Mateo 5:12 - Mixteco del suroeste de Tlaxiaco Oaxaca

¹² Na̱ ka̱ꞌ kusɨ̱ɨ̱ꞌ iniꞌ rán jee sɨ̱ɨ̱ꞌ kuvi ka̱ꞌ iniꞌ ánímaꞌ rán, chi mánasɨ́ ñáꞌnú ví ta̱ꞌvi̱ꞌ nataji Ndiosíꞌ nu̱u̱nꞌ rán ya̱ íyó ne̱ antivɨ́ súkún. Chi sánikua̱ꞌ sáꞌá kini ráa jín ránoꞌó suni sukuán nsa̱ꞌá kini rá ñɨvɨ jín rá te̱e nna̱kani tu̱ꞌun nkene yuꞌú máá maá Ndiosíꞌ ne̱ yanaꞌán ne̱ ntiáꞌan nkiji ránoꞌó.

Mateo 5:12 Iomraidhean Croise

Génesis 15:1

Sáá njia̱ꞌa rá yaꞌá, nkenta tu̱ꞌun I̱toꞌoꞌ‑ó nu̱u̱nꞌ Abram sáá nxi̱nénu̱u̱nꞌ I̱toꞌoꞌ‑ó nu̱u̱nꞌ re̱ꞌ jee nkachiꞌ‑i: ―Koto yúꞌví nú, Abram, chi nuꞌuꞌ ví ya̱ nama noꞌó jee máá ñáꞌnú ví ta̱ꞌvi̱ꞌ taji ni̱ꞌ nu̱u̱nꞌ noꞌó.

Mateo 16:27

Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kiji tuku ni̱ꞌ iniꞌ ñɨ̱vɨ́ yaꞌá, jee viiꞌ víꞌí kuñáꞌnú ni̱ꞌ jín tiñu níso ni̱ꞌ kuéntáꞌ kua̱ꞌ kúñáꞌnú maá Tátáꞌ ni̱ꞌ Ndiosíꞌ, jee kiji ni̱ꞌ jín rá najiáꞌáꞌ ííꞌ ni̱ꞌ. Saájee nachunáán ni̱ꞌ nu̱u̱nꞌ ta ɨɨn rá ñɨvɨ sánikua̱ꞌ na̱ja íyó tiñu nsa̱ꞌá ráa.

Mateo 6:16

’Jee sáá nééꞌ niteꞌ rán sáá néñu̱ꞌun rán Ndiosíꞌ, jee koto sáꞌá xií rán, kuéntáꞌ sáꞌá rá ñɨvɨ íyó sansuꞌva, chi nínta xií nu̱u̱nꞌ ráa sáva stúvi ráa nu̱u̱nꞌ rá ñɨvɨ ya̱ nééꞌ niteꞌ ráa. Soo máá naáꞌ vá káchíꞌ ni̱ꞌ nu̱u̱nꞌ rán, ya̱ nɨꞌɨ ta̱ꞌvi̱ꞌ ya̱ ni̱ꞌi̱nꞌ ráa ví kua̱chi nákuetúꞌún ñɨvɨ ráa, [jee nsú ta̱ꞌvi̱ꞌ jiáꞌa Ndiosíꞌ].

Lucas 13:34

’¡Jerusalén! ¡Jerusalén! Ránoꞌó ñɨvɨ ñuunꞌ vá ya̱ jiáꞌníꞌ rán rá te̱e ya̱ nákani ráa rá tu̱ꞌun kéne yuꞌú máá maá Ndiosíꞌ, jee kúun rán yu̱u̱ꞌ rá te̱e ya̱ nchu̱ichí Ndiosíꞌ va̱ji nu̱u̱nꞌ nú. Jee kue̱ꞌe̱ꞌ íchí nkuini ni̱ꞌ nastútú ni̱ꞌ rá se̱ꞌya ñuunꞌ nú, kuéntáꞌ kua̱ꞌ nastútú ɨɨn che̱tán rá se̱ꞌya ti̱ꞌ chi̱ji rá chi̱yo̱ꞌ ti̱ꞌ, soo ntu nkuíni nú.

