Matiusu 1:6 - Ma Jou ai Demo-demo o Totobelohoka

⁶ De ukuoli o Isai ai ngofaka abe to ngone nanga koano ma dihiraino o Dautu. De hokogea o Yesusu ai totofora abe o Abarahaamoka de auku ka hiadono o Dautuku. De naa tinihingahu ma titi to Dautu ai totoforauku o Isiraele ma nyawa abe yolape-lapeuku ka hiadono ma oraha o homoa ma nyawa yangohama de yataoko. Abe ma oraha gea o Isiraele ma nyawa yodadioka o nyawa manga gogilaongo de yaoika manga dutu manga tonakoka abe gea o Babele ma tonakoka. Ho nanga koano o Dautu ai ngofaka gea ai romanga o Saloomo, abe ai ngofaka ngoi meme gea mofaooka angamoi muna ma dihiraino modadi to Uria ngoi fekata masara una wohonengoka.

Matiusu 1:6 Iomraidhean Croise

2 Samuele 11:3

De o Dautu wihidingoto ai gilaongo womatengo la woiki woleha-leha o nyawaika abe muna gea o ngo kia. De una wolio o Dautika de wotemo, wato, “Marai muna gea o ngo Baseba abe ami baba o Eliama de ami rokata o Uria de una gea o Hete ma nyawa abe wodadi to ngone nanga tentara.”

2 Samuele 23:1

De naa adonoka abe o Dautu, o Isai ai ngofaka, una iwiperekioka. De o Dautu ai wowango ma goronaka Ma Jou wigorakiye abe hiadono ka unangohi wokokurutiye o duniaka. Ma Jou, abe ma dodihiraka o Yakubu womahijou Unangika, Una gea abe wiiriki o Dautu la wahikoano o Yakubu ai totoforauku. De una wososawaro wonyanyi de wodiai o nyanyianga duru ihohailoa ma ngoe abe yahiutumu de yahisanangi o Isiraele ma nyawaika. De hokonaa o Dautu ai behehongo ma demo ma baha:

1 Kokoano 15:5

De hokogea Ma Jou wohiaturu angamoi o Dautu ai wowangoka wodiai abe duru wihisanangi Ma Jou o Yawe de una wotobahingounu Ma Jou o Yawe ai behehongika ka hiadono ai wowango ma bahaika. Masara naga moi o Dautu wodiai abe duru ko wihisanangiua Ma Jouika de gea ma titi ai howono o Uriaika, o Hete ma nyawa gea.

1 Tawari 28:5

De Ma Jou o Yawe wohihiowa de o ngofaka o nau-nauru ko manga ngoe de onangino wiiriki ahi ngofaka o Saloomo la una wohituruuru. Ho o Isiraele ma nyawa, abe Ma Jou o Yawe wonahikoano ngoneino, ngone mata-mata ahao o Saloomo ai kuahaka abe una Ma Jou wiirikoka la wogogere o Isiraele ma nyawa nanga koano ma kaderaka.

Yesaya 11:1

Nanga koano ma dihiraino o Dautu de ai ngofa-ngofakuku de ai totoforauku ona yomaketeturuuru yodadi to ngone nanga koano, masara ahao naga ma oraha abe ko hokogenangokaua. De abe ma oraha o koano ma kuaha agoraka o Dautu manga tauoka de aino, gea imaketero hoka o gota ma amoko atolangoka de ma hou to ena ma agere dika. Masara dokenangikali de ahao naga ma oraha abe manga agere gea itorioli. De gea ma titi abe o Dautu ai totoforaukuino de naga womatengo woboa de unangoli wodadi wokoano.

Matiusu 1:5

De ukuoli to Salamono ai ngofaka o Boasa, abe ai ngofaka ngoi meme gea o ngo Rahaba. De ukuoli to Boasa ai ngofaka o Obede, abe ai ngofaka ngoi meme o ngo Ruutu. De ukuoli to Obede ai ngofaka gea o Isai.

