Hebreos 4:9 - Alacatlatzala Mixtec New Testament

⁹ Ña̱kán xa̱ꞌa̱ ni̱vi naveꞌe Ndios, ndixa to̱nda̱a ki̱vi̱ ña ki̱ꞌvi nayóꞌo no̱o̱ nakindée na xíꞌin Ndios.

Hebreos 4:9 Iomraidhean Croise

San Mateo 1:21

Tá kaku ta̱a sa̱ꞌya ñá, ta chinóo ún ki̱vi̱ ra kunaní ra Jesús. Saá kunaní ra, chi ta̱ saka̱ku nani̱vi xa̱ꞌa̱ kua̱chi na kuu ra ―káchí ñaángel xíꞌin ta̱José.

Tito 2:14

Jesucristo yóꞌo ta̱xi xíꞌin mi̱i ra ña ni̱xiꞌi̱ ra xa̱ꞌa̱ yó, ta ke̱ꞌé ra saá xa̱ꞌa̱ ña saka̱ku ra mi̱i yó no̱o̱ ndiꞌi ndee̱ ña o̱n váꞌa. Ta kísa káꞌno ini ra xa̱ꞌa̱ kua̱chi yó, ña ndundii yó ta nduu yó nañoo ra, ta saá xíꞌin ndiꞌi ñasi̱i̱ ini yó taxi xíꞌin mi̱i yó keꞌé yó ñava̱ꞌa.

Hebreos 11:25

Ta nda̱ víka̱, chi̱kaa̱ ini ra nakutáꞌan ra ñii nduu ra xíꞌin nañoo mi̱i ra naIsrael, na kúu nañoo Ndios. Na̱ka̱xin ra xo̱ꞌvi̱ ra xíꞌin nayóꞌo no̱o̱ ña kutaku̱ ra sakusii̱ ra ini mi̱i ra xíꞌin ña o̱n váꞌa ña kútoo ni̱vi kéꞌé na ñoyívi yóꞌo.

Hebreos 3:11

Ta saá ni̱saa̱ ní ini i̱ xi̱ni i̱ na, ta ndixa chi̱kaa̱ ini i̱ xa̱ꞌa̱ na: “Nda̱ ñii ki̱vi̱, o̱n ki̱ꞌvi na no̱o̱ taxi i̱ ña nakindée na xíꞌin i̱”, ka̱chí Ndios, saá káchí to̱ꞌon Ndios ña ni̱taa na xi̱na̱ꞌá.

Hebreos 4:1

Ta̱nda̱ vitin ndáya̱ꞌví to̱ꞌon ña ni̱ka̱ꞌa̱n Ndios xi̱na̱ꞌá ña kúu ña ki̱ndo̱o ra ndasaá ki̱ꞌvi yó no̱o̱ nakindée yó xíꞌin ra, ta saá xíni̱ ñóꞌó koto va̱ꞌa xíꞌin mi̱i yó ko̱to̱ nda̱ sava mi̱i yó o̱n kundeé yó ki̱ꞌvi yó nakindée yó xíꞌin Ndios.

Hebreos 4:10

Ta ki̱vi̱ yóꞌo, ni̱vi na ki̱ꞌvi nakindée xíꞌin Ndios, nakindée na no̱o̱ ndiꞌi chiño na, nda̱tán na̱kindée Ndios no̱o̱ chiño ña sa̱xi̱no̱ ra, ki̱vi̱ ki̱sa va̱ꞌa ra ñoyívi yóꞌo xíꞌin ñoyívi ni̱no.