Lucas 6:23

’Na̱ ka̱ꞌ sɨ̱ɨ̱ꞌ kuvi iniꞌ rán rá ki̱vɨ̱ꞌ koo sukuán, jee ne̱ kanava rán ya̱ nusɨ̱ɨ̱ꞌ nasɨ́kuitɨꞌ ka̱ꞌ iniꞌ rán, chi mánasɨ́ ñáꞌnú ví ta̱ꞌvi̱ꞌ nataji Ndiosíꞌ nu̱u̱nꞌ rán ya̱ íyó ne̱ antivɨ́ súkún, chi suni sukuán sáꞌá kini ráa jín ránoꞌó sánikua̱ꞌ nsa̱ꞌá kini rá jííꞌ ráa jín rá te̱e nna̱kani tu̱ꞌun nkene yuꞌú máá maá Ndiosíꞌ ne̱ yanaꞌán.

Lucas 6:35

’Soo kunu̱u̱nꞌ rán rá ñɨvɨ ya̱ túfíꞌ táꞌán ráa jín ránoꞌó jee saꞌá rán ya̱ váꞌa jín ráa. Jee ku̱ꞌvanúún rán nu̱u̱nꞌ ñɨvɨ sú ntu jíníꞌ rán ya̱ naniꞌinꞌ tuku rán maa. Jee máá ñáꞌnú ví ta̱ꞌvi̱ꞌ ni̱ꞌi̱nꞌ rán, jee kuvi rán se̱ꞌya Ndiosíꞌ máá ñáꞌnú ka̱ꞌ nu̱u̱nꞌ nɨꞌɨ, chi ñúnkúún iniꞌ re̱ꞌ rá ñɨvɨ ya̱ ntu jiáꞌa ráa ya̱ kútaꞌviꞌ ráa nu̱u̱nꞌ re̱ꞌ jín rá ñɨvɨ niváꞌa.

Hechos 16:25

Soo yatin kuvi ñuún, Pablo jín Silas káꞌánꞌ ráa jín Ndiosíꞌ jee jíta ráa nákuetúꞌún ráa Ndiosíꞌ. Jee tésóꞌo rá inka ñɨvɨ násɨ́ꞌ iniꞌ veka̱a.

Hechos 5:41

I̱ña̱jée nkene rá apóstol nu̱u̱nꞌ Justicia. Jee kúsɨ́ɨꞌ iniꞌ ráa, chi jíníꞌ Ndiosíꞌ ya̱ níkɨ́nꞌ na̱a̱ꞌ ráa Jesús jee saáva nnoꞌo ráa tu̱nkánuun jie̱ꞌe̱ꞌ re̱ꞌ.

Romanos 5:3

Jee nsáꞌ kua̱chi kuitɨꞌ yaꞌá, chi suni kúsɨ́ɨꞌ iniꞌ‑ó nu̱u̱nꞌ tu̱nóꞌó nóꞌo‑ó, chi jíníꞌ‑ó ya̱ nu̱u̱nꞌ tu̱nóꞌó nóꞌo‑ó vá sáꞌá ya̱ jíjia iniꞌ‑ó káꞌnú koo iniꞌ‑ó keꞌneꞌ iniꞌ‑ó ya̱ kuiñɨ kutú‑ó nu̱u̱nꞌ Jesús.

1 Corintios 3:8

Jee saáva, te̱e ya̱ tée tataꞌ sáꞌá jín te̱e ya̱ chíꞌi nute nu̱u̱nꞌ tataꞌ sáꞌá vá, jee ɨɨn ni̱ꞌ kúvi ráa. Soo tanu̱u̱nꞌ ráa ni̱ꞌi̱nꞌ rá ya̱ꞌvi ráa ya̱ nachunáán Ndiosíꞌ nu̱u̱nꞌ ráa sánikua̱ꞌ tanu̱u̱nꞌ tiñu nsa̱ꞌá ráa.

2 Corintios 4:17

Chi súnika̱ꞌ nóꞌo‑ó ñɨ̱vɨ́ yaꞌá, soo víyáxín kúvi rá tu̱nóꞌó vá jee núún ni ví‑i, chi sáꞌá‑a ya̱ ni̱ꞌi̱nꞌ‑ó ta̱ꞌvi̱ꞌ ya̱ viiꞌ kúñáꞌnú nasɨ́kuitɨꞌ ka̱ꞌ sáá kuneeꞌ‑ó nɨ́ɨ́nkání jín Ndiosíꞌ.

