Yosua 5:4 - Ma Jou ai Demo-demo o Totobelohoka

^4-6 De hokonaa ma titi hiadono o Yosua manga huhuna kiani wohiaturu. Abe ma oraha o Isiraele ma nyawa o Mesiiri ma tonaka ko yohupuahi de manga nau-nauru yomakokihunaka masara manga ngofa-ngofaka o nauru abe yomaboa manga dodagioka o tonaka ma kakaahaino ona ko yahunauahi. De o Isiraele ma nyawa manga dodagi manga taongo moruatino ma dekana hiadono manga nau-nauru mata-mataika abe ka idadi yososawaro o parangioka ma oraha yohupu, ona gea yokokihonengokau mangale ma titi ko iwihingounua Ma Jou o Yaweika. De hokogea kiani yohonenge de ahao manga gogianongoru ka idadi yowohama o Kanani ma tonakika abe duru ma dodihiraka wahibehehongo manga totoforaika wato o tonaka gea idadi to ona manga totoforauku manga tonaka abe genangoka ma joro duru ikutufuru ho kohangoe manga inomo genangoka. Masara to ona manga totofora abe yoluku yowohama o hibehehongo ma tonakika gea Ma Jou wato wahohowono onangika angamoi ko iwingakua Unangika ho ko yamakeuali manga hibehehongo ma tonaka gea.

Yosua 5:4 Iomraidhean Croise

Gegetongo 14:22

De Ngohi naa tagou-goungu, ona gea ko yowohamokaua o behehongo ma tonakika gea! Abe ona ihingamo Ngohino hiadono duru yoluku yowohama ma tonakika abe tahibehehongoka, ho ona gea ko moiua yowohama o tonakika gea abe yaolukoka! De ona gea ma dekanoka ihihioriki abe Ngohi naga ahi dararono ma goronaka de tomanoa nginioka. De to Ngohi ahi dodunguu onangoo yamake ahi heherangino abe ma oraha ka yogogerohi o Mesiiri ma tonakoka de ma oraha yotagi-tagi o tonaka ma kakaahaika naa. Masara ona ka ihikaika ihitaili Ngohino abe yoluku ihigihene ahi demoika. Igoungu manga totoforaika tahibehehongoka tato ma tonaka gea tahidoaka onangika masara ma oraha naa Ngohi tato ngaro de manga lako dika ma, ko yamakeokaua o behehongo ma tonaka gea. O nyawa moioo de ko iwa onangoka abe Ngohi ka tahigunoahi la yowohama o tonakika gea, angamoi ona gea ihiemono Ngohino. Ho naa ona ko yamakeuali.

1 Korintusu 10:5

De ngaro hokogea mia totofora mata-mataika yamakeoka ma owa kohangoe gea, masara Una ko wasanangiua ona abe yowoe-woeika ma titi ko iwa manga hingounu Unangika. De gea ma titi hiadono ona manga honenge Ma Jou watou-touniye o tonaka ma kakaahaka.

Higalioli 2:14

De abeika, nako haetongo ma oraha abe ma dihiraino o Kadese-Baraneaka hosobo de ino ino ino hiadono o Serede ma akere homahihora doka ma honongaika, gea aolomo nanga taongo moruange de tufange nanga dekana! De hokogea ma dekana ipahaikahi la ka idadi ngone o Isiraele ma nyawa nanga nau-nauru mata-mata yokokihonengohi. Abe ma dodihiraka de Ma Jou womahibehehongo wato ona abe yobaluhoka de ka idadi yoparangi, ona mata-mata kiani yohonenge ipaha de ahao ngone utu ka idadi howohama ma tonakika gea.

Higalioli 2:16

De ona mata-mata yopahaka de ahao

Yosua 5:3

Ho ka de hokogea Ma Jou o Yawe wihuloko de o Yosua wohiaturu la hiadono o huhuna ma gakana yawedono de yahuna manga nau-nauru. De ma ngi gea ihiromanga o Huhuna ma Kai ma Doomu abe nako to ona manga demo, o Gibea-Haaloto.