Gegetongo 27:21 - Ma Jou ai Demo-demo o Totobelohoka

²¹ De ma oraha ona yoperelu ihioriki abe to Ngohi Ma Jou o Yawe ahi hininga, abe o kia toigo ona yodiai, gea kiani o Yosua wileha o Eleasarika. De una ka idadi wihingahu to Ngohi Ma Jou ahi mau o Yosuaika. Abe o Eleasara ka idadi wapake o hidemo ma kiahonanga o Urimi de o Tumimi abe ka ihikaika imanoa ai alu ma dadatoko ma juberaka. To ena ma hiaturu tinihidoakoka abe kiani waniiki. De o Urimi de o Tumimi gea ihitunguu la wohioriki to Ngohi ahi mau nginika. De gea angamoi o Eleasara una ti ngini nia hidemo Ngohino ho ahi hininga tihimatoko unangika ma oraha wapake o Urimi de o Tumimi gea. De ahao unangoli wihingahu o Yosuaika.” Hokogea Ma Jou ai hiaturu abe wihingahu o Musaika.

Gegetongo 27:21 Iomraidhean Croise

Huhupu 28:30

De naga o hitararono de o hitotiai ma dodunguu ma kiahonanga abe enangoo kiani o Harunu wonoa ai alu ma dadatoko ma juberauku. Abe ma kiahonanga gea una de ai ngofa-ngofaka yapake la ihitunguu nako to Ngohi ahi hininga adaene eko ko adaenua ma oraha yomaputuhu manga hiaturu o Isiraele ma nyawaika. Ho ma oraha o Harunu wowohama Ngohi Ma Jou o Yawe ahi himangino de o hitararono de o hitotiai ma dodunguu ma kiahonanga gea kiani naga to una ai aluoka. Hokogea o Harunu ka ihikaika wao ma dodunguu ma kiahonanga gea ma oraha una naga Ngohi Ma Jou o Yawe ahi himangoka.”

Gegetongo 27:17

Ona yoperelu manga hihira hoka o domba ma gogoana abe wakunu wahihira la ngaro o kiaika dika yoiki ma ka idadi wahigilioli manga ngiino. De una wahimagaweoo onangika ma oraha nenangoka yosobo la wao wahingohama ani behehongo ma tonakika gea. Ufa hiadono to Ngona Ma Jou o Yawe ani nyawa yaika yaino hoka o domba ma duduono abe ko iwa ma gogoana.” Hokogea o Musa ai dora itagi ai nyawaika.

Gegetongo 27:2

Ho ona yamotoa yomaokoino o Hikamake ma Tau ma himangoka, de yomarihimangino de o Musa de o Eleasara manga hidemo ma nyawa Ma Jouika, de nagali ma kokawaaha manga hihira mata-mata genangoka. De ona yamotoa yomahingahu ma hihiraika gea ato,

Gegetongo 27:20

De ngonali Musa ahao nahingahu onangika abe to ngona ani kuaha imaturuuruoka o Yosuaikali la ona ahao iwihingounu unangika.

Gegetongo 27:22

Ho o Musa wodiai mata-mata gea duru imaketero hoka wihibehehongoka la Ma Jou o Yawe ai mau waniiki. Ho manga hidemo abe wahidemo Ma Jouika, o Eleasara, de o Yosua ahao o Musa wao o Isiraele ma nyawa manga doomu ma himangika la wahiketehirihimanga de manga doomu ma amokika.

Gegetongo 27:5

Ho manga demo gea yoihene de ahao o Musa woiki Ma Jou o Yawe ai himangino de wileha ma titi manga gurubungu gea.

Higalioli 31:3

Masara nako Una gea nia Jou, itigioka ma oraha abe Una ma hirete womahihora dokaika la ka idadi ngini niwihidoduruika Unangika. Abe Una ahao wahikala o nyawa-nyawa gea de wagoraka ma tonaka gea onangino la nginioli winihigogere genangoka. De abe ma titi ahi duruuru o Yosua, una ahao winihihira-hira la nimakutuono nimahihora doka ma akere ma honongaika, abe imaketero dika hoka ma dihiraino Ma Jou winihibehehongo nginika.

Higalioli 33:8

De o Musa ai hiowa ma demo ma titi o Lewi ma nyawa hokonaa, wato, “Ma Jou o Yawe, Ngona nahidoakoka o Urimi de o Tumimi o Lewi ma nyawaika, abe o mai-maihi ma kiahonanga gea o tagongo moi duru ma hohailoa, de ma tagongo gea nahidoaka ani hidemo ma nyawaika abe yagou-goungu ininiiki Ngonaika. De ma dihira ani nyawa mata-mata gea natailako ma ngioka abe ma romanga hinooto, abe ihiromanga o Hitaili de o Ribuutuino, angamoi genangoka ona manga ribuutu Ngonaika duru o fara moi, de duru inihitaili ma oraha inihigurubungu ma titi o akere.

Yosua 9:14

De o Isiraele ma nyawa yoihene manga demo ipahaino de ahao yatailako manga bilaono gea. De yatailako ibooto de yahidutugaika dika ato bote yagou-goungu manga hingahu ma demoino. Masara gea ko iwilehaua Ma Jou o Yaweika ma titi o homoa ma nyawa manga gogahoko gea.

Hihira 1:1

Abe ma oraha o Yosua wopahaka de ahao o Isiraele ma nyawa iwileha Ma Jou o Yaweika ato, “Koaho onagona ngomioka abe irahai yohiraika la yoiki yabaata o Kanani ma nyawaika gea?”

1 Samuele 14:19

Masara una de o Ahia ka manga gogiriakahi yomakoketemo de doka o Filistina ma nyawaka de yodogo-dogo yolilifanga. Ho o Saulu wihulokoli o Ahiaika wato, “Ibootohi, angamoi nanga oraha ko iwaka! Koaho ngone mata-mata hosobo dika la homataiti haparangi o Filistina ma tentaraika!”

1 Samuele 23:9

Masara ipahaino de o Dautu woihene abe o Saulu naga iwihidee unangika, ho wiahoko o Abiatara unangino de wihuloko wato, “Kiani naoino o efodo gea la ka idadi hohioriki Ma Jou ai hininga!” De o Abiatara waoino ma baju ma rorahai gea o Dautino.

1 Samuele 28:6

Ho o Saulu wileha Ma Jou o Yaweika wato, “Done hokokia koaho ngohi todiai?” De ngaro hokogea wileha masara Ma Jou duru ko wipalu-paluhua o Saulika. Abe ko wohidoakua o himatoko o nyawaika la genangino de o Saulu ka idadi wohioriki ai hininga. De ngaro Ma Jou ai uru ma dodofanga o Saulu ai leleha gea iwidofanga Unangika masara ko wopaluhua. De ngaro manga hidemo ma nyawa una waumo o Urimi de o Tumimi gea la genangino de ka idadi ihioriki Ma Jou ai hininga abe koaho hokokia o Saulu wodiai masara genangoo de Ma Jou ko wopaluhua ai leleha.

1 Samuele 30:7

De ahao o Dautu wihuloko manga hidemo ma nyawa Ma Jouika o Abiatara wato, “Abeika ngona naoino ani baju o efodo gea la ka idadi hohioriki Ma Jou ai hininga ma mau.” Ho o Abiatara wao ma efodo gea o Dautino.