Filiipi 1:1 - Ma Jou ai Demo-demo o Totobelohoka1 Mia gogianongoru o Yesusu Kristusoka abe o Filiipi ma kapongoka nimanoa. Ngomi naa o Paulusu de o Timotiusu, to Yesusu Kristusu ai huhuloko. Abe o Kristusu, Una gea nanga Koano Ma Jou wonahibehehongoka. De naa mia hurata mihidingoto ngini mata-mataika abe Ma Jou winihidadioka to Una ai nyawa. De ngaro ngini abe o gareja ma hihira de nginioo abe nitobaduhu-duhunu o garejaka, ma, to ngomi mia horomati mihidingoto ngini mata-mataika. Faic an caibideil |
Filiipi 1:1
48 Iomraidhean Croise
De o Peturusu una wogila-gila wotemo wato, “De duru ena gea abe ma dodihirainohi de o Dautu wonahingahu abe ahao idadi o Yudasika. Abe o Dautu wohitulihuku ai higiriiri ma bukuoka wato, ‘Ahao to una ai ngi o nyawa ko moiokaua yogogere genangoka.’ De naa ai demo moioli wotulihuku wato, ‘Ahao to una ai tagongo de ai gogere kiani womatengoli iwigoraka la wituruuru.’
“De naa tinihitiari moi nginika! Abe ngini kiani nimagoana ngini ma hirete done nirehene Ma Jou ai ngekomoka de aino. De nginioo kiani niagoana nia gogianongoru mata-mataika abe Ma Jou o Womaha winihitagongoka nginika la ngini nidadioka to ona manga gogoana ma nyawa. Ho Ma Jou ai gareja ma nyawa ona gea kiani ngini niapaliara irahai, angamoi Una womaijaino ai nyawa de wofangu de to Una ma hirete ai awunu!
Ahi gogianongoru o Yesusu Kristusoka abe o Roma ma kotaka nimanoa. Ngohi naa o Paulusu to Yesusu Kristusu ai huhuloko, de naa ahi tabea tohidingoto ngini mata-mataika. De abe ma titi to ngohi ahi tagongo, ngohi wohitingakoka Ma Jou de wohiahoko la todadi o hidingoto ma nyawa abe to Una ai Abari ma Rorahai ngohi tahingahu-ngahu o nyawaika.
Ho igoungu ngini naa Ma Jou duru winidora nginika, de Unangoo winiahoko Unangino, de hiadono nginioo nidadioka to Una ma hirete ai nyawa! Ho naa ahi hurata ma goronaka de ngohi ahi tabea tohidingoto ngini ahi gogianongoru mata-mataika o Roma ma kotaka. De ngini mata-mata tinigahoko Ma Jou nanga Baba de o Yesusu Kristusu nanga Baluhiye la ai owa de ai hininga ma miriidi winihidoaka nginika.
Ahi gogianongoru o Yesusu Kristusoka abe o Korintusu ma kotaka nimanoa, de nginioo o Akaya ma propinsi ma tonakoka abe nidadioka Ma Jou ai nyawa. Ngohi naa o Paulusu, abe Ma Jou wohiirikoka ngohi ma titi to Una ma hirete ai mau la todadi o hidingoto ma nyawa abe tahingahu-ngahu o nyawaika ma titi o Yesusu Kristusu. Abe o Yesusu Kristusu Una gea nanga Koano abe Ma Jou wonahibehehongoka. De o Timotiusu, nanga gianongoru o Yesusoka, una naga de de ngohi. De o hurata naa mihidingoto abe ngini Ma Jou ai gareja ma nyawaika ngaro o Korintusu ma kotaka nigogere de ngaro o ngi utuoka o Akaya ma tonakoka nigogere.
De naa abe ma titi ahi demo kangano de ma buturungu nginika, de ahi demo gea duru ihihitaana ngohino de itararono abe ahi hiningaka ma dumutu hokokia. De ngohi tonganono la ma titi ahi demo ma buturungino gea de ngini genangoka ka idadi nihihioriki abe ngohi naa duru toigo la Ma Jouika dika tihisanangi, de ufa hiadono ka o nyawaika dika tahisanangi. De ngaro igoungu naga o nyawa utu ihitae ngohino abe ona ato ahi hininga la tahisanangi o nyawaika, ma ngohi tohioriki abe ko idadiua to Kristusu ai huhuloko todadi nako hoka ka tohitailohi o nyawaika tahisanangi. Ho gea ngohi tomaputuhoka tato ngaro o nyawa utu ko ihisanangiokaua ma titi ahi demoino, masara ngohi kiani tileleani Unangika dika la Una gea wohisanangi ngohino. De ena gea ma titi hiadono ngini ka idadi duru niangaku ahi demoika, ho gea kiani ngini nimahigagaoika o Abari ma Rorahaiika abe ma dihiraino tinihingahuoka.
