San Juan 5:23 - Alacatlatzala Mixtec New Testament

²³ chi Ndios kóni ra ndí ndiꞌi ni̱vi ná kasa to̱ꞌó na Sa̱ꞌya ra, nda̱tán ñii ki̱ꞌva kísa to̱ꞌó na mi̱i ra. Ta ndiꞌi ni̱vi na o̱n xi̱in kasa to̱ꞌó yi̱ꞌi̱, nayóꞌo o̱n vása kísa to̱ꞌó na Yivá i̱ Ndios, ta̱a ta̱ ti̱ꞌví yi̱ꞌi̱ ki̱xaa̱ i̱.

San Juan 5:23 Iomraidhean Croise

San Mateo 10:37

’Ndiꞌi ni̱vi na kóni ko̱ꞌo̱n yichi̱ i̱, xíni̱ ñóꞌó kukiꞌvi ní ka̱ ini na koni na yi̱ꞌi̱ no̱o̱ naveꞌe mi̱i na. Tá ni̱vi kíꞌvi ka̱ ini na xíni na yivá na, án siꞌí na, án sa̱ꞌya na no̱o̱ yi̱ꞌi̱, ta saá nayóꞌo o̱n vása kómí na nda̱yí kundiko̱n na sa̱ta̱ i̱.

San Mateo 11:27

Ta tuku ni̱ka̱ꞌa̱n ta̱Jesús xíꞌin ni̱vi, káchí ra saá: ―Yivá i̱ Ndios ta̱xi ra ndiꞌi ñava̱ꞌa ndaꞌa̱ i̱. Nda̱ ñii ni̱vi o̱n vása xíni̱ na ini yi̱ꞌi̱, ta̱a ta̱ kúu Sa̱ꞌya Ndios, ta ñii la̱á mi̱i Ndios kúu ta̱ xíni̱ va̱ꞌa ini yi̱ꞌi̱. Ta nda̱ ñii ni̱vi o̱n vása xíni̱ na ini Yivá i̱ Ndios, ta ñii la̱á yi̱ꞌi̱, ta̱a ta̱ kúu Sa̱ꞌya ra, kúu ta̱ xíni̱ ini ra, ta ni̱vi na na̱ka̱xin i̱ taxi i̱ koni̱ na ini ra.

San Mateo 12:21

Ta ndiꞌi ni̱vi na ñoyívi yóꞌo xíꞌin ndinoꞌo níma̱ na kundati na ra ña keꞌé ra ñava̱ꞌa ta saka̱ku ra na, ka̱chí Ndios, ni̱taa ta̱Isaías xi̱na̱ꞌá.

San Mateo 15:8

Ni̱vi yóꞌo kísa to̱ꞌó na yi̱ꞌi̱ xíꞌin ndasaá kuiti to̱ꞌon kée yuꞌu̱ na, ta níma̱ na xíká ní yóo ña no̱o̱ i̱, chi o̱n vása ndinoꞌo ini na kísa to̱ꞌó na yi̱ꞌi̱.

San Mateo 28:19

Ta saá káꞌa̱n i̱ xíꞌin ndó: Kua̱ꞌa̱n ndó ndiꞌi saá xiiña ñoyívi yóꞌo ta sanáꞌa ndó nani̱vi ndasaá koo kundiko̱n na yichi̱ i̱, ta sakuchu ndó na xíꞌin ki̱vi̱ Yivá yó, xíꞌin ki̱vi̱ yi̱ꞌi̱ ta̱Sa̱ꞌya ra, ta xíꞌin ki̱vi̱ Níma̱ Ndios.

San Lucas 10:16

Ta saá ni̱ka̱ꞌa̱n ka̱ ta̱Jesús xíꞌin u̱ni̱ si̱ko̱ u̱xu̱ ta̱a, káchí ra: ―Ndóꞌó kómí ndó nda̱yí i̱ ndato̱ꞌon ndó xíꞌin ni̱vi. Ta ndiꞌi ni̱vi na nakiꞌin va̱ꞌa to̱ꞌon ña káꞌa̱n ndó, to̱ꞌon yi̱ꞌi̱ kúu ña nakiꞌin na. Ndiꞌi ni̱vi na o̱n xi̱in nakiꞌin ndóꞌó, ta yi̱ꞌi̱ kúu ta̱ o̱n xi̱in na nakiꞌin na. Ta ndiꞌi na o̱n xi̱in nakiꞌin yi̱ꞌi̱, Ndios kúu ta̱ o̱n xi̱in na nakiꞌin na, chi Ndios kúu ta̱a ta̱ ti̱ꞌví yi̱ꞌi̱ va̱xi i̱ ―káchí ta̱Jesús.

