Hechos 5:3 - Alacatlatzala Mixtec New Testament

³ Ta ni̱ka̱ꞌa̱n ta̱Pedro xíꞌin ta̱Ananías: ―Tata, ¿nda̱chun ta̱xi ún ña ni̱ki̱ꞌvi níma̱ ndiva̱ꞌa káꞌno Satanás ini ún ña xáꞌnda chiño ña no̱o̱ ún ña ka̱ꞌa̱n ún to̱ꞌon vatá xíꞌin Níma̱ Ndios? Chi ka̱chí ún ñayóꞌo kúu ndiꞌi si̱ꞌún ña na̱kiꞌin ún xa̱ꞌa̱ ñoꞌo̱ ni̱si̱kó ún, ta o̱n si̱ví ñanda̱a̱ kúu ña ni̱ka̱ꞌa̱n ún, chi ki̱ndo̱o ñii táꞌví si̱ꞌún ndaꞌa̱ ún.

Hechos 5:3 Iomraidhean Croise

San Mateo 13:19

Ndiki̱n ña ni̱ko̱yo yichi̱ ndáto̱ꞌon ña xa̱ꞌa̱ ni̱vi na xíni̱ so̱ꞌo xa̱ꞌa̱ yichi̱ no̱o̱ xáꞌnda chiño Ndios, ta nayóꞌo o̱n vása kúnda̱a̱ ini na, ta saá va̱xi ñandiva̱ꞌa káꞌno ta táva ña to̱ꞌon Ndios ña xi̱ni̱ so̱ꞌo na.

San Lucas 22:3

Ta ñandiva̱ꞌa káꞌno Satanás ni̱ki̱ꞌvi ña ini ta̱Judas Iscariote ta̱ kúu ñii ta̱a ta̱ u̱xu̱ o̱vi̱ xíka xíꞌin ta̱Jesús.

San Juan 13:2

Ta xikuaa ní, xa kóni kunaa kúu ña, ta saá yóo ta̱Jesús xíxi ra xíꞌin naxíka xíꞌin ra. Ta ñaníma̱ ndiva̱ꞌa káꞌno xa chi̱kaa̱ ña ini ta̱Judas Iscariote, sa̱ꞌya ta̱Simón, ña nataxi ra ta̱Jesús ndaꞌa̱ ni̱vi na sáa̱ ini xíni ñaꞌá.

San Juan 13:27

Ta ta̱Judas na̱kiꞌin ra si̱ta̱ va̱ꞌa yóꞌo, ta xi̱xi ra ña, ta saá xa̱ndi̱ko̱n ñaníma̱ ndiva̱ꞌa káꞌno na̱ní Satanás ni̱ki̱ꞌvi ña ini ra. Ta ta̱Jesús ni̱ka̱ꞌa̱n ra xíꞌin ra: ―Va̱ꞌa kama kasa ndivi ún chiño ña chi̱kaa̱ ini ún keꞌé ún ―káchí ra xíꞌin ta̱Judas.

Hechos 5:2

Ta si̱ꞌún ña na̱kiꞌin na xa̱ꞌa̱ ñoꞌo̱ ni̱si̱kó na, ñii táꞌví si̱ꞌún yóꞌo chi̱kaa̱ va̱ꞌa na. Ta inka̱ táꞌví si̱ꞌún, ta̱Ananías ta̱xi ra ña ndaꞌa̱ naapóstol xa̱ꞌa̱ ña koni̱ ñóꞌó ni̱vi nandáꞌví. Ta saá ta̱Ananías ki̱xaa̱ ra taxi ra si̱ꞌún yóꞌo ndaꞌa̱ ta̱Pedro, ta ni̱ka̱ꞌa̱n ra xíꞌin ra, káchí ra saá: ―Ñayóꞌo kúu ndiꞌi si̱ꞌún na̱kiꞌin ndi̱ xa̱ꞌa̱ ñoꞌo̱ ni̱si̱kó ndi̱ ―káchí ra. Ta ñásíꞌí ra ñáSafira ni̱xi̱yo yuꞌú ñá xíꞌin ra ña ke̱ꞌé ra saá.

Hechos 5:4

Tá o̱n ta̱ꞌán ka̱ si̱kó ún ñoꞌo̱ ún, ¿án o̱n ndixa xi̱komí ún nda̱yí si̱kó ún ña án o̱n si̱kó ún ña?, chi ñoꞌo̱ mi̱i ún xi̱kuu ña. Ta vitin xa ni̱si̱kó ún ña ta na̱kiꞌin ún si̱ꞌún xa̱ꞌa̱ ña, ta, ¿án o̱n si̱ví si̱ꞌún mi̱i ún kúu ndiꞌi ña na̱kiꞌin ún? Ta xi̱komí ún nda̱yí keꞌé ún xíꞌin si̱ꞌún yóꞌo ñii ki̱ꞌva nda̱tán kóni ún. Ta saá, ¿nda̱chun ni̱ka̱ꞌa̱n ún to̱ꞌon vatá xíꞌin ndi̱? Ta o̱n si̱ví ndasaá kuiti ndi̱ꞌi̱ kúu na ni̱ka̱ꞌa̱n ún to̱ꞌon vatá xíꞌin, ta xíꞌin mi̱i Ndios ni̱ka̱ꞌa̱n ún to̱ꞌon vatá ―káchí ta̱Pedro xíꞌin ta̱Ananías.

Hechos 5:9

Ta ni̱ka̱ꞌa̱n ta̱Pedro xíꞌin ñá: ―¿Nda̱chun yóꞌó xíꞌin yii̱ ún ni̱xi̱yo yuꞌú ndó ña koto ndoso ndó Níma̱ Ndios? Ta vitin nata̱a kuáchí na ni̱xa̱ꞌa̱n sa̱ndúxu̱n yi̱kí ko̱ñu yii̱ ún xa ndi̱kó na ki̱xaa̱ na ta yíta na yéꞌé. Ta saá tuku nata̱a kuáchí yóꞌo yíta tiꞌva na nakiꞌin na yi̱kí ko̱ñu mi̱i ún ko̱ꞌo̱n ña xíꞌin na ña sandúxu̱n na ña ―káchí ta̱Pedro xíꞌin ñá.

Santiago 4:7

Ña̱kán xíni̱ ñóꞌó kandixa ndó Ndios ta kasa ndivi ndó ña kóni ra. Ta no̱o̱ ñaníma̱ ndiva̱ꞌa káꞌno xíni̱ ñóꞌó kasa ndee̱ xíꞌin mi̱i ndó, ta kasa téé ndó níma̱ ndó ña o̱n chikaa̱ so̱ꞌo ndó ña káꞌa̱n ña, ni o̱n kasa ndivi ndó ña kóni ña, ta saá ñaníma̱ ndiva̱ꞌa káꞌno yóꞌo kama kee ña ko̱ꞌo̱n ña no̱o̱ ndó.

1 Pedro 5:8

Ta saá xíni̱ ñóꞌó vivíi ndinoꞌo kundito ndó ña koo tiꞌva ndó kasa ndivi ndó ña kóni Ndios, ta koto va̱ꞌa ndó chi ñandiva̱ꞌa káꞌno ndixa sáa̱ ní ini ña xíni ña ndóꞌó, ta nda̱tán xíka ñii tíleón tí xíꞌi̱ ní so̱ko nándukú rí ña kaxi rí, saá xíka ñandiva̱ꞌa yóꞌo sa̱ta̱ ndó.