Biblia Todo Logo
Bìoball air-loidhne

- Sanasan -




Filipi 4:8 - Mauni Mamaga Iifaga

8 Aau akiu Kristiano papiaumi, nini'ani ega'ina laifani'i au'i fuagai, ina'ina mo alaifania. Kapa'ina ko'a, kapa'ina akaiki'a, kapa'ina opaina, kapa'ina ofu faagagai laa'i kai felo ipauma auga, kapa'ina papiau keisa anina keani auga, kapa'ina papiau keisa felo ipauma keoma auga, ke kapa'ina papiau keifagaina auga, oi opomi i'ina kapa'i mo ee'iai fooge.

Faic an caibideil Dèan lethbhreac




Filipi 4:8
67 Iomraidhean Croise  

Ke isa e'i imoi, ke Herod ega au fou keulai'i kelao Iesu kepa'ani penia keinaka, “Pamalele aumu, lai alogo oi auga iifa ko'a mo loifania. Ke iifa ko'agai mo Deo ega keaga papiau lopamaleleni'i. Ke papiau oi eemuai ala keopola oma auga gefa aloauga. Gome oi papiau afe'i aloisa.


Gome Herod Ioane emani'iaina, ke elogo Ioane auga alo opai ke alo lolofa auga. Ega puo isa Ioane eafiapia mo fou keagu. Ke isa Ioane aina elogonia aisama, kapa ma'o mo ekapai'i ke alogamai mo isa aina elogonia.


Ega aisama Iesu isa epaini'i einaka, “Oi auga papiau ago'iai ifomi alo opai aumi koa i'opoga opamiaimi kai, Deo guami alo eisa. Gome kapa'ina papiau maa'iai keisa kapa akaiki'a ipauma keoma auga, Deo maagai auga kapa aga'o laa'i,” eoma.


Kai ega'ina kekapai'i kinagai, Ierusaleme taoninai au aga'o aka Simion eagu. Isa auga Deo maagai alo opaina, ke alo ko'agai Deo ega iifa muninai epea. Isa Deo Israel papiau'i agepalagaini'i, kania'i ageagamauga auga kina e'imaisa, ke Deo ega Spiritu isafa isa alogai eagu.


Ega kinagai au aka Iosepa, Iudea agogai taoni aga'o aka Arimatea keoma auga taoninai emai. Isa au felo ipauma, papiau ke Deo fou maa'iai laomai felo ipauma auga. Isa Deo ega agofa'a agemai auga e'imaisa.


Kaisau ifo aina fouga eifania auga, ega koa ekapa auga papiau isa au akaiki'a fekepamia eoma puo ekapa. Kai kaisau isa eulaisa auga au akaiki'a fekepamia eoma puo epinauga auga iifa ko'a auga, ke pifoge kapa'i aga'o isa eegai afoloisa.


Ke isa keinaka, “Konelius, Roma ifani au'i 100 e'ima'i lopiaga eulaimai. Isa Deo maagai alo opai auga, ke Deo emani'iaina, Isa mo eopolaga. Iudea papiau'i ma'oai isa ega koa ekapa auga kelogo puo aina keafia. Ke Deo ega agelo alo elolofa auga aga'o emai isa epainia, iifa feulaisa oi fomai isa ega e'ai, ke isa oi kapa'ina aloifania auga a'o felogo eoma,” keoma.


“Damaskus taoninai au aga'o aka Ananias eagu. Isa alo ko'agai Moses ega iifa muninai epea. Ega puo Iudea papiau'i Damaskus taoninai keagu au'i ma'oai ega'ina auga kelogo felo ke aina kainai kepea. Isa lau gaisau eoma puo eeu emai.


Ega puo aau akiu, au au'i imagea kuagai gua, oi ologo felo'i, Deo ega Spiritu alo'i ke ikifa alo'i epogu au'i fokinani'i, isa fo'ama ifake pinauga agapeni'i.


Ke kinai apea koa i'opoga, laomai felo'i isafa mo amakapa'i. Kai a'oa'o akaiki'a'i akapa'i, ke inuinu auga miamia'i falakapa'i. Ke papiau fou akeamage kai fou kefeu amage koa lao'i mai'i apala'i i'oi'i i'oi'i isafa falakapa'i. Ke ifo'a mo epo'aisai falaakekua, ke falapikupa.


