Yosua 9:1 - Ma Jou ai Demo-demo o Totobelohoka

¹ De ma oraha gea naga o kokoano yamuruono naga abe yahipareta manga nyawa homoi-homoiika o Yorodani ma akere ma honongaka abe o wange ma hiwariha idateke. De ona abe yomahikoano onangika naga o Hete ma nyawa de o Amori ma nyawa de o Kanani ma nyawa de o Ferisi ma nyawa de o Hewi ma nyawa de o Yebusi ma nyawa. De manga tonaka gea naga utu yomanoa o loku-lokuoka, de utu yogogere o loku-loku ma timiuku, de utuoli yogogere o Gogoronaka ma gahi ma ngigorino abe ka hiadono dau o Libanono ma loku-lokuku. De ma kokoano mata-mata gea yoihene ma abari abe ma titi o Isiraele ma nyawa duru yahikalaka o Yeriko de o Ai ma nyawa gea.

Yosua 9:1 Iomraidhean Croise

Huhupu 23:23

De ahi malaekata gea una winihihira-hira de winiao o tonakika gea abe ma oraha naa yonyawaika de o Amori ma nyawa, de o Hete ma nyawa, de o Ferisi ma nyawa, de o Kanani ma nyawa, de o Hewi ma nyawa, de o Yebusi ma nyawa, masara ona mata-mataika ahao takokiofioka o tonakoka gea.”

Huhupu 23:31

“De Ngohi ahao nia tonaka ma batingi tohititi o Bongo-bongo ma gahioka. Genangoka de imulaenge itagi hiadono ma batingi itubuku doka o Filistina ma nyawa manga gahika. De nia batingi ihititi o Bongo-bongo ma gahioka imulaengoli itagi o tonaka ma kakaahaika de ihidehepi ka hiadono o Efaraata ma akerika itubuku. Ho ma tonaka gea abe Ngohi tabatingoka ahao ika-ika de ma nyawa genangoka tahikokihupu mata-mataika. Ho ma oraha nia gogere niawoata de genangoka ahao ona tahihupu.

Huhupu 3:17

De naa tinihibehehongo nginika ahao Ngohi tinihihupu nia kangelaino o Mesiiri ma tonakoka de tiniao o tonaka moiikali abe ma joro duru ikutufuru genangoka ho duru kohaamoko ma hasili. Ona abe yogogerika ma tonakoka gea o Kanani ma nyawa, de o Hete ma nyawa, de o Amori ma nyawa, de o Ferisi ma nyawa, de o Hewi ma nyawa, de o Yebusi ma nyawa. Masara Ngohi tinihibehehongo ahao tinihigogere ma tonakoka gea.”’”

Huhupu 34:11

De gea ti ngini nia tagongo kiani nihihingounu Ngohino de nianiiki ahi behehongo mata-mataika abe tinihidoaka o wange naa. Abeika ahi duduhunu nginika, Ngohi ahao tahihupu ona mata-mata abe yogogere ma tonakoka gea abe Ngohi tinihidoaka. Ho ngaro o Amori ma nyawa, de o Kanani ma nyawa, de o Hete ma nyawa, de o Ferisi ma nyawa, de o Hewi ma nyawa, de o Yebusi ma nyawa ona mata-mataika ahao Ngohi tahihupu ma tonakino gea.

Gegetongo 13:29

De naga o Amaleke ma nyawa abe yogogerika o Negebe ma tonakoka de naga o nyawa utu manga gogere o tonaka abe de ma loku-lokuoka de ona o Hete ma nyawa, de o Yebusi ma nyawa, de o Amori ma nyawa. De ona abe yomahiromanga o Kanani ma nyawa manga gogere dai o tonakoka abe imakadateke o Gogorona ma Gahi de naga utu abe yogogere o Yorodani ma akere ma dolaka.” Hokogea manga hihawana ma hingahu ma demo.

Gegetongo 34:6

De ahao Ma Jou wihingahu unangika wato ahao manga tonaka ma batingi abe o wange ma dumuniha idateke, gea o Gogoronaka ma gahi.

Higalioli 1:7

Ho naa irahai la ibootohi nimahidodogumu naangoka ho koaho nisobo de nitagi-tagi o Amori ma nyawa manga tonakika abe naga ma loku ma ngoe genangoka. De naga ma tonaka utuoli abe kiani nitagi-tagi genangika, abe o Yorodani ma akere ma dola de ma tonaka abe itotoporono de ma loku-loku abe doka o Yorodani ma akere ma honongaka, de ma tonaka abe dakuiye idateke, de hiadono o Gogoronaka ma gahi ma ngigorika nimahiadono. Abe gea o Kanani ma nyawa manga tonaka de nagali o Libanono ma tonaka, de ka hiadono o Efaraata ma akere abe duru ma amoko ma akere gea.

Higalioli 3:25

De naa tomagahoko Ngona nohihigunoa la ngohioli ka idadi tomahihora o Yorodani ma akere gea de ngohioo ka idadi tamake ma tonaka ma rorahai gea abe doka ma honongaka, de ma tonaka abe naga ma loku-loku ma hohailoa, de o Libanono ma loku-loku gea.’ Hokogea ahi gogahoko Ma Jouika.”

Yosua 1:15

De ka ihikaika kiani niaduhunu nia gogianongoruika ka hiadono Ma Jou o Yawe wahidoaka o tonaka onangikali imaketero hoka nginioli winihidoakoka o hiaini ma tonaka nginika. De hokogea itiai angamoi ti ngini nia tonaka niamakeoka naangoka ho ka idadi niriidoka de nimatau nenangoka. De ma oraha adonoka o nyawa o Kanani ma tonakoka hahikalaka mata-mataika de ka idadi nia gogianongoruoo yomahitoonangoka manga tonaka abe Ma Jou o Yawe wahidoaka onangikaoo. Hokogea idadioka de ahao ti ngini nia nau-nauru abe yotobaduhu-duhunu o parangioka ka idadi yokokilio de yogogere o behehongo ma tonakoka nenanga abe o Yorodani ma akere ma honongaka naa abe idateke o wange ma hiwariha.” Hokogea o Yosua wahitararono manga dimo-dimonika ma titi manga tonaka ma hidoku ma hiaturu.

