Lucas 10:2 - Mixteco del suroeste de Tlaxiaco Oaxaca

² Jee nkachiꞌ re̱ꞌ nu̱u̱nꞌ ráa: ―Máá nááꞌ nijia ya̱ kue̱ꞌe̱ꞌ víꞌí ñɨvɨ ki̱vɨ nu̱u̱nꞌ Ndiosíꞌ ya̱ kúvi ráa tataꞌ sáꞌá re̱ꞌ. Soo íyó yakuꞌ ni rá musúꞌ kɨ̱stékútu̱ꞌún ráa Tu̱ꞌun Ndiosíꞌ sáva kɨ̱nastútú rá ñɨvɨ vá. Saáva ka̱ka̱nꞌ táꞌvíꞌ rán nu̱u̱nꞌ Ndiosíꞌ I̱toꞌoꞌ xí tataꞌ sáꞌá vá, ya̱ chuichí re̱ꞌ ka̱ꞌ rá musúꞌ kɨ̱ꞌɨ̱nꞌ ráa nastútúꞌ ráa maa.

Lucas 10:2 Iomraidhean Croise

Mateo 20:1

’Suꞌva tátúníꞌ Ndiosíꞌ nééꞌ antivɨ́ súkún nu̱u̱nꞌ rá ñɨvɨ yɨ́ꞌɨ́ xi̱ntíín re̱ꞌ, kúvi‑i kuéntáꞌ ɨɨn te̱e kúvi i̱toꞌoꞌ xí ñuꞌun, jee neꞌenꞌ víꞌí nkene re̱ꞌ kua̱nukú re̱ꞌ musúꞌ sáva satíñú ráa nteñu rá tataꞌ uva re̱ꞌ.

Marcos 13:34

Sukuán íyó kuéntáꞌ íyó ɨɨn te̱e ya̱ nkene‑e veꞌi‑i jee kua̱ꞌa̱nꞌ íká‑a. Jee ne̱ ntiáꞌan kene re̱ꞌ, jee njia̱ꞌa re̱ꞌ nu̱u̱nꞌ ta ɨɨn rá musúꞌ re̱ꞌ tiñu sáꞌá ráa, sáva kuneen kuéntáꞌ ráa veꞌi re̱ꞌ. Jee nta̱túníꞌ re̱ꞌ nu̱u̱nꞌ te̱e kúmí yuvéꞌí, ya̱ nito koo‑o.

Marcos 16:15

Jee nkachiꞌ re̱ꞌ nu̱u̱nꞌ ráa: ―Kuáꞌán rán kua̱íyó ñɨ̱vɨ́, jee stekútu̱ꞌún rán tu̱ꞌun váꞌa jie̱ꞌe̱ꞌ nuꞌuꞌ nu̱u̱nꞌ rá ñɨvɨ kua̱íyó ñɨ̱vɨ́, ya̱ nsa̱ꞌá Ndiosíꞌ.

Marcos 16:20

Jee nke̱i̱chí rá te̱e vá, jee nɨ́ɨ́n nste̱kútu̱ꞌún ráa tu̱ꞌun váꞌa Jesús, jee nchi̱neí maá I̱toꞌoꞌ‑ó ráa, jee nstúvi re̱ꞌ ya̱ naáꞌ ví tu̱ꞌun vá jín seña ííꞌ a̱nasɨ́ nsa̱ꞌá re̱ꞌ. Saá koo. Amén.]

Lucas 9:1

Nkana Jesús nastútú re̱ꞌ ni uxúꞌ u̱vi̱ꞌ (12) rá te̱e kútáꞌán jín re̱ꞌ súkuáꞌa re̱ꞌ ráa, jee njia̱ꞌa re̱ꞌ fuersáꞌ ííꞌ níꞌin nu̱u̱nꞌ ráa jín tiñu tatúníꞌ ráa sáva tavaꞌ ráa rá kui̱ꞌna̱ꞌ yɨ́ꞌɨ́ iniꞌ rá ñɨvɨ, jín suni sáva xinúvi ráa rá ñɨvɨ kúꞌvíꞌ.

Hechos 11:19

Rá ñɨvɨ kúneí iniꞌ ráa Jesús, ya̱ nkene ráa Jerusalén, sáá ñaꞌniꞌ ñɨvɨ Esteban, jee ñe̱te̱nuun ráa, chi nsa̱ꞌá kini ñɨvɨ ráa. Jee rá ñɨvɨ yaꞌá nkenta ráa ne̱ sánitɨ́ɨn Fenicia, jín ñuunꞌ káá ma̱ꞌñú nteñúꞌún naní Chipre, jín ñuunꞌ Antioquía. Jee nste̱kútu̱ꞌún kue̱ꞌe̱ꞌ ráa tu̱ꞌun Jesús kua̱chi nu̱u̱nꞌ rá ñɨvɨ Israel ni, ya̱ nééꞌ yukuán. Ntu nstékútu̱ꞌún ráa maa nu̱u̱nꞌ ni ɨɨn rá inka ñɨvɨ.

