Matiusu 22:3 - Ma Jou ai Demo-demo o Totobelohoka

³ De o nyawa manga ngoe ma dihiraino de wahingahuokau de wahokino la nako ma oraha adonoka de ka idadi yoboaino de yaniiki ma rame-rame gea. Ho ipaha de ma oraha adonoka, ho ma koano wahuloko ai duduhunu yamuruono naga la yoiki onangika abe ma koano wahingahuoka la ona ato, ‘Adonoka ma oraha abe ma koano ai ngofaka woilaka, ho ngini niboaino ma gogilaka ma rame-rameino!’ Masara gea barikua wahokoka ma ona yoluku yoboa!”

Matiusu 22:3 Iomraidhean Croise

Hosea 11:2

“Masara ngaro ka ihikaika tahoko onangika la ihiniiki Ngohi, masara ka utuohi yorehene Ngohioka ma homoaika. Abe ona yomahihuba-huba o pangao o Baalika de manga huhuba, de o manyanyi yotobatufu-tufuku o popangao utuika.

Hosea 11:7

De gea ma titi o kia hiadono o bodito yadaene ahi nyawaika? Angamoi ona manga hiningaka de duru yoigo ihiporete Ngohi! De ona yotobaahoko o Baalika, masara Ngohi ahi romanga ona ko ihigorakokaua.” Hokogea Ma Jou ai dadae ma demo o Isiraele ma nyawaika.

Matiusu 21:34

De ipahaino naga ma oraha ai redi naga de ma hasiloka, de o redi ma dutu ai huhuloko yamuruono naga wahidingoto yogoa-goanika la wato yale ma hasili ma hononga o angguru ma redino gea.

Matiusu 23:37

De ahao o Yesusu wotemoli o nyawa yowoe-woeika wato, “Hiokoo ngini o Yerusaleeme ma nyawa naa! Angamoi ngaro Ma Jou wahidingotoka ai nyawa manga ngoe nginika abe utu ai uru ma dodofanga de utuoli ai abari ato inihingahu nginika, masara ona gea ngini niatomaka. Abe utu onangino ngini niahakaru onangika ka hiadono yohonenge. Ho gea inihitaana abe ngini niaoluku Ma Jou ai demo nginika. De ngaro ngini nia hininga hokogea masara Ngohi naa ma ngoe toigo tapake ahi hininga ma dora nginika masara Ngohioo nihioluku. De gea tonahiketero abe Ngohi hoka o kuru-kuru ma mayo abe yoigo atoomuino to ena ma ngofa-ngofaka ma gafuufu ma timiuku la duru imahidutuku ma mayoika. Masara ngini naa nioluku niboa Ngohino.”

Matiusu 3:2

“Ngini kiani nitoba la nioporetika nia howo-howonika de nianiikoli Ma Jou ai hiningaika dika. Angamoi itigioka abe ma oraha Ma Jou wonahikoano ngone o duniaka naa.” De hokogea o Yohanese ai demo onangika la wato ona ahao iwidafongo irahai manga Koano Ma Jou.

Matiusu 9:15

De o Yesusu ma oraha wapaluhu onangika de womahiketero abe ma titi Una ma hirete de ona iwinii-niiki. Ho gea wapaluhu onangika wato, “Hokokia to ngone nanga biaha ma titi o gogilaka? Abe nako nanga gogilaka ma rame-rameoka de nanga dutu-dutu de nanga dodiawo kiani ihirame-rame ka ma moi de una abe woila-ilaka. Ko idadiua naga manga hininga ma huha de hiadono yopuaha abe ma oraha una woila-ilaka nagahi de de ona! Kiani manga hininga de ma garagoka dika. Masara ahao naga ma oraha abe ai dodiawoino iwiaoka woila-ilaka gea o ngi moiikali, de gea ma oraha ahao manga hininga idadi ihuha de yopuaha ho ko yolomuahi o inomo. De hokogenangoo to Ngohi ahi nyawa abe ihinii-niiki. Mangale ma titi abe Ngohi nagahi onangoka ho ngarouahi de ona yopuaha. Masara ahao naga ma oraha abe Ngohi ko ihiwaka onangoka de gea ahao ona ka idadi yopuaha.”