Gome isapu keafia papiau ke'ima'i au'i auga, papiau laomai felo kekapa au'i ee'iai auga, isa papiau ipamani'ini'i au'i laa'i. Kai papiau laomai apala kekapa au'i ee'iai auga, isa papiau ipamani'ini'i au'i kemia. Oi anina oani isapu eafia epamani'inimi auga papagai fopealai ooma ma? Ega ooma koa aisama, kapa'ina felo auga mo fokapa ega koa isa oi ageifa felo penimi.


Gome kaisau Iesu Kristo faugai ega epinauga oma auga, Deo alo epagama, ke papiau isa eegai keifa felo.


Kai kai mo alo'i ipaumagai maguae'i faaga iifalaina emia au'i, ega'ina gouga auga Deo ega iifa kainai aemia kai, Deo ega Spirituai emia. Ega'ina papiau'i auga Iudea papiau'i Deo ega papiau ko'a'i au'i. Ke isa Deo ega papiau kemia auga au afagaina papiau aumauni ee'iai aemai kai, Deo eegai emai.


Ega puo papiau e'i laomai felo, o apala auga afa isafina kina aemai koa kai, oi Iesu ega pinauga au'i pinauga felo, o apala kekapa folooma. Kai foagu Lopia ega mai pugu kina fo'ima. Isa agemai aisama, kapa'ina uminagai kemia alaisa'i au'i, eaeai agepafoki'i. Ke papiau pinauga kekapa au'i, gua'i alogai kapa'ina keopolaga kainai kekapa auga isafa agepafokia. Ke ega kinagai aisama, Deo kaisau epinauga felo auga ageau afagaina.


Pau lai Deo amegamega penia, ega koa oi kapa apala aga'o folokapa aoma. Ke lai ega'ina akapa auga, lai kapa ma'oai akapa'i ekaina auga papiau fekeisa alaoma kai, lai emai pinaugai a'ualai koa iisa ganinagai, oi laomai felo mo fokapa aoma.


Ega'ina akapai'i alogai, papiau isa'i lai au akaiki'amai kepamiaimai kai, isa'i auga lai au e'elemai kepamiaimai. Ke papiau lai keau afagainimai kai, isa'i au'i keifa apala penimai. Ke lai iifa ko'a mo aifania mo ganinagai, papiau lai pifogemai keifania.


Ke isa lai akimai Kristiano auga aga'o, iifa faunina Iesu Kristo fouga faugai epinauga auga kainai, iifi e'a papiau'i ma'oai isa keifagaina auga fou aulai'i eemi kefai.


Gome lai kapa'ina felo mo amakapa aoma alogai, Lopia mo agogai kiekie alaafi'i kai, papiau isafa ago'iai kiekie aafii'i auga keisa'i.


Kai papiau Deo ega Spiritu alo'iai eagu au'i iina kekapa oma: Isa alo'i ko'agai aga'o aga'o ani'i keani. Ke isa alogamai mo kelao kemai. Isa papiau fou gagaoai keagu. Ke papiau isa alo'i kepakiekie aisama, e'i alo kiekie keafiapia mo. Ke isa papiau kegafegafe peni'i. Ke isa papiau ee'iai laomai felo mo kekapa. Ke isa iifa ko'a mo keifania, ega koa papiau isa kepako'ani'i.


Ega puo oi aga'o aga'o pifoge iifa'i au'i fopua'afuni'i kai, iifa ko'a auga mo aami akimi Kristiano papiau'i maa'iai foifania. Gome i'a aga'o aga'o au'a, i'a ma'oai imaauga aga'omogai amai. Ke imaauga ega'ina auga Iesu Kristo.


Gome eaea puaga auga, laomai felo'i, ke alo opai lao'i mai'i mo kekapa'i, ke iifa ko'a mo keifani'i.


Ega puo foapa kapula, Deo ega iifa ko'a auga peleta koa fopamia uufamiai fopaaga. Ke alo opai laoga maina auga olagami aulina koa fopamia olagamiai fooge fopakaisapuimi.


