1 पतरस 1:5 - मंडयाली नंऊँआं नियम

⁵ परमेसरा आपणी सामर्था ले तुस्सा री हिफाजत करहा, क्यूंकि तुस्से मसीह यीसू पर भरोसा रखे, होर मसीह रे वापस आऊणें रे आखरी ध्याड़े तक तेस तुस्सा री हिफाजत करदे रैहणा। तेबे तुस्सा जाणी लेणा कि परमेसरे तुस्से पाप होर मौता दुहीं ले पूरी तरहा बचाई लितिरे।

1 पतरस 1:5 Iomraidhean Croise

यहून्ना 12:48

जो मुंजो बेकार जाणहां होर मेरी गल्ला नी मन्नदा, मेरे बोलिरे सच्चे बचना से दोसी ठैहराणा होर एस बचना आखरी ध्याड़े तेसरा न्याय करणा।

यहून्ना 17:15

हांऊँ ऐं प्रार्थना नी करदा कि, तू तिन्हा जो संसारा ले लग करी दे, पर ये भी कि तू तिन्हा जो तेस दुस्ट सैताना ले तिन्हारी हिफाजत कर।

यहून्ना 4:14

पर जो कोई तेस पाणी मन्झा ले पिंघा जो मां तेस जो देणा, तेस फेरी कधी भी सोखे नी हूंणां: पर जो पाणी मां तेस जो देणा, तेस तेता मन्झ एक सोता बणी जाणा जेस अनंत जिन्दगी रे कठे मुट्दे रैंह्णां।”

यहून्ना 5:24

“हांऊँ तुस्सा किन्हें सच्च -सच्च बोल्हा, जो मेरे बचन सुणी किन्हें मेरे भेजणे वाल़ेया रा विस्वास करहा, अनंत जिन्दगी तेसरी ई, होर तेस पर सजा रा हुक्म नी हुन्दा पर से मौता ले पार हुई किन्हें नौंईं जिन्दगी पाई चुकिरा।

रोमियो 11:20

ये सच्च आ, स्यों ता विस्वास नी करणे री वजहा ले तोड़ी गई, पर तू आपणे विस्वासा री वजहा ले बणी रैंहयां पर बडयाई देख्या करदा, पर एस गल्ला ले डर तेरे किन्हें क्या हुई सक्हा था।

रोमियो 8:18

मुंजो पक्का पता कि, जो एस टैम जो दुःख आस्से सहन करहे स्यों तेस महिमा रे साम्हणें कुछ भी नी ऐं, जो परमेसर आस्सा जो देणे वाल़ा आ।

1 कुरिन्थियो 1:21

क्यूंकि जेबे परमेसरे आपणे ज्ञाना रे मताबक देखेया कि संसारा रे लोक आपणे ज्ञाना रे ज्रीए तेस जो कधी नी जाणी सकदे, ता परमेसरा जो ये ठीक लग्या कि आस्सा री खुसी री खबरा जो प्रचार करणे रे ज्रीए विस्वास करणे वाले लोका रा उद्धार करहे, भले ही कुछ लोका जो ये गल नर्क्कली लगाई।

2 कुरिन्थियो 1:24

एता रा मतलब ये नी कि, आस्से तुस्सा पर एस गल्ला रा हक जताया करहे कि तुस्सा जो केस गल्ला पर विस्वास करणा चहिए। क्यूंकि तुस्से आपणे ही विस्वासा रे ज्रीए मजबूत बणिरे, होर आस्से तुस्सा री ही खुसी रे कठे तुस्सा साउगी काम करणा चाहें।

गलातियो 2:20

ये एह्ड़ा था जिहां हांऊँ मसीह साउगी तेसरे क्रूसा प्रयाल्हे मरी गया, हांऊँ से नी आ जो ऐबे भी जिउंदा, पर मसीह मेरे मन्झ जिउंदा। होर जेस तरहा ले ऐबे हांऊँ जिउंदा, ता सिर्फ परमेसर रे मह्ठे पर विस्वास करणे रे ज्रीए जिउंदा, जिन्हें मेरे किन्हें इतना प्यार कितेया कि तिन्हें आपणी जान मेरे कठे देई दिती।

इफिसियो 2:8

क्यूंकि विस्वासा रे ज्रीए परमेसरा रे अनुग्रह ले ई तुस्सा रा उद्धार हुईरा, होर तुस्सा रा उद्धार तुस्सा री वजहा ले नी हुआ, पर ये परमेसरा रा दान आ।

इफिसियो 3:17

जेता ले तुस्से मसीह पर विस्वास करी सको होर मसीह तुस्सा रे दिला मन्झ वास करी सके। हांऊँ प्रार्थना करहा कि परमेसरा रे कठे होर एक दूजे कठे तुस्सा रा प्यार, तुस्सा जो मजबूत बणाई रखे ताकि तुस्से पई नी जाओ।

फिलिप्पियो 1:6

होर मुंजो एस गल्ला रा भरोसा आ कि, जेस परमेसरे तुस्सा मन्झ खरा काम सुर्हू कितिरा, तेस ई से काम यीसू मसीह रे दबारा वापस आऊणें रे ध्याड़े तक पूरा करणा।

