Mateo 23:8 - Mixteco del suroeste de Tlaxiaco Oaxaca

⁸ ’Soo ránoꞌó, koto jiáꞌa rán ya̱ kaꞌanꞌ rá ñɨvɨ mestrúꞌ kúñáꞌnú ránoꞌó. Chi métúꞌún ni mestrúꞌ kúñáꞌnú rán íyó, ya̱ kúvi Cristo, jee ntáká ránoꞌó chi ɨɨn ni kúvi rán ya̱ kúvi rán ñaniꞌ jín ku̱ꞌva.

Mateo 23:8 Iomraidhean Croise

Mateo 10:25

Jee te̱e ya̱ kútúꞌva, íyó va̱ꞌani ya̱ kuvi re̱ꞌ kuéntáꞌ kua̱ꞌ mestrúꞌ re̱ꞌ. Jee suni sukuán ɨɨn musúꞌ, suni íyó va̱ꞌani retú kuvi re̱ꞌ kuéntáꞌ kua̱ꞌ i̱toꞌoꞌ‑o. Saáva retú kachiꞌ rá ñɨvɨ ya̱ i̱toꞌoꞌ xí veꞌi ví Beelzebú, ya̱ kúvi kui̱ꞌna̱ꞌ kúñáꞌnú, jee si̱kɨ̱ꞌ ká kaꞌanꞌ niva̱ꞌa ráa kune̱ꞌyá ráa rá ñɨvɨ táꞌán veꞌi re̱ꞌ.

Mateo 17:5

Jee ni káꞌánꞌ i̱i̱ꞌ ka̱ꞌ Pedro, jee nkenta vi̱ko̱ꞌ maa jiánu̱te̱ꞌ kuéntáꞌ íyó nuva ñuꞌunꞌ ñasɨꞌ‑ɨ ráa, jee nu̱u̱nꞌ vi̱ko̱ꞌ vá nkene ɨɨn ta̱chi̱yuꞌú, jee káchíꞌ‑i: ―Yaꞌá ví Se̱ꞌya ni̱ꞌ jee ñúnúunꞌ ni̱ꞌ re̱ꞌ, jee kúváꞌa iniꞌ ni̱ꞌ néꞌyá ni̱ꞌ re̱ꞌ. Tɨɨn kuéntáꞌ ñáꞌnú rá tu̱ꞌun káchíꞌ re̱ꞌ ―nkachiꞌ nusuyuꞌú vá.

Mateo 23:10

Jee suni koto jiáꞌa rán kaꞌanꞌ ráa mestrúꞌ ránoꞌó, chi métúꞌún ni mestrúꞌ rán íyó chúꞌun re̱ꞌ ichi ránoꞌó, ya̱ kúvi Cristo.

Mateo 23:7

Jee ñúnúunꞌ ráa ya̱ káꞌánꞌ yɨ́ñúꞌún ñɨvɨ jín ráa rá nu̱yáꞌvi, jín ya̱ káꞌánꞌ ñɨvɨ ráa mestrúꞌ.

Mateo 26:25

Saájee nna̱xiníkó Judas, te̱e ya̱ naku̱ꞌva re̱ꞌ Jesús, jee nkachiꞌ re̱ꞌ: ―¿Á nuꞌuꞌ ví‑i rúja?, Mestrúꞌ ―nkachiꞌ Judas. ―Maánú káchíꞌ maa ―nkachiꞌ Jesús.

Mateo 26:49

Jee kuísá ntañúꞌún ña̱kuyatin Judas nu̱u̱nꞌ Jesús, jee nkachiꞌ‑i nu̱u̱nꞌ re̱ꞌ: Tónkuaaꞌ‑ó, Mestrúꞌ ―nkachiꞌ‑i, jee nte̱yuꞌú‑u re̱ꞌ.

Marcos 10:51

Jee nkachiꞌ Jesús nu̱u̱nꞌ‑u: ―¿Ná kúvi ya̱ kúníꞌ nú ya̱ saꞌá ni̱ꞌ jín nú? Jee te̱e kuáá vá nkachiꞌ: ―Mestrúꞌ, kuíni ni̱ꞌ ya̱ nunijinꞌ nchinúún ni̱ꞌ sáva kuvi nakune̱ꞌyá ni̱ꞌ.

Marcos 11:21

Jee sáá nna̱ku̱ꞌun iniꞌ Pedro ya̱ nkachiꞌ Jesús nu̱u̱nꞌ yutun vá, jee nkachiꞌ‑i nu̱u̱nꞌ Jesús: ―¡Mestrúꞌ! ¡Kune̱ꞌyá! Yutun higo vá, ya̱ nchi̱sónínu nú maa, jee ya̱ nnachi‑i.

