‘Dautu, hokonaa tonihingahu, ka de o wange gea ahi nyawa tahihupu o Mesiiri ma tonakino masara Ngohi ko tolingirua o kota moi o Isiraele ma nyawa manga dutu-dutu ma hidogoronaka abe ka idadi ma kota gea tomadingaka Ngohino. Abe ma titi o kota gea tomangiriki la ona ihigoko o tau moi la yomahuba-huba Ngohino genangoka de ahi romanga yagorakiye de manga horomati Ngohino, ma kota gea ko tomangirikuahi. De ngaro o nauru abe tihidoaka ma kuaha unangika la wahihira ahi nyawa o Isiraele ma nyawa, ma, Ngohi ko moiua tiiriki ka hiadono ma oraha naa.
Sakaria 3:2 - Ma Jou ai Demo-demo o Totobelohoka2 Masara Ma Jou o Yawe wotemo o Ibilihi ma haekika wato, “Ngohi naa Ma Jou o Yawe de Ngohi duru toluku ani dadae ma demo! Abe Ngohi naa Ma Jou o Yawe abe tairikoka o Yerusaleeme ma kota la idadi to Ngohi ahi kota, ho naa tohigalioli abe duru toluku to ngona ani dadae ma demo abe notemoka ma titi ahi nyawa o Yosua! De ahi nyawa naa tihiketero tato una gea ngade-ngade hoka o gota ma jaga moi abe youku / yotokara o uku ma goronaka, masara ko yotinouahi de agorakoka.” Faic an caibideil |
Sakaria 3:2
22 Iomraidhean Croise
De o Yesusu womalegaika de wamake naga manga ngoe yomulaenge yomapopaatino ma ngofakino. Ho ma tokatika wataeroka o Yesusu wato, “Ngona o tokata ma dorou abe o nyawa nahidiai la yodadioka yomou de yatopongono, ngona naa tonihuloko la naa naga nohupuoka unangino de ibootohi nowohamika ai badanga ma goronaika ka hiado-adonika.”
De o Yesusu duru wataere ma tokatika gea wato, “Ibootohi notemo ho nohupuoka unangoka gea!” De wotemo ibooto de ma tokata iwihiruba ma nauru gea ma tonakuku. De barikua iwihirubauku masara ahao iwinoaika dika de ko iwihiodiruali. De naa mata-mata idadi duru o nyawa mata-mata manga kokihimangoka ho ona mata-mata iwilega-lega.
De o Yesusu ka wahingahuohi ona iwitobaniikika wato, “De igoungu kangano ahi demo ma goronaka de tato ngini naa nitebinoka masara gea ma dumutu ko ngini mata-mataikaua. Angamoi o nyawa abe tairikoka Ngohi duru tahioriki ona gea. De ma titi nena tinihingahu la ahao idadi duru imaketero hoka ma dihira ihitulihukuoka, abe Ma Jou ai Demo-demoka itemo ato, ‘Womatengo abe miolomo mimahidodai moi, una gea wodadioka ahi musu.’”
De nagali ai duduhunu ma utumu moioli, abe Una wonahidoaka la ahao ma bahauku de nanga hohowono ko inadaenokauali ngoneino. Ho ibootohi ngone hohawana ma titi Ma Jou ahao wonahohowono. Abe ngaro naga o nyawa eko o kia dika abe inatae ngoneino masara manga demo gea ko ilakua Ma Jou ai himangoka. Abe ma titi nako yoboa Ma Jouino la inatae de inakalaki ato, “Ona naa manga howono hokonaa de hokonaa ho kiani Ngona nahohowono onangika!” Masara ngaro hokogea inatae ngoneino masara Una ko wonahohowonua angamoi Una ma hirete wonahitotiaioka ho nanga howono wakokiofioka. De nako hiadono Una wonahitotiaioka, gea moioo de ko iwa abe akunu iwihigaro Unangika la ka wonahohowonohi! De gea Ma Jou ko wonahohowonokaua angamoi o Yesusu Kristusu Una wohonengoka la wonabangu ma titi to ngone nanga howo-howono. De hongoli Una iwihimomikoka ai honengino de wogorakiyeoka, ho ka idadi hohioriki abe Ma Jou duru wadafongo ai huhuba gea ma titi ngone la nanga hohowono aofioka. De Una wogorakiye ho ma oraha naa de wogogere ai kuaha ma ngioka abe Ma Jou ai nirakoka la wonahidemo Ma Jouika ma titi ngone. Ho nako naga abe yoboa Ma Jouino de inatae ngoneino de o Yesusu Kristusu ka idadi wonademo ai Babaika wato, “Ngaro ufa de nahohowono onangika angamoi Ngohi tomahimokuoka manga hohowono ho naa duru ko iwaka.” Hokogea ai demo ai Babaika ma titi ngone. Ho mangale ma titi Ma Jou wonahitotiaioka ma titi o Yesusu Kristusu ai datorino de wonaetongo ngone ai nyawa duru ma hohailoa, ho ngaro hokokia inatae ngoneino masara ko hamakeokaua o hohowono Ma Jouoka de aino.
Masara nako o nyawa utuoli abe o howono dika yanii-niiki, ona gea yomakiniiki de o Ibilihi ma haeke ma titi manga datorino, angamoi ena gea duru ma dodihirainohi de yatobahowo-howono. Ho ufa nimahigunoa hiadono o nyawa inibudi abe ma titi gea ena. De nako Ma Jou ai Ngofaka, Una gea woboa o duniauku naa la ka idadi o Ibilihi ma haeke ma datoro gea duru wohibinaaha enangika.
De nako o nyawa utu abe manga hohowono o ukuika ngade-ngade yadaenoka, ona gea kiani ngini nimataiti niaduhunu la ufa yogila-gila o ukuika. De abe nagahi o nyawa utuoli abe manga wowango ma datoro duru itorouholi, de gea onangoo ma ka idadi niaduhunu de nia hininga de ma doraka, ma kiani nginioo nimahitiari done o nyawa inihiata-atara de nginioo niruba o howonuku. Angamoi to ona manga howono gea kiani ngini niodohata enangika done imahora nginikali.
Masara ngaro to Ma Jou ai malaekata ma ko yamoroinua la yongelo o malaekata utuikali. Abe hoka o Mikaele abe una gea Ma Jou ai malaekata manga haeke womatengo. Ngaro una masara ma dodihiraino de ko iwimoroinua wongelo abe o Ibilihika. Abe ma dodihiraka de o Mikaele de o Ibilihi ma haeke, de gea igoungu yokadatoro ma titi to Musa ai honenge. Masara ngaro hokogea yokadatoro ma una ko wongeloua o Ibilihika ma gea wato, “Ahao ahi Baluhu idodutu Una dika wonitaere ngonaika.” Hokogea to Mikaele ai demo enangika.
Ho ona de ma aewani yoiki yomakuduhunu iwiparangi abe o Domba ma Ngofakika, masara o Domba ma Ngofaka de to Una ai nyawa ahao yahikala, angamoi Una gea o balu-baluhu mata-mata manga Baluhu idodutu de o kokoano mata-mata manga Koano. De ai nyawa abe iwinii-niiki, ona gea abe Ma Jou wahokoka manga ngongakuino de wairikoka la yodadi ai nyawa, de ona duru yatobagou-goungu iwiniiki Unangika.”
Sanasan