De o Saulu de ai ngofaka o Yonatana, ngone duru hahigiriiri onangika, De manga romanga duru ikokurutiye ngoneoka. De ona yahinooto ka ihikaika yomakiniiki manga wowango ma dodagioka, De ngaro ma oraha manga hohonengoka masara ko yomakitingakokaua. De ona gea nako yakiniiki manga musuika de duru de manga hiapotoka. Abe nako ona de o kawihi masara ka onangohi yohiapoto. De onangoo duru de manga bobuturungoka. Abe nako ona de o singa ma boki masara ka onangohi duru yoputurungu.
Filiipi 4:8 - Ma Jou ai Demo-demo o Totobelohoka8 Ho naa, ahi gogianongoru o Yesusoka, ma titi moioli tato naa tinihibehehongo. Doka nia hiningaka kiani ka ihikaika niongano-nganono o kiaka abe ma gou-goungu, de o kiaka abe naga de ma horomatioka, de o kiaka itiai, de o kiaka abe ko iwa ma howono, de o kiaka ihohailoa, de o kiaka abe ngone mata-mata hohiromanga gea irahai, gea mata-mata kiani niongano-nganono. Abe o kia dika naga hohiromanga duru ma rorahai de duru ma owa, genangika dika ka ihikaika niohohininga. Faic an caibideil |
Filiipi 4:8
67 Iomraidhean Croise
Ho ona yomaputuhu la ahao yahidingoto o Yesusika o nyawa abe o doomu hinootoino. Abe ma doomu moiino to ona ma hirete manga nyawa abe yatobanii-niiki ona o Farisi ma nyawaika. De ma doomu moioli gea o Herodese ai nyawa yamuruono naga. De ko yahidingotuahi de yadotoko onangika abe hokokia ahao kiani iwileha o Yesusika. Ho ona yoiki iwitutumu o Yesusu de yoleha Unangika yato, “Mia Guru, abe Ngona minihiorikoka Ngona natobagou-goungu ani demoino. De minihiorikoo abe Ngona nomidotoko ngomino Ma Jou ai mau de enangoo duru nagou-goungu abe ngaro hokokia dika idadi. De Ngona duru ko nairikua o nyawa.
angamoi ami rokata o Herodese wigoana o Yohanese. Wigoana hokogea angamoi wato, “Una gea o totiai ma nyawa, abe hatoli ko iwa ai howono,” ho wimodongo o Yohanesika. De o Herodese duru woigo wotoihene ma titi o Yohanese ai demo-demo, abe ngaro doka ai hiningaka de duru ipusingi ma oraha woihene ai demo-demo gea masara ka idadiohi ma moi ma moi wotoihene.
De o Yesusu wotemo onangika wato, “Ngini naa duru nihitihira nia wowango ma datoro o kia dika naga la niato iti o nyawa inimake de inietongo ato ngini nitotiaioka ho nikurutiye. Masara o kia dika abe o nyawa yaetongo ato duru ikurutiye, gea duru itorou Ma Jou ai himangoka. Ho Una kiani winioluku nginika angamoi Una winihioriki ti ngini nia hininga ma dola ma dorou.”
De naga womatengo wogogere o Yerusaleeme ma kotaka ai romanga o Simeono. Una gea duru iwimagawe waniiki Ma Jou ai behehongo mata-mataika de to una ai wowango ma datoro itiai. De Ma Jou o Womaha naga o Simeonoka de ma dihira wihibehehongokau o Simeonika wato, “Ngona ko nohonenguahi de kiani nimakeohi de ani lako o koano gea abe Ma Jou wohibehehongoka.” Ho ka ihikaika o Simeono widodamaa ma koano gea abe o Isiraele ma nyawa manga hininga ma huha wagoraka angamoi ahao ma oraha gea de Una waduhunu manga hohowonino.