Yosua 1:4

De hokonaa tinihibatingi nia tonaka: daku o Negebe o tonaka ma kakaahaka de imahikauku ka hiadono dau o Libanono ma datekuku. De iloliti dinaiyeoli o wange ma hiwarino ka hiadono o Efaraata ma akere ma amoko abe enangoo ihidotadaene nia tonaka ma batingi. De ilolitoli imahikaoko hiadono dai o gahioko hiadono o Hete ma nyawa manga tonaka mata-mataika enangoo idadi ti ngini nia tonakoli.

Yosua 10:23

Ho o aruku ma goronaka de yaino yao o koano yamotoa gea, abe ona yahikoano manga kapongo o Yerusaleeme de o Heborono de o Yaramutu de o Lakisi de o Egono.

Yosua 11:17

Ho yahikala ipaha de ahao o Isiraele ma nyawa manga tonaka duru ihiwoatika de ihikurutika. Abe nako daku ma honongaiye manga tonaka ma batingi naga o Borongko ma loku-lokuoka abe itigi-tigino de o Edomo ma tonaka. De nako dau ma honongauku manga tonaka ma batingi naga o Baala-Gada ma kapongoka abe imanoa o Heremono ma loku ma timiuku de o Libanono ma dolaka. Abe ma tonaka gea mata-mata manga kokoano o Yosua wataokino de wahohonenge onangika.

Yosua 23:4

Abeika ngohi o tonaka nenanga tinihikodokuoka nginika abe ahao idadi ti ngini nia totoforauku manga oara ma tonaka ngaro ena gea o nyawa abe hahikalaka manga tonaka eko to ona manga tonaka abe ko hahikalauahi. Masara o tonaka mata-mata gea abe o Yorodani ma akere ma batingoka ka hiadono doka o Gogorona ma Gahika ena mata-mata idadioka ti ngini nia tonaka.

Yosua 24:11

“De ngini utu ka o ngofa-ngofakohi abe ma oraha o Yorodani ma akere ngini o Isiraele ma nyawa nimahihora ma honongaino ho niwohamoka o Kanani ma tonakino naa. De niboa o Yeriko ma kotaino de o Yeriko ma nyawa inilawana masara niahikalaka. De naga o nyawa utu manga ngoe iniparangi abe o Amori ma nyawa, o Ferisi ma nyawa, o Kanani ma nyawa, o Hete ma nyawa, o Giragasi ma nyawa, o Hewi ma nyawa, de o Yebusi ma nyawa. Ona mata-mata iniparangi la inihihupu o tonakino naa masara Ngohi Ma Jou tinihidoaka o lolaku ka hiadono niahikala ona mata-mataika.

Yosua 3:10

de una wato, “Ngini kiani nihikokioriki abe Ma Jou Wowango-wango Una naga wininiiki nia hidogoronaka de gea Una abe ahao o nyawa mata-mata abe yogogere o Kanani ma tonakoka wakiniiki hiadono manga tonaka idadiokali ti ngini nia tonaka. Ho ona o Kanani ma nyawa, de o Hete ma nyawa, de o Hewi ma nyawa, de o Ferisi ma nyawa, de o Giragasi ma nyawa, de o Amori ma nyawa, de o Yebusi ma nyawa ona mata-mata wakiniiki ma tonakino naa.

Yosua 3:17

De ma oraha ona mata-mata yomahihora de manga hohidemo yomaokoino dika o tonaka ma dodogowinoka o Yorodani ma dodobongino ma goronaka. De duru yomarii-riidoka dika genangoka ka hiadono o Isiraele ma nyawa yomamata yomahihora ma dudungika de ka hiadono ona mata-mata yomahikokiadonoka doka ma honongaika.

Yosua 5:1

Ho ka de o Amori ma nyawa manga koano mata-mataika yoihene o akere ka idadi idudungu ma ade-ade abe hokokia Ma Jou o Yawe wohidudungu o Yorodani ma akere de duru yohawana. Yoihene hokogea Ma Jou wodiai la waduhunu o Isiraele ma nyawa ma oraha yomahihora to ona manga honongaino ho duru manga modongo ilamoko o Isiraele ma nyawaika hiadono yofafara. De hokogenangoo o nyawa manga kokoano mata-mataika abe yogogere o Kanani ma tonakoka yamodongo ka hiadono onangoo abe yogogere dai o gahi ma ngigorino. Ho ona mata-mataika ko iwa manga domoroini la ka idadi yahimanga o Isiraele ma nyawaika la yalawana.

Yosua 6:27

Ho Ma Jou o Yawe naga ka ihikaika o Yosua winiiki. De o nyawa ma tonakoka gea ona mata-mataika iwihioriki o Yosua ma titi ai wowango ma datoro. Abe mata-mata una wodiaioka de wotemoka, gea o nyawa yomaketeade-ade hiadono duru ihikabarihi o tonaka ma amokika.

Yosua 9:7

De yoihene manga demo gea de yopaluhu yaleha o Hewi ma nyawaika ato, “Masara done sarakia homahiketehibehehongo de ngini, angamoi marai nia ngi tanu ko ikurutikaua. Abe nako nia tonaka ma digi-digino dika, ngomi ko idadiua o homahiketehibehehongo de ngini.”