Yohanese 8:12 - Ma Jou ai Demo-demo o Totobelohoka

¹² De ahao o Yesusu wahingahuoli onangika abe naga genangoka wato, “Ngohi naa o dunia ma dararono abe o nyawa tahitararono manga wowango. Ho onagona dika ihiniiki Ngohi naa, ona ko yogila-gilakaua o fufutuika masara yamake manga wowango ma ngekomo abe duru de ma dararonoka.”

Yohanese 8:12 Iomraidhean Croise

Higiriiri 18:28

De igoungu abe Ngona o Yawe nodadioka hoka ahi hilo, ho ma fufutu abe ihihawoka Ngona nodiai la idadi itararonoka!

Yesaya 49:6

De naa Una Ma Jou o Yawe wotemo Ngohino wato, “Igoungu tonihitagongo la o Isiraele ma nyawa nahigilio la ona yokokilio Ngohino, masara ka genangua dika ani tagongo tonihidoaka. Abe nagali tonihitagongo la nodadi hoka o hilo ma dararono abe nahitararono ma gou-goungu o dunia ma nyawa mata-mataika, la ngaro o nyawa yomanoa o tonaka kohagurutika masara mata-mata ihioriki abe Ngohi ka idadi taduhunu ona manga howo-howonino.”

Yesaya 50:10

Ho nginioka onagona naga abe nia horomati itagi nanga Jou o Yaweika, de onagona naga abe niwigihene to Una ai Huhulokika? Abe nako nia hininga hokogea, ngaro niaohana o huha de o kangela nia wowangoka, de niamao o fufutuoka dika nigogere, masara ka idadi nimahinganono nanga Baluhu o Yawe ai romangika dika la Una winiduhunu. De koaho nimahidutuku dika nanga Jouika.

Yesaya 9:2

De Ngona Ma Jou nahidoaka la ona duru yososanangi, de manga gogarago duru idadi ilamoko. Abe ona ahao yomorene to Ngona ani himangoka imaketero hoka o nyawa yotobamorene o gugutuku ma gogiriaka, de yomakigimono imaketero hoka ona yolaku-laku ma oraha yodafongo manga hilaku ma utumu.

Maleaki 4:2

“Masara ngini onagona dika abe naga nia horomati de nia hingounu Ngohino, gea duru nimakohowono de ona abe tahohowono ma oraha gea. Abe ngini ahao nia wowango ma datoro ma totiai imahilaku nginioka hiadono duru nigogarago. De mangale ma titi nia datoro ma totiai ahao ka idadi inihitogumu nia kangelaino. Ho ma oraha gea de ngini ko niakunua niatumungu nia gogarago ho hiadono ka inihirarama nia garago gea. Abe ngini niamao nimaketero hoka o totaleo abe ihihupu ma kurungaka de aika ma homoaika la ihoho aika aino.

Matiusu 5:14

De o Yesusu wogila-gilali wadotoko onangika wato, “De ka idadi tinihiketero de moioli, abe ngini naa nimaketero abe hoka o dararono moi abe o dunia ma nyawa ka idadi yamake. Angamoi nia wowango ma datoro ma rorahaiino gea de niahimatoko o nyawaika Ma Jou ai totiai ma ngekomo la onangoo ka idadi yaniiki enangika. Ho ufa nia wowango ma rorahai niagogono o nyawaka dika angamoi done ko niahiutumua onangika. Angamoi ti ngini nia wowango duru imaketero hoka o kota moi abe o lokuoka imanoa de to ena ma hilo ma dararono duru itararono, abe gea duru ko idadiua imagogono la ufa o nyawa yamake ma kota gea. Ho gea nginioo ko idadiua nimagogono nia wowango o nyawa utuino.”

Lukasa 2:32

De o ngofaka naa wodadi o dararono o nyawaika. Abe ma titi Una wobaluhiyeoka de ahao wahimatoko Ma Jou ai hininga o nyawa mata-mataika. De gea ngaro ona ko o Isiraele ma nyawaikaua, ma onangikaoo wahitararono. Igoungu Una naa womaboa o Isiraele ma nyawaino, De mangale ma titi o nyawa ahao duru iwihoromati Unangika, Ho o nyawa manga horomati itagioo ngomino, Abe ngomi midadioka to Ngona ani nyawa, ho manga horomati itagi o Isiraele ma nyawaino naa.” Hokogea o Simeono ai higiriiri ma demo Ma Jouika.

Yohanese 12:35

De ahao o Yesusu wapaluhu onangika wato, “O dararono ko itedekanokaua naga nginioka. Ho ma oraha naa kiani niagurokahi la nitagi-tagi o dararonoka abe ma oraha ena gea nagahi nginioka, done ma oraha o fufutu iboa de inihidufutuokahi. Angamoi o nyawa abe o fufutuoka yotagi-tagi ko yomahiorikua o kiaika dika yoiki.

Yohanese 12:36

Ho kiani ningaku o dararonika ma oraha nagahi nginioka la gea nidadioka o dararono ma nyawa.” Ka de hokogea o Yesusu wotemo ibooto de woikoka de ahao womagogonoka ho ko iwimakeokaua.

Yohanese 12:46

Ngohi toboa o duniauku naa hoka o dararono abe o nyawa tahitararono la onagona dika ihingakuoka, ona gea ko yomanoakaua o fufutuoka.”

Yohanese 14:6

De o Yesusu womahingahu onangika wato, “Ngohi naa ma ngekomo Ma Jouika, de Ngohioka ma titi ma gou-goungu, de Ngohioo o wowango ma ngango ma titi. Ho ko moiua yoboa ahi Babaiye nako ko Ngohinoua yoboa.