De ahao naga womatengo wingaku-ngakuoka abe woigo wikelenga o Yesusu ai honenge o lungunu ma goronaka. De una gea ai romanga o Yusupu abe o Arimatea ma kotaino woboa, de ai kota gea imanoa o Yudea ma tonakoka. De una o nyawa ma rorahai abe ai wowango wao itiai, de una wododamaa de ai hininga ma garago de wongano-nganono la idadi abe Ma Jou wahikoano ai nyawaika. De una gea wodadi o Yahudi ma nyawa manga hohidimono womatengo abe yotobauru-urusu o nyawa, masara abe ma titi ai dodiawo manga putuhu de manga datoro o Yesusika, gea o Yusupu duru ko womodekua.
“Abe naga o nyawa utu de manga dodotoko ma demo igoungu masara, utu ko igoungua manga dodotoko ma demo. Abe ko igoungua gea to ona manga dodotoko abe ma titi to ona dika manga tobahiorikino abe ona ma hirete yomadiai la ato o nyawa yagorakiye. Masara abe manga dodotoko ma demo duru igoungu, ona gea aniiki to Una ai mau abe wahidingo-dingotino. Ho o demo ma dutu dika abe duru iwigorakiye. De angamoi nako hokogea o nyawa yadotoko ahao, ona abe yoihene manga dodotoko gea, ko iwa manga hiningaka abe ka idadi manga guru gea iwitae.”
De ona ato, “To ngomi mia baluhu o Koroneliusu, una gea abe womihidingoto naangino. De mia baluhu una gea o Roma ma tentara manga haeke. De una ai wowango ma datoro itotiai, de duru wihoromati Ma Jouika. Ho o Yahudi ma nyawa ai kapongoka ona mata-mata duru iwisanangi de iwihoromati o Koroneliusika. Ho kanugono Ma Jou ai malaekata womatengo witemo unangika de wihuloko la una wonibehehongo ngonaika. De bari wonibehehongo angamoi kiani ngona nominiiki to una ai tauika de o hingahu ma demo notemo-temo unangika. Hokogea mia dodagi ma titi.”
Ho naa ngomi minihuloko miato koaho nanga gogianongoru yatumidi niairiki de niagoraka abe nia doomuino naa. De gea kiani niairiki o nauru abe o nyawa utu manga horomati itagi onangika de abe yalufungoka de Ma Jou o Womaha de o sosawaro. De niairiki ipaha de ahao ngomi miahitagongo onangika la onangoli yaleleani de yahikodoku o inomo o nyawaika abe naga de manga pereluoka, ho gea ko ngomiokaua mia tagongo.
Ho nanga wowango ma dodagioka de kiani hatobaniiki o dararono ma datoro dika abe gea ka ma rorahai dika nanga datoro. De gea kiani hokonaa nanga wowango. Abe ko idadiua haniiki o rame-rame abe naga genangoka o nyawa yadalu-daluku de gea hiadono manga badanga ma hafini ho ona ko yomahiparetakaua. De ufaoo ngone inatobadaluku eko homakitigi de abe ko nanga fekatua eko nanga rokatua. De ngaro naga utu o howono abe nanga badangoka hahowono ma enangoo ko idadiua haniiki. De ufa ngone homaketeribuutu eko homaketetaleana.
De nako o nyawa abe yotobadiai ma rorahai dika, ona gea ngaro ufa dika de yamodongo o popareta ma nyawaika angamoi ahao ko yamakeua o hohowono o poparetaino. Ho nako ngini nioigo la ufa niamodongo o poparetaika, gea kiani ma rorahai dika nitobadiai nia wowangoka. De gea ahao o popareta ona ko initaerua masara inihigiriiri nginika ma titi nia datoro ma rorahaiino. Abe gea ona tanu yodadi Ma Jou ai duduhunu nginika la hiadono ona ka idadi yodiai ma rorahai nginika. Masara nako o dorou ngini nidiai, gea de ahao ka idadi o poparetaika niamodongo. De gea itiai niamodongo o poparetaika angamoi ona igoungu naga de manga kuahaka la inihohowono nginika. Angamoi Ma Jou wahitagongo onangika la ona yahibalaha de o hohowono abe onagonaika yodiai itorou.
