Rm 1:13 - Meta’

¹³ Mbɨ bɔŋgɔb, mə kə̀b ni mbə̀ kyerɨ ni mə wɨə nyaʼə kàŋə̀ kə̀b nɨ yeʼe əsɨ nən ɨghəm nɔnɔʼ, àyɨə ɨnû mɔʼɔ nyaʼa kən əmɨ. Mə nyaʼa kəb yeʼe ɨmbə̀ʼ mə̀ ghɨ ni bə̂d mɔʼɔ rəkaʼ nən ben ə Ŋwiə̀, àmei ɨchî nɨ mə nyaʼa bə̀ ghɨ̀ əkaʼ bə̂d cherə mbe nɨ kaʼi mɨ̀Jû.

Ikan feg

¹³ Ìmbum məfi fɔrɔ ìtum njàbi ne tì yaʼi ane ifɔti tì Kristo, mə kə̀b gha mbə̀ kyeri gha, mə̀ ya chuʼri nyɔd aghəm nɔʼ nɔʼ ni yeʼe bàd awən ni ghì gha bəd mɔ̀ʼɔ bḛ Yeso icheg ne mə̀ ya bə̀ ghì abə mbin tì bəd ne kayi mə̀Ju. Si ya gha, inug mɔ̀ʼɔ ya təmni amə.

Rm 1:13 Iomraidhean Croise

Jn 12:24

Mə ghà rəsìʼ ɨ nən ni fɨtam kywɨ̀ mɨ rɨ nyɨ i ɨŋga si, kwɨ, fɨ bɨrɨ ten tə̀zìʼ wi. Fɨ mɨ kwɨ, fɨ bɨrɨ kɔ rɨtam nɔnɔʼ.

Jn 15:16

Kaʼi mbə̀nə nyaʼa chɔʼ əmɨ. À yɨə mɔ̌ nyaʼa chɔʼ əwən tom ni mbə̀ wo kɔ rɨtam, nɨ yeʼ rɨtam te nɨ bɨrɨ ten i koŋ. Mbə mɨ ghɨ̀ əne, Mbǎʼ bɨrɨ naʼ əghɨ ə mɔʼɔ ze nɨ mbə̀ biirɨ ɨ bɔ ənɨ mɨ ɨkum.

Jn 4:36

Ɨ mbɨə chwɨə wə̀d we nɨə kwə̀ŋ ɨghɨ. Məd wɨə fetɨ ɨghɨ mbe ɨmbə̀ʼ mbɨ jɨg ɨ̀tènɨ̀ rɨ mì. Əne wə̀d we nɨ konɨ mbɨ we nɨ kwəŋɨ bɨrɨ ghaʼrɨ ɨnɔ̂n.

Ɨ̀fàʼì 1:15

À nyaʼa ənɨ ə nyùmə̀ we, Pità nyaʼa nɔ̀ʼ təm əkaʼ bə̂d mbe nɨ nyaʼa ben ə Kristo, nɨ nyaʼa fɔtɨ əsɨ ə mɔʼ ɨghabɨ ɨkɨ fibɨ̀ mbɨ ɨwum be. Wɨ̀ nyaʼa təm əne ghà ni,

Ɨ̀fàʼì 14:27

Ənɨ mbɨ nyaʼa pe ə Antiɔ̀k, mbɨ nyaʼa fetɨ bə̂d Kristo mɨjìm, əne ghà ɨnû jìm mbe nɨ Ŋwìə̀ nyaʼa ghɨ ənɨ ə nən bə̀ ghà ɨchî nɨ wɨ̀ nyaʼa fiʼ ɨnə̂njɨ̀ əmbɨ ə bə̂d mbe nɨ kaʼi mɨ̀Jû ni mbɨ ben ə Kristo.

Ɨ̀fàʼì 15:12

Bə̂d mɨjìm mbe nɨ nyaʼa ɨŋga fetɨ we nyaʼa kəm rəziə ɨchî nɨ mbɨ nyaʼə zwetɨə ɨnû mbe nɨ Banabàs mbɨ Pɔ̂l nyaʼə ghà ɨmbə̀ʼ ɨchî nɨ Ŋwiə̀ nyaʼa che ənjìm mɨ̀mə̌d ghɨ̀ ɨnweenɨ-ɨnû bə̀ ghɨ̀ ɨnû yiirɨ əkaʼ bə̂d mbe nɨ kaʼi mɨ̀Jû.

