Hechos 3:14 - Alacatlatzala Mixtec New Testament

¹⁴ O̱n vása ní‑xiin ndó nakiꞌin va̱ꞌa ndó ta̱Jesús, ta̱a ta̱ kúu ta̱Nda̱a̱, ta̱ kúu ta̱Yi̱i̱, ta nda̱ víka̱ ndu̱kú ndó no̱o̱ ta̱Pilato ña saña ra inka̱ ta̱a, ta̱ kúu ta̱ xáꞌni ni̱vi.

Hechos 3:14 Iomraidhean Croise

San Mateo 27:20

Ta naxi̱kua̱ꞌa̱ no̱o̱ najudío xíꞌin nanáꞌno no̱o̱ nasu̱tu̱ chúꞌu na ni̱vi ña ndukú na ko̱ꞌo̱n ndíka̱ ta̱Barrabás, ta ndukú na ña kivi̱ ta̱Jesús.

San Marcos 1:24

―Yóꞌó kúu Jesús ta̱ñoo Nazaret, ta, ¿nda̱chun sándiꞌi ún ndi̱ꞌi̱? ¿Án xa ki̱xaa̱ ún sandiꞌi ún xa̱ꞌa̱ ndi̱? Xíni̱ va̱ꞌa i̱ yu kúu ún, yóꞌó kúu Ta̱a ta̱Yi̱i̱ ta̱ ki̱xi no̱o̱ Ndios ―káchí ña xíꞌin ra.

San Marcos 15:11

Ta nanáꞌno no̱o̱ nasu̱tu̱ yóꞌo chúꞌu na ni̱vi ña ndukú na ko̱ꞌo̱n ndíka̱ ta̱Barrabás.

San Marcos 15:7

Ta yóo ñii ta̱a na̱ní ra Barrabás, nákaa̱ ra ini veꞌe ka̱a xíꞌin natáꞌan ra, chi ki̱sa toon na ta ka̱ni táꞌan na xíꞌin nanáꞌno na xáꞌnda chiño no̱o̱ na, ta xa̱ꞌni na ni̱vi.

San Lucas 1:35

Ta nda̱kuii̱n ñaángel: ―Ta Níma̱ Ndios kixaa̱ ña xíꞌin ún, ta ndee̱ Ndios ta̱Káꞌno kixaa̱ ña nda̱tán ñii ku̱nda̱ti̱ koo ña, ta nakundixin níí ndiꞌi ún ña. Ña̱kán sa̱ꞌya ún kuu ra ñii ta̱a yi̱i̱, ta kunaní ra Sa̱ꞌya Ndios.

San Lucas 23:25

Ta sa̱ña ra ta̱a ta̱ na̱ka̱xin na ko̱ꞌo̱n ndíka̱, vará xi̱nakaa̱ ra ini veꞌe ka̱a xa̱ꞌa̱ ña ka̱ni táꞌan ra xíꞌin nagobierno, ta xa̱ꞌni ra ni̱vi. Ta saá ta̱Pilato na̱taxi ra ta̱Jesús ndaꞌa̱ na ña keꞌé na xíꞌin ra nda̱tán yóo ña kóni mi̱i na.

San Juan 16:10

Ta Níma̱ Ndios chindeé ña ni̱vi ña kunda̱a̱ ini na ndí yi̱ꞌi̱ kúu ta̱a ta̱ va̱ꞌa, ta̱ nda̱a̱, saá chi yi̱ꞌi̱ ndikó i̱ noꞌo̱ i̱ no̱o̱ Yivá i̱ Ndios, ta ndóꞌó o̱n kívi koni ka̱ ndó yi̱ꞌi̱ ñoyívi yóꞌo.

San Juan 18:40

Ta nda̱kuii̱n na, ta xíꞌin ndiꞌi ndee̱ na, ni̱ka̱ꞌa̱n na, káchí na saá: ―Óꞌon, o̱n saña ún ta̱yóꞌo. Va̱ꞌa ka̱ saña ún ta̱Barrabás ná ko̱ꞌo̱n ndíka̱ ra ―káchí na xíꞌin ta̱Pilato. Ta ta̱Barrabás yóꞌo xi̱kuu ñii ta̱a ta̱kuíꞌná.

