1 पतरस 2:8 - मंडयाली नंऊँआं नियम

⁸ होर फेरी पवित्र सास्त्रा मन्झ ये भी लिखिरा कि, “से एह्ड़ा पात्थर आ, जेता ले लोका जो ठेस लगी, होर एह्ड़ी चट्टान ई की जेता ले स्यों ठोकर खाएं,” क्यूंकि स्यों लोक परमेसरा रे बचना जो नी मनणे रे कठे ठोकर खाहें, होर परमेसरे ये नियुक्त कितिरा था कि तिन्हा किन्हें एह्ड़ा ही हूंणा।

1 पतरस 2:8 Iomraidhean Croise

लूका 2:34

तेबे समौने तिन्हा जो आसरीवाद देई किन्हें, तेसरी माऊ मरियमा किन्हें बोल्या, “सुण, एस बच्चे रे बारे मन्झ पैहले ले ई तय करी दितिरा कि एसरे ज्रीए कई इस्राएल देसा रे लोका परमेसरा ले दूर हुई जाणा। होर कईया परमेसरा वाले वापस आई जाणा, होर एस लोका जो चतन्न करणे वाल़े साहीं हूंणां होर कई एसरे बरखलाफ हूणें।

रोमियो 9:22

एह्ड़ा ही परमेसरे आस्सा साउगी भी कितिरा। से आपणा गुस्सा दसणे चांहां था होर आपणी सामर्थ जाहिर करणा चांहां था। से तिन्हा जो बड़े धीरज रखी किन्हें सैहां था, जिन्हा पर तेसरा गुस्सा जाहिर हूंणे वाल़ा था, होर जो विनास हूंणे रे लायक थे।

1 कुरिन्थियो 1:23

पर आस्से ता क्रूसा प्रयाल्हे आस्सा रे पापा री माफी रे कठे मरिरे मसीहा रा प्रचार करहा ऐं जो यहूदी लोका रे कठे ठोकरा रा कारण आ, होर अन्यजाति लोका रे कठे भी नर्क्कली गल ई।

2 कुरिन्थियो 2:16

ये खुसबू नास हूणें वाले लोका जो मरणे रे कठे मौता री मुस्क ई, होर उद्धार पाणे वाले लोका रे कठे जीवना देणे रे कठे जिन्दगी री खुसबू ई। होर सच्चे कोई भी आपणे आपा ले एस खुसबू जो फैलाणे रे लायक नी आ।

गलातियो 5:11

पर हे भाईयो होर बैहणो, हांऊँ प्रचार करी करहा कि खतने कुराणे री जरूरत नी, जो की यहूदी व्यवस्था रे बरखलाफ आ, होर इधी कठे यहूदी लोक मुंजो ऐबे तक स्ताया करहे। ता अगर हांऊँ क्रूसा रे बजाय लोका जो खतने कुराणे रे बारे मन्झ प्रचार करदा, ता यहूदी लोक मेरे ले नराज नी हुंदे।

1 थिस्सलुनकियो 5:9

क्यूंकि परमेसरे आस्सा जो गुस्से मन्झ सजा देणे रे कठे नी चुणिरा, पर इधी कठे चुणिरा, ताकि आस्से आपणे प्रभु यीसू मसीह रे ज्रीए उद्धार पाए।

1 पतरस 2:6

ये तेह्ड़ा ही आ जेहड़ा पवित्र सास्त्रा मन्झ भी लिखिरा कि परमेसर बोल्हा, “हांऊँ सिय्योन सैहरा मन्झ एक कोणे रा पात्थर रख्या करहा, जो कीमती आ होर चुणिरा आ, एता पर जो विस्वास करघा तेस कधी भी सर्मिन्दा नी हूंणां।”

1 पतरस 2:7

इधी कठे तुस्से जे मसीह यीसू पर विस्वास करहे ये विस्वासी लोका रे कठे कीमती पात्थर आ। पर विस्वास नी करणे वाले लोका रे कठे पवित्र सास्त्रा मन्झ लिखिरा कि, “से पात्थर जेस जो राज मिस्त्रिये बेकार जाणेया था सेई पात्थर कोणे रा पात्थर बणी गया।”

2 पतरस 2:3

एह्ड़े स्खाणे वाले लोक लालची हूंणे, होर मन घड़न्त कहाणीया बणाई किन्हें पैसा कमाणे रे कठे तुस्सा जो धोखा देणा। परमेसरे बौह्त पैहले ले ही इन्हों सजा देणे रा फैसला कितिरा था। होर ऐबे से करणे रे कठे त्यार आ, तेस सच्चे स्यों नास करी देणे।

यहूदा 1:4

क्यूंकि यीसू मसीह पर विस्वास करणे रा ढोंग करणे वाले कुछ लोक तुस्सा री कलीसिया किन्हें जुड़ी गईरे। ये परमेसरा री इज्जत नी करदे होर गलत उपदेस दें कि आस्से लुचपन करी सके, क्यूंकि परमेसर आस्सा रे पाप माफ करी देआ। स्यों प्रभु यीसू मसीहा रा इनकार करहा ऐं जो आस्सा रा एक ऐं प्रभु होर माल्क आ। बौह्त टैम पैहले पवित्र सास्त्रा मन्झ लिखिरा था कि परमेसर आस्सो सजा देआ।