Ɨ̀fàʼì 19:21

Ənɨ ɨnû mbɔ̂ nyaʼa fə che i, Əzwî ə Ŋwìə̀ ə nyaʼa ghɨ̀ Pɔ̂l nùŋ ɨŋga i fîŋ ni tə bɨrɨ chè ə Màsèdonià bə̀ chè ə Àkàiyà bɔŋ wò ə Jèrusalèm. Wɨ̀ nyaʼa ghà ni, “Mə mɨ fə wò pè əŋgu, mə berɨ bɨ wo ə Rom.”

Ɨ̀fàʼì 21:19

Pɔ̂l nyaʼa chàʼrɨ̀ mɨ̀mə̌d, əne ghà ɨnû jìm mbe nɨ Ŋwìə̀ nyaʼa chè ənjìm ə̀fàʼì əməd ghɨ̀ əkaʼ bə̂d mbe nɨ kaʼi mɨ̀Jû.

Ɨ̀fàʼì 28:14

Tɨ̀ nyaʼa pè əŋgu, zə bə̂d nɨ nyaʼa ben ə Kristo. Mbɨ nyaʼa tɔŋ əwa ni tɨ̀ chubɨ mbɨ mɨ̀mə̌d ɨni sambe. Əne yɨ ɨchî nɨ tɨ̀ nyaʼa wò pè ə Rom.

Rm 1:12

Əne yɨ ni, ɨbenɨ we tɨ̀ berɨ ɨgun ə Kristo tìmbɨ̀ əwa mbǎ mbǎ, wən tìmbɨ̀ wum, wum bə̀ tìmbɨ̀ wən.

Rm 11:25

Mbɨ bɔŋgɔb, mə kə̀b ni mbə̀ kyerɨ ənû ze nɨ yeʼ ənə̀mə, ɨmbə̀ʼ tɨ mbə̀ kɔndɨ ə ni mbə we əku. Ənû ze yɨ ni: Ŋwiə̀ fə ghɨ̀ ni fîŋ tɨ mɨ̀Izre tu. Tɨ bɨrɨ tu wò pè ənɨ ɨnun bə̂d mbe nɨ kaʼi mɨ̀Jû nɨ berɨ yeʼe əmbɨ ə Ŋwiə̀ fə kuʼu.

Rm 7:1

Mbɨ bɔŋgɔb, mə wɨə ghàm əmbɨ ə mbə̀n mbe nɨ kyerɨ rɨkə. Chəi mbə̀ kyerɨ ni tɨkə tɨə yimə wə̀d àmei ənɨ ə nyùmə̀ we nɨ wɨ̀ yeʼ ɨkǎ ə?

1 Kɔrèn 1:10

Mbɨ bɔŋgɔb, mə wɨə buʼ ɨbɔ ɨ nən ənɨ ɨkum a Ə̀nùŋɨ̀sɨg Yeso Kristo ni mbə̀n mɨjìm chub ənɨ ənû ə mɔʼ, mbɨ ni tɨ ə̀ghàbrɨ̀ ə nyɨ i əkaʼ nən, àyɨə mbə̀ nuŋ tə fîŋ ənɨ zɨ mɔʼ bə̀ nùŋ tə rɨkɔndɨ ənɨ wɨ mɔʼ.

1 Kɔrèn 10:1

Mbɨ bɔŋgɔb, mə kə̀b ni mbə̀ wɨrɨ kɔndɨ ni à yɨə pàʼ nyaʼə chàə̀ mba mɨ̀mbǎʼ rəŋwe ɨŋga ɨbad rɨkwàʼi. Mə bə̀ kə̀b ni mbə̀ wɨrɨ kɔndɨ ni mɨ̀mə̌d mɨjìm nyaʼa baanɨ ɨŋga rɨ̀bàà.