Aau akiu Kristiano papiaumi, e'u nini'aniai kapa isa'i fou'i alaifani'i pugu. Oi Lopia fou omia kainai eegai alomi fegama. Ke lau kapa'ina laifa kakau'i au'i i'opo'i mo fapapua'i eemi fefai pugu auga, lau eeuai opopo aga'o laa'i. Ke i'ina iifa'i oi emi pako'ai agepakaisapuimi.


Ke oi papiau iifi e'a alogai laa'i au'i ee'iai auga, oi ikifai fokagakaga, emi laomai foisa felo. Ke ega'ina agokapa alogai, kina maaga folopafua aagenia mo.


Ega agokapa oma aisama, kina ma'o emi agu alogai kapa'ina anina oani auga aufalao aga'o gakapa gapenimi afolooma kai, ifomi imamiai agokapa agoafia. Ke ega koa agokapa aisama, afe papiau'i pako'a papiau'i laa'i au'i oi au akaiki'ami akepamiaimi.


Ega koa i'opoga, isa akafa isafa kapa'ina ageifania auga, papiau isa aina fekeafia kainai fekepea. Isa papiau ee'iai faeifa apala ke alo, opo fou fepa'opaina. Ke kapa'ina eifania auga kainai fepea.


Kaisau ifo ega famili afae'ima felo aisama pako'a papiau'i age'ima'i agekaina ma? Laa'i ipauma! Ega puo isa ifo ega famili fe'ima felo kakaua. Ke kapa'ina ageifania auga, gauga alo'i ko'agai isa aina fekeafia ega iifa kainai fekepea ke fekekapa. Egae kai isa Deo ega pinauga agekapa, pako'a papiau'i age'ima'i agekaina.


Ke oi agu'amu puo ega'ina alokapa alogai, papiau e'elemu mo fakeoma fakepaakeiso. Kai oi nini'ani faunina mo foifania. Laomai felo mo fokapa. Alomu ko'agai papiau ani'i foani. Alomu ko'agai Iesu fopako'ania. Ke alomu fefelo, laomai apala'i foumakalaini'i. Ega koa fokapa, pako'a papiau'i oi fou oague au'i laomai felo mo fopakina'i.


Kai isa papiau ee'iai fegafegafe alogaina, feifa koko'i, ke Deo maagai laomai felo'i mo alo ko'agai ani'i feani fekapa'i. Ke isa kapa'ina agekapa auga, feisa felo ke feopola felo kai fekapa. Ke isa Deo maagai alo opai auga femia, ke alo felolofa. Ke isa ifo fepaapakipo fekaina.


Ke Iesu Kristo, i'a a'ima auga anina eani i'a alo'a ofuga feiku'i, i'a isa ifo ega papiau ipauma'a famia, ke alo'a ko'agai laomai felo'i mo Deo maagai fakapa'i eoma. Ega kainai isa ifo imaauga elogoaina fau'aisai emae, a'a laomai apala'i ma'oai afa'i eogei'i.


Oi au apao'i fopamaleleni'i e'i laomai, ke opola'i fou fekepa'opaini'i. Ega koa isa kapa'ina akeifania auga, papiau isa au akaiki'a'i fekepamia'i, ke aina'i fekeafia. Ke isa kapa'ina akekapa auga fekeisa, ke fekeopola felo kai fekekapa. Isa Deo ega iifa ko'a'i mo fekepako'ani'i. Ke isa alo'i ko'agai Deo, ke papiau isafa ani'i fekeani. Ke kina apala akeafia mo ganinagai, e'i kiekie fekeafiapia gamuga mo fekeopo.


Ke kapa ma'oai alokapa'i alogai, oi isa kapa'ina felo fekekapa auga fopakina'i fekekapa. Ke alopamalele alogai, alomu ke opomu fofougai fopamalele.


Ke lau anina laani a'a papiau fakeagu aage mo laoma. Ega puo alo'i, imaau'i fofougai isafa fekemalele, Deo maagai kapa'ina felo'i au'i fekekapa'i, ega koa aufa kina kapa'ina mo ani'i keani au'i, e'i pinaugai fekekapa'i fekeafi'i laoma.