Ho ngaro ufa ma oraha naa de ngini nimitailako ngomi naa, angamoi o hitailako ma oraha ko adonuahi. Masara koaho niodamaa dika hiadono nanga Baluhu idodutu woboali, angamoi ma oraha gea de ahao Una o kia dika agogonika o fufutuika, gea Una wale de wao ma dodawangeino. Abe ma oraha gea Una o nyawa manga hininga de manga hidee watailako de wahimatoko. De ahao o nyawa homoi-homoi yamake ma higiriiri Ma Jouino abe itiai yamake.
De naa ngomi minigahoko Ma Jouika ma titi ngini la ngaro ma dorou o kia dika masara gea mata-mata ngini nioluku nidiai. De nako ngomi ko miboauahi nginika de ngini nia dorou nianoaka ho ko nianiikokaua nia wowangoka, gea ahao ngaro ufa de miniurusu ngini. De igoungu nako ko miniurusua, gea ko idadiua mimahitaana abe ma titi mia kuaha o Yesusu Kristusoka de aino la minidotoko nginika. Masara ngomi miato ngaro o nyawa imihioriki abe ngomi naga de o Yesusu Kristusu ai kuahaka, eko ngaro ko ihiorikua, masara genangino de ko mipusingua. Abe ngomi miato iti ngini o datoro ma rorahai niatobaniiki nia wowangoka.
De ngomi miahidingoto nanga gogianongoru yahinooto la ona de o Titusu ka idadi yomakiniiki manga dodagioka abe yoboa initutumu nginika. De nanga gianongoru womatengo una gea o gareja ma doomu homoi-homoi ma tonakoka naa iwihigiriiri unangika ma titi ka ihikaika una wahingahu-ngahu o Abari ma Rorahai o nyawaika.
Masara nako hoka naga o nyawa yomatengo de yomahigunoa la Ma Jou o Womaha wahihira-hira ona manga wowangoka, gea ka idadi hamake onangoka ma hofoko abe iboa Ma Jou o Womahino. De gea ma hofoko hamake hokonaa manga wowangoka. Abe naga manga dora, de manga garago, de manga hininga ma miriidi, de manga dongohono, de manga hininga la yahidoaka o nyawaika, de o nyawa utuika yao irahai, de manga demo yatobagou-goungu,
Ho gea ngone kiani hatingakoka o ngelu-ngeluku nanga uruino la “ma gou-goungoli homahikangahu nanga gogianongoru mata-mataika.” Angamoi ngone homoi-homoi to Una ai badanga ma kiahonanga, de gea naga to ngone nanga borigogao nanga gogianongoru mata-mataika. Ho gea ufa homakeluku nanga gogianongoruika.
De gea ngini kiani nimahidubuluino nia goronaino, de nia alu kiani niodatoko de o alu ma dadatoko nimahinoauku. De nako nia lou, gea kiani nimasandaaliye. De ka ihikaika kiani niao nia dadatoko la ka idadi ma oraha nia musu ma hihiipi iboaino abe ena naga de ma ukuoka, de gea ka idadi nihihohonenge de nia dadatoko. De nia pea kiani naga ma dadatoko de gea ena nihisapeouku, de abe nia humaranga o dopo-dopoino abe ma doto arihononga gea ena kiani nimagorakino. De nako ti ngini nia dae de nia dadatoko gea mata-mata naga nginioka homoi-homoi nia badangoka, de gea ahao nimahidiaioka la ka idadi nia musu nialawana. Masara gea ahi demo nginika gea tanu o hiketero dika abe tohiketero nanga hininga ma dae de nanga hininga ma dadatoko abe gea Ma Jou wonahidailako ngoneino la gea ka idadi halawana o Ibilihi ma haeke de to ena ma toka-tokata. De abe nako o tentara yomahidubuluinoka manga goronaino, ona gea yomahidiaioka la yomataiti yoiki yoparangi. De gea tohiketero de ma gou-goungu, angamoi ngone kiani hatobagou-goungu ma titi nanga ngongakuoka. Ho gea ngini kiani ka ihikaika nimahidubuluino de ma gou-goungu la ma oraha Ma Jou woigo nisobo, gea ka idadi ngini nisoboka de