Matiusu 10:2 - Ma Jou ai Demo-demo o Totobelohoka2 De naa ona yangimoi de yahinooto manga roma-romanga abe o Yesusu wairiki de wahitagongo la yodadi to Una ai hidingoto ma nyawa. Abe una wohira-hira gea o Simono abe iwihiromangoli o Peturusu. De ahao naga o Andareasa abe o Peturusu ai dodoto, de ahao nagali o Yakobusu to Sebedeusu ai ngofaka, de nagali o Yohanese abe to Yakobusu ai dodoto. Faic an caibideil |
De ma moiuku o Yesusu wotagi-tagi o Galilea ma akere ma ngooto ma ngigorino de genangoka naga Una wamakeika yahinooto o ria-dodoto. Abe ma riaka gea ai romanga hinooto, abe moi iwihiromanga o Simono, de ai romanga moioli o Peturusu. De ai dodoto ai romanga o Andareasa. De ona yahinooto yomatobalingi-lingiri o nawoko la genangoka yomamake o tiwi, de abe ma oraha o Yesusu wamake de ona manga gogiriaka manga homa yodotumo o akeruku.
De o Yesusu wogila-gilali de abe ona yahinooto iwinii-niiki, ma ko yokurutikauahi de yamakeoli naga o ria-dodoto yahinooto, de ona gea manga romanga o Yakobusu de o Yohanese, to Sebedeusu ai ngofa-ngofaka. De gea ona yahinooto yogogerukuoka manga ngotiri ma amo-amoko ma goronaka de manga baba, abe ona mata-mata manga homa ihidodiai genangoka. De onangoo wahoko onangika la onangoo ka idadi iwiniiki o Yesusu.
De wotemo ibooto de yogila-gila yohupu o Yerusaleemino de youtiuku ma dolaka, de ahao yodoali de yomahiadono o Saitunu ma lokuiye. De genangoka wogogeruku o Yesusu de wamake Ma Jou ai Tau doka ma dola ma honongaka. De o Peturusu, o Yakobusu, o Yohanese, de o Andareasa yaino Unangino la yamotoa dika de ahao iwileha ato,
De ipaha de ai hidingoto ma nyawa abe nengokadauino de o Yesusu wahidingoto la yahingahu-ngahu o nyawaika de yahitogumu manga popanyakeino, ona gea yolioino Unangino. Yolioino de iwiade-ade mata-mata abe idadi manga dodagi ma goronaka. De ahao ka ona dika yomakiniiki de o Yesusu abe yoiki o Besaida ma kapongika.
Ka de gea mamake de o ngo Maria gea momapopaata moiki mahingahu o Peturusu de una winii-niiki womatengoli, abe una gea duru o Yesusu widora. Ho ka de moboa manga ngiika de mahingahu onangika mato, “Iwitohikoka! Gea nanga Baluhu ai honenge iwigorakoka ai lungunino de ko mihiorikua o kiaka iwikelenga!”
Naga ona o Yesusu iwitobaniiki yatumidi yomatoomuino o akere ma ngooto ma datekoka. De ona abe naga yomatoomuino o Simono Peturusu, de o Tomasa abe iwiahoko o Hago, de o Natanele abe ai kapongo o Kana ho una o Galilea ma nyawa. De nagali o Yohanese de o Yakobusu abe manga baba o Sebedeusu, de ona yahinootoli o Yesusu iwitobaniikino.
Ma oraha gea o Yesusu de o Peturusu yotagi-tagi yomakiniiki de o Peturusu womadogilioro de wimake ai dodiawo abe duru o Yesusu widora naga wahidoduruino. Naa una abe ma futu gea yomakutuono yolomo de una naga womahiiduiye hiadono womahitangonika o Yesusu ai aluoko de wileha wato, “Ahi Baluhu, gea onaguna wonihidoaka ani musuika?” Ho naa una gea abe o Yesusu de o Peturusu wahidoduruika.
De yomahiadonoka manga dodogumu ma tauika de yodoa ma lape hinootoiye angamoi genangoka manga ngi. De manga doomuoka gea naga o Peturusu, de o Yohanese, de o Yakobusu, de o Andareasa, de o Filipusu, de o Tomasa. De nagali o Batolomeusu, de o Matiusu, de o Yakobusu to Alefeusu ai ngofaka, de o Simono abe una o Seloto ma dodoomuino ma nyawa, de nagahi o Yudasa to Yakobusu ai ngofaka.
De yomaniata ipaha de ahao yodiai moi manga biaha abe yomakokamaihi la genangino de ka idadi ihioriki Ma Jou ai hininga. Ho yodiai manga gogiriaka de genangino ihidumutu o Matiasa ai romangika, ho una abe iwigoraka la unangoo wodadi nanga Baluhu ai hidingoto ma nyawa abe womahidogo ona yangimoi de yamoiika.
De gea ai hidoaka ma owa abe wonahidoaka ngone ai garejaino, gea o nyawa wahidoaka ngoneino abe ona gea de manga hiakunoka. Abe ona utu o Kristusu wairiki la ona yodadi to Una ai hidingoto ma nyawa. De naga utu Una wonahidoaka o garejaka ona abe yatobadofanga Ma Jou ai hingahu ma demo manga gogianongoru utuikali. Abe Una ka wobawili dika ai hingahu ma demo to ona manga hiningaika la ahao yadofanga. De naga utuoli wahidingo-dingoto la o Abari ma Rorahai yatobahingahu-ngahu o nyawa utuika. De naga utu Una wonahidoaka la ona inatobagoana de inatobadotoko ngone ai gareja ma nyawaino.