1 Kɔrèn 12:1

Mbɨ bɔŋgɔb, tɨ̀nîn mə kə̀b ni mbə̀ kyerɨ rəsìʼ ɨmbə̀ʼ mɨneʼe mbe nɨ Əzwî ə Zeŋɨ ə nàʼ əmbɨ ə bə̂d.

1 Kɔrèn 14:20

Mbɨ bɔŋgɔb, tɨ tə rɨkɔndɨ yeʼi ɨghabɨ tɨ bɔn kwa. Mbə̀ yeʼ ɨghabɨ ə bɔn bɔd ənɨ zɨə de ɨnû rɨbɔ̀ŋ, àyɨə mbə̀ berɨ tɨkɔndɨ bə̂d kyeŋ.

1 Kɔrèn 14:26

Mbɨ bɔŋgɔb, tɨ̀ gha ni yè ə? Ənɨ mbə̀ bomnɨ, wə̀d mɔʼɔ naʼ ɨkyî, wɨ cherə chwi ənû, wɨ cherə gha ənû ze nɨ Ŋwìə̀ gha ɨ bɔ, wɨ cherə gham ɨŋgam rɨsɔ̀ʼɔ̀, wɨ cherə toʼrɨ ɨŋgam we. Mbə̀ sɨə ghɨ̀ ɨnû jìm ɨmbə̀ʼ mbə̀n mɨjìm təm kàànɨ̀.

1 Kɔrèn 9:2

À mɨ yeʼ nɨ chəi bə̂d mɔʼɔ ben ni mə yɨə wə̀d tom Kristo, njɨ mə kyerɨ ni mbən ə benɨ, ɨmbə̀ʼ ɨghəm nɨ mbə̀ yɨ ənweenɨ ze nɨ chwi ni mɔ̌ yɨə wə̀d tom Kristo.

2 Kɔrèn 1:8

Mba bɔŋgɔb, tɨ̀ kə̀b ni mbə kyerɨ ŋgəʼ ze nɨ tɨ̀ nyaʼə zə ɨŋga əbà əbeŋ ze rɨ ə Esià. Ɨkom we nɨ mbɨ nyaʼa zɨ ɨgwɨ na nyaʼa kaŋ faŋ bə̀ nìd kəb nyem əwa. Wɨ̀ nyaʼa ghɨ̀ tɨ̀ kɔndɨ ni chəi tɨ̀ bɨrɨ wɨrɨ chub ɨkǎ.

2 Kɔrèn 2:14

Tɨ̀ naʼ məben-əwe əmbɨ ə Ŋwiə̀ ni, ənjìm ɨchî nɨ tɨ̀ yeʼ ənɨ ɨfɔtɨ mbɨ Kristo, ɨ wɨə che ɨmbì na ɨghəm jìm ghɨ̀ə̀ ni tɨ̀ yèn ɨghabɨ ə bə̂d nɨ che bid. Ɨ wɨə ghɨ̀ə̀ ni tɨ̀ jaŋ ɨnû mbe nɨ tɨ̀ kyerɨ ɨmbə̀ʼ ə Kristo ɨsɨ jìm. Ɨnû mbe yɨ ɨghabɨ ɨfɔ chɔ̀m.

Gàlesìyà 3:15

Mbɨ bɔŋgɔb, mə bɨrɨ nɨŋ ənweenɨ rɨ ənɨ ɨnû mbe nɨ bə̂d mɨ̀sɔŋɨchù ə ghɨ̀ ɨni jìm: Bə̂d mɨ fə ben ənû ə mɔʼɔ, san fɨso, chəi wə̀d nɨ tɨ̀ wɨ̀ wɨrɨ ghà ni chəi ənɨ tɨ̀ fɨso fe təm, kɨ̀ nɨ tɨ̀ wɨ̀ yì ənû ə mɔʼɔ ənɨ fɨso fe.

Gàlesìyà 6:18

Mbɨ bɔŋgɔb, à Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən. À yɨ əne.

