JAKOB 4:11 - ANU LUGOD N. T. (BSI)

¹¹ Akonc akoncm aima:nc agomcm luka:mvnsuyoka, bvrokvdvnga. Bvrrang akoncm aima:pc luka:mvnsunamdc cdcmanggom bvk bvrodc kcbangcm ba:yc, lujvg lurodok birudi:pc ludo odokkc lujvg lurodcm kcbangcm ba:do. Cmpige:la nolu jodi lujvglurodcm kcbangcm ba:do, nolu lujvglurodok lukampc agercm gerncmang cmpige:la kcbang ba:nckodan.

JAKOB 4:11 Iomraidhean Croise

LU:KKC 6:37

“Kcbangcm momvnsuyoka, nolumsin kcbangcm moma:ycpc: aimang cmna lugc:yoka, nolumsin aimang cmna luma:ycpc; mc:yinsulangka, nolumsin mc:yinsuycpc; bilangka, odo cdcmv:pc nolumsin biycpc;

ROMANKVDVNG 2:1

Cdcmpidag nolum mcma:yc, C:i taniya, no sc:kovcidaggom, cdvlo no sc:koiycm kcbangcm ba:doji; kapila:nc bvm kcbangcm ba:dodcm no avycm avyc aima:nc cmna lukesuto, kapila:nc, kcbang ba:nckvdv:dc, cdc agerv:dcm ila dung.

ROMANKVDVNG 2:13

Kapcnc cdc lujvglurodcm tadncdc:mang Ru:ncpvnckc kcra:lo sc:kobv dormokadagji, cmpige:la lujvglurodcm tadla ager gerncdcmc arodag cmna ludag.

ROMANKVDVNG 7:7

Okkom ngolu cmpcm luycn? Lujvglurodc pa:bc cmnai? Kapcsinmang! Ckvdaggom, cdc lujvglurdokkcpc imangamvlo, ngo pa:bcm kinma:ya:pc. Ngo lujvglurodcm lukanbima:ya:mvlo ilv-sa:lv:dc okkoji kinma:ya:pc, “No ilvng-gvlv:yoka.”

1 KORINTIANG KVDVNG 4:5

Cdcmpidag ayirdok po:pcbong kcba:ba:namcm, Ru:tumbv gvkuma:dapc lulenyoka, sc:kobv su:pak kcmolo lc:nam attarkvdv:dcm pva:lo:pc la:lenycji odokkc asinlok mc:nam sagnam kvdv:dcm lenabmoyckuji. Odo appvng tani:yc Ru:ncpvnckolokkcm aipai cmnam pa:suycku.

2 KORINTIANGKVDVNG 12:20

Kapila:nc ngo pcsopc mc:dag jc kapcji ila ngo okodcm mc:ma:ji cdcm nolum pa:ycpc, odokkc nolujen ngomjen pa:ycpc nolu okodcm mc:ma:ji; jc kapcji ila pamvnsunamc lenycpc, ka:lv:ma:namc, aglvngc avyongkcpc mc:namc, lume:pc aima:p lunamc, luman manna lunam agomc, ngo:na cmna lusunammc; odokkc u:jeru:yerra du:namc.

IPESIANG KVDVNG 4:31

Appvng koncasin gcnam odokkc ku:bclang aglvngc odokkc jc:tak kutagclang agom tadnyi:pc lunamc nolukkolo du:ma:pcka, appvng ncka:mvnsunamki odokkc.

1 TIMOTI: 3:11

Nc:ngkvdv:dc cdcmv:pc kvnggv:pc asinc mc:dappa:ru:yc, lume:pc lujvggo:ncmang, cmpige:la ru:la dolang, appvng atv agerlo.

2 TIMOTI 3:3

ainc ager lcgangc aidag cmna lulatsulv:ma:nc, angunma:nc, tani:mcngkampc ima:nc, luyircm tadkinma:nc, aima:pc lulvggo:nc, nc:ng mago:la igo:nc, kvnggv:pc aglvng sa:nc,

TITUS 2:3

Abv:nc nc:ngkvdv:dcmsin cdcmv:pc lulvgtoka agomasv inam-sa:namlo aiyo:dopc, lume:pc luncpc ima:dopc cdcmanggom tv:nclok pagbopc ima:dopc; okodc aidagji cdcm bulu poyirpa:yc,

JAKOB 1:16

Ngok aipc mc:bomsunam bvrokvdvnga, yadkosuyoka.

JAKOB 1:19

Scm kintoka, ngokkc aipc mc:bomsunam bvrrangkvdvnga. Appvng tani:ycm tadnamcm lomna tadmotoka, aso:pc agomcm lumotoka, aso:pc aglvgngcm sa:motoka,

JAKOB 1:25

Cmpige:la sc:kobv aiyo:pc ainc lujvg lurodo:pc ka:dagji, appvngcm aipc mc:mvnsunamlok lujvg lurodcm, odokkc mcmang-ke:ke:pc lukam tadtvla tadyc, mitpankunc tadncpc imang cmpige:la gerncpc cdc incdcmbulumpc iyc, bv bvk inam gvnamlo:bulu akirba:d pa:yc.

JAKOB 2:8

Nolu aroru:pc migom lujvglurodcm lukamdcmpc imvru:lo, astro:dok lukamdcmpc, “Noluk kumrv-ko:rv kvdv:dcm noluk avyvngkcmpc aipc mc:ycpc,” nolu ainc agerko gerdo.

JAKOB 5:10

Ipusire:ycm pa:nclang menrasunamcm pa:nclok pangodnckoncmpc, bvrokvdvnga, lungor agom lunckvdv:dcm gagtoka sc:kobulu Ru:tumkc aminno agomcm lutoji.

JAKOB 5:7

Menrasula du:toka, cdcmpidag, bvrokvdvnga, Ru:tumkc gvdoku longcdo:pc. Ka:toka, mo:pvsokkcm airu:pc arckanc a:ycm pa:yc cmna arvg inckvdv:dc, cdc opongarnc odokkc lcddarkc pcdo:dc oma:sisscm menrasula toya:la du:dopc toya:la du:do.

JAKOB 5:9

Jcngka:mvnsuyoka, bvrrangkvdvnga, akonkc birudi:pc akonc, jen nolum kcbangcm ba:ma:ycpc; ka:toka, kcbang ba:ncdc yabgo kvdv:do dagla dung.

1 PITOR 2:1

Cdcmpidag appvng ka:ru-ka:mangnammcm mc:pagamtoka odokkc yadgo:pagongcm odokkc mc:jubmcngkabma:nc asincm odokkc Ka:ruka:mangcm odokkc appvng lume:pc lujcmnam lunamcm.