San Mateo 9:15 - Alacatlatzala Mixtec New Testament

¹⁵ Ta nda̱kuii̱n ta̱Jesús, káchí ra saá: ―Tá yóo ñii ta̱a ta̱ tonda̱ꞌa̱, ta ndiꞌi ni̱vi na yóo viko̱ yóꞌo xíxi na, ta o̱n ki̱ví kuchuchú ini na, saá chi yóo ka̱ ta̱yóꞌo xíꞌin na. Ta ki̱vi̱ ña va̱xi o̱n kóo ka̱ ra xíꞌin na. Ta saá kía̱ koo soꞌon na.

San Mateo 9:15 Iomraidhean Croise

San Mateo 9:14

Ta naxíka xíꞌin ta̱Juan ta̱ sa̱kuchu ni̱vi, ki̱xaa̱ na no̱o̱ ta̱Jesús, ta ni̱nda̱ka̱ to̱ꞌon na ra: ―Kua̱ꞌa̱ ní yichi̱ yóo soꞌon ndi̱, ta yóo soꞌon nafariseo. Ta naxíka xíꞌin mi̱i ún, ¿nda̱chun nda̱ ñii ki̱vi̱ o̱n vása yóo soꞌon na?

San Mateo 9:16

’Tá yóo tiko̱to̱ ña yatá, ta nda̱ ñii ni̱vi o̱n sandaꞌa na ña xíꞌin tiko̱to̱ xa̱á, saá chi tá nakata na ña, ta nduu loꞌo ña xa̱á, ta nasita ña tiko̱to̱ yatá, ta kini ka̱ ta̱ꞌnda̱ tiko̱to̱ yatá yóꞌo.

San Marcos 2:19

Ta nda̱kuii̱n ta̱Jesús, káchí ra saá: ―Tá yóo ñii ta̱a ta̱ tonda̱ꞌa̱, ta ndiꞌi ni̱vi na yóo viko̱ tonda̱ꞌa̱ yóꞌo xíxi na, ta o̱n ki̱ví koo soꞌon na, saá chi yóo ka̱ ta̱yóꞌo xíꞌin na.

San Marcos 2:20

Ta ki̱vi̱ ña va̱xi o̱n kóo ka̱ ra xíꞌin na. Ta saá kía̱ koo soꞌon na.

San Lucas 17:22

Ta ta̱Jesús ni̱ka̱ꞌa̱n ra xíꞌin naxíka xíꞌin ra, káchí ra saá: ―Va̱xi ki̱vi̱ ña kachí ní ini ndó koto ndó yi̱ꞌi̱, ta̱a ta̱ ki̱xi no̱o̱ Ndios. Kachí ini ndó koo i̱ xíꞌin ndó, vará ñii ki̱vi̱, ta o̱n kuchiño ka̱.

San Lucas 5:34

Ta nda̱kuii̱n ta̱Jesús, káchí ra saá: ―Tá yóo ñii ta̱a ta̱ tonda̱ꞌa̱, ta ndiꞌi ni̱vi na yóo viko̱ tonda̱ꞌa̱ yóꞌo xíxi na, ta o̱n ki̱ví koo soꞌon na, saá chi yóo ka̱ ta̱yóꞌo xíꞌin na.

San Lucas 5:35

Ta ki̱vi̱ ña va̱xi, o̱n kóo ka̱ ra xíꞌin na. Ta saá kía̱ koo soꞌon na.

San Juan 16:6

Ta saá ni, vitin kúchuchú ní ini ndó xa̱ꞌa̱ ña xi̱ni̱ so̱ꞌo ndó ña káꞌa̱n i̱ ko̱ꞌo̱n i̱.

San Juan 3:29

Ta vitin nda̱tán yóo ñii ta̱a ta̱ xa yóo tiꞌva nakiꞌin ra ñii ñaꞌa̱ ñá kuu ñásíꞌí ra, saá yóo Cristo. Ta yi̱ꞌi̱ nda̱tán yóo ta̱migo ta̱a ta̱ tonda̱ꞌa̱ yóꞌo, saá yóo i̱, chi ta̱migo ra kúsii̱ ní ini ra ña xíni̱ so̱ꞌo ra to̱ꞌon ña káꞌa̱n ta̱a ta̱ tonda̱ꞌa̱ yóꞌo. Ta ñii ki̱ꞌva saá chútú ñasi̱i̱ ini i̱ vitin, chi xa ki̱xaa̱ Cristo ta xíni̱ so̱ꞌo i̱ to̱ꞌon ra.

