San Mateo 8:2 - Alacatlatzala Mixtec New Testament

² Ta ki̱xaa̱ ñii ta̱a ta̱ ndeé ní ndóꞌo kue̱ꞌe̱ táꞌyí ña na̱ní lepra. Ki̱xaa̱ ra xi̱kuxítí ra no̱o̱ ta̱Jesús, ta káchí ra saá xíꞌin ra: ―Tata, tá kóni ún, ta sandaꞌa ún yi̱ꞌi̱ no̱o̱ kue̱ꞌe̱ ña ndóꞌo i̱ ―káchí ta̱ ndeé ndóꞌo xíꞌin ta̱Jesús.

San Mateo 8:2 Iomraidhean Croise

San Mateo 10:8

Ta sandaꞌa ndó ni̱vi na ndeé ndóꞌo, ta sanataku̱ ndó ni̱vi na ni̱xiꞌi̱, ta sandaꞌa ndó ni̱vi na ndeé ndóꞌo xíꞌin kue̱ꞌe̱ táꞌyí na̱ní lepra, ta tava ndó níma̱ ndiva̱ꞌa ña saña ña ni̱vi. Ta sa̱níꞌi i̱ ndóꞌó nda̱yí ña kasa ndivi ndó ndiꞌi ñayóꞌo, ta o̱n vása xíni̱ ñóꞌó chaꞌvi ndó ña. Ta saá, tá keꞌé ndó ñava̱ꞌa xíꞌin ni̱vi, ta o̱n ndukú ndó ña chaꞌvi na ndóꞌó.

San Mateo 13:58

Ta saá o̱n vása ní‑keꞌé ra kua̱ꞌa̱ ní milagro xíꞌin na, chi ni̱‑xiin na kandixa na ra.

San Mateo 14:33

Ta na ñóꞌo ini tón barco xi̱kuxítí na no̱o̱ ta̱Jesús, ta ki̱sa to̱ꞌó na ra, ni̱ka̱ꞌa̱n na saá xíꞌin ra: ―¡Ndixa yóꞌó kúu ún Sa̱ꞌya Ndios! ―káchí na.

San Mateo 15:25

Ta ñáñaꞌa̱ yóꞌo ni̱to̱nda̱a yatin ñá, ta xi̱kuxítí ñá no̱o̱ ta̱Jesús, ta ni̱ka̱ꞌa̱n ñá xíꞌin ra: ―Tata, ¡chindeé ún yi̱ꞌi̱!

San Mateo 18:26

Ta saá ta̱ kísa chiño yóꞌo xi̱kuxítí ra ta xa̱ku ndáꞌví ra no̱o̱ ta̱rey, káchí ra saá: “Tata, kundáꞌví ini ún koni ún yi̱ꞌi̱, ta saá chaꞌvi ndiꞌi i̱ si̱ꞌún ña níká i̱ ndaꞌa̱ ún.”

San Mateo 2:11

Ta ni̱ki̱ꞌvi na ini veꞌe, ta xi̱ni na ta̱loꞌo xíꞌin siꞌí ra ñáMaría. Ta saá xi̱kuxítí na no̱o̱ ta̱loꞌo, ta ki̱sa to̱ꞌó na ra. Ta na̱kuiná na xa̱to̱n válí na, ta sa̱níꞌi na ra ñaoro, xíꞌin xuxa va̱ꞌa ña yáꞌví ní, xíꞌin nduta̱ va̱ꞌa tá támi xáꞌan na̱ní rá mirra.

San Mateo 20:20

Ta saá ki̱xaa̱ siꞌí ta̱Jacobo xíꞌin ta̱Juan, sa̱ꞌya ta̱Zebedeo kúu ra, ta ki̱xaa̱ ñá xíꞌin o̱vi̱ sa̱ꞌya ñá no̱o̱ ta̱Jesús, ta xi̱kuxítí ñá chi ndukú ñá ñii ñava̱ꞌa no̱o̱ ra.

San Mateo 26:6

Ta yóo ta̱Jesús ñoo Betania veꞌe ta̱Simón, ta̱ xi̱komí kue̱ꞌe̱ táꞌyí na̱ní ña lepra.

San Mateo 28:17

Ta xi̱ni na ra ta ki̱sa to̱ꞌó na ra, vará sava nayóꞌo ni̱xika ini na án ndixa kúu ta̱yóꞌo ta̱Jesús.

San Mateo 28:9

Ta xa̱ndi̱ko̱n ta̱Jesús na̱kutáꞌan ra xíꞌin náñaꞌa̱ yóꞌo yichi̱, ta chi̱ndeé ra ná ta ni̱ka̱ꞌa̱n ra siꞌa xíꞌin ná: ―Kuaꞌa, nana. Ná koo ñava̱ꞌa ini ndó ―káchí ra xíꞌin ná. Ta ni̱xaa̱ yatin ná no̱o̱ ra, ta xi̱kuxítí ná ta no̱mi ná xa̱ꞌa̱ ra ta ki̱sa to̱ꞌó ná ra.

San Mateo 4:9

Ta saá ni̱ka̱ꞌa̱n ñandiva̱ꞌa xíꞌin ra, káchí ña: ―Tá kuxítí ún no̱o̱ i̱ ta kasa to̱ꞌó ún yi̱ꞌi̱, ta saá taxi i̱ nda̱yí ndaꞌa̱ ún kuu ún ta̱káꞌno no̱o̱ ndiꞌi ñoyívi yóꞌo xíꞌin ndiꞌi ñakuíká kómí ña ―káchí ñandiva̱ꞌa xíꞌin ra.

