1 पतरस 3:9 - मंडयाली नंऊँआं नियम

⁹ बुराई रे बदले बुराई मत करा; होर ना गाली रे बदले गाली देआ; पर आसरीवाद ई देआ; क्यूंकि परमेसरे तुस्से इधी कठे सादिरे ताकि तुस्से दूजेया जो आसीस दो, होर अगर तुस्से एह्ड़ा करहे ता परमेसरा भी तुस्सा जो आसीस देणी।

1 पतरस 3:9 Iomraidhean Croise

मत्ती 19:29

होर जेस केसिए घर-बार या भाई-बैहण या माऊ-बापू या बाल बच्चे या डोर्हीया मेरे चेले हूंणे रे नाते छाडी दितिरे, तिन्हा जो सौ गुणा मिलणा, होर तेस अनंत जिन्दगी रा अधिकारी हूंणां।

मत्ती 25:34

तेबे मां राजे आपणी ओरली वखा वाली किन्हें बोलणा, हे मेरे बापू रे धन्य लोको, आऊआ, तेस राज्या रे अधिकारी हुई जाऊआ, जो संसारा री सुर्हूआता ले तुस्सा रे कठे त्यार कितिरा।

मत्ती 5:39

पर हांऊँ तुस्सा किन्हें ये बोल्हा कि, बुरे माह्णुंआं रा साम्हणां देख्या करदे; पर अगर कोई तेरे मुंहा रे सीधी तरफ तुजो चांडा मारे, ता तेस वखा जो आपणे मुंहा रा दूजा पासा भी फेरी दे।

मत्ती 5:44

पर हांऊँ तुस्सा किन्हें ये बोल्हा कि, आपणे दुसमणा किन्हें प्यार रखा होर आपणे सताणे वाल़े रे कठे प्रार्थना करा।

मरकुस 10:17

जेबे यीसूए आपणे चेले साउगी यरुस्लेम वखा जो जाणे रे कठे आपणा सफर सुर्हू कितेया, ता एक माह्णुं तेस वाले दौड़ी किन्हें आया, होर तेसरे अगे घुटणे टेकी किन्हें तेस ले पूछेया? “हे खरे गुरु, अनंत जिन्दगी पाणे रे कठे हांऊँ क्या करूं?”

लूका 10:25

होर एक व्यवस्था स्खाणे वाल़ा यीसू वाले आया, होर ये बोली किन्हें तेसरी परखणी करदा लग्या कि, “हे गुरु, अनंत जिन्दगी पाणे रे कठे हांऊँ क्या करूं?”

लूका 18:18

केसी मुखिये यीसू ले पूछेया, हे खरे गुरु, अनंत जिन्दगी पाणे रे कठे हांऊँ क्या करूं?

रोमियो 12:14

आपणे सताणे वाले जो स्राप नी देआ पर आसरीवाद देआ।

रोमियो 12:17

बुराई रे बदले केसी किन्हें बुराई नी करा; जो गल्ला सभी लोका रे कठे खरी ई, तिन्हा गल्ला री फिकर करा।

रोमियो 8:28

होर आस्से जाणहां ऐं कि जो लोक परमेसरा किन्हें प्यार रख्हा ऐं, होर जो परमेसरा री इच्छा रे मताबक चुणिरे तिन्हारे कठे सब गल्ला मिली किन्हें भलाई पैदा करहा ई।

रोमियो 8:30

फेरी जिन्हा जो तिन्हें पैहले ले ठैहराया, तिन्हा जो चुणिरा भी आ, होर जिन्हों चुणिरा, परमेसरे स्यों आपणी नजरा मन्झ धर्मी माह्णुं भी बणाईरे, होर जिन्हों परमेसरे आपणी नजरा मन्झ धर्मी माह्णुं बणाईरा, तिन्हा जो आपणी महिमा रे साझीदार भी बणाया।

गलातियो 3:14

ये इधी कठे हुएया कि, जो आसीस परमेसरे अब्राहमा जो देणे रा वादा कितिरा, सेई आसीस मसीह यीसू साउगी एक हूंणे री वजहा ले गैर-यहूदी लोका जो भी मिले, ताकि मसीह पर विस्वासा रे ज्रीए आस्से पवित्र आत्मा जो पाई ले, जेस जो देणे रा वादा परमेसरे आस्सा किन्हें कितिरा था।

इफिसियो 4:32

एता रे बजाय एक दूजे पर दया होर करुणा करणे वाले बणा। क्यूंकि परमेसरे मसीह साउगी एक हूंणे री वजहा ले तुस्सा रे पाप माफ किते, इधी कठे तुस्से भी एक दूजे जो माफ करा।

1 थिस्सलुनकियो 5:15

येह ध्यान रखा कि कोई केसी किन्हें बुराई रे बदले बुराई नी करहे, पर हमेसा सब लोका किन्हें होर एक दूजे किन्हें भलाई करणे रा जतन करहा।

इब्रानियो 12:17

तुस्से ता जाणहां ऐं कि, बादा मन्झ जेबे तिन्हें बापू री आसीस पाणी चाही ता से तेजो नी मिली, होर रोई-रोई किन्हें आसिसा जो दबारा मांगणे पर भी तेजो आपणी गलती सुधारणे रा मौका नी मिल्या।

इब्रानियो 6:14

“मां सच्चमुच तुजो बौह्त आसीस देणी, होर मां तुजो बौह्त बंस देणे।”

1 पतरस 5:10

होर ऐबे परमेसर जो अनुग्रहा ले भरिरा आ, होर जिन्हें यीसू मसीह साउगी जुड़े रैहणे री वजहा ले आस्सा जो स्वर्गा मन्झ आपणी अनंत महिमा मन्झ साझी हूंणे रे कठे सादीरा, तुस्सा रे थोह्ड़ी देरा तक दुःख उठाणे ले बाद तेस आपु ई तुस्से खरे बनाणे, ताकि तुस्सा मन्झ कोई गलती नी हो होर तेस तुस्सा रे दिल मजबूत करणे, होर तेस तुस्से सामर्थी बणाई देणे ताकि तुस्सा रा विस्वास कमजोर नी हो।