San Mateo 12:3 - Alacatlatzala Mixtec New Testament

³ Ta nda̱kuii̱n ta̱Jesús, káchí ra saá xíꞌin na: ―¿Án o̱n vása ní‑kaꞌvi ndó to̱ꞌon Ndios no̱o̱ káꞌa̱n ña xa̱ꞌa̱ xi̱i̱ síkuá yó ta̱rey David xíꞌin natáꞌan ra, ki̱vi̱ ni̱xiꞌi̱ ní na so̱ko?

San Mateo 12:3 Iomraidhean Croise

San Mateo 12:2

Ta xi̱ni nafariseo ña ke̱ꞌé nayóꞌo, ta ni̱ka̱ꞌa̱n na saá xíꞌin ta̱Jesús: ―Naxíka xíꞌin ún ni̱yaꞌa ndoso na nda̱yí Ndios chi xa̱ꞌnda na trigo, ta o̱n váꞌa kasa chiño yó ki̱vi̱ yi̱i̱ ña nákindée yó, káchí nda̱yí Ndios ña ni̱taa ta̱Moisés xi̱na̱ꞌá.

San Mateo 12:4

Saá chi kui̱ya̱ xi̱na̱ꞌá ni̱ki̱ꞌvi nayóꞌo ini veꞌe Ndios, ta xi̱xi na si̱ta̱ va̱ꞌa ñayi̱i̱ vará o̱n si̱ví su̱tu̱ xi̱kuu na. Ta káchí nda̱yí Ndios saá: “Ndasaá su̱tu̱ kuiti kúchiño kuxu si̱ta̱ va̱ꞌa ñayi̱i̱.”

San Mateo 12:5

Ta xa ka̱ꞌvi ndó nda̱yí Ndios ña káꞌa̱n o̱n ki̱ví kasa chiño yó ki̱vi̱ yi̱i̱ ña nákindée yó. Ta nasu̱tu̱ kísa ndivi na chiño veꞌe ño̱ꞌo káꞌno ki̱vi̱ yi̱i̱ ña nákindée yó, ta o̱n ko̱ó kua̱chi ndíso na xa̱ꞌa̱ ñayóꞌo.

San Mateo 19:4

Ta nda̱kuii̱n ta̱Jesús, káchí ra saá: ―¿Án o̱n vása ní‑kaꞌvi ndó to̱ꞌon Ndios ña káꞌa̱n xa̱ꞌa̱ ki̱vi̱ ki̱sa va̱ꞌa Ndios ñoyívi yóꞌo? Chi Ndios ki̱sa va̱ꞌa ra ñii ta̱a xíꞌin ñii ñaꞌa̱.

San Mateo 21:16

Ta na sánáꞌa nda̱yí Ndios xíꞌin nanáꞌno no̱o̱ nasu̱tu̱ ni̱nda̱ka̱ to̱ꞌon na ta̱Jesús: ―¿Án xíni̱ so̱ꞌo ún yukía̱ káꞌa̱n naválí yóꞌo? Ta nda̱kuii̱n ta̱Jesús, káchí ra saá: ―Oon, xíni̱ so̱ꞌo i̱ ña káꞌa̱n na. Ta ndóꞌó, ¿án o̱n vása ní‑kaꞌvi ndó to̱ꞌon Ndios, no̱o̱ káchí ña saá?: Ndios chi̱tóni̱ ra ka̱ꞌa̱n naválí ñato̱ꞌó xa̱ꞌa̱ ra. Nda̱ yuꞌu̱ naválí xíꞌin yuꞌu̱ naválí páꞌá na chíchín nakiꞌin ra ñato̱ꞌó, káchí to̱ꞌon Ndios ―káchí ta̱Jesús xíꞌin na.

San Mateo 22:31

Xa̱ꞌa̱ ña nataku̱ na ni̱xiꞌi̱, ¿án o̱n vása ní‑kaꞌvi ndó yukía̱ ni̱ka̱ꞌa̱n Ndios xíꞌin ta̱Moisés xi̱na̱ꞌá? Ka̱chí ra saá:

San Marcos 12:10

’¿Án o̱n vása ní‑kaꞌvi ndó to̱ꞌon Ndios, ña káchí saá?: Yóo yu̱u̱ ña ni̱‑xiin ni̱vi na kísa va̱ꞌa veꞌe koni̱ ñóꞌó na, ta mi̱i yu̱u̱ yóꞌo ndu̱u ña yu̱u̱ ñano̱ó nákaa̱ xa̱ꞌa̱ veꞌe.

San Marcos 12:26

Xa̱ꞌa̱ ña nataku̱ na ni̱xiꞌi̱, ¿án o̱n vása ní‑kaꞌvi ndó yukía̱ ni̱ka̱ꞌa̱n Ndios xíꞌin ta̱Moisés xi̱na̱ꞌá, ki̱vi̱ xi̱ni ra yito̱n ñiño̱ xíxi̱ nó? Ka̱chí ra saá: “Yi̱ꞌi̱ kúu Ndios, ta ta̱Abraham, ta̱Isaac, xíꞌin ta̱Jacob kísa to̱ꞌó ra yi̱ꞌi̱ vitin”, ka̱chí Ndios.

San Lucas 10:26

Ta nda̱kuii̱n ta̱Jesús, ni̱ka̱ꞌa̱n ra: ―¿Yukía̱ káchí nda̱yí Ndios ña ni̱taa ta̱Moisés xi̱na̱ꞌá? ¿Yukía̱ káꞌvi ún no̱o̱ nda̱yí yóꞌo? ―káchí ra.

San Lucas 6:3

Ta nda̱kuii̱n ta̱Jesús, ni̱ka̱ꞌa̱n ra saá xíꞌin na: ―¿Án o̱n vása ní‑kaꞌvi ndó to̱ꞌon Ndios no̱o̱ káꞌa̱n ña xa̱ꞌa̱ xi̱i̱ síkuá yó ta̱rey David xíꞌin natáꞌan ra ki̱vi̱ ni̱xiꞌi̱ na so̱ko?