Filipi 2:1 - Mauni Mamaga Iifaga

^1-2 Ke oi Iesu Kristo fou omia auga alomi epakapulania, ke isa oi animi eani auga laoga mainai oi epaameimi, ke Deo ega Spiritu fou aga'omo omia, ke aga'o aga'o eemiai ogafegafe ke guami oania. Ega koa aisama, Iesu Kristo kapa'ina oi faagamiai ekapaisa auga i'opoga mo fokapa. Ke Iesu oi animi eani koa i'opoga papiau ma'oai ani'i ega foani oma, ke alomi aga'omo femia kapa'ina amoafia ooma auga pinaugaga aga'omo fokapa. Ega koa agokapa aisama, lau e'u alogama agopafua.

Filipi 2:1 Iomraidhean Croise

Luka 2:25

Kai ega'ina kekapai'i kinagai, Ierusaleme taoninai au aga'o aka Simion eagu. Isa auga Deo maagai alo opaina, ke alo ko'agai Deo ega iifa muninai epea. Isa Deo Israel papiau'i agepalagaini'i, kania'i ageagamauga auga kina e'imaisa, ke Deo ega Spiritu isafa isa alogai eagu.

Ioane 14:18

Ke lau oi isagepa koa afalapua'afunimi kai, alamue eemi alafai.

Ioane 14:27

Lau gagao oi lapenimi, ega'ina auga lau e'u gagao eemiai lapua'afuga. Ke lau kapa'ina lapenimi auga agofa'a papiau'i kepipeni koa i'opoga koa alapipeni. Ega puo foloopopo alomi faemafu ke folomani'i.

Ioane 17:13

“Lau pau Oi eemu alafai kai, lau agofa'ai laaguega kai i'ina kapa'i laifani'i, ega koa lau e'u alogama ala koa auga isa isafa alo'iai fepogu laoma.

Acts 2:46

Ke kina ma'oai Deo ega e'a alogai ma'oai alo'i aga'omogai kekaigugu. Ke kina isa'iai aufa e'i gopu e'a'iai isafa kekaigugu. Egae Iesu ega mae keopolaga kemegamega, alo'i ko'agai gafegafeai guaniai fo'ama aga'o aga'o kepipeni, ke alo'i egama alogaina.

Acts 4:32

Pako'a papiau'i ma'oai opo'i alo'i aga'omo emia. Ke ifo'i epo'iai e'i amu kepipeni. Ke kai aga'o ega amu akekua aepa'aua aeifa isa apuga aeoma.

Roma 5:5

Ke ega'ina afia'amaga i'a alo'a afaepamafua. Gome Deo ega Spiritu i'a epenii'a auga faagagai Isa alo ko'agai i'a ani'a eani auga laoga maina i'a gua'a alogai e'efauka.

Roma 8:26

Ke i'a alo'aisai apinapina koa i'opoga, Deo ega Spiritu isafa i'opoga mo ekapa i'a a'a apokeai epalagaini'a. Gome i'a ala famegamega oma auga alalogo kai, Deo ega Spiritu ifo maipinapinaga mo, nini'ani agaifa'opo'i afaekaina au'i nini'ani'iai i'a fau'aisai Deo emegamega penia.

1 Korinto 12:13

Gome i'a Iudea au'a ma, Grik au'a ma, kala'afi, o aagu aage mo ifo'a a'a pinauga akapa ma ganinagai, Spiritu aga'omogai i'a ma'oai baptismo aafiia. Ke imaau'a aga'omo koa i'opoga, i'a ma'oai Iesu fou aga'omo amia. Ega'ina auga Deo ega Spiritu aga'omo mo i'a ma'oai ega ipeni epeni'a ainu koa i'opoga, alo'aisai eague.

1 Korinto 15:31

Aau akiu Kristiano papiaumi, lau auga aufa kina mae mauni epogai e'u pinauga lakapa. Kai lau iifa faunina i'a a'a Lopia Iesu Kristo fouga lainogonia auga, oi opako'ania kainai lau laina'au lanini'ani, ke ega'ina laifania auga alou ko'agai lapako'ania laifania.

1 Korinto 3:16

Ke oi ifomi auga Deo ega e'a, ke Deo ega Spiritu oi alomiai eague auga alologo ma? Iifa gome oi Deo ega Spiritu alomiai eague auga ologo.

2 Korinto 13:14

Lai amegamega, ega koa Lopia Iesu Kristo ega gafegafe akaiki'a, ke Deo alo ko'agai papiau ani'i eani auga laoga maina, ke Deo ega Spiritu papiau alo'i aga'omo epamia auga laoga maina oi ma'oai eemiai feka aoma.

2 Korinto 2:14

Kai Deo, Iesu Kristo faagagai i'a aufa kina epapeai'a, kapa ma'oai apalutini'i, ke Iesu ega logo fouga, mulamula foga felo, Isa kepa'a penia koa i'opoga auga, Isa i'a faaga'aisai epapea afu ma'oai elao. Deo tenkiu akaiki'a amapenia.