Hebreos 4:3

Ta mi̱i yó vitin na kúu ni̱vi na ndáa ini to̱ꞌon Ndios, kúchiño ki̱ꞌvi yó no̱o̱ nakindée yó xíꞌin ra, ta xa̱ꞌa̱ ni̱vi na toon ní ini, na o̱n xi̱in koni̱ so̱ꞌo, ka̱chí Ndios saá: Ta saá ni̱saa̱ ní ini i̱ xi̱ni i̱ na, ta ndixa chi̱kaa̱ ini i̱ xa̱ꞌa̱ na: “Nda̱ ñii ki̱vi̱, o̱n ki̱ꞌvi na no̱o̱ taxi i̱ ña nakindée na xíꞌin i̱”, ka̱chí Ndios. Ta vitin xíni̱ yó ndí yóo no̱o̱ nakindée yó, chi Ndios, ki̱vi̱ ki̱sa va̱ꞌa ra ñoyívi yóꞌo xíꞌin ñoyívi ni̱no, nda̱ ki̱vi̱ saá chi̱ndúꞌu̱ ra no̱o̱ nakindée yó xíꞌin ra.

Hebreos 4:8

Chi tá kui̱ya̱ xi̱na̱ꞌá ta̱Josué ní ta̱xi ra ña ki̱ꞌvi ni̱vi naIsrael no̱o̱ nakindée na, níkúu, ta saá Ndios o̱n vása ní‑xini̱ ñóꞌó ka̱ꞌa̱n ka̱ ra xa̱ꞌa̱ inka̱ ki̱vi̱ ña nakindée ni̱vi, níkúu.

1 Pedro 2:10

O̱n si̱ví ni̱vi na kándixa Ndios xi̱kuu ndó siꞌna, ta vitin nañoo Ndios kúu ndó; siꞌna ni̱xika ndó yichi̱ no̱o̱ ni̱saa̱ ini Ndios xi̱ni ra ndóꞌó, ta vitin Ndios xa sa̱ka̱ku ra ndóꞌó, ta ndixa ki̱sa káꞌno ini ra xa̱ꞌa̱ ndó.

Apocalipsis 14:13

Ta saá xi̱ni̱ so̱ꞌo i̱ to̱ꞌon ña ki̱xi ñoyívi ni̱no, ni̱ka̱ꞌa̱n ña xíꞌin i̱, káchí ña saá: ―Taa ún to̱ꞌon yóꞌo: “Ki̱vi̱ vitin ta ndiꞌi saá ki̱vi̱ ña va̱xi, ndiꞌi ni̱vi na ndíko̱n Jesucristo, táná kivi̱ na xa̱ꞌa̱ ña kándixa na ra, ta Ndios taxi ra ña kunakaa̱ ñasi̱i̱ ini nayóꞌo” ―káchí to̱ꞌon ña xi̱ni̱ so̱ꞌo i̱. Ta saá ni̱ka̱ꞌa̱n Níma̱ Ndios, káchí ña saá: ―Ndixa saá yóo ña, chi ki̱vi̱ xaa̱ ni̱vi yóꞌo ñoyívi ni̱no, ndixa nakindée na, chi xa ku̱ndivi chiño ke̱ꞌé na ñoyívi no̱o̱ ñoꞌo̱. Ta saá ni, Ndios nákáꞌán ra ndiꞌi chiño va̱ꞌa ña ki̱sa ndivi na, ta saá ñoyívi ni̱no nakiꞌin na ña yaꞌvi na xa̱ꞌa̱ chiño va̱ꞌa yóꞌo ―saá káchí Níma̱ Ndios, xi̱ni̱ so̱ꞌo i̱.

Apocalipsis 21:4

Ndios yakón ra ña sanayaa ra nduta̱ nduchu̱ no̱o̱ na xa̱ꞌa̱ ña xa̱ku na. Ta nda̱ ñii ka̱ yichi̱ o̱n kivi̱ ka̱ na, ni o̱n kóo ka̱ ña kuchuchú ini na, ni o̱n kóo ka̱ ña kuaku na xa̱ꞌa̱, ni o̱n kóo ka̱ ña kukiꞌvi̱ ka̱ yi̱kí ko̱ñu na, ta ndiꞌi ña ni̱xo̱ꞌvi̱ na tá ya̱chi̱ o̱n kóo ka̱ ñayóꞌo.