Joshua 9:10 - Ohiatonhseratokénti

¹⁰ Tánon tsi nishakoieráse ne teninonhtihioʼtserá꞉ke ne Amorʼró꞉nons né꞉ne ná꞉kon nokwá꞉ti ne Jordan: ne ronhnonhtí꞉io Sihon ne Heshbon ó꞉ni ne ronhnontí꞉io Og ne Bashan, ne raónha Ashtaroth nón꞉we nihanákereʼkwe.

Joshua 9:10 Iomraidhean Croise

Genesis 14:5

Ne kaieríhaton iawén꞉re shiiohserakehátie ne Chedorlaomer tánon ratikwé꞉kon ne rontinontí꞉ioʼs né skátne ratikwekonhátie wahshakotishén꞉ni ne Rephaim né꞉ne Ashteroth Karnaimʼke nón꞉we, ó꞉ni ne Zuzim né꞉ne Ham nón꞉we í꞉ken, ó꞉ni ne Emim ne ne Shaveh-Kiriathaim nón꞉we í꞉ken.

1 Chronicles 6:71

Né kawátsires tsi ratiʼtáraiens ne Gershon né꞉ne tahonwanawíhon né kén iotséton kanatasónhas, ó꞉ni ne ionhontsaiéntons tsi konwatiʼteronhtákwas: Né꞉ne tsi kanakeraseráien né tsit-karakwínekens nòkwahti ne Manasseh: Golan, né Bashan nón꞉we, tánon ne Ashtaroth.

Numbers 20:14

Ne Mahís iashakoténiete ne ratirihwakarénies Kadesh tahonténhti ronhnontiʼióke niahón꞉ne né꞉ne Edom nónhwe. Wahonníron, “Kí꞉ken oríhwa sewatátenons nónhwe nonhtá꞉we, né tsi kentiókwahiens NÍsraerʼró꞉nonke. Sateriéntare tsi nahonkwahrihwanorónsten tánon tsi ní꞉ioht tsi wahakwahronhiáken,

Deuteronomy 1:4

Ne kí꞉ken nó꞉nen ne Roiá꞉ner shihosénhnion ne Ronhnonhtí꞉io Sihon né꞉ne Amorʼró꞉nons nahotaró꞉ten, raónha rakó꞉rahkwe ne tsi kaná꞉taien ne Heshbon, tánon ne Ronhnonhtí꞉io Og né Bashan, raónha ne rakó꞉rahkwe ne tsi kaná꞉taien ne Ashtaroth ó꞉ni ne Edrei.

Deuteronomy 2:30

“Ók ki ne rononhtí꞉io Sihon iáh ne teshonkwariwá꞉wi nahiakwató꞉hetste ne raonakeraʼsehrá꞉kon. Ne Roiá꞉ner sewaní꞉io wahononhtsistaʼní꞉rate ó꞉ni wahaterihioseranonhwè꞉ne, ne káti nahónton nashakwaʼsén꞉ni tánon aiakwatiénawatste ne raonakeráhsera, tánon shé꞉kon ki nihionkwatienawáston.

Joshua 12:4

Kwáh ó꞉ni wahonwasén꞉ni ne ronhnonhtí꞉io Og né꞉ne Bashan nón꞉we, rahonhà꞉a khók iatesothaténronhne ne rathikowá꞉nenskwe né꞉ne Rephaim; roʼkorásthonhne ne Ashtaroth nón꞉we tánon ne Edrei.

Joshua 13:31

Thóh í꞉kare nasénhnon ne Gilead, ó꞉ni ne Ashtaroth ó꞉ni ne Edrei, né꞉ne kanathakweʼní꞉io ne kanatowá꞉nens ne Og kanakerahserá꞉kons ne Bashan nón꞉we. Akwé꞉kon kí꞉ken ne thonwanawí꞉hons ne asénhnon rahotiwá꞉tsires tsi nithonatwatsirí꞉non ne Machir ne roiénha ne Manasseh.

Joshua 2:10

Hionkwariwarón꞉ken tsi ní꞉ioht tsi roniatarásthaton ne kaniatarakeʼkowáhne ne Roiá꞉ner ne sewahénton ne shathontesewahténhti ne Egypt. Hionkwarihwarónhken ó꞉ni tsi ietsinonhwarià꞉kon ne Sihon tánon ne Og, ne teʼnihiáse Amorʼró꞉nons shakothinonhtí꞉iokwe ne nà꞉kon nòkwah ne Jordan.

Joshua 2:9

tánon wahakawénhase, “Wakaterièn꞉tare né꞉tho Roiá꞉ner tsi thetsisewá꞉wi ki kén꞉en ionhontsá꞉ien. Kwáh onhkweʼtakwé꞉kon ne kén꞉en kanakerahserá꞉kon tsi ietsiʼtshiánis.

Joshua 9:11

Ne hionkihéntenhse ó꞉ni ratikwé꞉kon nonhkweshón꞉as ne hontionhontsá꞉ke ratinákere wahonkiró꞉ri nahiakwaweienénhthaʼne ne kákhwa ne thahiakwatáhakwe tánon ne iathakwaterà꞉te. Wahonkiró꞉ri iahiakwathatatkà꞉we ne sanhátsera ahiakwáton tánon nakwariwanónhtonhse nahitewatsanerenhserón꞉ni.

Joshua 9:9

Ethò꞉ne wahonwakaratónhase: “Kwáh í꞉ken tsi ahí꞉nonh nió꞉re tionhontsá꞉ien nitionhkwè꞉non, Shé꞉shion, tiorì꞉wa tsi washakwasenhnáronhke ne Roiá꞉ner Saní꞉io. Kwáh akwé꞉kon hionkwariwarónhken tsi nihoié꞉ren ne Egypt nón꞉we.