nianiiki to Una ai mau nginika. De nako o alu ma dadatoko o tentara yomahinoaukuoka, de gea yodatoko done manga musu manga dae yakorona manga badangino. De gea tohiketero de o totiai, angamoi nako ngini nitotiai Ma Jou ai himangoka, gea ahao nia totiai inidatoko la ufa o Ibilihi ma dae iniruwae nginika. De nako o tentara yomahisandaaliyeoka, gea manga sandaala yaduhunu la ufa yopakoro de yoruba. Ho gea tohiketero de o Abari ma Rorahai, angamoi nako ngini nimahigagaoika genangika, gea ahao iniduhunu la ufa niruba de ufa niahowono. De abe nako manga dadatoko yasoinoka naga manga giamoka, gea ka idadi ma tentara yomahitatoko la manga musu manga hihiipi abe itoka-tokarino, gea ena yomahitatoko. De manga dadatoko gea yomahiparihi de yahohonengoo manga musu ma hihiipi de ma ukuoka. Ho gea tohiketero ma dadatoko gea de ti ngini nia ngongaku Unangika, angamoi iti nia ngongaku naga de gea ahao ka idadi inidatoko ngaro hokokia dika o Ibilihi ma haeke iniparangi nginika. De nako ona o tentara manga pea ma dadatoko ma sapeo, gea yomahinoaukuoka la ato yodatoko manga pea. De gea ena tohiketero de nia nganganono abe duru nihioriki Ma Jou winiduhunoka nia howo-howonino de winihidoakoka o wowango ka hiado-adonika. Ho nako nia nganganono gea naga nia hiningaka, gea ena inidatoko la ufa o Ibilihi ma haeke iniruwae nia hiningaka. De nako o tentara manga humaranga o dopo-dopoino, gea yapake la yalawana manga musuika. De nako ti ngini nia humaranga o dopo-dopoino, gea Ma Jou o Womahoka de aino winihidoaka la ngini niapake, de ma humaranga gea tohiketero de Ma Jou ai Demo-demo, ho gea ena kiani niapake la nialawana o Ibilihi nia musuika.
Ho naa, ahi gogianongoru o Yesusoka, ko tohibobahauahi ahi hurata naa de tinihigaro tato, ngaro ngini ka nigaragoka ma titi nanga Baluhu idodutuoka! De naa ahi hitiari nginika naa marai tohigali-galioli, masara gea irahai, abe ko itubuhoua ngohino tinihingahuoli, angamoi ahi hitiari nginika naa idadi nia duduhunu.
De gea mata-mata minihigaro nginika la bote ahao naga o nyawa ko iwingaku-ngakua de inimake nia datoro gea ma ka ma rorahai dika nia datoroka, de gea ahao naga manga horomati nginika. De nako naga nia magawe nia karajaangika, gea ahao ka idadi ngini homoi-homoiika nimahidailako ti ngini ma hirete nia wowango ma perelu, ho gea ngaro ufa de ngini nimahinganono utuika la hiadono ti ngini nia perelu inihidailako.
De onangoo abe yahipareta o nyawaika, hoka o kokoano de onagona dika naga de manga poparetaka, onangoo ma kiani niagahoko Ma Jouiye ma titi ona. De ma oraha nimaniata gea de ka idadi niagahoko la nanga popareta Ma Jou wahiowa. Ho itiai nanga popareta hagahoko Ma Jouiye la Una wahikokaaturu ona gea la ngone nanga wowango de ma utumoka. Abe nako Una wahikokaaturu nanga popareta gea, de ahao ngone nanga wowangoka hatoli iriidi de naga de ma dameoka, de ngone ka idadi howango de haniiki duru itiai Ma Jou ai mau ngoneino de homakao duru irahai ngone de nanga date-datekoka.
De ma ngo-ngofeka abe o garejaka yaduhunu, onangoo ma kiani manga wowango hokogea itotiai hiadono o nyawa utu yahayanga onangika abe imaketero hoka ma nau-nauroli. O ngo-ngofeka gea ufa yotobahiade-ade masara kiani ona ka yakunu yomatongohono de ka ihikaika manga gogianongoru ka idadi yangaku onangika.