Marcos 14:45

Sáá nkenta re̱ꞌ, jee ntañúꞌún kuitɨꞌ nku̱yatin re̱ꞌ nu̱u̱nꞌ Jesús, jee nkachiꞌ re̱ꞌ nu̱u̱nꞌ‑u: ―Mestrúꞌ. Jee nte̱yuꞌú re̱ꞌ maa.

Marcos 9:5

Jee nkachiꞌ Pedro nu̱u̱nꞌ Jesús: ―¡Mestrúꞌ! ¡Na̱ ka̱ꞌ va̱ꞌa ka̱ꞌ ya̱ íyó‑ó yaꞌá! Saꞌá ráníꞌ u̱ni̱ꞌ veꞌi sayo, ɨɨn kuvi nú, jee ɨɨn kuvi Moisés, jee ɨɨn kuvi Elías.

Lucas 22:32

Soo nuꞌuꞌ jíkánꞌ táꞌvíꞌ ni̱ꞌ jie̱ꞌe̱ꞌ nú nu̱u̱nꞌ Ndiosíꞌ sáva níta ya̱ kúneí iniꞌ nú nuꞌuꞌ. Jee sáá nakani iniꞌ nú ya̱ nsa̱ꞌá nú jee nikó nú nu̱u̱nꞌ nuꞌuꞌ saájee nasáneí nú iniꞌ ánímaꞌ rá ñanitáꞌán nú kuiñɨ ni̱ꞌin ráa ―nkachiꞌ Jesús.

Juan 1:38

Saájee nna̱koto yátá Jesús, jee niniꞌ re̱ꞌ ya̱ níkɨ́nꞌ ráa ya̱ta̱ꞌ re̱ꞌ, jee nkachiꞌ re̱ꞌ nu̱u̱nꞌ ráa: ―¿Ná kúvi ya̱ nánukú rán? ―nkachiꞌ re̱ꞌ nu̱u̱nꞌ ráa. Jee nna̱xiníkó ráa nu̱u̱nꞌ re̱ꞌ, jee nkachiꞌ ráa: ―Mestrúꞌ, ¿né núꞌ kúvi nu̱u̱nꞌ nééꞌ nú? ―nkachiꞌ ráa.

Juan 1:49

Jee nna̱xiníkó Natanael: ―Mestrúꞌ, noꞌó kúvi nijia Se̱ꞌya Ndiosíꞌ, jee noꞌó kúvi te̱e nísotíñú ya̱ kiji tatúníꞌ nú nu̱u̱nꞌ rá ñɨvɨ ñuunꞌ maáó Israel ―nkachiꞌ re̱ꞌ.

Juan 11:8

Jee nkachiꞌ rá te̱e súkuáꞌa re̱ꞌ ráa nu̱u̱nꞌ re̱ꞌ: ―Mestrúꞌ, sukuán yatin ni ya̱ nkuini rá te̱e kúñáꞌnú nu̱u̱nꞌ ñɨvɨ Israel kuun ráa yu̱u̱ꞌ noꞌó jee, ¿á tukuni kuíni nú ya̱ kɨ̱ꞌɨ̱nꞌ nú yukuán rúja? ―nkachiꞌ ráa.

Juan 20:16

Nkachiꞌ Jesús nu̱u̱nꞌ ña: ―¡María! Jee nna̱koto ña jee káꞌánꞌ ña tu̱ꞌun hebreo jee nkachiꞌ ña: ―¡Raboni! ―ya̱ kuíni káchíꞌ Mestrúꞌ.

Juan 3:2

Jee ña̱ꞌa̱nꞌ te̱e yaꞌá yakuááꞌ nu̱u̱nꞌ nééꞌ Jesús, jee nkachiꞌ re̱ꞌ nu̱u̱nꞌ Jesús: ―Mestrúꞌ, jíníꞌ ránꞌ ya̱ máá Ndiosíꞌ nchu̱ichí noꞌó va̱ji nú sáva xínéꞌénꞌ nú rá tu̱ꞌun re̱ꞌ, kuéntáꞌ ɨɨn Mestrúꞌ nu̱u̱nꞌ ránꞌ. Chi ni̱ꞌ ɨɨn ñɨvɨ nsáꞌ kúvi saꞌá rá seña a̱nasɨ́ sáꞌá nú, retú ntu íyó Ndiosíꞌ jín‑i.