Yohanese 3:19

Hokonaa ma titi manga hohowono gea: angamoi o dararono ma gou-goungu Ma Jouino iboakau o duniauku, masara o nyawa nako o dararono de o fufutu ka o fufutuohi yoigo mangale gea ona yodiaioka itorou.”

Yohanese 7:17

De ngini ka idadi nihioriki ahi dodotoko Ma Jouoka de aino. Angamoi ngaro onagona dika ma nako yairiki la ato yaniiki to Ma Jou ai hininga, gea ka de yoihene ma titi abe tadotoko onangika de ihioriki gea Ma Jouino dika de ma dodotoko gea ko Ngohinoua dika ma titi.”

Yohanese 9:5

De Ngohi naa o dunia ma dararono ho ma oraha Ngohi togogerohi o duniaka naa, o nyawa ka tahitararonohi manga wowangoka.”

Hidingoto 13:47

De gea tanu duru imakiniiki de Ma Jou ai behehongo ma dodihiraino abe Una wohuloko ngomino wato, ‘Ngohi naa tonihidadi o hilo la ka idadi ona ko o Yahudi ma nyawaua ihihioriki ma titi Ngohi, Abe ma titi ngonaino de o duduhunu ma abari ka idadi itagi o dunia ma ngi mata-mataika ngaro duru kohagurutika.’ Hokogea itemo Ma Jou ai Demo-demoka abe ma titi ona ko o Yahudi ma nyawaua yamake o Abari ma Rorahai.”

2 Peturusu 2:17

De ona abe nginioka gea manga demo ka parahaja dika, angamoi ngaro hokokia dika yotemo masara ma bahauku de manga demo gea ko ihofokua. Ho gea ngohi tahiketero tato ona gea yomaketero dika hoka o jojobuubu abe ko inahidoakua o akere. Eko ka idadi tahiketero ona abe hoka o lobi ma birini ho ma rato ihikabarihi ho hiadono o awana ko inaadonua ngoneino. Hokogea ngohi tahiketero de ona yotobadotoko abe manga demo ka parahaja dika. Ho ona gea mangale ma titi manga demo ma homoa ho ahao manga hohowono amake o fufutu ma ngioka, abe ma ngi gea Ma Jou wohidiaioka de duru kohamofufutu genangoka.

2 Peturusu 2:4

De gea ka idadi duru hohioriki abe Ma Jou ahao wahohowono abe ona yotobadotoko ko itiaiua, angamoi abeika hokokia ma dodihiraino de Una wahohowono abe iwilawa-lawanika. Abe ngaro o momalaekata abe ma dodihiraino de ona yahowonoka Ma Jouika, ma Una ko wanoaikaua manga hohowono masara gea wahohowono o haara ma gogurutuku abe genangoka duru kohamofufutu. De genangoka yogoa-goana ma momalaekata gea la ufa ihupu ka hiadono ma hohowono ma baha ma oraha adonoka, de ma oraha gea ahao wohikokibinaaha enangika.

1 Yohanese 1:6

Ho nako ngone homahingahu hato haniiki Ma Jou ai datoro itiai de naga nanga gogao itiai Unangika, masara nanga hiningaka tanu o fufutuoka homanoa, gea ngone hoeluku dika de to Una ai demo ma gou-goungu ko haniikua.

Yudasa 1:13

De o nyawa gea yomaketero abe hoka o lulu ma ago-agomo ma oraha o rato, ho ma oraha ihohe ma dudungiha de ma peseke ihibuaeliye de ihikabarihi arihonongaika. De hokogea tahiketero onangika angamoi manga datoro gea o himaleke dika ho hiadono ma peseke naga onangoka. De ona gea hoka o muru-murumu utu o dihangoka abe irehene ma dodagioka de aino ho hiadono to ena ma dodagi ko itiaiokaua yaniiki. De ona gea ahao ma hohowono amake o fufutu ma ngioka ka hiado-adonika, de ma ngi gea Ma Jou wahidiaiokau abe duru kohamofufutuholi genangoka. De hokogea to ona gea manga hohowono ahao amake abe ma nyawa gea yomahikasapuru nginika.

Yudasa 1:6

De naa moioli tinihihohininga abe ma titi Ma Jou ai momalaekata. Angamoi ma dodihiraka de ai malaekata utu gea manga kuaha de manga gogere gea yanoaka de iwiporetoka Ma Jouika. De ma malaekata gea Ma Jou wakokipakitoka de wakokibuika abe o fufutu ma bui ma goronaka ka hiado-adonika, de genangokahi wahidogunoaika hiadono ahao ai hohowono ma wange adono. De ma oraha gea ahao ai malaekatoo Una wahohowono.

Himatoko 21:24

De gea ma kota ma dararono ahao yahitararono o dunia ma nyawa mata-mataika. De o kota gea ma ngorana ifelengaika dika ka ihikaika angamoi duru ko iwa la yofutu genangoka. Ho nako ko yofutua, gea ko iwa ma titi la ma ngorana yatatoko. De ma oraha gea o dunia ma nyawa manga kiahonanga ma hali-hali de ma hohailoa, gea mata-mata yaoino abe o kota ma goronaino la ato iwihoromati Ma Jouika. De ngaro o dunia ma kokoano masara onangoo mata-mata yaoino manga kiahonanga ma hali-hali o kota ma goronaino la ato iwihoromati Unangika.