De ufa ani datoroka naga ma titi hiadono o nyawa iningelo ngonaika ma titi ngona ka o goduuruohi dika. Masara koaho to ngona ani wowango ma totiai naga la hiadono ona ka idadi yomaaduru abe hoka ngonali ani wowango. Abe ngaro ani demo, de ani datoro, de ani dora o nyawaika, de ani ngongaku, de ngaro ani hininga ma hohailoa, ma, kiani gea mata-mata itiai Ma Jou ai himangoka la hiadono nia gogianongoru gea ka idadi yomaaduru abe hoka ngonali ani wowango.
De kiani o nyawa imihayanga munangika ma titi ka ma dodihirainohi de ami wowango ma datoro irahai. Abe to muna ami ngofa-ngofaka mapaliara de madotoko itiai, de ami tauokaoo ngaro o homoa ma nyawa ma madafongo la yomahidodogumu munangoka. De nako ami gogianongoru o Yesusoka manga perelu naga, muna ka idadi momahitipokouku de maleleani onangika la mato maduhunu. De nako hiadono naga o nyawa yohuha eko yapanyakeuku, ma muna gea imimagawe maduhunu onangika. Ho kiani muna gea ka ihikaika ami wowango ma datoro ma hailoa ingodumu naga munangoka. De nako igoungu hokogea momatengo mofao ami wowango ma dihira, gea de ahao ka idadi ami romanga nitulihuku la muna ami tagongo de ami leleani naga o garejaka de hiadono mamake ami hewa ma balaha gea ami leleanioka de aino.
De nako o ngofeka momatengo imitimonoka, gea de ahao ka idadi nomihigaro munangika abe imaketero hoka to ngona ngoni meme nomihigaro. De nako naga momatengoli abe hatoli ka o goohi eko naga ka o moholehohi, munangika nomiduhunu abe hoka to ngona ngoni firanga o dodotoli nomiduhunu, ma iti nomahitiari la ani hininga ka irorahai dika abe ma oraha nomiduhunu munangika.
Masara kiani hokonaa ai wowango ma datoro. Nako hiadono o nyawa iwirekata unangika, una gea kiani wadafongo de wao irahai abe gea iwirekatino. De una gea kiani duru woigo o datoro ma rorahai hiadono ai wowangoka de ka ihikaika wotobadiai abe ma rorahai. De kiani una gea ai hininga ibaluhoka la hiadono ngaro o kia dika wohimanga ma ka wakunu wairiki abe imakiniiki de Ma Jou ai mau unangino. De kiani ai wowango ma datoro itotiai, de kiani ai hininga duru itebini Ma Jouika, de kiani una ka wakunu womatongohono ma dorouino. Ho una gea ko nigorakuahi de ai wowango ma datoroka kiani nihiorikohi abe to una ai wowangoka imakiniiki de ma hitiari ma demo naa mata-mata ngonaika.
Abe Una gea womahidoaka la ka idadi wonahihohe nanga howono ma kuahaino de wonahitebini nanga wowango. De ai datorino gea de wonatingaka Unangino la hiadono hodadi to Una ma hirete ai nyawa, de Una woigo wato ngone duru inamagawe hotobadiai ma rorahai dika. Ho mangale ma titi ai hininga ma owa gea ngoneino ho hiadono ngone mata-mata kiani nanga wowango hao itiai ma oraha naa de ka hiadono nanga Baluhu ai gahe ma wange adonoka.
De abe hoka ona ani balu-baluhu yatimonoka o nau-nauru, onangika kiani nadotoko nato, “Ngini kiani nia wowango ma dumutu nimahipareta done nirehene ma dorouika, de kiani niwango itiai la hiadono nimahitaana abe o nyawa utu ka idadi inihayanga nginika, de kiani niakunu nimatongohono ma dorouino. De abe nia ngongaku Ma Jouika de nia doraoo o nyawa utuika, gea kiani ibitumu de ko ikelu-kelua mata-mata. De ngaro o kia dika abe ahao naga niohimanga nia wowangoka, ma ngini kiani nimatongohono de ufa nirehene Ma Jouino.” Hokogea kiani nadotoko ani balu-baluhika genangoka abe yaperekioka.