Ufainagai Deo agofa'a fofouga gapagama eoma aisama, kapa aga'o aeafia agofa'a aepagama. Kai Isa eifa mo agofa'a fofouga egama auga apako'ania. Ega'ina pako'agai i'a alogo pau amu ma'oai aisa'i au'i, alaisa'i au'i ee'iai kemai. Ke i'a ufu'a apa'a Deo kapa'ina eifania auga kepako'ania puogai, isa e'i laomai felo mo auga ega iifa pukagai eifafoua.


Lau ke fou apinauga au'i fou alomai ko'agai apako'ania, Deo maagai kapa'ina felo o apala auga alogo puo, anina aani laomai ma'oai felo'i mo fakapa'i aoma. Ega kainai faumaisai fomegamega faefuafua.


Iifa gome kaisau alo ko'agai Deo muninai gapea eoma koa aisama, iina fekapa oma: Isa isagepa, ke afuafu keulalu kina apala'iai keague au'i fe'ima'i. Ke isa agofa'a fofouga alogai laomai apala'i epogu, ke Deo keumakalaina au'i ma'oai keague kai ega'ina papiau'i epo'iai faekoko. Kaisau ega koa ekapa auga Ama'a Deo anina eani, ke Isa maagai alo ko'agai ke alo opainai Isa eau afagaina auga.


Kai ikifa ufai Deo eegai emai ikifaga auga, papiau epalagaini'i Deo ega aguai keagu. Laomai ma'oai epo'iai papiau kapa Deo ega aguai eagu auga laoga maina kapa akaiki'a ipauma. Ke ega'ina ikifaga eafia papiauga auga, papiau fou gagaoai keagu, ke ifo elogoaina papiau kapa'ina keifania auga, aepaafiafi kai'iai mo epakaisa. Ke isa aina aefua, papiau keifania auga ekapa, ke papiau gua'i eani alogaina. Ke isa papiau fau'iai kapa felo'i ma'o ekapa'i, ke kapa'ina ekapa auga opo aga'omogai ekapa. Ke kapa ma'oai alo ko'agai mo ekapa'i.


Ke oi pau Deo ega iifa muninai opea kainai, oi alomi elolofa. Ega koa oi alomi ko'agai aami akimi Kristiano papiau'i ani'i oani. Ega koa i'opoga mo, foisa felo oi aga'o aga'o alomi ko'a ipaumagai ke alomi fofougai animi foani.


Oi Deo akepako'ania papiau'i epo'iai oague alogai, agu felogai foagu. Ega koa isa oi laomai apala okapa keoma keifa apala penimi mo ganinagai, isa oi felo okapa auga fekeisa, ke Iesu Kristo agemai i'a ageisa'a kinagai aisama, isa Deo au akaiki'a fekepamia laoma.


Ke ega'ina laagai auga, oi alomi ko'agai aga'o aga'o animi foani alogaina. Gome oi alomi ko'agai animi agoani koa aisama, ega'ina laoga mainai papiau oi eemiai laomai apala'i ma'o kekapa'i au'i agemoka'i ago'agegeaini'i.


Ekefa'auagai, i'ina auga lau malele gua lapapua eemi efai auga. Lau malele aga'o lapapua kakaua auga, ke i'ina fou lapapua'i auga, oi fekepaopolanimi, alomiai laomai felo'i mo fekepa'uegeni'i foopolani'i laoma.


Gauagai, i'a ake'aisai mo falaifa papiau ani'i aani falaoma kai, alo'a ko'agai isa ani'i aani auga laoga maina fakapa, ke alo'a ko'agai fapinauga fapalagaini'i.


Ke kaisau Iesu agemai pugu afia'amaga eafia'ama auga, Iesu Deo maagai alo opaina ipauma koa i'opoga, isa ifo alo e'ima laomai apala aga'o aekapa.


Ekefa'auagai, papiau spiritu ega isapuai kenini'ani keoma au'i folopako'a afe'aini'i. Kai oi isa kapa'ina keifania auga Deo ega Spiritu ma eegai emai keifania auga fo'opo foisa. Gome profeta pifoge'i ma'o kepealai agofa'a fofouga kepea.


Lean sinn:

Sanasan


Sanasan