Lukasa 13:34

De ngaro o Yesusu ko womahiadonuahi o Yerusaleemika masara ai hininga duru ihuha ma titi o Yerusaleeme ma nyawa gea. Ho ai hininga itagi o Yerusaleeme ma nyawaika hiadono wotemo wato, “Hiokoo ngini o Yerusaleeme ma nyawa! Angamoi ngaro Ma Jou ma dodihirainohi de wahidingoto ai nyawa manga ngoe nginika abe utu ai uru ma dodofanga de utuoli ai abari ato inihingahu nginika, masara ngini niaolukoka to Una ai nyawa gea. Abe ona utu hiadono ngini niahakaru onangika hiadono yohonenge, masara utu niatomaka abe ko de o hakaruinoua, ho gea niaolukoka Ma Jou ai Demo-demo nginika. De ngaro ngini nia hininga hokogea masara Ngohi naa ma ngoe toigo tapake ahi hininga ma dora nginika masara Ngohioo nihioluku. De gea tonahiketero abe Ngohi hoka o kuru-kuru ma ayo abe yoigo atoomuino to ena ma ngofa-ngofaka ma gafuufu ma timiuku la duru imahidutukino ma ayo ma badangino. Masara ngini naa ka nioluku niboa Ngohino.”

Lukasa 15:28

“De ma duduhunu ai demo gea woihene de ma riaka duru wongamo de ka woluku wowohama ma tau ma goronaika. Ho ai baba wohupuino wibuhuku de duru wogaho-gahoko unangika la wato irahai ma rame-rame gea unangoo waniiki.

Lukasa 19:27

“De ma koano wogila-gila wotemo wato, ‘De naa abe ma titi ona ma dihiraino ihilawa-lawanoka de yoluku la ngohi todadi to ona manga koano, abeika ngini niatoomuino de niao nenangino la niakokitomaka dika naa ahi himangoka.’” De hokogea o Yesusu ai hiketero ma ade-ade abe wadotoko iwinii-niikika la wahigaro onangika wato ona ka ihikaika yao irahai manga tagongo Unangoka de aino ka hiadono Una woboali.

Yohanese 5:40

ma, ngini nioluku Ngohino niboa la niamake o wowango ma gou-goungu gea.” Hokogea o Yesusu wataere o Yahudi ma nyawa manga balu-baluhika.

Hidingoto 13:45

Masara o Yahudi ma nyawa manga hihira ma kotaka gea ka de yamake manga ngoe-ngoe abe yotoomuino de manga hiningaka aomangoka de o daleana. Ho manga hihira gea yadoa-doana ona yahinootoika, de abe o kia dika yotemo de ma hihira ona yoluku manga demoika hiadono o ribuutu ka ihikaika yotobadiai.

Roma 10:21

Masara nako Ma Jou ai demo abe ma titi o Yahudi ma nyawa manga hininga, gea duru imakohowono. Angamoi ngaro Ma Jou duru woigo la onangoo waduhunu abe imaketero hoka ona ko o Yahudi ma nyawaua waduhunu, masara to Una ai nyawa gea ka iwioluku Unangika. Abeika Ma Jou ma hirete ai demo ma dodihiraino abe Una wotemo wato, “Ngohi naa ma deka-dekanuku tahoko onangika la tato ona yolio Ngohino la tadafongoli, masara ona gea ka ihikaika ihilawana de manga hingounu Ngohino ko iwa.” Hokogea ma dodihiraino ihitulihukuoka ma titi o Yahudi ma nyawa iwioluku Ma Jouika, de hokogenangoo ma oraha naa naga, angamoi to ona manga hininga ka hokogea dika Unangika. Ho gea ka idadi ngone hohioriki abe o Yahudi ma nyawa barikua ona yoihenoka de ihiorikoka o Kristusu ai hingahu ma demo abe o Abari ma Rorahaiino, masara ona ka yoluku yangaku enangika. Ho gea itararono abe duru manga ngolukino dika ma titi hiadono ona ko manga ngoe ko yamakeua Ma Jou ai duduhunu manga howo-howonino.