De abe ngona ma hirete, ngonaika tonihibehehongo tato kiani notobadiai abe ma rorahai la ani gogianongoru ka idadi yomaaduru abe hoka ngonali ani wowango ma datoro ma rorahai. De abe ma oraha ani gogianongoru manga himangoka de nadotoko, gea kiani nadotoko onangika de ani hininga ma hohailoa dika. De kiani ani dodotoko gea nao itiai de gea ani demoka ufa hiadono yafikiri ato ka o hawaliti dika ma demo, done ahao ko iwa manga horomati ngonaika.
De igoungu ahi behehongo gea ma dumutu ngonaika la tato naduhunu yahinooto gea, masara tanu irahai tahidumutoo nanga gogianongoruika mata-mataika abe genangoka o Kereta ma nuuhoka yogoo-gogere. De onangoo gea koaho yomadoto-dotokohi abe hokokia yaduhunu o nyawaika hiadono ona gea ka idadi yakunu yotobadiai abe ma rorahai. De nako ahao naga idadi ma kangela o kia dika abe ahao naga yadaene o nyawaika abe ka hiadono manga perelu o nyawa utu duru ko iwa hiadono yohuha, gea de ahao nanga gogianongoru genangoka ka idadi yaduhunu onangika de manga perelu yahidailako angamoi gea ma dodihirainohi de ona yomadotokoka de yakunoka yotobadiai abe ma rorahai. De nako hokogea yodiai, gea yomahitaana abe manga wowango gea duru ko parahajaua.
De naa ngohi togahoko la ngini ka ihikaika niminiata ngomi nenangoka. De ngomi naa mimatailakoka mia hininga de ka idadi mimahingahu abe gea ko imakalawanua de Ma Jou ai mau masara imakiniiki dika to ngomi mia hininga de to Unangoli ai hininga. Angamoi to ngomi mia hininga ma dumutu la ngaro o kia dika naga miato midiai, masara duru mioigo la mia datoro gea itaana de ma rorahai dika. Ho gea togahoko la ngini niminiata la hokogea idadi to ngomi mia wowango ma goronaka.
Masara nako o nyawa abe Ma Jou o Baba wafetongo onangika wato ona yagou-goungu yomahuba-huba de iwiniiki duru itiai Unangika, ona gea ka idadi manga datoro hokonaa hamake manga wowangoka. Abe ona gea yatutumu o gohi-gohihi de o bao-bao la yaduhunu onangika manga kokangela ma goronaka. De nagali abe ona gea ma rorahai dika yatobanii-niiki, abe ma titi ngaro manga hiningaka eko ngaro manga wowango ma datoroka ma ko iwa manga howono angamoi yatingakika o dunia naa ma hininga onangino. De ona hokogea yaduhunu o huha ma nyawaika de yoluku o howono yodiai angamoi to Una ai demo ona yanii-niiki. Abe ai demo ma goronaka de Ma Jou wonahigaro ngoneino wato kiani hokogea hodiai nanga wowangoka, ho ona gea yaniiki to Una ai demoika dika.
Masara nako Ma Jou ai sosawaro o nyawa yanii-niiki manga hiningaka, gea ahao manga hininga ka itebini iree-reeika. De nagali abe manga borigogao manga gogianongoruoka yoogoana la duru yomaketedodiawo, de abe yomakao de manga hininga ma mobole, de yomahikokongounu, de yomakuduhunu manga kangela ma goronaka, de nagali manga datoro ma rorahai utuoli ma ngoe yotobadiai. De nagali abe ona o nyawa ko yairikua, de abe yatobagou-goungu manga hiningaka ho ko ma iwa abe yomadokangelukino dika. De hokogea o nyawa manga hininga nako Ma Jou ai sosawaro o Horogaka de auku yahihira-hira onangika.
De mangale ma titi naga nia hingounu ma gou-goungika abe o Abari ma Rorahaiika hiadono ti ngini nia wowango ihitebinoka genangino. Ho mangale nia wowango itebinoka ho ngini ka niakunu nimakodora ngini o gogianongoruoka abe de nia dora ma gahumu dika. Ho naa tinihuloko nginika tato ngini kiani duru nimakodora de nia hininga ma gahumu abe nia hininga ma debi-debinoka de aino.
