De ahao o Musa wihingahu o Harunika wato, “Hokonaa idadi la ngone hihioriki kiani hihingounu itiai Ma Jou o Yaweika. Una naa wonahimatoko ai medebini ngoneino la ngone duru hohioriki to Una ai demo ma titi abe ma dihirainohi wonahingahuoka wato, ‘Ngohi tomahitaana ahi medebini onangika abe naga ahi datekoka, La o nyawa mata-mataika naga manga horomati itagi Ngohino.’ Hokogea Ma Jou wonahingahuokau la ngone hihingounu de nanga modongoka Unangika.” Hokogea o Musa wihingahu o Harunika ibooto de o Harunu duru womarii-riidoka dika. Ma Jou o Yawe wahingahuokau o Isiraele ma nyawa manga hidemoika abe nako o manyanyi yotufuku Unangiye kiani yapake o uku abe yale o Haro-harongo ma Huhuba ma Ngiino angamoi ma uku gea iwidingakoka Unangika. Masara o Harunu ai ngofaka yahinooto naa marai de manga sade yale dika o uku utu de manga hiningaka ato, “Adodoua ngaro ka hapake.” Masara gea manga horomati ko iwa Ma Jou ai behehongika abe kiani iwihingounu itiai. De angamoi to ona manga datoro duru ka ihikaika o nyawa manga himangoka ho done onangoo ahao yomaaduru hoka o Nadaba de o Abihuoli. Abe Ma Jou wahioriki o Isiraele ma nyawa iwihigihene ko itiaiua ho hiadono ma dihiraino abe o Sinai ma lokuoka kiani wahitiari onangika la ufa yatilakuru ai behehongo ma demo ngaro ona o Isiraele ma nyawaika eko ngaro manga hidemo unangika ma, ko idadiua yatilakuru Ma Jou ai hingahu ma demoika. De Ma Jou ai hingahu o Musaika gea hamake O Huhupu 19:22: “De hongoli onangoo abe manga gogianongoru yahidemo Ngohiye done yomaputuhu yatilakuru ahi loku ma batingino angamoi ona ato, ‘Ngomi o hohidemo Ma Jouika ho ka idadi abe mia biaha miboa Ma Jou o Yaweino,’ masara nako ona yotemo hokogea la ato yomahuba Ngohino masara ko yomahidiaiuahi de ko yomatingakinouahi Ngohino, ho onangoo gea kiani tahohonenge.” Hokogea Ma Jou ai medebini ho hiadono ma oraha o Abihu de o Nadaba ato iwileleani Ma Jou masara ka yaniiki dika abe ipuda to ona manga hiningaino hoka o Kainoli ho hiadono kiani wahohowono onangika.
Yakobusu 3:1 - Ma Jou ai Demo-demo o Totobelohoka1-2 Ahi gogianongoru, ngone hohioriki abe ngone mata-mata ka hahowonohi de gea nanga howono ma rupa naga ma ngoe. De nako ngone hato homahipareta nanga uru ma demoino hiadono ko horubakaua ma titi nanga uruino, gea duru ko igapangua. Angamoi tanu nako onagona dika abe ka ihikaika manga uru ma demoino ka yakunu yomahipareta ho ko yorubakaua ma titi manga uruino, ona gea duru yongodu-ngodumoka. De ka idadi hahiromanga onangika hato manga badanga ma amokika yakunu yomahipareta ho hiadono ko yahowonokaua. Angamoi nako to ngone nanga badanga ma kiahonanga mata-mataika, marai ka nanga uruohi hokangela homahipareta. Ho mangale ma titi gea hiadono ngohi tinihitiari nginika, tato, kalioli ka niwoe nioigo nimahidadi abe nitobadotoko nia gogianongoru utuikali. De hokogea tinihitiari angamoi nako o nyawa yotobadoto-dotoko, to ona gea manga demo abe ihupu manga uruino kiani hatoli iwoe. De genangino ma titi hiadono igapanga yahowono ma titi manga demo gea ma ngoe abe ipaata manga akiroka de aino. De gea imaketero dika abe hoka ngomi naa abe