Matiusu 5:1 - Ma Jou ai Demo-demo o Totobelohoka

¹ De o Yesusu wamake o nyawa duru ko manga ngoe gea abe yoboaka Unangino ma ngioka gea, ho Una wodoaiye ma hohutulu o loku ma geleforoka de genangoka wogogeruku. De ona abe iwinii-niiki yomatoomuino Unangoka.

Matiusu 5:1 Iomraidhean Croise

Matiusu 13:2

De o nyawa duru ko manga ngoe yoboaino Unangino ho hiadono iwihigilolitino. Masara o nyawa gea duru ka yowoeokaholi ho o Yesusu womaturuuruoka abe wofarene o ngotiroko de wogogeruku o ngotiroka gea. Masara o nyawa yowoe-woe abe yomafafoino genangoka, ona ka o dowongioka dika yototoihene.

Matiusu 15:29

De ipaha o Yesusu wosoboli ho wanoaika ma tonaka gea de wolio o Galilea ma akere ma ngootika. De ma ngootoka gea Una wodoa o lokuiye ho genangoka wogogeruku.

Matiusu 4:25

De ma titi to Una ai kuaha gea hiadono Una ngaro o kiaika dika woiki masara o nyawa duru ko manga ngoe iwihideefotino Una. Abe naga utu o Galileaino ma nyawa, de naga utuoli o Kapongo Ngimoi ma tonakino yoboa, de utuoli o Yerusaleeme ma kotaino yoboa, de nagali o Yudea ma tonakino, de naga utuoli abe o Yorodani ma akere ma honongaka de yaino yoboa la iwinii-niiki o Yesusika.

Matiusu 5:2

De ahao Una womulaenge wadotoko onangika ma titi o nyawa abe yamake ma hiowa Ma Jouoka de aino gea. Ho o Yesusu wadotoko wato,

Maruku 3:13

De ma oraha gea o Yesusu wodoa daku o lokuiye. De gea wodoaiye de ko womatengoua, angamoi Una wahokino manga ngoe abe womaputuhoka wato ona gea iwiniiki dakuiye. Ho ona yomahiadoniyeoka de genangoka yomatoomuino o doomu moi.

Maruku 3:20

Ho o lokuoka de auku youtiuku de yolio yowohamika ma tau ma goronaika. Masara imaketero hoka ma dihirali naga o nyawa ko manga ngoe iwiniiki de genangoka yomatoomuino o tau ma goronaka. Ho o Yesusu de iwinii-niiki ato yolomo ma ko idadiua angamoi o nyawa yowoeholi.

Maruku 4:1

De ipahaino de o Yesusu ma moioli o nyawa wadotoko o Galilea ma akere ma ngooto ma datekoka. De duru ka yowoeokaholi yomatoomuino ho o Yesusu womaturuuru o ngotiroko de wogogeruku o ngotiroka gea la wadotoko onangika. De abe o nyawa yowoe-woe yomafafoino genangoka, ona ka o dudungoka dika de iwihigihene Unangika.

Lukasa 6:12

De ipahainoli de o Yesusu woiki wodoa o loku moiiye la dakenangoka womaniata. De Una ka iwihidetebiniye abe ko wotogu-togumua womaniata Ma Jouiye.

Lukasa 6:17

De wairiki ibooto de ona yomakutuono youti ma geleforino ka hiadono o tonaka ma dolauku yomahiadonoka abe duru itiaiika ma tonaka genangoka. De naga Unangoka ona abe iwinii-niiki de o nyawa utu yowoe-woeoka. Abe naga o Yudea ma kapo-kapongino mata-mata yoboaino, de nagali o Yerusaleeme ma kotaino, de utuoli dai o gahi ma ngigoroka de yaiha yoboa abe ona gea o Tirusu de o Sidono ma kotaka ma nyawa.

Lukasa 6:20

De ahao o Yesusu womalega iwinii-niikika de wadotoko wato, “Ngini abe nihu-huha o duniaka naa, ngini gea niamake ma hiowa Ma Jouino, angamoi Una ka idadi winihikoano nginika.”

Lukasa 9:28

De o Yesusu wahingahu gea mata-mata onangika de ahao ngade-ngade o wange tufange ipahaika de o Yesusu wodoa o lokuiye la womaniata dakenangoka. De Una wahoko o Peturusu de o Yakobusu de o Yohanese la ona yomakiniiki yodoa daku o lokuiye.

Yohanese 6:15

De ona yomahikagaro, ato, “Ibootohi hodamaa. Ho naa ma oraha adonoka abe ka idadi hiao la hihidadi nanga koano!” Ho ka de wohioriki manga hininga gea, de o Yesusu womadohuku onangino de woiki womatengo dika o lokuikali.