Tobadotoko 2:23 - Ma Jou ai Demo-demo o Totobelohoka

²³ Angamoi o wange-wangeiye nanga karajaanga ihihofoko ma odiri nanga badangoka de ma kangela nanga hiningaka. De ngaro o futu-futuoka masara nagahi nanga hininga ma huha abe iboa nanga karajaangino gea. Enangoo ko kia-kiaua ma titi!

Tobadotoko 2:23 Iomraidhean Croise

Dodadi 3:17

De ahao Ma Jou wotemo o naurikali wato, “Ho naa to ngonaoo ani hohowono naga angamoi gea tonihingahuoka tato, ‘Ufa ma hofoko gea naolomo,’ masara ko nohihigihenua. De mangale ka nomihigihene ngoni fekatika ho hiadono naolomo ma hofoko gea abe ko tonihigunoaua ho ani hohowono hokonaa: Ngohi o tonaka tohipoha de o hohowono ho hiadono kiani duru nomapoputurungu nomakarajaanga la hiadono o tonakino ma hasili namake. De o tonaka ma hasili ani redino gea ti ngini nia inomo ho ka ihikaika hokogea nia wowango.

Dodadi 47:9

De o Yakubu wipaluhu wato, “Ahi koano, to ngohi ahi wowango de ahi paradidu ma kangelaka hiadono adono ahi ngumuru o taongo o ratuhu moi de moruange ma dekana. Masara nako de to ngohi ahi tofora manga ngumuru tanu to ngohi ko kia-kiauahi. Abe ka to onangohi manga paradiduoka yatedekana.”

Estere 6:1

De o futu gea abe o Hamana wihidiai o Modekai ai hone-honenge ma ngi, duru o futu gea o koano ko wamakeua ai giooko ho wihuloko ai duduhunu womatengoika la waleino o kokoano manga hohininga ma buku de wibasa. Gea ena ma buku abe ka ihikaika nako naga abe duru kiani ma titi ihitulihuku gea yotulihi la ufa yawohanga. Ho o futu gea o koano ko iwikiookua de ai duduhunu waleino ma buku gea de womulaenge wabasa o koanoika hoka wihibehehongo.

Higiriiri 127:2

De naa moioli abe ka parahaja dika, nako o nyawa duru yokarajaangaholi la ato yomahidailako manga perelu. Abe nako duru yongorumu yosobo la yokarajaanga ka hiadono yahidufutuku, gea ko ma titiua abe manga karajaanga kiani naga de ma hasiloka. Angamoi Una gea ka idadi wonahidailako ngaro homasikaa de ngaro homaiduoka, iti to Una ai hininga ma dora duru itagi ngoneino.

Higiriiri 32:4

Angamoi Ngona o futu de o wange nohihikangela de ani dodotoko ma dodubuho, de ahi buturungu ka ihutulu moduku abe hoka o wange ma hau-haukoka ihidahauku.

Tobadotoko 2:11

Masara ipahaino de ngohi tongano-nganono abe ma titi ahi wowango ma datoro gea todiaioka, de ahi karajaanga ma hasili mata-mata tamakeoka. De ahi hiningaka taetongo gea mata-mata tato ma bahauku de duru ko iwa ma titi genangino. Abe gea duru ka ma hoanino halegono, ho nanga sosanangi tanu ko inahiutumua ngone.

Tobadotoko 5:12

Ona abe yotobakarajaanga, ngaro manga inomo ilamoko eko ikuranga, masara o futu-futu de manga giooko irahai. Masara onagona dika abe de manga tiwi-tiwioka, to ona manga giooko ikuranga mangale ma titi manga kaya ma amoko gea.

Tobadotoko 5:17

Angamoi o wange-wangeiye duru hongorumiha de hokarajaanga ka hiadono ihohomuku, ho ka ihikaika holomo o fufutuoka dika! De nagali nanga kokangela inaohana de nanga gogama inadaene de nanga hininga ma huha ka ihikaika hamao, ho nanga utumu duru ko iwa!

Hidingoto 14:22

De ma kota-kotaka gea de duru yahipoputurungu o ngongaku ma nyawa manga hininga mata-mataika. Abe ona yahitobahigaro la ka ihikaika o ngongaku ma dodotoko yatobanii-niiki enangika. De yahihohininga onangika ato, “Ngone hingaku-ngakuoka ko ma titiua nanga wowango ma goronaka de ma rorahai dika ka ihikaika hamake. Masara kiani nagaoo o kokangela abe haohana. De abe ma kokangela hohimangoka de ahao ika-ika hohapongo dakuiye la Una ka idadi wonahikoano ngone ai nyawa.” Hokogea manga higaro onangika.