Filipenses 1:29

Chi jie̱ꞌe̱ꞌ Cristo, ntaji Ndiosíꞌ u̱vi̱ꞌ tiñu váꞌa nu̱u̱nꞌ rán: nsáꞌ kua̱chi ntaji re̱ꞌ ya̱ ínúꞌ iniꞌ rán Cristo, chi suni ntaji re̱ꞌ ya̱ kunoꞌo rán jie̱ꞌe̱ꞌ Cristo.

Filipenses 2:17

Retú kaꞌniꞌ rá ñɨvɨ Roma nuꞌuꞌ, suꞌva nasokoꞌ ni̱ꞌ maáníꞌ nu̱u̱nꞌ Ndiosíꞌ. Jee suꞌva sikétáꞌán ni̱ꞌ maáníꞌ jín ya̱ násokoꞌ rán maárán nu̱u̱nꞌ re̱ꞌ, ya̱ sáꞌá rán tiñu re̱ꞌ chi kúneí iniꞌ rán re̱ꞌ. Saáva sú kaꞌniꞌ ráa nuꞌuꞌ, jee sɨ̱ɨ̱ꞌ koo iniꞌ ánímaꞌ ni̱ꞌ, jee kúsɨ́ɨꞌ iniꞌ ni̱ꞌ jín nta̱ká rán.

Colosenses 1:24

Vitan jee nuꞌuꞌ, ne̱ ánímaꞌ ni̱ꞌ kúsɨ́ɨꞌ víꞌí iniꞌ ni̱ꞌ ya̱ nóꞌo ni̱ꞌ jie̱ꞌe̱ꞌ tiñu sáꞌá ni̱ꞌ jie̱ꞌe̱ꞌ ya̱ váꞌa ránoꞌó. Sáni nnoꞌo Cristo jie̱ꞌe̱ꞌ rá ñɨvɨ ya̱ kúneí iniꞌ ráa re̱ꞌ, suni sukuán ne̱ yɨkɨkúñu máá maáníꞌ nóꞌo ni̱ꞌ ni síkúnkuvi ni̱ꞌ tiñu Cristo jie̱ꞌe̱ꞌ ya̱ váꞌa maáráa, ya̱ kúvi ráa kuéntáꞌ yɨkɨkúñu re̱ꞌ, ya̱ kúvi ráa ñɨvɨ re̱ꞌ ya̱ nstútú re̱ꞌ.

Colosenses 3:24

Chi ya̱ jíníꞌ rán ya̱ ni̱ꞌi̱nꞌ rán nu̱u̱nꞌ máá I̱toꞌoꞌ‑ó ta̱ꞌvi̱ꞌ, ya̱ jiáꞌa re̱ꞌ nu̱u̱nꞌ rá ñɨvɨ yɨ́ꞌɨ́ nu̱u̱nꞌ re̱ꞌ, chi nu̱u̱nꞌ maá I̱toꞌoꞌ‑ó Cristo sátíñú rán.

1 Tesalonicenses 2:15

Rá ñɨvɨ Israel vá ví ya̱ ñaꞌniꞌ ráa I̱toꞌoꞌ‑ó Jesús jín rá te̱e ya̱ nna̱kani ráa tu̱ꞌun nkene yuꞌú Ndiosíꞌ ne̱ yanaꞌán. Jee nta̱níkɨ́nꞌ rá ñɨvɨ vá ránuꞌuꞌ ñuunꞌ yukuán. Ntu kúváꞌa iniꞌ Ndiosíꞌ néꞌyá re̱ꞌ ráa. Jee kénta ráa si̱kɨ̱ꞌ nta̱ká ñɨvɨ.

Hebreos 10:34

Chi nku̱náꞌví iniꞌ rán rá ñɨvɨ ya̱ yɨ́ꞌɨ́ iniꞌ veka̱a jie̱ꞌe̱ꞌ íñɨ́ ráa jín tu̱ꞌun váꞌa Cristo. Jee suni ne̱ sɨ̱ɨ̱ꞌ ni̱yo iniꞌ rán sáá nka̱neeꞌ rá ñɨvɨ rá nantíñú kúmí rán, chi jíníꞌ rán ya̱ ne̱ antivɨ́ nu̱u̱nꞌ nééꞌ Ndiosíꞌ yukuán ñúꞌún ta̱ꞌvi̱ꞌ váꞌa nasɨ́kuitɨꞌ rán ka̱ꞌ ya̱ koo nɨ́ɨ́nkání.