San Mateo 8:1

Ta saá ke̱e ta̱Jesús ta va̱xi noo ra xi̱ki̱, ta kua̱ꞌa̱ ní ni̱vi xi̱kundiko̱n na sa̱ta̱ ra.

San Mateo 8:25

Ta naxíka xíꞌin ra sa̱nakáxín na ini ra, ta ni̱ka̱ꞌa̱n na xíꞌin ra: ―Tata, ¡saka̱ku ún ndi̱ꞌi̱! ¡Yi̱yo ní ka̱ꞌa̱ ndiꞌi yó xíꞌin takuií, chi kua̱n ke̱tá tón barco ini mi̱ni!

San Mateo 9:18

Tá káꞌa̱n ta̱Jesús xíꞌin na, ta saá ki̱xaa̱ ñii ta̱ xáꞌnda chiño no̱o̱ nañoo judío, ta ki̱xaa̱ ra xi̱kuxítí ra no̱o̱ ta̱Jesús, ta ni̱ka̱ꞌa̱n ra, káchí ra saá xíꞌin ra: ―Tata, sa̱kán ni̱xiꞌi̱ ñáloꞌo sa̱ꞌya i̱. Ná ko̱ꞌo̱n ún xíꞌin i̱ veꞌe i̱, ta ná chinóo ún ndaꞌa̱ ún si̱ni̱ ñá, ta nataku̱ ñá ―káchí ta̱yóꞌo xíꞌin ta̱Jesús.

San Lucas 4:27

Ta inka̱ kui̱ya̱ xi̱na̱ꞌá ta̱profeta Eliseo ni̱ka̱ꞌa̱n ndoso ra to̱ꞌon Ndios xíꞌin ni̱vi, ta ni̱xi̱yo kua̱ꞌa̱ ní naIsrael na xi̱ndeé ní ndóꞌo kue̱ꞌe̱ táꞌyí na̱ní ña lepra. Ta Ndios o̱n vása ní‑sandaꞌa ra nda̱ ñii ni̱vi nañoo Israel na xi̱komí kue̱ꞌe̱ lepra, ta Ndios sa̱ndaꞌa ra ñii la̱á ta̱Naamán, ta̱a ta̱ñoo Siria xi̱kuu ra. Ta̱yóꞌo o̱n si̱ví ta̱Israel xi̱kuu ra, ta ta̱yóꞌo kúu ta̱a ta̱ sa̱ndaꞌa Ndios ―káchí ta̱Jesús xíꞌin na.

San Juan 9:38

Ta saá nda̱kuii̱n ra, ni̱ka̱ꞌa̱n ra xíꞌin ta̱Jesús: ―Tata, ta̱Káꞌno no̱o̱ i̱ kúu ún, kándixa i̱ yóꞌó ―káchí ra, ta ki̱sa káꞌno ñaꞌá ra.

Hechos 10:14

Ta nda̱kuii̱n ta̱Pedro, ni̱ka̱ꞌa̱n ra: ―Tata, o̱n ki̱ví keꞌé i̱ saá ña kuxu i̱ kiti̱ yóꞌo, chi nda̱ ki̱vi̱ vitin nda̱ loꞌo o̱n vása ní‑xixi i̱ ko̱ñu kiti̱ tí káꞌa̱n nda̱yí ña ni̱taa ta̱Moisés ndí kúu rí kiti̱ tí kini no̱o̱ Ndios ―káchí ta̱Pedro.

Hechos 10:25

Tá ki̱xaa̱ ta̱Pedro veꞌe ta̱Cornelio, ta saá ke̱ta ta̱Cornelio nakiꞌin ra ta̱Pedro, ta xi̱kuxítí ra no̱o̱ ta̱yóꞌo ña ki̱sa to̱ꞌó ñaꞌá ra.

1 Corintios 14:25

Tá xíni̱ so̱ꞌo na to̱ꞌon Ndios ña káꞌa̱n ndó xíꞌin na, ta saá Ndios sanati̱vi ra no̱o̱ na ndiꞌi ña ñóꞌo seꞌé níma̱ na. Ta saá kuxítí na xa̱ꞌa̱ ña kasa to̱ꞌó na Ndios, ta ka̱ꞌa̱n na xíꞌin ndó, kachí na saá: “Ndixa Ndios yóo ra xíꞌin ndóꞌó”, kachí na xíꞌin ndó.

Apocalipsis 19:10

Ta yi̱ꞌi̱ xi̱kuxítí i̱ no̱o̱ ñaángel ña kasa to̱ꞌó i̱ ña, ta kama ni̱ka̱ꞌa̱n ñaángel yóꞌo xíꞌin i̱: ―O̱n keꞌé ún saá, o̱n kuxítí ún no̱o̱ i̱. Saá chi nda̱tán yóo mi̱i ún xíꞌin nañani ún na ndíko̱n Jesucristo, saá yóo yi̱ꞌi̱, chi ndiꞌi yó kísa chiño yó no̱o̱ Ndios, ta kándixa yó to̱ꞌon ña nda̱a̱ ña ni̱ka̱ꞌa̱n Jesucristo, ta o̱n sandakoo yó kándixa yó to̱ꞌon ra. Ta saá o̱n váꞌa kuxítí ún no̱o̱ i̱, chi xíni̱ ñóꞌó ndasaá Ndios kuiti kasa káꞌno yó. Chi to̱ꞌon ña sa̱náꞌa Jesucristo ñii kúu ña xíꞌin to̱ꞌon ña ni̱ka̱ꞌa̱n naprofeta xi̱na̱ꞌá, saá chi ndiꞌi to̱ꞌon yóꞌo ka̱ku ña no̱o̱ Níma̱ Ndios ―káchí ñaángel xíꞌin i̱.