1 यहून्ना 2:3 - मंडयाली नंऊँआं नियम

³ अगर आस्से परमेसरा रे हुक्मा जो मन्नघे, ता एस गल्ला ले आस्सा जो पता लगा कि आस्से तेस जो जाणहां ऐं।

1 यहून्ना 2:3 Iomraidhean Croise

लूका 6:46

“जेबे तुस्से मेरा ग्लाईरा नी मन्नदे, ता तुस्से मुंजो हे प्रभु, हे प्रभु किधियो बोल्हा ऐं?

यहून्ना 14:15

“अगर तुस्से मेरे किन्हें प्यार रख्हा ऐं, ता तुस्सा मेरे हुक्म मनणें।

यहून्ना 15:10

अगर तुस्से मेरे हुक्मा जो मनघे, ता तुस्सा मेरे प्यारा मन्झ बणी किन्हें रैंह्णां। जिहां मैं आपणे बापू रा हुक्म मन्या, होर तेसरे प्यारा मन्झ बणी रैंहयां।

यहून्ना 15:14

जो कुछ हांऊँ तुस्सा जो हुक्म देहां, अगर तेह्ड़ा ई करघे ता तुस्से मेरे दोस्त ऐं।

यहून्ना 17:3

होर अनंत जिन्दगी येई कि, स्यों तुजो एकमात्र सच्चे परमेसरे होर यीसू मसीहा जो जाणी सको, जेस जो तैं भेजिरा।

2 कुरिन्थियो 4:6

इधी कठे परमेसरे बोल्या कि, “नह्यारे मन्झा ले प्रयासा चमके,” होर सेई परमेसर समझ रूपी चमका जो आस्सा रे दिला चमका आ, ताकि आस्से यीसू मसीह मन्झ परमेसरा री महिमा जो देखी सके।

इब्रानियो 5:9

होर सिद्ध बणने पर, तेसरे हुक्म मनणे वाले सभ लोका रे कठे से जुग-जुग रे कठे उद्धारा री वजहा बणी गया।

1 यहून्ना 2:13

हे बडे बजुर्गो, हांऊँ तुस्सा जो इधी कठे लिख्या करहा कि, जो सुर्हू ले आ, तुस्से तेस जो जाणहां ऐं; हे जुआनो हांऊँ तुस्सा जो इधी कठे लिख्हा कि, तुस्से तेस दुस्ट सैताना पर जीत पाई लईरी; हे बच्चेयो, मैं तुस्सा जो इधी कठे लिखिरा कि, तुस्से बापू परमेसरा जो जाणी लईरा।

1 यहून्ना 3:14

आस्से जाणहां ऐं कि, आस्से मौता ले पार हुई किन्हें अनंत जिन्दगी मन्झ आई पुज्ही रे; क्यूंकि आस्से भाई होर बैहणा किन्हें प्यार रख्हा ऐं, जो प्यार नी रख्दे, से मौता री दसा मन्झ रैंहयां ऐं।

1 यहून्ना 3:19

जेबे आस्से दूजेया किन्हें प्यार करघे ता आस्सा जाणी लैणा कि आस्से सच्चाई रे ऐं; होर अगर बुरे कामा री वजहा ले भी आस्सा री अंतरात्मा परमेसरा रे साम्हणें आस्सो दोसी बणाहां, ता भी आस्से हिम्मता किन्हें परमेसरा रे साम्हणें जाई सक्हा ऐं, क्यूंकि आस्से जाणांहे कि परमेसर आस्सा री अंतरात्मा ले बडा आ होर से सभ कुछ जाणहां।

1 यहून्ना 3:6

जो कोई मसीह मन्झ वास करहा ऐं, से बार-बार पाप नी करदा रैहन्दा; जो कोई पाप करहा, तिन्हें ना ता मसीह देखिरा, होर ना जाणिरा।

1 यहून्ना 4:13

एता ले आस्से जाणहां ऐं कि, आस्से परमेसरा मन्झ वास करहा ऐं, होर से आस्सा मन्झ वास करहा; क्यूंकि परमेसरे आपणी पवित्र आत्मा मन्झा ले आस्सा जो दितिरा।

1 यहून्ना 4:7

हे लाडले भाईयो होर बैहणो, आस्से आपु मन्झ प्यार रखे, क्यूंकि प्यार परमेसरा ले आ; होर जो कोई एक दूजेया किन्हें प्यार करहा, से परमेसरा रे बच्चे ऐं; होर परमेसरा जो जाणहां।

1 यहून्ना 5:19

आस्से जाणहां ऐं कि, आस्से परमेसरा रे ऐं, होर सारा संसार तेस दुस्ट सैताना रे कब्जे मन्झ आ।

1 यहून्ना 5:2

जेबे आस्से परमेसरा किन्हें प्यार करहा ऐं, होर तेसरे हुक्मा जो मन्हां ऐं, ता एता ले ई आस्से जाणी लैहां ऐं कि आस्से परमेसरा रे बच्चेया किन्हें प्यार करहा ऐं।

1 यहून्ना 5:3

जो आस्सा रा प्यार परमेसरा किन्हें ये आ, होर से एता मन्झ आ कि आस्से तेसरे हुक्म मन्हें; होर तेसरे हुक्म मन्ना कठण नी ऐं।

प्रकासना री गल्ला 12:17

होर एस वजहा ले अजगर तेस्सा ज्नाने पर गुस्सा हुआ, होर तेस जन्नाने रे बाकि संताना साउगी युद्ध करणे जो निकल्या, यानि तिन्हा लोका साउगी जो परमेसरा रे हुक्म मन्हां ऐं, होर जो लोक यीसू री प्रभु हूंणे री गुआही दे।

प्रकासना री गल्ला 14:12

क्यूंकि ये सारी गल्ला हूंणे वाली, इधी कठे परमेसरा रे पवित्र लोका जो धीरज रखणा चहिए। ये स्यों लोक ऐं जो परमेसरा रे हुक्मा जो मन्हां ऐं, होर यीसू मसीह पर विस्वास रख्हा ऐं।

प्रकासना री गल्ला 22:14

धन्य ऐं स्यों, जो आपणे कपड़े धोई लैहां ऐं, क्यूंकि तिन्हा जो दुराजे ले हुई किन्हें सैहरा मन्झ दाखल हूंणे रा हक मिलणा। होर तिन्हा जो जिन्दगी देणे वाले डाला ले फल खाणे रा भी हक मिलणा।