San Juan 14:1

Ni̱ka̱ꞌa̱n ta̱Jesús xíꞌin naxíka xíꞌin ra, káchí ra saá: ―O̱n kundiꞌi ini ndó. Ndixa ndinoꞌo ini ndó kandixa ndó Ndios, ta ndixa ndinoꞌo ini ndó kandixa ndó yi̱ꞌi̱.

San Juan 16:14

Ta chinóo síkón ña ñato̱ꞌó i̱ no̱o̱ ni̱vi, chi ndiꞌi ñandíchí ña kómí i̱, Níma̱ Ndios nakiꞌin ña ñayóꞌo, ta taxi ña ñandíchí yóꞌo ndaꞌa̱ ndó ña kunda̱a̱ ini ndó ndiꞌi ñanda̱a̱.

San Juan 17:10

Chi ndiꞌi ni̱vi na ndíko̱n yi̱ꞌi̱ kúu na ndíko̱n yóꞌó, ta ndiꞌi ni̱vi na ndíko̱n yóꞌó kúu na ndíko̱n yi̱ꞌi̱. Xa̱ꞌa̱ ña kéꞌé nayóꞌo kúu ña kánóo síkón ñato̱ꞌó i̱.

Romanos 1:7

Ña̱kán táa i̱ tutu yóꞌo ña xaa̱ ña ndaꞌa̱ ndóꞌó, nañani yó xíꞌin náki̱ꞌva̱ yó, na táku̱ ñoo Roma, ta kúu ndó ni̱vi na kíꞌvi ní ini Ndios xíni ra. Ta Ndios ka̱na ra ndóꞌó ña kuu ndó ni̱vi nayi̱i̱ ta kutaku̱ ndii ndó no̱o̱ ra. Kóni i̱ ndí Yivá yó Ndios xíꞌin Sa̱ꞌya ra Jesucristo, Ta̱a ta̱Káꞌno no̱o̱ yó, ¡ná keꞌé ra ñava̱ꞌa xíꞌin ndó! ¡Ná taxi ra ñava̱ꞌa koo ña ini ndó!

Romanos 15:12

Saá tuku kui̱ya̱ xi̱na̱ꞌá ni̱taa ta̱profeta Isaías to̱ꞌon Ndios ña káchí saá: Ñii ki̱vi̱ nana ndaa ñii yito̱n xa̱á no̱o̱ ñii tioꞌo tón yito̱n yatá, ta tioꞌo yito̱n yatá yóꞌo káꞌa̱n xa̱ꞌa̱ ni̱vi naveꞌe ta̱Isaí. Ta yito̱n xa̱á nana ndaa yóꞌo kúu ña káꞌa̱n xa̱ꞌa̱ ta̱a ta̱ tiꞌví Ndios ña saka̱ku ra ni̱vi; chi ñii ta̱sa̱ꞌya ñani síkuá ta̱Isaí yóꞌo kuu ra, ta kuu ra ñii ta̱a ta̱káꞌno, ta̱a ta̱ kaꞌnda chiño no̱o̱ ni̱vi na o̱n vása kúu najudío. Ta ni̱vi yóꞌo xíꞌin ña ndinoꞌo ini na kundati na ña saka̱ku ra na, káchí to̱ꞌon Ndios ña ni̱taa ta̱Isaías xi̱na̱ꞌá.

Romanos 6:22

Ta Ndios xa sa̱ka̱ku ra ndóꞌó no̱o̱ ndee̱ ña o̱n váꞌa, ta o̱n vása ka̱ xáꞌnda chiño ña no̱o̱ ndó. Ta vitin ndinoꞌo ini ndó xa ta̱xi xíꞌin mi̱i ndó ndaꞌa̱ Ndios ña kasa ndivi ndó ña kóni ra. Ta xa̱ꞌa̱ ñayóꞌo ndixa nakiꞌin ndó ñava̱ꞌa ní ndaꞌa̱ Ndios, chi taxi ra kutaku̱ ndó xíꞌin ra ndiꞌi saá ki̱vi̱ ña va̱xi.

Romanos 8:9

Ta ndóꞌó, o̱n vása táku̱ ka̱ ndó kísa ndivi ndó ndasaá kuiti ña kóni yi̱kí ko̱ñu ndó. Ta nda̱ víka̱, tá ndixa Níma̱ Ndios táku̱ ña ini ndó, ta saá táku̱ ndó kísa ndivi ndó ña kóni Níma̱ Ndios. Ta ni̱vi na o̱n vása táku̱ Níma̱ Jesucristo ini, ta ni̱vi yóꞌo o̱n vása ñii yóo na xíꞌin Jesucristo, chi o̱n vása ndinoꞌo ini na kándixa na ra.