mitobadoto-dotoko o nyawaika. Ho ngaro ngomi eko ngaro ngini utu abe hotobadoto-dotoko, masara nako hiadono hahowono ma titi nanga uru ma demoino de gea kiani ngone hamake nanga hohowono Ma Jouino. De ka to ngoneohi nanga hohowono gea hatoli itubuho nako de o nyawa utu manga hohowono abe ona ko yodoto-dotokua, angamoi to ngone nanga tagongo gea la Ma Jou ai Demo-demo hadotoko o nyawaika. De nako genangoka de hahowono gea itararono abe utuohi itubuho ma hohowono Unangino. Ho koaho ngini kalioli ka niwoe nioigo nimahidadi abe nitobadotoko nia gogianongoru utuikali, done niahowono ma titi ko nimahiparetaua abe nia uru ma demoino. Faic an caibideil |
Yakobusu 3:1
30 Iomraidhean Croise
De o Yesusu wotemo wato, “De naa tinihingahu nginika abe ahao o nyawa initae-tae abe imaketero hoka Ngohioli ihitaeoka. Abe ma dihiraino de naga abe ihitae Ngohino ato o toka-tokata ma hidimono, ho ngini ngaro ufa niheranga nako nginioo o nyawa initae-tae de manga demo ma dorou dika. Angamoi Ngohi ti ngini nia dutu, de ngini to Ngohi ahi duduhunu. De ngini to Ngohi ahi nyawa abe nimatobadotoko Ngohino angamoi Ngohi ti ngini nia guru. Abe ma titi nako ngini de Ngohi, ma ka Ngohiohi tokurutiye ahi gogere. De ngaro ka Ngohiohi tokurutiye masara ka idadiohi o nyawa ihitae Ngohino. De genangino de duru ka idadi nihioriki abe nginioo ahao o nyawa initae nginika. Angamoi Ngohi hoka o tau ma dutu de gea ngini hoka ahi nyawa ahi tauoka. De nako o nyawa ihitaeoka Ngohino de o demo ma dorou, hongoli manga dadae ma demo ma dorou ahao itagi nginika.”
De ahao o Yesusu ai hitiari ma demo wahidumutu onangika abe yodadi o Yahudi ma nyawa manga hohidimono. De Una wahitiari wato, “De ngini abe nitobadoto-dotoko o Musa ai Paretaino de nginioo abe o Farisi manga doomuino, ahao ti ngini nia hohowono duru kohadubuho niamake nginika! Angamoi ngini ka nimadokangelukino dika abe niato niwileleani Ma Jouika masara ko niagou-goungua niwileleani. De gea ma titi nia wowangoino de ngini niata-tatoko o nyawa abe tanu yoigo yodadi Ma Jou ai nyawa abe ahao wahikoano onangika. Ho ngini ma hirete nimatatoko la ufa nidadi to Una ai nyawa, de hongoli o nyawa utuika niata-tatoko genangino. Ho duru nia datoro gea itorou!”
“De ngini abe nitobadoto-dotoko o Musa ai Paretaino de nginioo o Farisi manga doomuino, ahao ti ngini nia hohowono duru kohadubuho niamake nginika! Angamoi ngini ka nimadokangelukino dika abe niato niwileleani Ma Jouika masara ko niagou-goungua niwileleani. De gea ma titi ngini niarusi abe o ngo-ngofeka yofao-fao la niaora onangino manga tau de manga kiahonangoo. De gea nidiaioka yofao-faoika de ahao nimaniata kohadekanino la niato nia totiai niahimatoko o nyawa utuika. Ho gea Ngohi tato ti nginiohi nia hohowono ahao duru ilamoko.”
De nagali genangoka o Farisi ma doomuino ma nyawa, de ona gea ka de iwimake abe o Yesusu womahisapurika de o nyawa abe manga datoro ito-totorou de ona duru iwihininga kuranga o Yesusika. Ho ona yaleha iwinii-niikika ato, “Adodoa ho nia guru gea yomakutuono yolomo de o pajaka yogaho-gahoko de o nyawa utuoli abe yodiaioka itorou Ma Jouika? Gea duru ko itiaiua!”