Ho mangale ma titi nanga rimoi o Yesusu Kristusoka, ho hiadono naa duru ko iwaka ma hikohowono nanga hidogoronaka. De gea ngaro ngone utu o Yahudi ma nyawa de utu ko o Yahudi ma nyawaua, ma ngone naa ko homakohowonua. Eko ngaro ngone utu o nyawa manga huhuloko de utu ko o nyawa manga huhulokua, ma gea ngone hoimoi dika. Eko ngaro ngone utu o nauru de utu o ngofeka, masara gea Ma Jou wonalega wato ko iwaka ma hikohowono ngoneoka angamoi ngone mata-mataika ka hoimoi dika o Yesusu Kristusoka.
Ahi gogianongoru o Yesusu Kristusoka abe o Efesusu ma kotaka nimanoa. Ngohi naa o Paulusu, abe Ma Jou wohiirikoka ngohi la todadi o hidingoto ma nyawa abe tahingahu-ngahu o nyawaika ma titi o Yesusu Kristusu nanga Koano abe Ma Jou wonahibehehongoka. De o hurata naa tohidingoto abe ngini niwingaku-ngaku o Yesusu Kristusika abe Ma Jou winitinga-tingakoka ngini Unangika.
Ho mangale ma titi to Ma Jou ai owa gea mata-mata ngoneuku ho hiadono ngohi naa duru ka ihikaika totarimakase Unangiye ma titi ngini mata-mata, angamoi nginioo niamakeoka to Una ai owa abe imaketero hoka ngohioli tamakeoka. Abe nengokadau toihene ma titi nia ngongaku nanga Baluhu idodutu o Yesusika de abe nia doraoo itagi Ma Jou ai nyawa mata-mataika. Ho genangoka de aino ka hiadono ma oraha naa naga ngohi duru ko tomatogu-togumua totarimakase Unangiye ma titi ngini abe ma oraha tomaniata.
De masara angamoi ko hohiorikua itigioka tohonenge eko kouahi, ho ngohi duru toigo, iya, iti nanga Baluhu idodutu o Yesusu ai mau, ma, tonganono ko itedekanokaua de o Timotiusu ka idadi tihidingoto nginika. Una tihidingoto la ahao ma oraha una wolio ngohino de ngohi toihene o abari nginino la ka idadi tosanangi.
De gea ufa niataoko ihowono, angamoi ngohi tomangaku genangika ko tomahiadonuahi, abe ko ma titiua ahi wowango ma datoroka ka ihikaika tomaaduru hoka o Kristusoli. Masara hokogenangua, ma, ngohi ka togila-gilahi la hiadono genangika tomahiadono de tomahitongohi. Angamoi o Yesusu Kristusu womahitounakau ngohi naa, ho itiai to Una ai mau ngohino taniiki.
Ona gea Ma Jou iwiniiki ko igou-goungua, masara ngone naa abe duru hiniiki igou-goungu. Abe ngone naa tonahiromanga tato ngone o huhuna ma nyawa ma gou-goungu. De gea ma romanga ma titi o kia? De gea ma titi abe ngone naa hihigiriiri Ma Jou de gea ihititi abe nanga gogao Ma Jou o Womahino de ko ma titiua to ngone nanga kuahaino. Abe Ma Jou o Womaha, Una gea naga de de ngone. De ngone naa duru hidogarago o Yesusu Kristusika ma titi ai duduhunu ngoneino, de ko ma titiua to ngone nanga nganganono o dodunguuika dika abe nanga badangoka de hiadono wonadafongo Ma Jou. Ngone naa ko hokogenangua nanga nganganono. Ho gea tonahiromanga tato ngone o huhuna ma nyawa ma gou-goungu. Hokogea ma titi o huhuna ma gou-goungu, abe ngone naa haniiki.
De igoungu, ngaro o kia dika naga, ma nako ahi Baluhu idodutu o Yesusu Kristusu duru tihioriki, gea ka enangohi duru de ma utumoka. De o kia dika abe naga utuoli, gea enangoo taetongo ko kia-kiaua. De Una gea ma titi hiadono gea mata-mata abe ahi wowango ma dihira tanoaka, de gea ena tohiromanga ka o wale-wale dika, la ka idadi o Kristusoli tomahitongohi,
Mia gogianongoru o Yesusu Kristusoka abe o Tesalonika ma kotaka nimanoa. Ngomi naa o Paulusu de o Silasa de o Timotiusu. De naa mia hurata mihidingoto abe ngini o Tesalonika ma garejaka. De gea ngini minihiorikoka abe nia gogere naga nanga Baba Ma Jouoka de nanga Baluhu idodutu o Yesusoka, abe Una gea nanga Koano abe Ma Jou wonahibehehongoka. Ho naa ngomi minigahoko nanga Jouiye la ahao ai owa de ai hininga ma miriidi winihidoaka nginika.