1 Corintios 1:3

Ta Ndios Yivá yó xíꞌin Jesucristo Ta̱a ta̱Káꞌno no̱o̱ yó, ¡ná taxi ra ña koo ñava̱ꞌa ini ndó! Ta, ¡ná keꞌé ra ñava̱ꞌa xíꞌin ndó!

1 Corintios 10:31

Ta yi̱ꞌi̱ ndakuii̱n i̱ ka̱ꞌa̱n i̱ xíꞌin ndó ndí ña xíni̱ ñóꞌó ní ka̱ keꞌé yó kúu ñayóꞌo: tá xíꞌi yó án xíxi yó án nda̱ yu kúu inka̱ ña kéꞌé yó, ta xíni̱ ñóꞌó kasa ndivi yó ndiꞌi ñayóꞌo xa̱ꞌa̱ ña kanóo síkón ní ñato̱ꞌó Ndios.

1 Corintios 16:22

Tá yóo ni̱vi na o̱n vása kíꞌvi ini xíni na Jesucristo, ta, ¡va̱ꞌa nayóꞌo kuiso na chiꞌña no̱o̱ Ndios! Ta ndúkú i̱ no̱o̱ Jesucristo, Ta̱a ta̱Káꞌno no̱o̱ yó, káchí i̱ saá: “¡Ya̱chi̱ ní ndikó ún kixaa̱ tuku ún ñoyívi yóꞌo, Tata!”, káchí i̱ xíꞌin ra.

1 Corintios 6:19

¿Án o̱n vása kúnda̱a̱ ini ndó ndí yi̱kí ko̱ñu ndó kúu veꞌe ño̱ꞌo no̱o̱ táku̱ Níma̱ Ndios?, chi Ndios ta̱xi ra Níma̱ ra ña táku̱ ña ini ndó. Ta vitin yi̱kí ko̱ñu ndó o̱n si̱ví ndasaá kuiti kuenda mi̱i ndó kúu ña,

2 Corintios 1:9

Xa nda̱ ku̱nda̱a̱ ini ndi̱ ña ndixa kivi̱ ndi̱, níkúu. Saá ni̱xo̱ꞌvi̱ ndi̱ xa̱ꞌa̱ ña sakuáꞌá ndi̱ ña nda̱ loꞌo o̱n kundaa ini ndi̱ ndí xíꞌin ndee̱ mi̱i ndi̱ kuchiño saka̱ku xíꞌin mi̱i ndi̱, ta nda̱ víka̱, sa̱kuáꞌá ndi̱ ña va̱ꞌa ndáa ini ndi̱ Ndios, ta̱a ta̱ sánataku̱ ni̱vi na ni̱xiꞌi̱.

2 Corintios 13:14

Ta Jesucristo, Ta̱a ta̱Káꞌno no̱o̱ yó, ¡ná keꞌé ra ñava̱ꞌa ní xíꞌin ndó! ¡Ná sanáꞌa Ndios no̱o̱ ndó ndí ndixa kíꞌvi ini ra xíni ra ndóꞌó! Ta, ¡ñii yuꞌú ná koo ñii ñii ndó xíꞌin Níma̱ Ndios, chi táku̱ ña ini ndó! Saá ná koo ña.

2 Corintios 5:14

Ta ña kíꞌvi ini Jesucristo xíni ra mi̱i ndi̱ kúu ña chíndaꞌá ndi̱ꞌi̱ ña va̱ꞌa kísa ndivi ndi̱ chiño ña sa̱kuiso ra ndi̱ꞌi̱. Saá chi kúnda̱a̱ ini ndi̱ ndí ñii la̱á Jesucristo ni̱xiꞌi̱ xa̱ꞌa̱ kua̱chi ndiꞌi ni̱vi. Ta saá ndiꞌi ni̱vi nda̱tán yóo ña ni̱xiꞌi̱ na, saá yóo ña.

2 Corintios 5:19

Ta to̱ꞌon ña ndáto̱ꞌon ndasaá kúchiño nakutáꞌan va̱ꞌa ni̱vi xíꞌin Ndios kúu ña káchí saá: Xíꞌin ña ni̱xiꞌi̱ Jesucristo ndaꞌa̱ tón cruz xa̱ꞌa̱ kua̱chi ni̱vi, Ndios ni̱xi̱yo ra kísa chiño ra ña sánakutáꞌan va̱ꞌa ra ni̱vi xíꞌin mi̱i ra, ta kíndaa ra kua̱chi sa̱ta̱ ni̱vi na kándixa Jesucristo, chi nayóꞌo ñii yóo na xíꞌin ra. Ta Ndios sa̱kuiso chiño ra mi̱i ndi̱ ña káꞌa̱n ndoso ndi̱ no̱o̱ ni̱vi to̱ꞌon yóꞌo.

