Apocalipsis 17:4 - Alacatlatzala Mixtec New Testament

⁴ Ta ñáñaꞌa̱ yóꞌo ndíxin ñá tiko̱to̱ ndíꞌí to̱ón xíꞌin ña kuáꞌá. Ta kua̱ꞌa̱ ní oro xíꞌin kua̱ꞌa̱ ní yu̱u̱ yéꞌe ña livi ña yáꞌví ní, ndóo ndaa ña sa̱ta̱ tiko̱to̱ ndíxin ñá. Ta xíꞌin ñii ndaꞌa̱ ñá, níꞌi ñá ñii copa ñaoro ña chútú xíꞌin kua̱ꞌa̱ ní no̱o̱ ña o̱n váꞌa, ta chútú ña xíꞌin ndiꞌi no̱o̱ ña kúu kua̱chi kini ña ni̱ki̱ꞌvi ñá xíꞌin kua̱ꞌa̱ ní nata̱a.

Apocalipsis 17:4 Iomraidhean Croise

Apocalipsis 14:8

Ta inka̱ ñaángel ñao̱vi̱ ña ndíko̱n sa̱ta̱ ñaángel yóꞌo, ndáchí ña ma̱ꞌñó ñoyívi ni̱no, ta káꞌa̱n ña káchí ña saá: ―Vitin ñoo káꞌno Babilonia xa na̱kava ña, ta ndu̱u ña ñoo ndáꞌví ní, ña o̱n ko̱ó ka̱ ndee̱ kómí, chi ñayóꞌo kúu yaꞌvi ña xa̱ꞌa̱ ña sa̱ndáꞌví ní ña ni̱vi ñoyívi. Nda̱tán yóo ñáñaꞌa̱ ñá kísi̱n xíꞌin kua̱ꞌa̱ ní nata̱a saá ni̱xi̱yo ñoo káꞌno Babilonia, chi ni̱vi nañoo yóꞌo na̱taxi xíꞌin mi̱i na ña keꞌé na kua̱ꞌa̱ ní no̱o̱ ña o̱n váꞌa. Ta ni̱vi na ñoo káꞌno Babilonia yóꞌo kéꞌé na nda̱tán kéꞌé ñii ñaꞌa̱ ñá ndeé ní chu̱ꞌu ndiꞌi ni̱vi ñoyívi ña koꞌo ní na vino xa̱ꞌa̱ ña saxíini rá na, ta keꞌé na kua̱ꞌa̱ ní no̱o̱ ña o̱n váꞌa, ñii ki̱ꞌva nda̱tán ke̱ꞌé mi̱i ñá ―káchí ñaángel.

Apocalipsis 18:12

O̱n kóo ka̱ ni̱vi na sata ña kúu oro, ña kúu plata, ni o̱n sata ka̱ na kua̱ꞌa̱ ní yu̱u̱ ña livi, ña náyeꞌe, ña yáꞌví ní. Ni o̱n kóo ka̱ ni̱vi na sata tiko̱to̱ va̱ꞌa ña yáꞌví ní ña kúu lino án seda. Ta o̱n kóo ka̱ ni̱vi na sata tiko̱to̱ va̱ꞌa ña kúu ña ndíꞌí to̱ón án ña kuáꞌá. Ni o̱n kóo ka̱ ni̱vi na sata tón vi̱ti̱ va̱ꞌa tón támi ní xáꞌan, ni o̱n kóo ka̱ ni̱vi na sata inka̱ ñakuíká ña kúu ña na̱ní marfil, xíꞌin inka̱ ña kúu mármol. Ni o̱n kóo ni̱vi na sata ka̱a ña kúu hierro, án inka̱ ka̱a ña kúu bronce.

Apocalipsis 18:16

kachí na saá: ―¡Ay! ¡Ay! ¡Ndáꞌví ní yóꞌó ñoo káꞌno Babilonia! Va̱ꞌa ní livi xi̱ndixin ún tiko̱to̱ yáꞌví ní ña kúu lino, ña kúu tiko̱to̱ kuáꞌá án tiko̱to̱ ndíꞌí to̱ón. Ta sa̱ta̱ tiko̱to̱ yóꞌo xi̱ndo̱o ndaa kua̱ꞌa̱ ní oro xíꞌin kua̱ꞌa̱ ní yu̱u̱ yéꞌe ña livi ní, ta yáꞌví ní.

Apocalipsis 19:2

Chi xíꞌin ñanda̱a̱ ndixa Ndios kísa nani ra xa̱ꞌa̱ kua̱chi. Xa ki̱sa nani ra xa̱ꞌa̱ kua̱chi na ñoo káꞌno na kéꞌé kua̱ꞌa̱ ní ña o̱n váꞌa. Chi nañoo yóꞌo chu̱ꞌu na inka̱ ni̱vi ña ke̱ꞌé na kua̱ꞌa̱ ní no̱o̱ ña o̱n váꞌa ñii ki̱ꞌva nda̱tán ke̱ꞌé mi̱i na, ta xíꞌin ña o̱n váꞌa ke̱ꞌé na ñoo káꞌno yóꞌo, ki̱sa kini na ndiꞌi saá xiiña ñoyívi no̱o̱ ñoꞌo̱. Ta nañoo yóꞌo xa̱ꞌni na kua̱ꞌa̱ ní ni̱vi na kándixa Ndios. Ta xa̱ꞌa̱ ña o̱n váꞌa yóꞌo, káꞌa̱n Ndios ndí xíni̱ ñóꞌó xo̱ꞌvi̱ ní na, káchí kua̱ꞌa̱ ní to̱ꞌon ña xi̱ni̱ so̱ꞌo i̱.

Apocalipsis 21:21

Ta ña u̱xu̱ o̱vi̱ yéꞌé ña kómí na̱ma̱ ña xi̱no nduu sa̱ta̱ ñoo yi̱i̱, ñii ñii yéꞌé yóꞌo ku̱va̱ꞌa ña xíꞌin ñii yu̱u̱ yaa ña livi ní, ña yáꞌví ní, ña na̱ní perla. U̱xu̱ o̱vi̱ kúu yéꞌé, ta u̱xu̱ o̱vi̱ kúu perla náꞌno yóꞌo. Ta yichi̱ káꞌno ñoo yóꞌo, nina ñaoro kúu ña. Ta no̱o̱ yichi̱ yóꞌo, nda̱tán yóo yu̱yu̱ yéꞌe ña táxi koto yó nda̱ inka̱ táꞌví sa̱ta̱ ña, saá yóo ña.

Apocalipsis 9:21

Ta ni̱vi na ni̱ndo̱o táku̱ yóꞌo, ni̱‑xiin na sandakoo na ña xáꞌni na inka̱ ni̱vi, ni o̱n vása ní‑xiin na sandakoo na chíkaa̱ na ña nákuati tásín na xa̱ꞌa̱ natáꞌan na, ni ni̱‑xiin na sandakoo na ña kísa kuíꞌná na. Ta nata̱a, ni o̱n vása ní‑sandakoo na kíꞌvi na kua̱chi xíꞌin náñaꞌa̱ ná o̱n si̱ví násíꞌí na kúu. Ta náñaꞌa̱, ni o̱n vása ní‑sandakoo ná kíꞌvi ná kua̱chi xíꞌin inka̱ ta̱a ta̱ o̱n si̱ví yii̱ ná kúu.