1 पतरस 3:1 - मंडयाली नंऊँआं नियम

^1-2 हे लाड़ियो, तुस्से भी आपणे-आपणे लाड़े रे अधीन रैहया। इधी कठे कि अगर तिन्हा मन्झा ले कुछ परमेसरा पर विस्वास करणे वाले नी हो, ता तिन्हा तुस्सा रे कुछ बोले बगैर तुस्सा री जिन्दगी जो देखी किन्हें विस्वास करणा। जेबे तिन्हा देखणा कि किहाँ तुस्से परमेसरा री इज्जत करहे, होर पवित्र जिन्दगी जीए, तिन्हा मसीह पर विस्वास करणा।

1 पतरस 3:1 Iomraidhean Croise

मत्ती 18:15

“अगर तेरा विस्वासी भाई तेरे बरखलाफ गुनाह करहे, ता जा होर कल्हे जे गलबात करी किन्हें तेस जो समझाई दे; अगर से तेरी सुणी किन्हें आपणे पापा जो मनी ले ता तैं आपणा भाई वापस जीती लेया।

रोमियो 10:16

पर सभीए तेस खुसी री खबरा पर विस्वास नी कितेया। यसायाह नबी बोल्हा कि, “हे प्रभु, आस्सा री खबरा पर केसिए विस्वास नी कितेया।”

रोमियो 6:17

तुस्सा री पुराणी जिन्दगी मन्झ तुस्से पापा रे गुलाम थे, पर ऐबे तुस्से पुरे मना किन्हें मसीह रे बारे मन्झ तिन्हा उपदेसा जो मन्नदे लगिरे जो तुस्सा जो स्खाईरे थे। इधी कठे हांऊँ परमेसरा रा धन्यावाद करहा।

रोमियो 7:2

उदाहरणा रे कठे बिधि रे मताबक एक जन्नानी आपणे लाड़े किन्हें जिन्दे जी तेस किन्हें बझीरी। पर जेबे तेस्सा रा लाड़ा मरी जां, ता से केसी होरी किन्हें ब्याह करणे रे कठे अजाद ई। हालांकि अगर लाड़े रे जिन्दे जी से केसी दूजे माह्णुं वाले चली जाईं, ता तेस्सा जो व्यभिचारणी बोल्या जां।

1 कुरिन्थियो 11:3

पर एक गल ई जो हांऊँ चाहां कि तुस्से ये जाणी लो: कि हर एक मर्धा रा मूंड मसीह आ, होर एक लाड़ीया रा मूंड लाड़ा, होर मसीह रा मूंड परमेसर आ।

1 कुरिन्थियो 14:34

ज्नाने कलीसिया मन्झ चुप रहे, क्यूंकि तिन्हा जो ज्यादा गल्ला करणे री इज्जाजत नी ई। जेहड़ा व्यवस्था मन्झ लिखिरा भी आ।

1 कुरिन्थियो 7:16

हे लाड़ियो तुस्से पक्का याद रखा कि तुस्सा री वजहा ले तुस्सा रे लाड़े री जिन्दगी बदली सकां ई। या हे लाड़ेयो तुस्से याद रखा कि तुस्सा री वजहा ले तुस्सा री लाड़ीया री जिन्दगी बदली सकां ई।

इफिसियो 5:33

पर ये गल तुस्सा जो भी लागू हुईं कि, तुस्सा मन्झा ले हर एक आपणी लाड़ी किन्हें आपणे साहीं प्यार करहा, होर लाड़ी भी आपणे लाड़े री इज्जत करहे।

कुलुस्सियो 3:18

हे लाड़ीयो, तुस्से आपणे-आपणे लाड़े रे अधीन रैहया, क्यूंकि एह्ड़ा करणा ही प्रभु रे लोका जो खरा लघ्हा।

कुलुस्सियो 4:5

हर एक मौके रा खरा फायदा लेई किन्हें प्रभु यीसू पर विस्वास ना करणे वाले साउगी बड़ी समझदारी किन्हें व्यवहार करहा।

2 थिस्सलुनकियो 1:8

होर जो परमेसरा जो नी जाणदे, होर आस्सा रे प्रभु यीसू मसीह रे बारे मन्झ खुसी री खबरा जो नी मन्नदे, तेस तिन्हा जो सजा देणी।

इब्रानियो 11:8

विस्वास करणे री वजहा ले ई अब्राहमा जो परमेसरे एक एह्ड़ी जगहा जाणे रे कठे सादेया जो जगहा बादा मन्झ तेस जो विरासता मन्झ परमेसर देणे वाल़ा था। होर से ये नी जाणदा था कि हांऊँ केथी जाया करहा, फेरी भी परमेसरा रा हुक्म मन्नी किन्हें से तेस देसा जो चली गया।

इब्रानियो 5:9

होर सिद्ध बणने पर, तेसरे हुक्म मनणे वाले सभ लोका रे कठे से जुग-जुग रे कठे उद्धारा री वजहा बणी गया।

1 पतरस 1:22

सच्चा जो मनणे री वजहा ले ही तुस्से आपणे पापा ले सुद्ध किती गईरे। इधी कठे ऐबे आपणे विस्वासी भाई बैहणा किन्हें गहरा होर पुरे दिला किन्हें प्यार करदे रैहया।

1 पतरस 3:7

तिहां ईं हे लाड़ेयो, तुस्से भी आपणी-आपणी लाड़ीया साउगी बड़ी समझदारी किन्हें जिन्दगी बिताऊआ। याद रखा की स्यों तुस्सा ले कमजोर ईं, इधी कठे तिन्हारी इज्जत करा, क्यूंकि तुस्से दुहें तेस अनंत जिन्दगी रे दान रे साझीदार हो, जो परमेसरे बड़े अनुग्रहा किन्हें दितिरा। एह्ड़ा इधी कठे करहा की जेबे तुस्से दुहें प्रार्थना करहे ता परमेसर तुस्सा री सुणी ले।

1 पतरस 4:17

परमेसरा रा न्याय करणे रा टैम आई गईरा, पैहले आस्सा विस्वासी लोका रा न्याय हूंणा। जेब्की परमेसरा पैहले आस्सा विस्वासी लोका रा न्याय करणा ता तिन्हा लोका पर आऊणें वाली खरतनाक गल्ला रे बारे मन्झ सोचा, जो परमेसरा री दितिरी खुसी री खबरा जो नी मन्नदे।