Barikua de miboa nginika de mia domoroini duru ilamoko la minidotoko, ngaro ahao gea de ngomi imihikangela ipahaino o Filiipioka. De gea marai niohiningaoo abe ma dihiraino hokokia o Filiipi ma nyawa utu imihikangela ngomino. Abe gea ngomi ko miboauahi nginika de o Filiipi ma kotakahi ona utu imihikangela de imingelo. De gea ipaha de ahao ngomi migila-gila de hiadono mimahiadono nginikali. De igoungu nginiokaoo naga utu nia dodiawo manga ngoe onangoo imilawana ngomino, masara Ma Jou womiduhunu de womihitomoroini la ka idadi miakunu imimoroini minihingahu nginika to Una ai Abari ma Rorahai.
Mia gogianongoru o Yesusu Kristusoka abe nimanoa o Tesalonika ma kotaka. Ngomi naa o Paulusu, o Silasa, de o Timotiusu. De naa mia hurata mihidingoto abe ngini o Tesalonika ma garejaika. De gea ngomi minihiorikoka abe ti ngini nia gogere naga nanga Baba Ma Jouoka de nanga Baluhu idodutu o Yesusoka, abe Una gea nanga Koano abe Ma Jou wonahibehehongoka.
De mia demo abe minihingahuoka nginika, gea mata-mata ahao idadi ma wange gea abe Una woboali. De ma wange gea de ahao ngone ai debi-debini ma nyawa himake abe ma oraha woboa de gea naga to Una ai medebini ma dararono Unangoka. Angamoi igoungu ma wange gea ngone hingaku-ngakuoka mata-mata ahao duru hiheranga de hiadono duru hihigiriiri Unangika. De nginioo ahao naga ngomioka ma oraha gea la homakutuono hihigiriiri Unangika, angamoi ngini nengokadau ningakuoka mia demoino gea abe minihingahuoka nginika ma titi Una. Ho ngomi duru mitarimakase Unangika ma titi abe ti ngini nia ngongaku de nia dora ka iputurungohi hiadono ma oraha naa naga.
De o gareja ma duduhunu, onangoo ma kiani o nyawa utu yahayanga onangika abe imaketero hoka o gareja ma hihirali o nyawa yahayanga onangika. Ho o gareja ma duduhunu gea, kiani manga wowango itotiai. Ufa ona yomahihawo-hawo dika de manga ngeluku ma demo, de ufa o nyawa abe o angguru ma gohaka ma teongo ifoloiholi yokere, de ufa ona abe yosanangi yarusi o nyawaika la hiadono manga tiwi yomamake genangino.
Ahi gianongoru o Titusu. O hurata naa ngohi o Paulusu totulihi. Abe ngohi naa Ma Jou ai duduhunu tomatengoino, de hongoli ngohi o Yesusu Kristusu ai hidingoto ma nyawa la tatobahingahu-ngahu o nyawaika ma titi Una. De gea ngohi wohiirikoka la wato to Una ai nyawa wairi-irikoka, onangika gea taduhunu. Abe Una woigo wato tonaduhunu ngone mata-mata la hiadono nanga ngongaku Unangika idogo iputurungu de hiadono utuohi itararono ngone hohioriki ma gou-goungu Ma Jouoka de aino. Angamoi nako hiadono ma gou-goungu gea hataoko itiai, gea de ahao hapoa howango itiai Ma Jou ai himangoka de hihisanangi Unangika.
Abe una gea kiani o nyawa abe ai wowangoka ko iwa ai datoro ma dorou, ho o nyawa utu duru ko idadiua iwitae unangika, angamoi una gea Ma Jou wihitagongika la wato una gea watobagoa-goana ai gogianongoru o garejaka. De nako naga womatengo nato nigoraka la una ahao wodadi watobagoa-goana o garejaka, ho una gea iti ufa hiadono womahitobakurutiye eko wotobatualono eko womatobadaluku eko watobapoha o nyawaika ma titi ai ngamo. De iti ufa womatengoani abe wosanangi o nyawaika warusi la hiadono ai tiwi womamake genangino. Ko idadiua ai wowango ma datoro hokogea.