Kalatia 4:6

Ke oi Deo gauga kainai Deo ega Spiritu Iesu Kristo eegai eka auga, pau oi epeniimi alomiai ekae. Ke Deo ega Spiritu i'a Deo gauga auga epalogoni'a kainai, i'a alogamai Deo aifaga, “Abba, oi lai Amamai” aoma.

Kalatia 5:22

Kai papiau Deo ega Spiritu alo'iai eagu au'i iina kekapa oma: Isa alo'i ko'agai aga'o aga'o ani'i keani. Ke isa alogamai mo kelao kemai. Isa papiau fou gagaoai keagu. Ke papiau isa alo'i kepakiekie aisama, e'i alo kiekie keafiapia mo. Ke isa papiau kegafegafe peni'i. Ke isa papiau ee'iai laomai felo mo kekapa. Ke isa iifa ko'a mo keifania, ega koa papiau isa kepako'ani'i.

Efesus 4:4

Ke Deo oi eifanimi aisama, oi ma'oai emi afia'ama aga'omo emia. Ega koa i'opoga, Lopia kainai oi ma'oai imaaumi aga'omo emia, ke Deo ega Spiritu isafa aga'omo oafiia ma'oai alomiai eague.

Filipi 1:8

Lau ega laifa oma, gome Iesu Kristo oi guakaemi ala epa'au oma koa i'opoga, lau oi ma'oai guakaemi ega lapa'au oma auga ko'a mo Deo eifafoua.

Filipi 3:3

Gome i'a auga papiau maguae'i faaga iifalaina emia auga gouga ko'a ipauma auga aafiia. Ega'ina auga i'a Deo ega Spirituai Deo aau afagaina, ke Iesu Kristo fou amia kainai aaina'au kai, faaga'aisai kapa'ina kekapaisa auga alapako'ania.

Kolose 2:2

Lau ega'ina lakapa auga, lau anina laani isa mapaame'i, ke alo'i aga'omo femia, alo'i ko'agai aga'o aga'o ani'i fekeani laoma. Ke isa ega koa fekekapa, Deo ega ogefake kapa akaiki'a Iesu Kristo auga fekelogo felo laoma. Ke ega koa fekekapa, ega koa alo'i kapulaga ipaumagai kapa ma'oai oko'i fekelogo laoma.

Kolose 3:12

Ega puo oi auga Deo oi animi eani alogaina, ke ekinanimi ega papiau epamiaimi aumi, ke Isa maagai alo lolofa aumi omia koa i'opoga, oi guani ke gafegafe laoga maina, ke ifomi e'elemi fopamiaimi auga laoga maina, ke papiau gagafe'i mo foafia auga laoga maina, ke kapa'ina eemiai fekemia fokiekie alogaina mo ganinagai, gamuga mo foopo, foafiapia mo auga lao'i mai'i ma'oai tiapu koa fopamia'i foi'iuka'i.

Hibru 6:18

Deo ega pako'a nini'anina, ke ifo akagai ega pako'a iifaga ekapaisa. I'ina iifa'i auni'i i'oi'i afaepamia'i, ke Deo aepipifoge puo ega iifa laa'iai afaeaopagai. I'a alogo Deo i'a ago'aisai afia'ama eogeisa fepalagaini'a eoma. Ega kainai i'a kiekie aafia aisama, Isa fepalagaini'a afia'amaga aafia'ama puo, Isa eega alao magogo kapula fepeni'a aoma.

1 Peto 1:2

Ke oi aumi Deo Ama muni kapa'ina agemia elogo auga ega logoai, ke Deo ega Spiritu papiau alo'i epalolofania auga ega pinaugai oi ekinanimi. Ega koa oi Iesu Kristo aina foafia, ke Iesu Kristo ifagai oi emi apala feikulai'i eoma. Lau lamegamega ega koa Deo ega gafegafe akaiki'a, ke gagao fou alomi fepapogua, fepafakaua laoma.

1 Ioane 3:24

Kaisau Deo eifania koa kekapa au'i, Deo fou keagu, ke Deo isafa isa fou keagu. Ke Deo ega Spiritu i'a epenii'a i'a Deo fou aague auga epalogoni'a.

1 Ioane 4:12

Kai aga'o Deo aeisaisa. Kai i'a alo'a ko'agai aga'o aga'o ani'a agaani aisama, Deo i'a alo'aisai ageagu. Ke Deo papiau ani'i eani koa i'opoga, i'a isafa papiau ani'i ega faani oma auga laoga maina alo'a agepapogua.

1 Ioane 4:16

Ke ega koa emia puo alogo, ke apako'ania Deo alo ko'agai i'a ani'a eani auga laoga maina faugai aague. Ke Deo auga alo ko'agai i'a ani'a eani. Ega puo kaisau ega agu alogai alo ko'agai papiau ani'i eani auga, Deo isa fou keagu, ke isa Deo fou keagu.