Ahi gogianongoru abe ngini nidadioka Ma Jou ai debi-debini ma nyawa de abe nginioo hoka ngohioli abe ngone mata-mata wonaahokoka nanga ngongakuino la hakokimake o Horoga. Ahao kangano abe ahi demo ma goronaka de tinihitararonoka abe nanga Duduhunu Una gea ka wakunu wonaduhunu ngoneino, ho abeika hingano-nganonohi ma titi Una gea. De abe naa o Yesusu tihiromangoli tato Una gea Ma Jou ai hidingoto ma nyawa ngoneuku la ai hingahu ma demo wonahingahu-ngahu ngoneino. De Unangoo to ngone nanga Hidemo abe ka Unangohi wokokurutiye nako de o hidemo utu.
Ahi gogianongoru abe ngini nidadioka Ma Jou ai nyawa. Ngohi naa o Peturusu to Yesusu Kristusu ai hidingoto ma nyawa, abe Una wohihidingoto ngohi la to Una ai abari tahingahu-ngahu o nyawaika. De naa ngohi tinihurata nginika abe ngini o dionikino ma nyawa abe nimahikokabarihika o tonaka utuika. Abe ngini naga utu nimanoa o Pontusu ma tonakoka, de naga utuoli o Galatia ma tonakoka nimanoa, de utuoli o Kapadokia ma tonakoka nimanoa, de utuoli o Asia ma tonakoka nimanoa, de abe ngini utuoli o Bitinia ma tonakoka nimanoa. De ngohi tinihioriki abe ngini homoi-homoi nimanoa, gea imaketero hoka o dionikino ma nyawa dika nimanoa nia ngi homoi-homoiika.
Ahi gogianongoru abe ngone o ngongaku moioka. Ngohi naa o Simono Peturusu to Yesusu Kristusu ai huhuloko de ai hidingoto ma nyawa, abe Una wohihidingoto ngohi la to Una ai abari tahingahu-ngahu o nyawaika. De naa ngohi tinihurata nginika abe ti ngini nia gogere nanga ngongakuoka, gea ka imaketero dika de to ngomioli naa mia gogere abe ngomi to Una ai hidingoto ma nyawa. De mangale ma titi o Yesusu Kristusu Una duru wototiai ai hiningaka ho ko wonairikua abe ngone homoi-homoi hiboringakuoka Unangika, de gea ngone mata-mata haborimakeoka nanga ngongaku ma wowango Unangino. De abe o Yesusu Kristusu, Una gea to ngone nanga Jou de nanga Duduhunu.
Ahi gogianongoru o Yesusu Kristusoka. Ngohi naa ti ngini nia dimono nanga ngongakuoka. De naa ahi hurata tohidingoto abe ngona ahi dodiawoika de to ngona ani ngofa-ngofakikaoo. De igoungu abe ngona Ma Jou woniirikoka la wonihidadi to Una ai ngofaka. De ngini mata-mata duru tagoungu tinidora nginika, masara ka ngohiua dika tinidora, ma naga utu nanga gogianongoru manga ngoe abe onangoo ihiorikoka ma dodotoko ma gou-goungu, de onangoo mata-mata duru inidora nginika.
O buku naa ma dolaka naga o Yesusu Kristusu ai himatoko abe Ma Jou wihidoaka Unangika ma titi hokokia abe ko itedekanokaua de kiani idadioka. De gea o Yesusu Kristusoli wihidingoto ai malaekata womatengo abe ngohi to Una ai gilaongino la ai malaekatino gea de ngohi tamake ma himatoko. De gea ihihimatoko ngohino la ahao ngohioli ka idadi tadofanga ma himatoko naa abe to Una ai gogilaongo utuikali.
Ngohi naa o Yohanese ti ngini nia gianongoru o Yesusoka. De mangale ngohi de ngini nanga borigogere naga Unangoka, ho ngone mata-mata naga nanga kangela abe hoborihimanga. De genangino tohioriki abe ngini de ngohi homahiketehigogao angamoi ngone mata-mata hodadioka to Una ai kokawaaha o doomu moioka. De ngohi tohiorikoo abe ngone homaketero ma titi abe ngaro o kangela ma goronaka masara ngone ka homatongohono dika ma dorouino. De naa tomahingahu nginika abe ngohi nengokadau ihitaokino de ihihidingoto nenangino la ihihohowono ma nuuhino naa abe ma romanga o Patomos. De gea ngohi ihitaokino de ihihohowono ma nuuhino naa ma titi tahingahu-ngahu o nyawaika abe Ma Jou ai Demo-demo de abe o Yesusu ai ade-ade gea duru tahigaro la tato yangaku enangika.
Ho ngini mata-mata o Horogaka ngaro ka nigogaragoka ma titi o Babele ma kota ibinaahaka! De ngini abe ma dihiraino Ma Jou winihidadi ai hidingoto ma nyawa de abe utuoli ai uru ma dodofanga, de ngaro ngini utu mata-mata abe nidadioka to Una ai debi-debini ma nyawa, masara ngini mata-mataika ngaro ka nigogaragoka angamoi naa Ma Jou winihibalahoka ngini. De gea Ma Jou wahohowonoka o Babele ma nyawaika abe hokokia imakiniiki de to ona manga datoro ma dorou nengokadau abe yodiai nginika.