San Lucas 12:28 - Alacatlatzala Mixtec New Testament

²⁸ Vará nda̱ loꞌo ki̱vi̱ táku̱ yita válí yuku̱, chi ñii ki̱vi̱ ndáxaa ña, ta inka̱ ki̱vi̱ ndáꞌva̱ ña, ta saá táan na ña ini xi̱to̱n ko̱ko̱ ña, ta Ndios ndáa ra ña, ta livi ndátón sákundixin ra ña. Ñayóꞌo sánáꞌa ndí Ndios ndáa va̱ꞌa ra ndóꞌó, chi ndóꞌó ndáya̱ꞌví ní ka̱ ndó no̱o̱ yita válí. ¡Nda̱chun loꞌo ní kándixa ndó Ndios ña kundaa ra ndóꞌó!

San Lucas 12:28 Iomraidhean Croise

San Mateo 14:31

Ta ta̱Jesús xa̱ndi̱ko̱n sa̱nakaa̱ ra ndaꞌa̱ ra, ta ti̱in ra ta̱Pedro, ta ni̱ka̱ꞌa̱n ra xíꞌin ra: ―¡Ta̱a ta̱ loꞌo ní kándixa ini yi̱ꞌi̱ kúu yóꞌó! ¿Nda̱chun xíka ini ún, ta o̱n vása kándixa ún yi̱ꞌi̱ chindeé i̱ yóꞌó?

San Mateo 16:8

Ta ku̱nda̱a̱ ini ta̱Jesús yukía̱ ni̱ka̱ꞌa̱n xíꞌin táꞌan na, ta káchí ra saá xíꞌin na: ―Na o̱n vása kándixa kúu ndó. ¿Nda̱chun káꞌa̱n xíꞌin táꞌan ndó: “O̱n ko̱ó si̱ta̱ va̱ꞌa níꞌi yó”, káchí ndó?

San Mateo 17:17

Ta nda̱kuii̱n ta̱Jesús, ni̱ka̱ꞌa̱n ra xíꞌin ni̱vi: ―¡Ni̱vi na toon ní ini kúu ndóꞌó, ta o̱n xi̱in ndó kandixa ndó Ndios! ¿Ndasaá ka̱ ki̱vi̱ xíni̱ ñóꞌó kutaku̱ i̱ xíꞌin ndó? ¿Nda̱ ama kundeé ini i̱ xíꞌin ndó? Ta vitin, va̱ꞌa taxi ndó ná kixi ta̱loꞌo yóꞌo no̱o̱ i̱ ―káchí ra.

San Mateo 17:20

Ta nda̱kuii̱n ta̱Jesús, káchí ra xíꞌin na: ―O̱n vása ní‑kuchiño ndó chi xíni̱ ñóꞌó kandixa ka̱ ndó Ndios. Ndixa káꞌa̱n i̱ xíꞌin ndó, tá kandixa ndó Ndios vará nda̱ loꞌo kuiti, nda̱tán yóo ndiki̱n mostaza loꞌo ní ña, ta xa̱ꞌa̱ ña loꞌo kuiti kandixa ndó, ñayóꞌo taxi ña kukomí ndó ndee̱ ña ka̱ꞌa̱n ndó xíꞌin yuku̱ káꞌno ñíndichi yóꞌo: “Kutaꞌa ún yóꞌo ta kua̱ꞌa̱n ún inka̱ xiiña kaa̱”, kachí ndó, ta yuku̱ káꞌno ñíndichi yóꞌo kutaꞌa ña. Saá chi tá kándixa loꞌo ndó Ndios, ta kuchiño ndó kasa ndivi ndó ndiꞌi ña̱ꞌa.

San Mateo 6:30

Vará nda̱ loꞌo ki̱vi̱ táku̱ yita válí yuku̱, chi ñii ki̱vi̱ ndáxaa ña, ta inka̱ ki̱vi̱ ndáꞌva̱ ña, ta saá táan na ña ini xi̱to̱n ko̱ko̱ ña, ta Ndios ndáa ra ña, ta ndátón sákundixin ra ña. Ñayóꞌo sánáꞌa ndí Ndios ndáa va̱ꞌa ra ndóꞌó, chi ndóꞌó ndáya̱ꞌví ní ka̱ ndó no̱o̱ yita válí. ¿Nda̱chun loꞌo ní kándixa ndó Ndios ña kundaa ra ndóꞌó?

San Mateo 8:26

Ta ni̱ka̱ꞌa̱n ta̱Jesús xíꞌin na: ―¿Nda̱chun yíꞌví ní ndó? ¿Nda̱chun o̱n vása kándixa ndó Ndios ndáa ra ndóꞌó? Ta nda̱koo ta̱Jesús, ta xa̱ꞌnda chiño ra no̱o̱ ta̱chi̱ naꞌá xíꞌin takuií mi̱ni. Ta saá ku̱tásin ta̱chi̱ naꞌá xíꞌin takuií mi̱ni, ñii ya̱a̱ ya̱a̱ ku̱u.

San Lucas 8:25

Ta ni̱ka̱ꞌa̱n ra xíꞌin naxíka xíꞌin ra: ―¿Nda̱chun o̱n vása kándixa ndó Ndios ndáa ra yó? ―káchí ra. Ta nayóꞌo yíꞌví ní na, ta na̱kaꞌnda ní ini na ndóo na, ta ni̱nda̱ka̱ to̱ꞌon táꞌan na: ―¿Yu kúu ta̱yóꞌo? Chi xáꞌnda chiño ra no̱o̱ ta̱chi̱ naꞌá xíꞌin takuií mi̱ni, ta xíni̱ so̱ꞌo ña to̱ꞌon káꞌa̱n ra ―káchí na.

Hebreos 6:7

Chi ni̱vi na kándixa Jesucristo, Ndios kéꞌé ra ñava̱ꞌa xíꞌin nayóꞌo, ta ni̱vi yóꞌo yóo na nda̱tán yóo ñoꞌo̱ no̱o̱ kóon sa̱vi̱ no̱o̱ ña, ta va̱ꞌa nákiꞌin ña takuií sa̱vi̱ yóꞌo ta sákuaꞌno ña ndiꞌi ña kuxu ni̱vi na kísa chiño no̱o̱ ña.

1 Pedro 1:24

Chi to̱ꞌon Ndios, ña ni̱taa ñii ta̱profeta xi̱na̱ꞌá, káchí ña saá: Ndiꞌi ni̱vi nda̱tán yóo ku̱ꞌu̱ kuíi̱, saá yóo na. Ñakáꞌno livi ña kómí ni̱vi, yóo ña nda̱tán yóo yita livi ña xáꞌno no̱o̱ ku̱ꞌu̱ kuíi̱. Chi ku̱ꞌu̱ kuíi̱ yíchi̱ ña, ta ñii ki̱ꞌva saá yíchi̱ yita livi xíꞌin ña, ta nakava ña no̱o̱ ñoꞌo̱ ta ndiꞌi xa̱ꞌa̱ ñayóꞌo;