Juan 3:26

Jee ña̱ꞌa̱nꞌ ráa nu̱u̱nꞌ Juan, jee nkachiꞌ ráa nu̱u̱nꞌ re̱ꞌ: ―Mestrúꞌ, kune̱ꞌyá, chi te̱e ya̱ nku̱táꞌán jín nú íyó ka̱ꞌ ichi ntekáꞌnú Jordán, jie̱ꞌe̱ꞌ re̱ꞌ ya̱ njia̱ꞌa nú ya̱ naáꞌ, jee te̱e vá síkuánuté re̱ꞌ jee nɨꞌɨ ñɨvɨ kua̱ꞌa̱nꞌ nu̱u̱nꞌ re̱ꞌ.

Juan 4:31

Jee ni kua̱ꞌa̱nꞌ ña, jee rá te̱e súkuáꞌa re̱ꞌ ráa, jíkánꞌ táꞌvíꞌ ráa nu̱u̱nꞌ re̱ꞌ: ―Mestrúꞌ, kajiꞌ nú ―nkachiꞌ ráa.

Juan 6:25

Jee sáá nkanta ráa íyo ka̱ꞌ ichi yuꞌú nteñúꞌún, jee yukuán nna̱ketáꞌán ráa re̱ꞌ. Jee ni̱ka̱tu̱ꞌún ráa re̱ꞌ: ―Mestrúꞌ, ¿na̱ma ntiaaꞌ nú yaꞌá? ―nkachiꞌ ráa.

Juan 9:2

Jee rá te̱e súkuáꞌa re̱ꞌ ráa ni̱ka̱tu̱ꞌún ráa re̱ꞌ, jee nkachiꞌ ráa: ―Mestrúꞌ, ¿né ɨɨn nsa̱ꞌá kua̱chi, á te̱e yaꞌá áxí tátáꞌ re̱ꞌ jín nánáꞌ re̱ꞌ nsa̱ꞌá kua̱chi, ya̱ nkaku kuáá re̱ꞌ? ―nkachiꞌ ráa.

2 Corintios 1:24

Jee nsáꞌ núníꞌin ránꞌ kosoꞌ ránꞌ nu̱u̱nꞌ ránoꞌó jie̱ꞌe̱ꞌ ichi ya̱ kúneí iniꞌ ránú Jesús. Chisaꞌ táꞌán sátíñú nkáá kúvi ránꞌ jín ránoꞌó, sáva kusɨ̱ɨ̱ꞌ iniꞌ ánímaꞌ ránú. Chi íñɨ́ ni̱ꞌin rán jie̱ꞌe̱ꞌ kúneí iniꞌ rán Cristo.

2 Corintios 4:5

Jee nsú jie̱ꞌe̱ꞌ maáráníꞌ ví ya̱ stékútu̱ꞌún ránꞌ, chisaꞌ káchítu̱ꞌún ránꞌ ya̱ I̱toꞌoꞌ nu̱u̱nꞌ kua̱íyó ví Jesús ya̱ kúvi Cristo. Jee ránuꞌuꞌ chi kúvi ránꞌ kua̱chi musúꞌ ni ya̱ sátíñú ránꞌ nu̱u̱nꞌ Jesús nu̱u̱nꞌ ya̱ váꞌa ránoꞌó.

Efesios 3:15

Jee nu̱u̱nꞌ re̱ꞌ va̱ji ntáká tataꞌ yó ñɨvɨ ya̱ ya nééꞌ antivɨ́ súkún jín iniꞌ ñɨ̱vɨ́ yaꞌá.

Filemón 1:16

Jee kuneeꞌ re̱ꞌ jín noꞌó, soo nsú kua̱chi kuéntáꞌ ɨɨn musúꞌ kéꞌen ñɨvɨ, chisaꞌ si̱kɨ̱ꞌ ka̱ꞌ kúvi re̱ꞌ ka̱ꞌ nsú káꞌ ɨɨn musúꞌ kéꞌen ñɨvɨ, chi kúvi re̱ꞌ ñaniꞌ‑ó ya̱ ñúnúunꞌ‑ó, jee ñúnúunꞌ víꞌí ni̱ꞌ maa, soo saꞌ víꞌí káꞌ kunu̱u̱nꞌ nú maa, jie̱ꞌe̱ꞌ kúvi re̱ꞌ ɨɨn ñɨvɨ jín jie̱ꞌe̱ꞌ yɨ́ꞌɨ́ re̱ꞌ nu̱u̱nꞌ I̱toꞌoꞌ‑ó.

