Lucas 9:7 - Mixteco del suroeste de Tlaxiaco Oaxaca

⁷ Jee Herodes, te̱e tátúníꞌ, chi nku̱káꞌnú iniꞌ re̱ꞌ jie̱ꞌe̱ꞌ ntáká tiñu sáꞌá Jesús. Jee nku̱naan nku̱suꞌva re̱ꞌ, chi sava rá ñɨvɨ káchíꞌ ya̱ Juan ví‑i ya̱ nna̱tekuꞌ i̱i̱ꞌ‑i ya̱ níꞌiꞌ‑i,

Lucas 9:7 Iomraidhean Croise

Mateo 11:2

Jee te̱e síkuánuté naní Juan yɨ́ꞌɨ́ re̱ꞌ iniꞌ veka̱a, jee nteso̱ꞌo re̱ꞌ jie̱ꞌe̱ꞌ rá tiñu ya̱ sáꞌá Cristo. Saájee nchu̱ichí‑i sava rá te̱e ya̱ kútáꞌán jín‑i súkuáꞌa‑a ráa kua̱ꞌa̱nꞌ ráa nu̱u̱nꞌ Jesús,

Marcos 8:28

Jee suviráa nna̱xiníkó nu̱u̱nꞌ re̱ꞌ: ―Káchíꞌ sava rá ñɨvɨ ya̱ kúvi nú Juan ya̱ nsi̱kuánuté, jee sava ráa ka̱ꞌ káchíꞌ ya̱ kúvi nú Elías, jee sava ráa ka̱ꞌ káchíꞌ kúvi nú ɨɨn rá te̱e nna̱kani ráa tu̱ꞌun nkene yuꞌú máá maá Ndiosíꞌ tióꞌ chíji nasɨ́kuitɨꞌ.

Lucas 13:31

Jee maá hora yukuán ntuꞌva sava rá te̱e yɨ́ꞌɨ́ ñujiínꞌ fariseo nu̱u̱nꞌ Jesús, jee nkachiꞌ ráa nu̱u̱nꞌ re̱ꞌ: ―Kene nú nu̱u̱nꞌ ñuunꞌ yaꞌá kuáꞌán chi kuíni Herodes kaꞌniꞌ re̱ꞌ noꞌó ―nkachiꞌ ráa.

Lucas 21:25

’Saájee koo seña nu̱u̱nꞌ nka̱niiꞌ jín nu̱u̱nꞌ yo̱o̱ꞌ jín suni rá tiu̱u̱nꞌ. Jee iniꞌ ñɨ̱vɨ́ yaꞌá koo nasɨ́kuitɨꞌ tu̱nkuíꞌyáꞌ iniꞌ rá ñɨvɨ nta̱ká nación, jee sa̱ꞌvi iniꞌ ráa ya̱ kuyu̱ꞌví ráa ya̱ nɨꞌɨn jiaku nasɨ́kuitɨꞌ nteñúꞌún jín ya̱ ji̱so̱ꞌ nasɨ́kuitɨꞌ nute sikéne‑e vá.

Lucas 23:7

Jee sáá nku̱káꞌnú iniꞌ re̱ꞌ ya̱ yɨ́ꞌɨ́ Jesús xi̱ntíín Herodes ya̱ nísotíñú nu̱u̱nꞌ ñuunꞌ Galilea, jee nta̱jí re̱ꞌ maa nu̱u̱nꞌ Herodes ya̱ suni nééꞌ‑e nu̱u̱nꞌ ñuunꞌ Jerusalén rá ki̱vɨ̱ꞌ yukuán.

Lucas 3:1

Jee kui̱ya̱ꞌ xáꞌúnꞌ (15) ya̱ nkuvi ya̱ tátúníꞌ Tiberio nu̱u̱nꞌ rá nación ya̱ yɨ́ꞌɨ́ ráa xi̱ntíín ñuunꞌ Roma, jee Poncio Pilato kúvi re̱ꞌ te̱e tátúníꞌ nu̱u̱nꞌ ñuunꞌ Judea, jee Herodes kúvi re̱ꞌ te̱e tátúníꞌ nu̱u̱nꞌ ñuunꞌ Galilea, jee ñaniꞌ re̱ꞌ Felipe kúvi re̱ꞌ te̱e tátúníꞌ nu̱u̱nꞌ ñuunꞌ Iturea jín nu̱u̱nꞌ ñuunꞌ Traconite, jee Lisanias kúvi te̱e tátúníꞌ nu̱u̱nꞌ ñuunꞌ Abilinia.

Lucas 9:19

Jee nna̱xiníkó ráa: ―Káchíꞌ sava rá ñɨvɨ kúvi nú Juan ya̱ nsi̱kuánuté, jee sava ráa ka̱ꞌ káchíꞌ ya̱ kúvi nú Elías, jee sava ráa ka̱ꞌ káchíꞌ ya̱ kúvi nú ɨɨn rá te̱e ya̱ nna̱kani ráa tu̱ꞌun nkene yuꞌú máá maá Ndiosíꞌ tióꞌ chíji nasɨ́kuitɨꞌ jee vitan nna̱tekuꞌ tuku‑u, káchíꞌ rá ñɨvɨ ―nkachiꞌ ráa nu̱u̱nꞌ Jesús.