De kiani nihidodiai la ti ngini nia wowango niao itiai o nyawa manga hima-himangoka abe ona ko iwihiorikuahi Ma Jouika. Angamoi nako niwango nitotiai de o nyawa utu ka initaeohi nginika ato niahowono, de gea ahao o nyawa ka idadi inimake nia datoro ma totiai, de genangino inihioriki ma titi nia hininga ma rorahai. De gea ma bahauku de marai ona utu ahao iwihigiriiri Ma Jouika abe ma titi yomafikiroka ti ngini nia wowango ma datoro de genangino ma titi hiadono ona iwingaku Unangika. Ho mangale ma titi ngini niwango nitotiai de marai ngone hingaku-ngaku utuohi howoe abe ma oraha Ma Jou woboali la wonatailako ngone homoi-homoiino.
De naa moi ahi demo kiani nihitihira angamoi ka enangohi ikurutiye, de gea ngini ka nigila-gilahi nimakokodora de nia dora duru kohaamoko nia gogianongoruika. Angamoi ngaro idadi abe nanga gogianongoru duru ma ngoe inihowono nginika, masara nako ngini nimakodora, gea ahao nimahikokinginioo ka idadi nimahikokoofi nia gogianongoru manga howo-howono gea nginika.
Ahi gogianongoru abe ngohi duru tinidora nginika. Ngohi ahi hininga ma dumutu naga la tato tinihihohininga nginika ma titi abe nengokadau nimadotokoka. Angamoi ngini niihenoka ma hingahu ma demo ma ngoe, abe naga utu ma hingahu Ma Jou ai uru ma dodofangino iboa, abe ona gea yotebi-tebini to Una ai himangoka. De nagali ma huhuloko ma demo nanga Baluhu idodutu de nanga Duduhunoka, abe nengokadau ai demo gea ngomi ai hidingoto ma nyawa miadofanga nginika. De ma dodotoko gea tato tinihihohininga nginika la ka idadi ma debi-debini niongano-nganono nia kokihiningaka homoi-homoi. De hokogea ahi hininga ma dumutu, ho gea ma titi hiadono ngohi tinihurata ma hinooto ibooto nginika. De ngaro ahi hurata ihira-hiraika nginika abe nengokadau ngini niamakeoka, de ngaro abe ahi hurata naa ena, masara ahi hurata hinootoo naa abe ma goronaka de ahi hininga ma dumutu ka moi dika. De ahi hininga gea la tato tinihihohininga nginika ma titi abe nengokadau nimadotokoka, la ka idadi ma debi-debini niongano-nganono nia kokihiningaka.
De ahi gogianongoru abe duru tinidora nginika, naa moi tinihitiari ma titi o nyawa utu manga dodotoko de manga hingahu ma demo. Abe ngaro o nyawa yomahingahu ato bari Ma Jou o Womahoka de aino iboa manga demo, ma gea kalioli ngini nitangakuholi manga demoika gea, masara koaho ihira niatailakohi manga demo la nihioriki gea iboa Ma Jouoka de aino ekola o womaha utuokali de aino iboa manga demo gea. De tinihitiari hokogea angamoi naga o nyawa ko manga ngoeoka o duniaka naa abe yomahiromanga ato Ma Jou ai uru ma dodofanga, masara ona gea yotobaeluku dika de gea ko Ma Jou ai demoua abe o nyawaika yahingahu-ngahu.
Ho naa, gianongoru, ngaro ufa nohawana. De o kia dika ngona nogahoko todiai, gea mata-mataika ahao ngohi todiai. Ko moiua o Beteleheeme ma dimo-dimonino abe ahao inihiade-ade ato ngona nahowono noboa hokonaa angamoi ona mata-mata inihioriki abe ngona o ngofeka abe ani wowango ma datoro irahai.” Hokogea o Boasa ai horomati ma demo o ngo Ruutika.
Sanasan