Hechos 13:28

Vará o̱n vása ní‑naníꞌi na kua̱chi ta̱Jesús ña taxi kaꞌni na ra, ta ndu̱kú na no̱o̱ ta̱gobernador Pilato taxi ra nda̱yí ndaꞌa̱ na ña kaꞌni na ta̱Jesús.

Hechos 2:27

Ña o̱n vása taxi ún koo níma̱ i̱ ndiꞌi saá ki̱vi̱ no̱o̱ ndóo ni̱vi na ni̱xiꞌi̱, ni o̱n taxi ún ña ta̱ꞌyi̱ yi̱kí ko̱ñu i̱ ti̱xin ñáñá. Chi ta̱a ta̱ na̱ka̱xin ún kasa chiño no̱o̱ ún kúu i̱, ta ta̱a ta̱yi̱i̱ kúu i̱.

Hechos 22:14

Ta saá ni̱ka̱ꞌa̱n ra xíꞌin i̱, ka̱chí ra: “Mi̱i Ndios, ta̱ síkón ní ñato̱ꞌó chi̱nóo naxi̱i̱ síkuá yó xi̱na̱ꞌá, na̱ka̱xin ra yóꞌó ña kunda̱a̱ ini ún yu kúu ña kóni ra kasa ndivi ún. Ta na̱ka̱xin ra yóꞌó xa̱ꞌa̱ ña na̱kutáꞌan ún xíꞌin ta̱Jesús ta̱a ta̱ kúu ta̱Nda̱a̱. Ta na̱ka̱xin ra yóꞌó xa̱ꞌa̱ ña xi̱ni̱ so̱ꞌo ún to̱ꞌon ña ke̱e mi̱i yuꞌu̱ ta̱yóꞌo.

Hechos 4:27

’Ta xa ku̱ndivi ña ni̱ka̱ꞌa̱n ta̱David, chi ñoo Jerusalén yóꞌo na̱kutáꞌan ta̱rey Herodes xíꞌin ta̱gobernador Pilato xíꞌin inka̱ ni̱vi na ñoo xíyo, ta xíꞌin sava nañoo yó naIsrael, ta ndiꞌi nayóꞌo na̱koo yuꞌú na ña kaꞌni na Sa̱ꞌya ún ta̱yi̱i̱ ta̱Jesús, ta̱a ta̱ na̱ka̱xin ún ta sa̱kuiso chiño ún ra ña saka̱ku ra ni̱vi.

Hechos 5:28

―Xa xa̱ꞌnda chiño ndi̱ no̱o̱ ndó ña o̱n ka̱ꞌa̱n ka̱ ndó xíꞌin nda̱yí ki̱vi̱ ta̱Jesús. Ta, ¿nda̱chun sóꞌó ní ndó ña o̱n xi̱in ndó kasa ndivi ndó to̱ꞌon ña ni̱ka̱ꞌa̱n ndi̱? Ta vitin ni̱vi na ndóo ndiꞌi saá xiiña ñoo Jerusalén xa xi̱ni̱ so̱ꞌo na to̱ꞌon ña sánáꞌa ndó xa̱ꞌa̱ ta̱Jesús. Ta ndóꞌó ndúkú ndó sakuiso ndó kua̱chi sa̱ta̱ ndi̱ ña xa̱ꞌni ndi̱ ta̱Jesús yóꞌo ―káchí ta̱káꞌno no̱o̱ nasu̱tu̱ xíꞌin naapóstol.

Hechos 7:52

Ta kui̱ya̱ xi̱na̱ꞌá naxi̱i̱ síkuá yó sa̱xo̱ꞌvi̱ na ndiꞌi naprofeta na ni̱ka̱ꞌa̱n ndoso to̱ꞌon Ndios, ta̱nda̱ xa̱ꞌni na ndiꞌi ni̱vi na nda̱to̱ꞌon xíꞌin na ndí ñii ki̱vi̱ Ndios tiꞌví ra ñii ta̱a ta̱ kúu ta̱Nda̱a̱ ña kixi ra ñoyívi yóꞌo ña saka̱ku ra ni̱vi. Ta ki̱vi̱ ki̱xi ta̱a ta̱Nda̱a̱ yóꞌo, ta mi̱i ndó ki̱sa kuíni̱ ini ndó xi̱ni ndó ra ta na̱taxi ndó ra ndaꞌa̱ nachiño, ta xa̱ꞌni na ra.