Santiago 3:1

Ránoꞌó ñaniꞌ ni̱ꞌ jín ku̱ꞌva ni̱ꞌ, koto kénta koo kue̱ꞌe̱ꞌ rán kúvi mestrúꞌ xínéꞌénꞌ Tu̱ꞌun Ndiosíꞌ. Chi jíníꞌ‑ó ya̱ xe̱e̱nꞌ ka̱ꞌ nakuniꞌi si̱kɨ̱ꞌ ráníꞌ saꞌá Ndiosíꞌ jie̱ꞌe̱ꞌ na̱sa xínéꞌénꞌ ránꞌ tu̱ꞌun re̱ꞌ.

1 Pedro 5:3

Jee koto tátúníꞌ ni̱ꞌin rán ntáká tiñu nu̱u̱nꞌ rá ñɨvɨ ya̱ néen kuéntáꞌ rán. Chisaꞌ kueꞌnu va̱ꞌa rán ichi Ndiosíꞌ sáva suꞌva ku̱ꞌva rán ɨɨn ichi váꞌa nu̱u̱nꞌ ráa na̱ja kueꞌnu ráa.

Apoclipsis 1:9

Nuꞌuꞌ Juan, ya̱ kúvi ni̱ꞌ ñanitáꞌán‑órán. Jee jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo, ɨɨn nuún ni nkáá nóꞌo ni̱ꞌ jín ránoꞌó tu̱nóꞌó sáꞌá kíni ñɨvɨ yó, jee ɨɨn nuún ni nkáá yɨ́ꞌɨ́ ni̱ꞌ jín rán xi̱ntíín Ndiosíꞌ, jee ɨɨn nuún ni nkáá káꞌnú íyó iniꞌ‑ó kúneí‑ó kúníꞌin‑ó íñɨ́‑ó jín Cristo. Jee jie̱ꞌe̱ꞌ ya̱ stékútu̱ꞌún ni̱ꞌ tu̱ꞌun váꞌa Ndiosíꞌ jín tu̱ꞌun ya̱ kúvi ya̱ naáꞌ ya̱ njiáꞌa Jesús, jee saáva ntɨɨn rá ñɨvɨ nuꞌuꞌ yɨ́ꞌɨ́ ni̱ꞌ xi̱ntíín ráa, jee ña̱na̱ka ráa nuꞌuꞌ ne̱ nu̱u̱nꞌ ɨɨn ñuꞌun naní Patmos ya̱ káá sɨ́ɨ́n ma̱ꞌñú nteñúꞌún.

Apoclipsis 19:10

Saájee nuꞌuꞌ nna̱kui̱ñɨ̱ꞌ ítɨ́ ni̱ꞌ jiáxin ni̱ꞌ maáníꞌ ne̱ nu̱u̱nꞌ ñu̱ꞌún nu̱u̱nꞌ najiáꞌáꞌ ííꞌ vá sáva kuneñu̱ꞌun ni̱ꞌ maa. Soo nkachiꞌ‑i nu̱u̱nꞌ ni̱ꞌ: ―Koto sáꞌá nú sukuán. Chi suni táꞌán musúꞌ kúvi ni̱ꞌ jín noꞌó jín rá ñanitáꞌán nú, ya̱ yɨ́tíñú‑órán nu̱u̱nꞌ Ndiosíꞌ ya̱ níkɨ́nꞌ kutú váꞌa‑ó tu̱ꞌun jie̱ꞌe̱ꞌ Jesús. Saáva kuneñu̱ꞌun nú máá maá Ndiosíꞌ. Chi rá tu̱ꞌun na̱a̱ꞌ ya̱ nkachitu̱ꞌún Jesús, yukuán kúvi tu̱ꞌun na̱a̱ꞌ ya̱ jiáꞌa Ta̱chi̱ꞌ Ííꞌ nu̱u̱nꞌ rá ñɨvɨ ya̱ káchítu̱ꞌún na̱a̱ꞌ tu̱ꞌun kéne yuꞌú Ndiosíꞌ ―nkachiꞌ najiáꞌáꞌ ííꞌ vá.

Apoclipsis 22:9

Soo nkachiꞌ‑i nu̱u̱nꞌ ni̱ꞌ: ―Koto sáꞌá nú sukuán, chi suni táꞌán musúꞌ kúvi ni̱ꞌ jín noꞌó, jín rá ñanitáꞌán nú ya̱ kúvi ráa rá ñɨvɨ ya̱ nákani rá tu̱ꞌun kéne yuꞌú Ndiosíꞌ, jín maáráa ya̱ chúꞌun iniꞌ ráa tu̱ꞌun re̱ꞌ ya̱ nééꞌ nu̱u̱nꞌ tutuꞌ yaꞌá. Saáva kuneñu̱ꞌun nú máá maá Ndiosíꞌ.