Angamoi igoungu ngini ma dihiraino de nimakitingakoka Ma Jouoka de aino. De gea ka idadi tinihiketero hoka o domba o duduono moi abe nirehenoka nia dodagioka de aino. Masara naa inihiboakali ti ngini nia Gogoanika, abe o Kristusu Una gea winitobagoana de winitobapaliara ti ngini nia hininga homoi-homoiika. Ho irahai nako nginioo ma oraha inihikangela nginika de nimaaduru hoka o Kristusoli la ko iwa nia hibalaha ma dorou o nyawaika.
Ahi gogianongoru abe ngone o ngongaku moioka. Ngohi naa o Simono Peturusu to Yesusu Kristusu ai huhuloko de ai hidingoto ma nyawa, abe Una wohihidingoto ngohi la to Una ai abari tahingahu-ngahu o nyawaika. De naa ngohi tinihurata nginika abe ti ngini nia gogere nanga ngongakuoka, gea ka imaketero dika de to ngomioli naa mia gogere abe ngomi to Una ai hidingoto ma nyawa. De mangale ma titi o Yesusu Kristusu Una duru wototiai ai hiningaka ho ko wonairikua abe ngone homoi-homoi hiboringakuoka Unangika, de gea ngone mata-mata haborimakeoka nanga ngongaku ma wowango Unangino. De abe o Yesusu Kristusu, Una gea to ngone nanga Jou de nanga Duduhunu.
Ahi gogianongoru abe ngini Ma Jou winiahokoka nia ngongakuino la winihidadi to Una ai nyawa. Ngohi naa o Yudasa, o Yesusu Kristusu ai huhuloko de o Yakobusu ai dodoto. De naa ahi hurata tohidingoto ngini mata-mataika abe ngini nimanoa Ma Jou o Baba ai dora ma goronaka de abe o Yesusu Kristusu ka ihikaika winigoana nginika.
O buku naa ma dolaka naga o Yesusu Kristusu ai himatoko abe Ma Jou wihidoaka Unangika ma titi hokokia abe ko itedekanokaua de kiani idadioka. De gea o Yesusu Kristusoli wihidingoto ai malaekata womatengo abe ngohi to Una ai gilaongino la ai malaekatino gea de ngohi tamake ma himatoko. De gea ihihimatoko ngohino la ahao ngohioli ka idadi tadofanga ma himatoko naa abe to Una ai gogilaongo utuikali.
De naa tonihimatoko dika abe ma dogogono kangano ma titi ma murumu tumidi namake ahi giama ma nirakoka de ma posi ma liate enangoo tumidi abe o gurasino yodiai. De hokonaa ma dogogono gea ma titi. Abe ma posi ma liate tumidi, gea ena ma gareja ma doomu tumidi. De abe ma murumu enangoo tumidi, gea ma gareja tumidi homoi-homoi manga malaekata. Hokogea ma dogogono ma titi.”
Ho ka de wohitemo hokogea de ngohi tomamotumukuoka o malaekata gea ai louoka la tato tomahuba unangika. Masara una wohitaere ngohino wato, “Ufa hokogea nodiai! Ngona kiani Ma Jouika dika nomahuba. Angamoi ngohi naa to Una ai gilaongo abe imaketero hoka ngonali de abe hoka nanga gogianongoru utuoli abe ngone homoi-homoi hahingahu-ngahu o Yesusu ai ade-ade de duru hahigaro o nyawaika la hato ona ka idadi iwingaku Unangika. Angamoi ma hingahu ma demo abe yahigaro o nyawaika la iwingaku o Yesusika, ena gea ma hirete abe yahiakunu Ma Jou ai nyawaika la ma abari gea ka idadi yahingahu-ngahu o nyawa utuika.” Hokogea o malaekata ai demo ngohino.
De ahao Una gea wohihulokoli wato, “Naa ngona nohitulihuku ahi demo naa abe o Peregamusu ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe naga ahi humaranga o dopo-dopoino abe ma doto arihononga.’” Hokogea Una womahingahu.
De ahao Una gea wohihulokoli wato, “Naa ngona nohitulihuku ahi demo naa abe o Semirna ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe ko kia-kiauahi idadi de Ngohi nagau, de Ngohi duru ko iwa ahi bobaha. De Ngohi nengokadau tohonengoka masara naa Ngohi towangokali.’” Hokogea Una womahingahu.
Masara gea ma malaekata wohitaere ngohino wato, “Ufa hokogea nodiai! Angamoi ngohi naa ka to Una ai gilaongo abe imaketero hoka ngonali de hoka nanga gogianongoru utuoli ai uru ma dodofanga. De ngaro ona mata-mata abe ahao yatobaniiki ma demo abe naa ma bukuoka, ma onangoo gea iwileleani Unangika. Ho ngone mata-mata homaketero dika abe hileleani Unangika, ho ufa ngona nohihigiriiri ngohino! Ho kiani Ma Jouika dika ngona nomahuba!”
Sanasan