2 Corintios 5:21

Vará Jesucristo nda̱ ñii ña o̱n váꞌa o̱n vása ní‑keꞌé ra, ta xa̱ꞌa̱ kua̱chi ndiꞌi ni̱vi, Ndios sa̱nduu ra Jesucristo ta̱a ta̱ na̱kuiso ndiꞌi kua̱chi ni̱vi ñoyívi. Ta saá xa̱ꞌa̱ ña ni̱xiꞌi̱ Jesucristo ndaꞌa̱ tón cruz xa̱ꞌa̱ kua̱chi ni̱vi, ndiꞌi mi̱i yó na kándixa ñaꞌá, ndu̱u yó ni̱vi na ndii no̱o̱ Ndios ta o̱n vása ndíso ka̱ yó kua̱chi no̱o̱ ra.

Santiago 5:6

Ndóꞌó nakuíká sa̱kuiso ndó kua̱chi ni̱vi na o̱n ko̱ó kua̱chi kómí, ta̱nda̱ xa̱ꞌni ndó sava na, ta na o̱n ko̱ó kua̱chi kómí yóꞌo o̱n vása ní‑kuchiño na xíꞌin ndó.

1 Pedro 3:18

Saá chi mi̱i Jesucristo ni̱xo̱ꞌvi̱ ra ta ni̱xiꞌi̱ ra ñii la̱á yichi̱ xa̱ꞌa̱ ndiꞌi kua̱chi ni̱vi. Ta̱a ta̱ va̱ꞌa kúu ra, ta̱a ta̱ o̱n ko̱ó kua̱chi kómí kúu ra, ta ni̱xo̱ꞌvi̱ ní ra xa̱ꞌa̱ ndiꞌi mi̱i yó ni̱vi na ndíso kua̱chi; ke̱ꞌé ra saá ña kuchiño kuyatin yó no̱o̱ Ndios ta kutaku̱ yó xíꞌin ra ndiꞌi saá ki̱vi̱. Tá sa̱xo̱ꞌvi̱ ní ni̱vi yi̱kí ko̱ñu Jesucristo ta xa̱ꞌni na ra, ta na̱taku̱ ra no̱o̱ ña ni̱xiꞌi̱ ra, ta ndixa táku̱ ndinoꞌo ra vitin.

1 Juan 2:1

Ndóꞌó, ni̱vi na kándixa Jesucristo, nda̱tán yóo sa̱ꞌya i̱, saá yóo ndó, saá chi kíꞌvi ní ini i̱ xíni i̱ ndóꞌó. Ta táa i̱ tutu yóꞌo xaa̱ ña ndaꞌa̱ ndó xa̱ꞌa̱ ña o̱n keꞌé ndó ña o̱n váꞌa. Ta saá ni, tá yóo ki̱vi̱ kéꞌé ndó ña o̱n váꞌa, ta xíni̱ ñóꞌó kunda̱a̱ ini ndó ndí yóo ñii ta̱a ta̱ chíndeé mi̱i yó ña nákiꞌin ra to̱ꞌon yó no̱o̱ Yivá yó Ndios, ta ta̱yóꞌo kúu Jesucristo, ta̱a ta̱nda̱a̱.

Apocalipsis 3:7

Tuku ni̱ka̱ꞌa̱n ra xíꞌin i̱, káchí ra saá: ―Taa ún no̱o̱ tutu to̱ꞌon yóꞌo ko̱ꞌo̱n ña ndaꞌa̱ ñaángel ña ndáa ni̱vi na kándixa yi̱ꞌi̱ ta nákutáꞌan na ñoo Filadelfia ña kísa káꞌno na Ndios: “Yi̱ꞌi̱, ta̱a ta̱ káꞌa̱n xíꞌin ndó, kúu Ta̱a ta̱Yi̱i̱ ta̱Nda̱a̱ ndixa. Yi̱ꞌi̱ kómí i̱ llave ña xi̱komí ta̱rey David ña nakoná yéꞌé ña ki̱ꞌvi ni̱vi ñoo Jerusalén. Ta yéꞌé ña nakoná i̱, nda̱ ñii ni̱vi o̱n kuchiño na nakasi na yéꞌé yóꞌo. Ta yéꞌé ña nakasi i̱, nda̱ ñii ni̱vi o̱n kuchiño na nakoná na yéꞌé yóꞌo.