Tobadotoko 7:1 - Ma Jou ai Demo-demo o Totobelohoka

¹ O minya abe ma bounu ihailoa o nyawa yaetongo ato duru irahai. Masara nako ngone howango itiai la homalingiri nanga romanga ma rahai, ka enangohi duru ikurutiye. De ngaro o nyawa yogarago ma titi ngone homaboa, masara koaho nanga romanga ma rahai naga abe ma oraha nanga baha adonoka.

Tobadotoko 7:1 Iomraidhean Croise

Sosawaro 22:1

Nako ngone kiani homangiriki la o tiwi ma amoko hamake ekola nanga romanga irahai o nyawa manga himangoka, gea koaho nanga romanga ma rahai homangiriki, angamoi ka enangohi de ma utumoka abe ngaro de o gurasi de o haaka ma amoko.

Tobadotoko 10:1

De gea imaketero abe hoka o minya ma bounu irahai de o gufuru moi dika yodohonenge genanguku hiadono ma minya ma bounu ihidadidorouoka. Hokogenangoo o bodo ma datoro ma hohutulu dika de ihirusaka o sosawaro ma amoko.

Yesaya 56:5

Abe gea to Ngohi ahi tauoka de tagorakiye to ona manga roma-romanga la idadi o horomati ma amoko onangika. De ngaro hoka ma dihiraino de ona tanu ka idadi yomamake manga ngofaka, masara ka nenangohi manga horomati duru ilamokiye abe tahidoaka onangika. Abe manga romanga ma gurutiye gea tahidoaka la duru ko ihihangua ka hiado-adonika.”

Yunusu 4:3

Ho o Yunusu wohidungonoka de wato, “Ho naa, Ma Jou o Yawe, nako hokogea naduhunu nanga musu, koaho ngohi tohonengoka la ibooto tohohininga abe naa naduhunoka onangika. Ngohi towango ko toigokaua, ho koaho tohonenge dika toigo.”

Lukasa 10:20

De abe ngini niato nigogarago, gea ufa ma titi o toka-tokata inihingounu nginika de gea dika ma titi ho hiadono niodogarago. Angamoi koaho niodogarago abe ma titi ti ngini nia roma-romanga homoi-homoi atulihukuoka o Horogaka, de ka enangohi idadi nia gogarago ma titi.”

Yohanese 13:2

Ho ifufutuku de yolomo de naga Unangoka ona abe o Yesusu iwitobaniiki yangimoi de yahinooto. Masara hokokanganoinohi de o Ibilihi idiaiokau hiadono o Yudasa, abe ai baba o Simono de ai fam Isikarioto, una doka ai hiningaka womatemo wato, “Ngohi ka idadi o Yesusu tifukunu.”

2 Korintusu 5:1

De hokonaa ma titi hiadono ngomi mia hininga ma lako itagi enangika abe ahao hamake o Horogaka, angamoi to ngone nanga badanga naa ko itongohonua masara ika-ika de ahao ihonenge. Abe nanga badanga naa ka idadi hohiketero de o hijai-jai ma tau abe o duniakahi dika ngone hapake. De hohioriki abe ma oraha to ngone nanga hijai-jai ma tau naa ibinaahaka, gea ahao o Horogaka de Ma Jou wonahidoaka ngone homoi-homoiino nanga tau moioli abe itongohono ka hiado-adonika ho ko ihonengua. De abe tohiromanga nanga tau gea nanga badanga ma hungi, gea ko o nyawa biaha manga giamokaua de aino idadi, masara Ma Jou Una ma hirete dika wohidadi.

2 Korintusu 5:8

Ho ngomi naa ngaro o kia dika idadi mia wowangoka masara duru mitomoroini. De ngaro hiadono ngomi mihonenge masara ka misanangi dika. Angamoi ngomi miato koaho mianoaka mia hijai-jai ma badanga naa la miloiki de mimahiadono mia ngiika abe genangoka ko mimaturuuruokaua mia ngi, abe gea miloiki nanga Baluhu idodutu ai ngiika. De ka enangohi abe duru imihisanangi.

Ibarani 11:2

De ma dodihiraino o kia ma titi ho hiadono nanga totofora utu Ma Jou wadosanangi onangika? De gea wadosanangi onangika abe naga manga ngongaku Unangika dika.

Ibarani 11:39

De ona gea mata-mata Ma Jou duru wadosanangi onangika ma titi to ona manga ngongaku Unangika. De masara ngaro Una duru wasanangi onangika ma ona gea ko yamakeuahi manga hadia ingodumu abe ma dodihiraino de wahibehehongoka onangika.

Himatoko 14:13

De ahao o ilingi moioli toihene o Horogaka de aino itemo ngohino ato, “Ngona kiani ahi demo naa nohitulihuku, notulihi nato, ‘Ma oraha naa de imahikaika de onagona dika abe yohonenge ma titi iwinii-niiki nanga Baluhu idodutuika, ona gea duru youtumu.’” De ahao Ma Jou o Womaha wapaluhu wato, “Gea duru igoungu, abe ona gea ahao o Horogaka de ka idadi yomahiaini manga kangela de manga karajaanga ma dubuhoino, angamoi ma titi manga karajaanga ma hasilino ho ahao genangoka de yamake manga sosanangi ma utumu.” Hokogea ma ilingi ma demo abe ngohi toihene.

Ruutu 3:14

Ho o ngo Ruutu momaidu o Boasa ai louiha hiadono ngade-ngade itebini de ahao momomiki la ufa o nyawa utu imihioriki muna o ngo kia. Abe o Boasa ai hitiari ma demo o ngo Ruutika, wato, “Iti ufa duru itebinoka de ahao nolio done o nyawa ihioriki naga o ngofeka moboa o futuoka ahi gandumu ma rorero ma ngiino naa.”