Hebreos 11:26

Chi nñu̱ꞌun iniꞌ re̱ꞌ ya̱ yɨ́yáꞌvi víꞌí ka̱ꞌ ví ya̱ ku̱ꞌva rá ñɨvɨ tu̱nkánuun re̱ꞌ kuéntáꞌ kua̱ꞌ nito u̱ꞌvi̱ꞌ ráa Cristo, nsú káꞌ kukúká re̱ꞌ jín rá nantíñú yɨ́yáꞌvi íyó ñuunꞌ Egipto. Chi nneenu̱u̱nꞌ re̱ꞌ ya̱ ni̱ꞌi̱nꞌ re̱ꞌ ta̱ꞌvi̱ꞌ ya̱ ku̱ꞌva Ndiosíꞌ nu̱u̱nꞌ re̱ꞌ.

Hebreos 11:33

Jee jie̱ꞌe̱ꞌ ya̱ ni̱nu̱ꞌ iniꞌ ráa nku̱neí iniꞌ ráa Ndiosíꞌ, jee sava ráa nka̱ntáꞌán ráa, jee nku̱neí ráa nna̱tɨɨn ráa rá ñuunꞌ náꞌnú nna̱kɨ̱ꞌɨ xi̱ntíín ráa, jee na̱a̱ꞌ nta̱túníꞌ sava ráa nu̱u̱nꞌ rá ñuunꞌ ráa, jee nni̱ꞌi̱nꞌ ráa tu̱ꞌun nchi̱sóyuꞌú Ndiosíꞌ kunima̱ni̱ꞌ‑i nu̱u̱nꞌ ráa, jee ñasɨꞌ Ndiosíꞌ yuꞌú rá nikaꞌa sáva nka̱jíꞌ rátíꞌ ráa,

Hebreos 11:6

Soo retú ntu ínúꞌ iniꞌ‑ó kúneí iniꞌ‑ó Ndiosíꞌ tékúꞌ, jee ni ntu íyó na̱ja kuvi kuva̱ꞌa iniꞌ re̱ꞌ kune̱ꞌyá re̱ꞌ yó. Chi ñɨvɨ nátuꞌva‑a nu̱u̱nꞌ re̱ꞌ jee íyó‑o i̱nu̱ꞌ iniꞌ‑i ya̱ íyó nijia re̱ꞌ, jín suni ya̱ ku̱ꞌva re̱ꞌ ta̱ꞌvi̱ꞌ nu̱u̱nꞌ rá ñɨvɨ ya̱ nánukú ráa re̱ꞌ.

Santiago 1:2

Ránoꞌó ya̱ kúvi ñaniꞌ maáníꞌ jín ku̱ꞌva ni̱ꞌ, íyó tɨɨn rán ya̱ kusɨ̱ɨ̱ꞌ víꞌí iniꞌ ánímaꞌ rán, sáá kototúníꞌ kéꞌín nu̱u̱nꞌ tu̱nóꞌó táꞌánꞌ si̱kɨ̱ꞌ rán.

Santiago 5:10

Rá ñaniꞌ jín rá ku̱ꞌva, íyó tɨɨn kuéntáꞌ rán kuéntáꞌ ɨɨn ñujiínꞌ kunikɨnꞌ rán na̱sa nnoꞌo rá ñɨvɨ nna̱kani ráa tu̱ꞌun nkene yuꞌú Ndiosíꞌ jee ni̱yo káꞌnú iniꞌ ráa, ya̱ nu̱u̱nꞌ súví I̱toꞌoꞌ‑ó nkachitu̱ꞌún ráa tu̱ꞌun re̱ꞌ.

1 Pedro 4:13

Chisaꞌ na̱ ka̱ꞌ íyó kusɨ̱ɨ̱ꞌ iniꞌ rán ya̱ jíꞌín rán nóꞌo tu̱nóꞌó jie̱ꞌe̱ꞌ yɨ́ꞌɨ́ rán nu̱u̱nꞌ Cristo, sáva suni ntántúníꞌ nasɨ́kuitɨꞌ nusɨ̱ɨ̱ꞌ iniꞌ rán kaꞌanꞌ kuekuꞌ rán ki̱vɨ̱ꞌ nenta nijinꞌ Cristo stúvi re̱ꞌ ya̱ viiꞌ nasɨ́kuitɨꞌ kúñáꞌnú re̱ꞌ nísotíñú re̱ꞌ.