Roma 8:3

De ngone hohioriki abe Ma Jou ai hininga ngoneino gea la ngone howango hototiai to Una ai himangoka. Masara ngaro to Una ai Pareta wonahidoaka masara ngone ko hakunua haniiki enangika ma titi nanga badanga imanoa o howono ma kuahaka. Ho ai Pareta gea tanu ko inaduhunua la howango hototiai. De gea ma titi hiadono Ma Jou Una ma hirete wonaduhunu ma titi ai Ngofakino. Abe Una wihidingoto to Una ma hirete ai Ngofaka ngone o nyawauku de wihidoaka la to Una ai badanga ma rupa imaketero abe hoka to ngone o nyawali nanga badanga ma rupa. Masara naga moi abe duru imakohowono. Abe to ngone nanga badanga gea imanoa o howono ma kuahaka, masara to Una ai badangoka gea de ko iwa o howono Unangoka. De gea Ma Jou wihidingoto ai Ngofaka gea ngoneuku la wohibinaaha o howono ma kuaha to ngone nanga bada-badangoka. Ho mangale ma titi to Una ai Ngofakino de Ma Jou wohikalaka o howono ma kuaha ngoneoka. De hokogea wodiai angamoi ma dodihirainohi de Ma Jou ai hidee nagau la wato ngone howango hototiai abe nanga datoro duru imakiniiki de abe to Una ai Pareta ma demo ma goronaka. Ho naa ngone onagona dika abe ngone ko haniikokaua nanga badanga ma hafini ma dorouika de hinii-niikoli Ma Jou o Womahika, gea ngone abe ka idadi howango hototiai to Una ai himangoka. De gea mangale ma titi Ma Jou o Womaha ai karajaangino hiadono ngone ko hamakeokauali nanga hohowono Ma Jouino.

Ruutu 4:22

De o Obede ai ngofaka o Isai, de o Isai ai ngofaka o Dautu.

1 Samuele 16:1

De ahao Ma Jou o Yawe wileha o Samuelika, wato, “Samuele, hokokia ma dekanohi de ani hininga ma huha nihininga o Saulika? Ngona kiani nodafongo gea abe Ngohi taputuhoka abe nako o Isiraele ma nyawa manga koano, una tiolukokau. Ho naa nomahidiai noiki nihitunguu unangika abe tiirikoka la tihidadi o koano abe o Saulu ai duruuru. Ho naa kiani ani minya ma ngi o domba ma nauru ma tatadukino naomanga de o debi-debini ma minya de noiki daku o Beteleheeme ma kotaiye. Abe genangoka kiani nitutumu womatengo ai romanga o Isai angamoi to una ai ngofa-ngofakino naga womatengo gea abe tiirikoka la una gea tomadingakoka Ngohino la wodadi o koano.” Hokogea Ma Jou o Yawe ai behehongo o Samuelika.

1 Samuele 17:12

De o Dautu abe o Isai ai ngofaka, abe o Efaraata ma doomuino, una o Beteleheeme ma nyawa abe o Yehuda ma dutuino. De o Isai gea ai ngofaka o nau-nauru yatufange de ma oraha o Saulu wodadi o Isiraele ma nyawa manga koano de o Isai duru iwiperekioka.

1 Samuele 17:58

De ahao ma koano o Saulu wileha wato, “Ngona naa done ani baba onaguna?” De o Dautu wipaluhu ai koanoika wato, “Ngohi naa to ani duduhunu o Isai ai ngofaka, de una gea o Beteleheemoka ma nyawa.”

1 Samuele 22:8

De bote ena gea ma titi hiadono nihihidee itorou ngohino! Angamoi abeika, nengokadau ma oraha una gea de to ngohi ahi ngofaka yomahiketehibehehongo de ngini ko moiua nihihingahu ngohino! Ho itararono abe nia hininga ko itagiua ngohino. De o Dautu una gea ma dihiraino de wodadi ahi duduhunu, masara ma oraha naa de ahi ngofaka wihigaro o Dautika la ka idadi o Dautu wohihagogono de wohitoma! Masara ngini naa ko moiua nihihingahu ma titi manga hidee gea!”