Apocalipsis 12:12 - Alacatlatzala Mixtec New Testament

¹² Ta saá, ¡ná kusii̱ ini ndiꞌi ndóꞌó, na kúu na táku̱ ñoyívi ni̱no no̱o̱ yóo Ndios! ¡Ta ndáꞌví ní ni̱vi na táku̱ no̱o̱ ñoꞌo̱! ¡Ta ndáꞌví ní ndiꞌi kiti̱ tí táku̱ ti̱xin takuií mi̱ni! Ndáꞌví ní ndiꞌi nayóꞌo, chi xa no̱o ñaníma̱ ndiva̱ꞌa káꞌno Satanás, ta ki̱xaa̱ ña no̱o̱ ñoꞌo̱, ta ki̱xaa̱ ña no̱o̱ takuií mi̱ni. Ndáꞌví ní ni̱vi, chi ndeé ní sáa̱ ini ñaníma̱ ndiva̱ꞌa káꞌno yóꞌo, chi xa xíni̱ ña ndí saloꞌo ní ki̱vi̱ kómí ña nda̱yí ña kúchiño kasa ndivi ña chiño o̱n váꞌa ―saá ni̱ka̱ꞌa̱n to̱ꞌon ña xi̱ni̱ so̱ꞌo i̱, ña ki̱xi ñoyívi ni̱no.

Apocalipsis 12:12 Iomraidhean Croise

San Lucas 15:10

Ndixa káꞌa̱n i̱ xíꞌin ndó, nda̱tán kúsii̱ ini ñáyóꞌo, saá kúsii̱ ini naángel na yóo xíꞌin Ndios xíni na ni̱vi na na̱ndikó ndinoꞌo ini, ta na̱kiꞌin na kua̱ꞌa̱n na yichi̱ Ndios ―káchí ta̱Jesús xíꞌin na.

San Lucas 2:14

¡Ná kanóo síkón ñato̱ꞌó Ndios, ta̱ yóo ñoyívi ni̱no! Ná koo va̱ꞌa ini ni̱vi ñoyívi yóꞌo, na kúu ni̱vi na kúsii̱ ini Ndios xíni ra, káchí naángel.

Hebreos 10:37

Chi no̱o̱ to̱ꞌon Ndios ña ni̱taa na xi̱na̱ꞌá, Ndios ka̱chí ra saá: Kúma̱ni̱ saloꞌo ki̱vi̱ ta ta̱a ta̱ chi̱tóni̱ i̱ xaa̱ ñoyívi, ndixa xaa̱ ra, ta o̱n naꞌá ní ka̱ yaꞌa, ta xaa̱ ta̱a yóꞌo.

2 Pedro 3:8

Ta ndóꞌó, nañani yó xíꞌin náki̱ꞌva̱ yó, na kíꞌvi ní ini i̱ xíni i̱ kúu ndóꞌó; ta kóni i̱ ña o̱n nandoso ndó ndí no̱o̱ Ndios ñii ki̱vi̱ yóo ña nda̱tán yóo ñii mil kui̱ya̱, ta ñii mil kui̱ya̱ yóo ña nda̱tán yóo ñii ki̱vi̱, saá yóo ña.

Apocalipsis 10:6

ta ni̱ka̱ꞌa̱n ña, káchí ña saá: ―Ndios kúu ta̱a ta̱ táku̱ ndiꞌi saá ki̱vi̱, ta ki̱sa va̱ꞌa ra ñoyívi ñoꞌo̱ xíꞌin ñoyívi ni̱no, xíꞌin ndiꞌi ña yóo ndiꞌi saá ñoyívi. Ta saá tuku ki̱sa va̱ꞌa ra takuií mi̱ni xíꞌin ndiꞌi ña ñóꞌo ti̱xin takuií mi̱ni yóꞌo. Ta mi̱i Ndios yóꞌo káchí ra ndí ndixa o̱n kundati ka̱ ra.

Apocalipsis 11:10

Ta ndiꞌi ni̱vi kusii̱ ní ini na xa̱ꞌa̱ ña ni̱xiꞌi̱ nata̱a yóꞌo, nda̱ nakuita na ka̱ꞌa̱n na viko̱, ta kixáꞌá na saníꞌi na ña̱ꞌa ndaꞌa̱ natáꞌan na chi ndeé ní kusii̱ ini na xa̱ꞌa̱ ña ni̱xiꞌi̱ nata̱a yóꞌo. Saá chi kani si̱ni̱ na ndí o̱vi̱ naprofeta yóꞌo kúu na kómí kua̱chi xa̱ꞌa̱ ña ni̱xo̱ꞌvi̱ ní ndiꞌi ni̱vi ñoyívi.