Ho ai dutu abe wokaya-kaya wiahokino de witaere unangika wato, ‘Naa ma titi o kia hiadono toihenino o dadae ma demo abe ihidumutu ngonaika? Abe ona ato bari ngona naa ka naumo dika ahi tiwi! Ho naa tonihuloko la ngona nohiaturoka ahi tiwi ma gegetongo ma buku mata-mataika la ka idadi nohihingahu ahi tiwi hokokiahi ma oraha naa naga. De nako hiadono gea nohihingahuoka de ahao ani karajaanga ibooto ngohioka, ko idadiokaua naurusu to ngohi ahi tiwi.’”
De o Yesusu wogila-gila wadotoko abe iwinii-niikika wato, “De ngini ufa nimahidadi o tobauru-urusu ma nyawa abe ka de niamake o nyawa manga datoro de ka ngini dika niaputuhu niato kiani to ona gea manga hohowono hokonaa de hokonaa. Angamoi nako ngini nisabaranga dika niahohowono o nyawa utuika, done ahao Ma Jouoli kiani winihohowono nginika. Masara nako ngini ibootohi nimaketehohowono, gea ahao Ma Jou Unangoo ngaro ufa de winihohowono nginika.” “Masara koaho ngini niaofi o nyawa manga howono nginika la ka idadi nginioo nia howo-howono aofioka.”
De o Antiokia ma kota ma garejaka naga utu Ma Jou ai uru ma dodofanga de naga utuoli abe yatobadoto-dotoko manga gogianongoruika ma titi Ma Jou ai dodotoko. De ona gea manga roma-romanga hokonaa, naga o Baranabasa de o Saulusu, de nagali o Simeono abe iwifetongo o Daro-daromo ma nyawa, de o Lukiusu abe o Kirenoka ma nyawa, de o Menaheme abe una gea ma oraha ai etetekohi de duru widodiawo de wogogule de o Herodese Antipasa, abe o Herodese gea ipahaino wolamokoka de wodadi wokoano.
De abe nanga garejaka naa Ma Jou wonahidoaka o nyawa abe manga hiakunu irupa-rupa. Abe ona utu wahidingo-dingoto la o Abari ma Rorahai yatobahingahu-ngahu o nyawaika, to onangohi manga hiakunu duru ikurutiye. De ahao nagali Una wonahidoaka o garejaka ona abe yatobalufungu de Ma Jou ai kuaha la hiadono Una ka wobawilika wahingahu onangika ai hingahu ma demo abe woigo wato ona ahao yadofanga manga gogianongoru utuikali ai hingahu ma demo gea. De ona gea manga hiakunu ngade-ngade imaketero ma gurutiye abe hoka ona yatobahingahu-ngahuoli. De ahao nagali Ma Jou wonahidoaka ona yotobadotoko Ma Jou ai Demo-demoino, de genangoo ma hiakunu hatoli ikurutiye, masara ko adonua ma gurutiye abe hoka ma hiakunu hinooto gea. De ahao nagali Ma Jou wonahidoaka ona abe ka yakunu o heheranga yodiai, de ahao ona abe ka yakunu o nyawa yahitogumu manga popanyakeino, de ahao ona abe yakunu o nyawa yaduhunu, de ahao ona ka yakunu o nyawa utu yahiaturu la yomarimoi yokarajaanga, de ahao ona abe ka yakunu o nyawa utu manga demo yosawaro yotemo. Ho nanga garejaka naa de Ma Jou wonahidoaka de wonahiaturu ngone mata-mata ma titi to Una ai hiakunu ngone homoi-homoiika.
Angamoi ngone homoi-homoi ahao kiani homakokiokoino o Yesusu Kristusu ai himangoka abe ma oraha wonatailako nanga datoro homoi-homoi abe nanga badangokahi hodiaioka. De ma oraha gea wonahibalaha ngoneino de ma rorahai ma titi nanga datoro ma rorahai abe hodiaioka. Masara abe nanga datoro ma dorou abe ngone hodiaioka, de gea ahao wonahibalaha de ma dorou ngoneino. De gea ma titi hiadono ngomi ka ihikaika mia hininga ma dumutu la miato wiwihisanangi Unangika dika.