Ibarani 12:25

Ho ngone naa kiani duru homahidodiai la ufa hiadono hiolukoli Ma Jouika. Angamoi gea Ma Jou Una ma hirete abe wihidingoto ai Ngofaka o Yesusu la Unangoli wonadofanga de wonatemo-temo ngoneino abe ma titi Ma Jou ai Demo-demoino. Ho ngone naa homahidodiai la ufa hiadono hiolukoli o Yesusika angamoi gea tanu Ma Jouikaoo hioluku. De nako hiadono hiolukoli Unangika, gea ahao kiani nanga hohowono hamake Unangino. De gea hohioriki abe onagona dika iwioluku Unangika ahao yamake manga hohowono angamoi ngaro ma dodihiraka ma hokogea idadi. Abe ma dodihiraino de o Yahudi ma nyawa yamake manga hohowono ma titi ona yoluku yaniiki Ma Jou ai demo abe o Musaka de aino wadofanga onangika. De hokogea to ona manga hohowono ma dodihiraino, ho hongoli ngone naa utuohi kiani hamake ai hohowono nako ngone ko haniikua Ma Jou ai demo naa moioli abe nanga Baluhu o Yesusu wohiboa o Horogaka de auku de wadofanga ngoneino. Angamoi nanga tofora o Musa una o duniaka dika ma nyawa, masara nako o Yesusu, Una gea o Horogaka de wauku woboa. Ho nako hiadono ngone hiolukoli Unangika, gea ahao nanga hohowono inadaene ngoneuku.

Ibarani 9:15

Masara nako ngone o nyawa, ngone hatilakuroka ai behehongo ihira-hiraika. Ho mangale ma titi gea de kiani Una wohonenge la genangino wonabangu ngone ma titi nanga howo-howonino gea. De gea ma oraha wonabangu de wodadioka Una abe wohiaturu nanga behehongo ma hungi. De Una wodadioka to ngone nanga Hidemo Ma Jouika abe o behehongo ma hungiokali wonahidemo. De gea ko ma titiua nanga howo-howono dika wohiaturu la ko iwaka, masara gea wohiaturoo la ngone mata-mata abe Ma Jou wonaahokoka nanga ngongakuino, ngone ahao ka idadi hamake nanga utumu abe ma dihiraino de Una wonahibehehongoka. Angamoi ma dodihiraino de Ma Jou wonahibehehongoka ma utumu ma ngoe ngoneino wato ahao wonahidoaka, ho naa ma titi o Kristusino de wohiaturu la nanga utumu gea hakokimake! De nanga utumu gea ka jai-jaiua dika, masara gea itongohono ka hiado-adonika.

Himatoko 22:17

De naa Ma Jou o Womaha de onangoo abe yodadioka o Domba ma Ngofaka ai darunu, ona mata-mata yakokiahoko o nyawaika ato, “Abeika niainohi!” Ho onagona dika abe yototoihene ma demoino naa kiani onangoli yahoko o nyawa utuika ato, “Abeika niainohi Unangino la niwiniiki!” De gea onagona dika abe manga ngomaha yodudungu de yoigo o wowango ma akere yaokere, ona gea ka idadi yoboa dika de o wowango ma akere gea ngaro ufa de yofangu ma ka idadi yomale dika de yaokere la ona gea yowango.

1 Samuele 9:13

De kiani ngini nimataiti done ko niwidaenua angamoi itigioka ma oraha naga o ngolo-ngolomo o huhuba ma tauoka abe kiani una waniiki daku o lokuoka. Abe nako manga ngolo-ngolomo ma inomo una ko wahiowauahi de ona abe yahokino ko idadiuahi yaolomo manga huhuba ma inomo gea. Ho nako nimataiti una ko wodoauahi o huhuba ma tauiye de ka idadi nimakamake de una gea.” Hokogea manga higaro o Saulu de ai dodiawoika.