Fìlipì 1:22

Mə mɨ chɔʼ nɨ chub ɨkǎ, mə bɨrɨ wò ɨmbì ghɨ̀ ɨnû cherə nɨ kaanɨ. Àyɨə əbà ze nɨ mə bɨrɨ chɔʼ, chəi mə kɨrɨ kyerɨ.

Fìlipì 4:17

Chəi mə̀ gha əne ɨmbə̀ʼ ɨghəm nɨ mə̀ kəb ni mbə naʼ ɨghɨ ɨ num. Mə kə̀b yeʼ ni Ŋwìə̀ chwɨ əwən ɨchî nɨ mbə̀ weerɨ əmɨ.

Kòlosè 1:10

Tɨ̀ wɨə kɔ̀ŋgɨ̀ əməd ɨmbə̀ʼ wɨ̀ ghɨ ni mbə̀ chub ɨchî nɨ Ə̀nùŋɨ̀sɨg kəbɨ. Tɨ̀ wɨə bə̀ kɔ̀ŋgɨ̀ə̀ ni mbə̀ sɨə ghɨ̀ ɨnû jìm mbe nɨ bɨrɨ ghɨ ni fîŋ məd bɔŋ ə. Ɨchî nɨ mbə̀ə chubə bɨrɨ ghɨ ni mbə ghɨ ɨ̀chɔ̀m ənɨ tɨkwɨrɨ ɨnə̂njɨ̀ nɔnɔʼ bə̀ ghɨ̀ ni mbə sɨə jeŋgɨə kyerɨ ə Ŋwiə̀ wò ɨmbì.

Kòlosè 1:6

nɨ fə yeʼe ɨ nən. Ɨkə̂n chɔ̀m wɔ̂ wɨə kwiə bə̀ ghɨ̀ə̀ ni bə̂d mɨ̀jìm ɨŋga ɨsɨg ghɨ ɨnû mbe nɨ Ŋwiə̀ kəbɨ, àmei ɨchî nɨ mbə nyaʼa fə bə̀ fə kɔ ghɨ̌, kɔ rɨ əni ze nɨ mbə̀ nyaʼa zu bə̀ kyerɨ rəsìʼ ɨmbə̀ʼ ɨ̀chɔ̀m Ŋwiə̀.

1 Tèsàlonikà 2:18

Tɨ̀ nyaʼa kàŋ kə̀b nɨ wɨrɨ yeʼe əsɨ nən àyɨə Satàn nyaʼa kən əwa. Mɔ̌ Pɔ̂l nyaʼa kàŋ kəb yeʼe ɨghəm nɔnɔʼ.

1 Tèsàlonikà 4:13

Mba bɔŋgɔb, tɨ̀ kə̀b ni mbə̀ kyerɨ rəsìʼ ɨmbə̀ʼ bə̂d mbe nɨ fə kwɨ, ɨmbə̀ʼ tɨ mbə kən ə ɨghabɨ ə bə̂d nɨ chəi mbɨ nuŋ ɨkɔndɨ ni mbə bɨrɨ chubɨ mbɨ ə Ŋwiə̀.

2 Tès 2:7

Ənû ze nɨ Satàn ə ghɨ̀ ni bə̂d ton ə Ŋwiə̀ bə̀ ton tɨkə rɨ məd fə sɨə fàʼə̀. Àmei məd we nɨ yim ənû ze bɨrɨ wo ɨmbì yim pè ənɨ Ŋwìə̀ chɨ əməd rɨ ɨnə̂njɨ̀.

2 Timotì 4:17

Mbɨ nyaʼa ghɨ̀ əne, àyɨə Ə̀nùŋɨ̀sɨg nyaʼa təm ɨban num, naʼ ɨka ɨ num ni mə gha ɨŋgam Ŋwiə̀ jìm, ɨmbə̀ʼ ə bə̂d mɨ̀jìm mbe nɨ kaʼi mɨ̀Jû zu. Ənɨ mə̀ nyaʼa gha əne, Ə̀nùŋɨ̀sɨg nyaʼa chɨ̀ əmɨ rɨ ɨchû ɨvɨ, ɨchî nɨ mbɨ nyaʼa nɨrə sobə ni mbɨ zwiirɨ əmɨ.