De gea ai hidoaka ma owa abe wonahidoaka ngone ai garejaino, gea o nyawa wahidoaka ngoneino abe ona gea de manga hiakunoka. Abe ona utu o Kristusu wairiki la ona yodadi to Una ai hidingoto ma nyawa. De naga utu Una wonahidoaka o garejaka ona abe yatobadofanga Ma Jou ai hingahu ma demo manga gogianongoru utuikali. Abe Una ka wobawili dika ai hingahu ma demo to ona manga hiningaika la ahao yadofanga. De naga utuoli wahidingo-dingoto la o Abari ma Rorahai yatobahingahu-ngahu o nyawa utuika. De naga utu Una wonahidoaka la ona inatobagoana de inatobadotoko ngone ai gareja ma nyawaino.
De ona gea yoigo yomahidadi yotobadoto-dotoko Ma Jou ai Pareta o nyawaika, masara ngaro to ona ma hirete manga demo ma, ko ihiorikua ma titi. De ngaro ona duru ko ihiorikua, ma, yogila-gila dika Ma Jou ai Pareta yadotoko o nyawaika de yomahihawo-hawo dika abe ona ato duru ihioriki o dodotoko gea ma titi.
De mangale ma titi Ma Jou ai mau gea hiadono Una wohihitagongo ngohi la ai Abari ma Rorahai toiki tatobahingahu-ngahu onangika abe ko o Yahudi ma nyawaua. De gea ena totemoka duru tagou-goungu de ko toelukua! Ho gea wohihitagongino ngohino la wato o Abari ma Rorahai gea de nanga ngongaku ma dodotoko ma gou-goungu ngohi tahingahu-ngahu o nyawa mata-mataika. Ho ahi ngofaka, duru tonihigaro la ngini mata-mata genangoka nimaniata de o nyawa mata-mataika niagahoko Ma Jouiye.
De nako ona nginioka abe inihitobahihira-hira nia doomu ma goronaka, onangika niahingounu de niahigihene manga hiningaika. Angamoi ona gea naga de manga tagongoka la ka ihikaika initobagoa-goana nia hininga homoi-homoi la ato ufa ngini nirehene Ma Jouoka de aino. De nako hoka ahao idadi abe ngini utu nirehenoka ma titi ona manga gogoana nginika ko yodiaiua, gea ahao onangoo kiani yomahitararono Ma Jouika ma oraha wonatailako ngone homoi-homoiino. Ho nako nginioka naga nia hingounu nia hihiraika, de gea ngaro ufa ona yomahitararono Unangika ma titi ti ngini nia datoro. De gea nako niahingounu onangika, ahao manga tagongo ka idadi yodiai de manga garagoka de aino. Masara nako nia hingounu ko iwa nia hihiraika, gea ahao manga hininga idadi itubuho, de nginiokaoo ko niamakeokaua manga tagongino ma utumu.
Ahi gogianongoru abe duru tinidora nginika, abeika niafikirohi naa ahi demoino. Kiani ngini homoi-homoi niamagawe nitotoihene Ma Jou ai demo abe ka ma gou-goungika. De masara nako ti ngini ma hirete nia demo, gea kalioli ka nimataiti nimahingahu ti ngini ma hirete nia hininga. De naa moioli tinihibehehongo, tato kalioli ka nimataiti nia ngamo ipudaiye.
De abe niahitobahihira-hira nia gogianongoruika abe ona Ma Jou winihitagongoka nginika, de gea ufa nimagorakiye ngini ma hirete la niahidadi ona nia lou ma dodoko. Masara koaho nia tagongo gea niao itiai Ma Jou ai himangoka abe de nia hininga ma dodipokouku. La gea ahao o nyawa utuoli nia doomuino ka idadi yoigo yomaaduru abe hoka nginioli ma titi nia tagongo niao duru irahai.