Matiusu 13:3 - Ma Jou ai Demo-demo o Totobelohoka

³ De naga ma titi ma ngoe o Yesusu wadotoko o nyawaika abe wapake o hiketero ma ade-adeino. De naa moi ai ade-ade abe wadotoko ona manga ngoe-ngoeika, wato, “Abeika nitotoihene ahi ade-ade naa. De naga womatengo wotobaredi-redi woiki wohibarihi o bibiti.

Matiusu 13:3 Iomraidhean Croise

Habaku 2:6

Masara ko itedekanuahi de marai manga musu onangoli ka idadi yamia-mia onangika. Abe ona ahao yotemo ato, ‘Naa ma duruino de ngini nimagora dika o nyawa manga kiahonanga la ka idadi ti ngini nia kaya itou-touniye. Masara nia datoro gea ko ihikaikaua angamoi ahao kiani naga to ena ma dodogumu. Abe itigioka ma oraha abe nia hininga ma huha iboaino de duru inihikangela nginika.

Matiusu 13:4

Ho o bibiti ma gogiriaka wohibarihi de utu ipuraraha ka o ngekomuku dika, de o totaleo iboaino ho aolomoka.

Matiusu 13:53

De o Yesusu wadotoko ibooto ai hiketero ma ade-adeino de ahao genangoka de wosobo,

Matiusu 22:1

Ka de gea ipaha de o Yesusu wahingahu onangika o hiketero ma ade-ade moioli. De Una wotemo wato,

Matiusu 24:32

De o Yesusu wogila-gilali wahitararono onangika wato, “Abeika tohiketero. Nako o gogilioro ma gota, ka idadi genangino homadotoko, e? Abe nako ma jaga-jaga iboleoka de ihokaka, gea ka de hamake de hohiorikoka hato, ‘O, marai itigioka o hiwara ma oraha, angamoi hamakeoka ma dodunguu.’

Maruku 12:1

De ahao o Yahudi ma nyawa manga hohidimono gea nagahi o Yesusoka de Una womulaenge wodotoko abe wahiketero ona, wato, “De naga womatengo o angguru ma redi wodatomo. Wodatomo ibooto de wohigilolitino wadaduhu ma redi gea. Wadaduhu ibooto de ahao wofaiti o humu moi abe o angguru ma teongo ahao ihahuru genanguku. De ahao moi wodiai abe o redi yogoa-goana manga tau. De gea mata-mata wabootoka de o nyawa yamuruono naga ahao wahewa la wato ona yoogoana to una ai redi gea. De o redi ma dutu de yogoa-goana yomahiketehibehehongo la nako adonoka ma oraha abe ahao amake o redi ma hasili, de ahao ma hasili gea yaregu la ahao ma hononga iwihidoaka o redi ma dutuika. De yomahiketehibehehongo ibooto de ahao o redi ma dutu wosoboka de wotagi-tagi o tonaka utuikali.

Maruku 12:12

De ma hohidimono gea duru ihiorikoka abe o Yesusu ai hiketero gea tanu wahiketero ona, abe ona iwioluku Unangika. De tanu ona ato ma oraha gea dika de o Yesusu iwitaokino masara ko idadiua angamoi yamodongo o nyawa yowoe-woeika hiadono ka iwikokinoaika dika ho ona ka yokokilio dika.

Maruku 3:23

Ho o Yesusu wahokino ona abe yotobadoto-dotoko o Musa ai Paretaino de waleha onangika wato, “Ho mode o Ibilihi yahititoko to ena ma hirete ma dodiawo o nyawaino?

Maruku 4:13

De o Yesusu wotemoli onangika wato, “Sarakia ahi hiketero kangano abe wohibarihi o bibiti, gea ko nihiorikua ma titi? Nako gea done sarakia o hiketero ma ade-ade utu de ahao nihioriki ma titi?” Hokogea o Yesusu wataere onangika de ahao ai hiketero ma ade-ade wahitararono onangika hokonaa la duru ihioriki ma titi.

Maruku 4:33

Hokogea o Yesusu wadotoko o nyawaika, abe duru kohangoe o hiketero wapake. De gea o nyawa wadotoko hiadono o nyawa manga hininga duru aomangoka de ai demo. Ho nako nagahi to ona manga hiakunu la yoihene, gea o Yesusu ka wadotokohi onangika.

Lukasa 12:41

De o Yesusu wadotoko ibooto ma titi ona kiani yomahidiai de ahao o Peturusu wileha Unangika wato, “Mia Baluhu, ani hiketero ma demo gea nomihidumutu ngomino dika abe minitobanii-niiki eko o nyawa mata-mataikaoo ma dumutu?”

Lukasa 8:10

De o Yesusu wapaluhu onangika wato, “Ma dihiraino o nyawa ko ihiorikuahi Ma Jou ai dogogono abe ma titi hokokia Una wahikoano ai nyawaika. Masara ma oraha naa de Una winihimatoko ai dogogono gea ka nginika dika abe nidadi ahi nyawa la wato ngini naa ka idadi nihioriki. Masara ona abe ka iwiporetohi Unangika, borotaua de ona ihioriki abe ma titi hokokia ai nyawaika wahikoano Ma Jou. Ho gea ma titi hiadono Ngohi tadotoko o nyawaika de o hiketero ma ade-ade, la ona abe ka iwiporetohi ahao idadi onangika duru imaketero hoka ma dihira Ma Jou wotemoka wato, ‘Ona gea barikua yomalega-lega de manga lako ahi datorino masara ko ihiorikua ma titi genangino, de barikua ona yotoihene de manga ngauku to Ngohi ahi demoino masara ko ihiorikua to ena ma titi.’” “Hokogea Ma Jou ai demo ma dihiraino, de duru hokogea idadi onangika abe yotoihene ahi hiketero ma ade-ade, angamoi ko yakunua yataoko ma titi genangino.”

Yohanese 16:25

De o Yesusu womahingahuohi ona iwitobanii-niikika wato, “Ngaro Ngohi ma dihiraino ma ngoe o hiketero de o demo ma dulu tapake, ma itigioka ma oraha de o hiketero ko tapakeokaua la tinidotoko nginika. Ho ahao tinihingahu ma titi ahi Baba de tapake dika o demo abe duru igapanga niataoko ma titi.