Apocalipsis 11:14

Ta ñayóꞌo kúu ñao̱vi̱ ñayo̱ꞌvi̱ ní ni̱xo̱ꞌvi̱ ni̱vi. Ta va̱ꞌa kunda̱a̱ ini ndó ndí kúma̱ni̱ ka̱ xo̱ꞌvi̱ na ñau̱ni̱, ta xa yatin ní va̱xi ñau̱ni̱ yóꞌo.

Apocalipsis 12:9

Ta naángel na yóo xíꞌin Ndios ta̱va na tíko̱o̱ naꞌá xíꞌin ndiꞌi níma̱ ndiva̱ꞌa ña yóo xíꞌin rí, ta sa̱kana na tíyóꞌo ta saá sa̱kana na ndiꞌi níma̱ ndiva̱ꞌa ña yóo xíꞌin rí nda̱ ñoyívi no̱o̱ ñoꞌo̱. Ta tíko̱o̱ naꞌá yóꞌo kúu tíko̱o̱ yatá ní, ta inka̱ ki̱vi̱ rí kúu Satanás án ñaníma̱ ndiva̱ꞌa káꞌno. Ta ñaníma̱ ndiva̱ꞌa káꞌno yóꞌo kúu ña sándáꞌví ndiꞌi ni̱vi ñoyívi no̱o̱ ñoꞌo̱.

Apocalipsis 13:6

Ta xíꞌin nda̱yí yóꞌo, na̱koná rí yuꞌu̱ rí, ta ki̱xáꞌá rí káꞌa̱n rí nina to̱ꞌon ña o̱n váꞌa xa̱ꞌa̱ Ndios, ta káꞌa̱n rí to̱ꞌon ndiva̱ꞌa xa̱ꞌa̱ ki̱vi̱ Ndios, ta káꞌa̱n rí to̱ꞌon ndiva̱ꞌa xa̱ꞌa̱ no̱o̱ yóo Ndios, ta káꞌa̱n rí to̱ꞌon ndiva̱ꞌa xa̱ꞌa̱ ndiꞌi ni̱vi na táku̱ ñoyívi ni̱no no̱o̱ yóo Ndios.

Apocalipsis 18:20

Ta saá xi̱ni̱ so̱ꞌo i̱ to̱ꞌon ña ni̱ka̱ꞌa̱n ñii ñaángel, káchí ña saá: ―Ta vitin ndóꞌó na ndóo ñoyívi ni̱no no̱o̱ yóo Ndios, ¡ná kusii̱ ní ini ndó! Ta ndóꞌó naapóstol, na xi̱kuu na ti̱ꞌví Ndios ki̱sa ndivi chiño ra, ta ndóꞌó naprofeta, na ni̱ka̱ꞌa̱n ndoso to̱ꞌon Ndios, ta ndiꞌi inka̱ ndóꞌó na kúu nayi̱i̱ chi ndíko̱n ndó Ndios, ¡va̱ꞌa ná kusii̱ ní ini ndiꞌi ndó!, chi Ndios ki̱sa ndivi ra ñanda̱a̱ xa̱ꞌa̱ ndó. Saá chi ki̱sa nani ra xa̱ꞌa̱ ña o̱n váꞌa ke̱ꞌé ni̱vi na ñoo káꞌno yóꞌo xíꞌin ndó, ta sa̱xo̱ꞌvi̱ ra na xa̱ꞌa̱ ña o̱n váꞌa yóꞌo ―káchí ñaángel.

Apocalipsis 8:13

Ta saá xi̱to i̱, ta xi̱ni̱ so̱ꞌo i̱ ñii ñaángel, ta ndáchí ña ma̱ꞌñó ñoyívi ni̱no, ta xíꞌin ndiꞌi ndee̱ ña, ni̱ka̱ꞌa̱n ña, káchí ña saá: ―¡Ay! ¡Ay! ¡Ay! Ndáꞌví ní ni̱vi na táku̱ no̱o̱ ñoꞌo̱, chi ndeé ní xo̱ꞌvi̱ na táná inka̱ u̱ni̱ naángel tivi na tón trompeta. Ta vitin na u̱ni̱ ángel yóꞌo xa yóo tiꞌva na ña kixáꞌá ñii ñii na tivi na tón trompeta ―ni̱ka̱ꞌa̱n ñaángel.

Apocalipsis 9:12

Ta ndiꞌi ñayóꞌo kúu ñano̱ó ñayo̱ꞌvi̱ ní ni̱xo̱ꞌvi̱ ni̱vi. Ta ni̱yaꞌa ña, ta kúma̱ni̱ ka̱ inka̱ o̱vi̱ ña va̱xi ñayo̱ꞌvi̱ ní xo̱ꞌvi̱ na.