James 1:4 - Mauni Mamaga Iifaga

⁴ Ke Deo anina eani emi pako'a fekapula mo felao maeai, ke emi aguagu alogai laomai felo'i mo fokapa'i ega koa Isa maagai alo opai aumi fomia eoma. Ega'ina mo laa'i kai, emi aguagu alogai alomi ko'agai mo Isa fopako'ania. Ke Isa aina kainai kapa ma'oai fokapa afe'aini'i, ke muninai isafa fopea eoma. Ke fuagai aisama, emi keaga age'opai, kapa aga'o kainai afolokai. Ega puo i'opo i'oi'i i'oi'i eemi akefai aisama, gamu'i mo foopo emi pako'a foafiapia, alomiai mo fekeka felao ega'ina i'opo'i ma'oai fekepagai afe'ai laa'i fekemia. Egae kai Deo maagai alo opai aumi agomia.

James 1:4 Iomraidhean Croise

Mateo 10:22

Ke lau akau puogai papiau ma'oai alo'i ko'agai oi animi afakeani kai, kaisau agekapula lau agepako'aniau mo agelao fuagai auga kania ageisagamau.

Mateo 19:20

Ega aisama au agu'a ega'ina eifa einaka, “Ega'ina iifa'i ma'oai laafi'ini'i kai kapa'ina auga alakapa koa?” eoma.

Mateo 5:48

Ega puo oi Amami ufai eague auga alo opai lao'i mai'i alo epogu koa i'opoga, oi isafa Isa koa i'opoga fomia alo opai lao'i mai'i alomi fepogu.”

Mako 10:21

Ega aisama Iesu au maaga eisa anina eani puo epainia einaka, “Kapa aga'omo alokapa koa. Molao emu amu ma'oai mo'afa'afalaini'i, ke monina ulalu au'i mopeni'i ega koa ufai alopa'amu'amu. Egae kai fomai muniuai fopea,” eoma.

Luka 18:22

Iesu i'ina a'o elogonia aisama, au ega'ina epainia pugu einaka, “Ma'oai lokapai'i kai aga'omo alokapa koa. Emu amu ma'oai fo'afa'afalaini'i, monina foafia ulalu au'i fopeni'i. Ega alokapa oma aisama, emu amu aagoai lo'afa'afalaini'i au'i afa ufai aloafia. Egae kai fomai muniuai fopea,” eoma.

Luka 21:19

Ega kainai alomi fopakapulania, lau eeuai foafia'ama, ega koa agu pagai maunina agoafia,” eoma.

Luka 8:15

Kai a'isa felogai ke'ualai au'i, Deo ega iifa alo'i ko'agai ke alo'i felogai a'o kelogo keafi kapulania. Ega puo i'opo kina emai aisama, keafiapi'i mo elaolao Deo maagai laomai felo'i mo kekapa'i ani'i keoge,” eoma.

Ioane 17:23

Ke lau isa alo'iai faagu, ke Oi lau alouai foagu. Ke iifa gome isa moafi kaigugu'i aga'omo kegamia, ega koa Oi lau loulaisau auga agofa'a papiau'i fekelogo. Ke Oi lau aniu loani koa i'opoga, isa isafa ani'i ega loani oma auga isafa agofa'a papiau'i fekelogo laoma.

1 Korinto 2:6

Kai lau ke papiau fou apinauga au'i, papiau e'i pako'ai keapao au'i maa'iai ikifa iifaga aifania. Kai ikifa ega'ina auga, i'ina agofa'a ikifaga laa'i, o i'ina agofa'agai papiau ke'ima'i lopia'i au'i e'i ikifa laa'i. Gome isa keagu alogai, e'i isapu ikifaga ega'ina eka kai, kemae aisama ega'ina isapuga laa'i emia.

Kalatia 6:9

Ke i'a laomai felo ikapa fala'apoloaina falaapakipo, gome Deo kina epaapa auga kina agemai aisama, au oga felo afaunia kainai, puaga isafa felo agaafia.

Kolose 4:12

Ke Epafras, oi emi papiau aga'o, ke Iesu Kristo ega pinauga ekapa auga, ega pamego iifa'i oi eemiai eulaisa. Isa aufa kina mo oi faumiai megamegai eafipugu, ega koa oi foapa kapula, alomi fekapula, Deo kapa'ina anina eani fokapa eoma auga fologo felo eoma.

1 Tesalonika 5:23

Lai amegamega ega koa Deo ifo gagao inagome auga, oi kapa ma'oai okapa'i au'i faaga'iai alo lolofa aumi fepamiaimi aoma. Ke i'a a'a Lopia Iesu Kristo agemai pugu aisama, lalaumiai, alomiai, ke imaaumiai laomai apala aga'o okapaisa faeoma puo faepenimi aoma.

Hibru 13:21

Deo Iesu faagagai ega ekapa oma auga, fepalagainimi fofua foagu, kapa felo'i ma'oai ega logoai fokapa laoma. Ke Iesu Deo alo fepagama mo pinauga ekapaisa koa i'opoga, Iesu ega pipalagaisai, i'a Deo alo fapagama mo pinauga fakapa. Ke Iesu ega'ina auga aoniamo, Au Akaiki'a amapamia, ke amaau afagaina faefuafua. Amen.

James 1:5

Kai oi epomiai kaisau ega'ina i'opo'i alo'iai fepeauka auga ikifaga, eegai laa'i koa aisama, Deo fegoina fepalagaina. Deo gafegafe akaiki'a auga agogoina aisama, afaepapuua, kapa'ina ogoina auga, kapa e'ele ipauma pinoina agopinoi mo ganinagai, emi apala afaeisa kai agepenimi mo. Ega puo kaisau eegai ega'ina ikifaga laa'i koa aisama, Deo fegoina ega'ina ikifaga fepenia.

James 3:2

Oi ologo felo koa i'opoga, i'a ma'oai aague alogai, keaga i'oi'i i'oi'iai agagapai a'ualai, papiau puo kepeni'a. Kai gagapai ma'o alogaina auga, i'a a'a nini'aniai papiau puo apeni'i aisama, gagapai a'a nini'aniai kemai. Kai aufalao aga'o epo'aisai nini'aniai gagapai aga'o aekapakapa auga, isa eague alogai, imaauga fofouga age'ima agekaina. Ke Deo maagai alo opai ipauma auga agemia.

1 Peto 5:10

Ke Deo gafegafe ma'oai inagome auga, Iesu Kristo faagagai oi eifanimi, Isa ega isapu, ke eaea akaiki'a fou akeka aoniamo auga foafia eoma. Ke oi kina pika koa mo agokiekie afegai, Isa ifo oi emi kiekie eegai agepapealaimi. Ke Isa oi emi pako'ai agepakapulanimi afololao afolomai, ke emi pako'a agoafiapia.

2 Peto 1:9

Kai ega'ina lao'i mai'i aufalao aga'o eegai laa'i koa aisama, Deo maagai isa auga maaga ekimi, ke isa maaga aaka aelao kai, kapa'ina agogai ekae auga mo eisa. Ke Deo isa ufainagai laomai apala'i ekapai'i au'i eikui'i auga e'agege efua.