Hechos 14:23

Ñii ñii ñoo no̱o̱ nákutáꞌan ni̱vi na kándixa ta̱Jesús xa̱ꞌa̱ ña kísa káꞌno na Ndios, ta̱Pablo xíꞌin ta̱Bernabé na̱ka̱xin na sava nata̱a naxi̱kua̱ꞌa̱ xa̱ꞌa̱ ña kuu na na ndíso chiño xíꞌin ni̱vi yóꞌo. Ta saá naapóstol xíꞌin ni̱vi ñii ñii ñoo yóꞌo na kándixa ta̱Jesús, ni̱xi̱yo soꞌon na ta ni̱ka̱ꞌa̱n na xíꞌin Ndios xa̱ꞌa̱ nata̱a xi̱kua̱ꞌa̱ na ndíso chiño xíꞌin nayóꞌo, ta ta̱xi ñaꞌá na ndaꞌa̱ ta̱Jesús, ta ndu̱kú na no̱o̱ ra ña kundaa va̱ꞌa ra na ndíso chiño xíꞌin ni̱vi yóꞌo, chi vitin kándixa na ra, ta ndáa ini na ra.

1 Corintios 7:5

Ta saá o̱n váꞌa ta̱a nakasi xíꞌin mi̱i ra ña o̱n taxi ra yi̱kí ko̱ñu ra ndaꞌa̱ ñásíꞌí ra. Ta ñii ki̱ꞌva saá, o̱n váꞌa ñaꞌa̱ nakasi xíꞌin mi̱i ñá ña o̱n taxi ñá yi̱kí ko̱ñu ñá ndaꞌa̱ yii̱ ñá. Ta saá ni, yóo nda̱yí ña nakasi xíꞌin mi̱i na loꞌo kuiti ki̱vi̱ xa̱ꞌa̱ ña taxi xíꞌin mi̱i na ña ka̱ꞌa̱n na xíꞌin Ndios. Ta ta̱a xíꞌin ñásíꞌí ra xíni̱ ñóꞌó siꞌna koo yuꞌú na xa̱ꞌa̱ ña keꞌé na saá. Ta o̱n váꞌa nakasi xíꞌin mi̱i na kua̱ꞌa̱ ní ki̱vi̱, chi yi̱yo ní o̱n kuchiño na nasita xíꞌin mi̱i na, ta níma̱ ndiva̱ꞌa káꞌno chindaꞌá ña na ki̱ꞌvi na kua̱chi xíꞌin inka̱ ta̱a án xíꞌin inka̱ ñaꞌa̱.

2 Corintios 11:27

Ñii ñii ki̱vi̱ ndeé ní ki̱sa chiño i̱, ta kua̱ꞌa̱ ní ñayo̱ꞌvi̱ ni̱ndoꞌo i̱. Kua̱ꞌa̱ ní ñoó o̱n vása ní‑kuchiño ku̱su̱n i̱; kua̱ꞌa̱ ní yichi̱ ni̱xiꞌi̱ ní i̱ so̱ko; kua̱ꞌa̱ ní yichi̱ ni̱yi̱chi̱ ní i̱ takuií; kua̱ꞌa̱ ní yichi̱ o̱n vása ní‑xixi i̱; kua̱ꞌa̱ ní yichi̱ ni̱xiꞌi̱ ní i̱ kaxin; ta kua̱ꞌa̱ ní yichi̱ o̱n vása ní‑xiyo tiko̱to̱ ña kundixin i̱.

Apocalipsis 19:9

Ta saá ñii ñaángel ni̱ka̱ꞌa̱n ña xíꞌin i̱, káchí ña saá: ―Vitin taa ún to̱ꞌon yóꞌo, ña káchí saá: “Nákaa̱ ñasi̱i̱ ini ni̱vi na kúu na ka̱na Ndios kixi na viko̱ tonda̱ꞌa̱ Ndikachi” ―káchí ñaángel xíꞌin i̱. Ta tuku ni̱ka̱ꞌa̱n ñaángel xíꞌin i̱, káchí ña saá: ―Ndiꞌi to̱ꞌon ña ni̱ka̱ꞌa̱n i̱ xíꞌin ún kúu to̱ꞌon ña nda̱a̱ ña ki̱xi no̱o̱ Ndios ―káchí ñaángel xíꞌin i̱.

Apocalipsis 21:2

Ta saá xi̱ni i̱ ñoo yi̱i̱ ña kúu ñoo Jerusalén ña xa̱á, va̱xi noo ña ñoyívi ni̱no no̱o̱ yóo Ndios. Livi ní káa ñoo yóꞌo, nda̱tán livi káa ñáñaꞌa̱ ñá livi ní tiko̱to̱ ndíxin xa̱ꞌa̱ ña tonda̱ꞌa̱ ñá, saá yóo ñoo, xi̱ni i̱.