San Lucas 23:1 - Alacatlatzala Mixtec New Testament

¹ Ta saá na̱kuita ndiꞌi na, ta kua̱ꞌa̱n ta̱Jesús xíꞌin ndiꞌi na, ta̱nda̱ ni̱xaa̱ na no̱o̱ ta̱gobernador Pilato.

San Lucas 23:1 Iomraidhean Croise

San Lucas 22:66

Ta saá ni̱ti̱vi inka̱ ki̱vi̱, ta na̱kutáꞌan ndiꞌi naxi̱kua̱ꞌa̱ no̱o̱ najudío, xíꞌin nanáꞌno no̱o̱ nasu̱tu̱, xíꞌin na sánáꞌa nda̱yí Ndios, na̱kutáꞌan ndiꞌi na ndóo na veꞌe chiño. Ta kua̱ꞌa̱n ta̱Jesús xíꞌin napolicía, ta ni̱xaa̱ na no̱o̱ nachiño na kúu naJunta Suprema. Ta nayóꞌo ni̱ka̱ꞌa̱n na xíꞌin ta̱Jesús:

San Lucas 22:71

Ta saá ni̱ka̱ꞌa̱n na xíꞌin natáꞌan na: ―O̱n vása xíni̱ ñóꞌó yó inka̱ ni̱vi taxi na kua̱chi xa̱ꞌa̱ ta̱yóꞌo, chi mi̱i yó xi̱ni̱ so̱ꞌo yó káchí ra kúu ra Sa̱ꞌya Ndios, ta xíꞌin to̱ꞌon yóꞌo kándiva̱ꞌa ra xíꞌin Ndios ―káchí na.

Hechos 4:27

’Ta xa ku̱ndivi ña ni̱ka̱ꞌa̱n ta̱David, chi ñoo Jerusalén yóꞌo na̱kutáꞌan ta̱rey Herodes xíꞌin ta̱gobernador Pilato xíꞌin inka̱ ni̱vi na ñoo xíyo, ta xíꞌin sava nañoo yó naIsrael, ta ndiꞌi nayóꞌo na̱koo yuꞌú na ña kaꞌni na Sa̱ꞌya ún ta̱yi̱i̱ ta̱Jesús, ta̱a ta̱ na̱ka̱xin ún ta sa̱kuiso chiño ún ra ña saka̱ku ra ni̱vi.