Efesios 6:24

Ná keꞌé Ndios ñava̱ꞌa ní xíꞌin ndiꞌi ni̱vi na kúu na o̱n vása sándakoo ña ndixa kíꞌvi ini na xíni na Jesucristo, Ta̱a ta̱Káꞌno no̱o̱ yó. Saá ná koo.

2 Timoteo 1:12

Xa̱ꞌa̱ ña kísa ndivi i̱ chiño yóꞌo ña sa̱kuiso chiño ra yi̱ꞌi̱, vitin xóꞌvi̱ i̱ ndiꞌi tondóꞌó yóꞌo. Ta saá ni, o̱n vása kúkaꞌan no̱o̱ i̱ xa̱ꞌa̱ ndiꞌi ña xóꞌvi̱ i̱, chi xíni̱ káxín i̱ yu kúu ta̱a ta̱ kándixa i̱, ta ndixa ndáa ini i̱ ndí kómí ra ndee̱ ña kundaa va̱ꞌa ra to̱ꞌon ra ña ta̱xi ra ndaꞌa̱ i̱, ta saá ni̱vi na kándixa ra ka̱ꞌa̱n ndoso na to̱ꞌon ra a̱nda̱ kixaa̱ ki̱vi̱ ña ndikó Jesucristo ñoyívi yóꞌo.

Hebreos 1:6

Ta Ndios, ki̱vi̱ ti̱ꞌví ra Sa̱ꞌya ra ta̱ kúu ta̱no̱ó xíꞌin ra, ki̱xaa̱ ra ñoyívi yóꞌo, ta ni̱ka̱ꞌa̱n ra xíꞌin naángel na kísa chiño no̱o̱ ra, ka̱chí ra saá: Ndiꞌi ndóꞌó naángel, ¡ná kasa káꞌno ndó Sa̱ꞌya i̱!

2 Pedro 1:1

Yi̱ꞌi̱, ta̱Simón Pedro, ñii ta̱apóstol ta̱ kísa chiño no̱o̱ Jesucristo kúu i̱. Ta táa i̱ tutu yóꞌo xaa̱ ña ndaꞌa̱ ndóꞌó, ni̱vi na xa na̱kiꞌin ñava̱ꞌa ña livi, ña ndáya̱ꞌví ní, ña kúu ña ndáa ini ndó Ndios nda̱tán ndáa ini mi̱i ndi̱ Ndios. Ta vitin xa na̱kiꞌin yó ñava̱ꞌa yóꞌo, chi ta̱a ta̱nda̱a̱ kúu Jesucristo, ta̱Káꞌno no̱o̱ yó, ta kúu ra Ndios, Ta̱a ta̱ Sa̱ka̱ku mi̱i yó.

2 Pedro 3:18

Nda̱ víka̱ ndixa ñii ñii ki̱vi̱ xíni̱ ñóꞌó chikaa̱ ndó ndee̱ ña koni̱ va̱ꞌa ka̱ ndó Jesucristo, Ta̱a ta̱Káꞌno no̱o̱ yó, ta kúu ra Ta̱a ta̱ Sa̱ka̱ku mi̱i yó. Ñava̱ꞌa ña xa ta̱xi ra ndaꞌa̱ ndó chíndeé ña ndóꞌó ña ndinoꞌo ka̱ kutaku̱ ndó ñii ñii ki̱vi̱ nda̱tán kóni mi̱i ra. Ná kasa káꞌno ní yó ra nda̱ vitin ta̱nda̱ ndiꞌi saá ki̱vi̱ ña va̱xi. Saá ná koo ña.

1 Juan 2:23

Tá yóo ni̱vi na o̱n xi̱in kandixa Sa̱ꞌya Ndios, ñayóꞌo kóni kachí ña ndí o̱n xi̱in na kandixa na mi̱i Ndios. Ta ni̱vi na ndinoꞌo ini káꞌa̱n ndáto̱ꞌon na ndí kándixa na Sa̱ꞌya Ndios, ta ni̱vi yóꞌo kúu na táku̱ Ndios ini.

2 Juan 1:9

Ndiꞌi ni̱vi na sa̱ndakoo yichi̱ Jesucristo ta kua̱ꞌa̱n na inka̱ yichi̱, ta ña kéꞌé na saá sánáꞌa ña ndí Ndios o̱n vása yóo ra táku̱ ra ini ni̱vi yóꞌo. Ta ni̱vi na ñii ñii ki̱vi̱ va̱ꞌa ndíko̱n na yichi̱ Jesucristo, ta saá Yivá yó Ndios yóo ra táku̱ ra ini ni̱vi yóꞌo, ta saá tuku Sa̱ꞌya ra Jesucristo yóo ra táku̱ ra ini na.