फिलिप्पियो 4:7

तेबे सांति देणे वाले परमेसरा, जो माह्णुंआं री समझा ले बाहर आ, तुस्सा रे दिलो होर तुस्सा रे विचारा जो मसीह यीसू मन्झ सुरक्षित रखणा।

2 तिमिथियुस 3:15

होर जेबे तू एक बच्चा ई था ता तैं पवित्र सास्त्रा जो सिख्या, जो तुस्सा री एस गल्ला जो समझणे मन्झ मदद करहा कि, जेबे तुस्से मसीह यीसू पर विस्वास करहे, ता परमेसर तुस्सा रा उद्धार करहा।

तितुस 2:13

आस्से एह्ड़ा ही करदे रहे जेबे कि आस्से आपणे म्हान परमेसर होर उद्धारकर्ता यीसू मसीह जो आपणी महिमा साउगी एस संसारा मन्झ वापस आऊणें री आस करदे लगिरे।

इब्रानियो 9:28

तिहां ईं मसीह भी कई लोका रे पाप माफ करणे रे कठे एक ई बारी बलिदान हुआ। पर जेबे तेस दबारा एस धरती पर आऊंणा, ता तेस पाप माफ करणे रे कठे नी, पर तिन्हा लोका जो उद्धारा करणे रे कठे आऊंणा, जो तेस जो न्हायल्दे लगिरे।

1 पतरस 1:13

एस वजहा ले आपणा-आपणा मन त्यार करा, जिहां लोक आपणी कमर कस्सी किन्हें काम करणे रे कठे त्यार हुंहाँ ऐं। चतन्न रहूआ की तुस्से क्या सोच्हे होर एह्ड़ा करणे ले तुस्से आपणे जिन्दगी एस आसा किन्हें जीये कि जेस ध्याड़े प्रभु यीसू मसीहा स्वर्गा ले वापस आऊंणा, तेस ध्याड़े परमेसरा तुस्सा जो आपणे अनुग्रहा रे ज्रीए उद्धारा रा दान देणा।

1 पतरस 4:13

पर जिहां-जिहां तुस्से मसीह रे दुःखा मन्झ साझी हुंहाँ ऐं, खुसी मनाऊआ। एस वजहा ले जेबे मसीहा लोका पर आपणी महिमा जाहिर करदे आऊंणा, तेबे तुस्सा बौह्त ज्यादा खुस हूंणा।

1 पतरस 5:1

एक होर गल ई जो हांऊँ तुस्सा लोका किन्हें यानि कलीसिया रे अगुवे किन्हें बोलणा चाहां, क्यूंकि हांऊँ भी तिन्हा साहीं एक कलीसिया रा अगुवा। मैं आपु स्यों दुःख देखिरे जो मसीहे बौह्त पैहले काटीरे। जेबे तेस दबारा वापस आऊंणा मां तेसरी महिमा रा भी साझीदार बणना। तुस्सा साहीं अगुवा हूंणे रे नाते हांऊँ तुस्सा किन्हें अर्ज करहा,

2 पतरस 1:3

परमेसरे आपणी सामर्था रे ज्रीए आस्सा जो से सब कुछ देई दितिरा, जेसरे ज्रीए आस्से सच्ची भक्ति री जिन्दगी जी सका ऐं। ये इधी कठे हुईरा की क्यूंकि आस्से परमेसरा जो जाणहां ऐं, होर तिन्हें ही आस्से आपणी खराई होर महिमा री वजहा ले आपणे लोक हूंणे रे कठे सादीरे।

1 यहून्ना 3:2

हे लाडले भाईयो होर बैहणो, ऐबे आस्से परमेसरा री बच्चे ऐं, होर हल्ली तक आस्सा जो नी पता कि आस्सा आगे क्या बणना! जो भी हो आस्से ये जाणहां ऐं कि, मसीह रे दबारा वापस आऊणें पर आस्सा भी तेस साहीं हूंणां, क्यूंकि जेह्ड़ा से आ, आस्सा से तेह्ड़ा ई देखणा।

यहूदा 1:1

हांऊँ यहूदा एस चिठ्ठी जो लिखी करहा। हांऊँ यीसू मसीहा रा सेऊआदार होर याकूबा रा छोटा भाई आ। परमेसरे जिन्हा लोका जो आपणे गास विस्वास करणे रे कठे सादिरे, हांऊँ तिन्हा लोका जो ये चिठ्ठी लिखी करहा। बापू परमेसर तुस्सा किन्हें प्यार करहा होर यीसू मसीहा रे ज्रीए तुस्से सुरक्षित ऐं।

यहूदा 1:24

एक ही परमेसर आ जो तुस्सा जो पऊणे ले बचाई सक्हा, होर जेबे तेस आपणी महिमा मन्झ तुस्से आपणे साम्हणें लेई आऊणें, तेबे से तुस्सा जो मगन होर बेकसूर रखी सक्हा। तिन्हें आस्सा रे, प्रभु यीसू मसीह रे ज्रीए आस्से बचाई लितिरे। सनातन काल ले लेई किन्हें महिमा, बड़ाई, होर गौरव, तेसरा था होर ऐबे भी तेसरा, होर जुग-जुग तेसरा ही रेहणा। आमीन।