Hechos 13:2

Ni néñu̱ꞌun ráa I̱toꞌoꞌ‑ó, jee nééꞌ niteꞌ ráa, jee nkachiꞌ Ta̱chi̱ꞌ Ííꞌ Ndiosíꞌ nu̱u̱nꞌ ráa suꞌva: ―Sasɨ́ɨ́n rán Bernabé jín Saulo, sáva saꞌá ráa tiñu ya̱ nkana ni̱ꞌ ráa saꞌá ráa.

Hechos 13:4

Saájee nkene Bernabé jín Saulo chi nchu̱ichí Ta̱chi̱ꞌ Ííꞌ Ndiosíꞌ ráa, jee ña̱ꞌa̱nꞌ ráa ñuunꞌ Seleucia. Jee ne̱ yukuán nna̱ku̱ꞌun ráa iniꞌ barkúꞌ kua̱ꞌa̱nꞌ ráa nu̱u̱nꞌ ñuunꞌ Chipre, ya̱ kúvi ñuꞌun káá sɨ́ɨ́n ma̱ꞌñú nteñúꞌún.

Hechos 20:28

’Kumí rán maárán jee kumí rán ñanitáꞌán ya̱ kúneí iniꞌ ráa Jesús. Chi ñani Ta̱chi̱ꞌ Ííꞌ ránoꞌó, sáva kuvi rán rá te̱e kúñáꞌnú nu̱u̱nꞌ ráa, sáva kunaka rán rá ñɨvɨ kúneí iniꞌ ráa Ndiosíꞌ. Ñatɨ ni̱ñɨ̱ꞌ maá Se̱ꞌya re̱ꞌ, sáá ni̱ꞌi̱ꞌ‑i nu̱u̱nꞌ kurúsiꞌ, sáva nakeꞌen re̱ꞌ rá ñɨvɨ vá.

Hechos 22:21

Jee I̱toꞌoꞌ‑ó nkachiꞌ nu̱u̱nꞌ ni̱ꞌ: “Kuáꞌán, chi tají íká ni̱ꞌ nó nu̱u̱nꞌ rá inka nación ya̱ ntu kúvi Israel”, sukuán nkachiꞌ I̱toꞌoꞌ‑ó ―nkachiꞌ Pablo.

Hechos 8:4

I̱ña̱jée rá ñɨvɨ ñéte̱nuun vá, jee ni̱kónúun ráa, jee nste̱kútu̱ꞌún ráa tu̱ꞌun váꞌa Jesús.

1 Corintios 12:28

Jee saáva nteñu rá ñɨvɨ yɨ́ꞌɨ́ xi̱ntíín Cristo jee xíꞌna ka̱ꞌ ñani Ndiosíꞌ sava rá te̱e kuniso ráa tiñu apóstol chúichí Cristo ráa stúvi ráa ya̱ nááꞌ jie̱ꞌe̱ꞌ Cristo. Jee ya̱ uvíꞌ, jee ñani re̱ꞌ sava rá ñɨvɨ kuniso ráa tiñu ya̱ nakani ráa rá tu̱ꞌun kéne yuꞌú maáréꞌ. Jee ya̱ uníꞌ, jee ñani re̱ꞌ sava rá ñɨvɨ ya̱ xínéꞌénꞌ ráa tu̱ꞌun váꞌa re̱ꞌ nu̱u̱nꞌ rá ñɨvɨ. Jee kuíre ñani re̱ꞌ sava ñɨvɨ ya̱ sáꞌá rá tiñu a̱nasɨ́ jín fuersáꞌ ííꞌ Ndiosíꞌ. Jee kuíre njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva xínúvi ráa rá ñɨvɨ kúꞌvíꞌ, jee njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva chíneí ráa rá ñanitáꞌán ráa, jee njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva kuneen kuéntáꞌ rá ñɨvɨ ya̱ jínúꞌ iniꞌ ráa Cristo, jee njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva kúvi káꞌánꞌ ráa inka ka̱ꞌ nu̱u̱nꞌ rá tu̱ꞌun káꞌánꞌ ya̱ ntu jiáku̱ꞌun iniꞌ ráa.

1 Corintios 15:10

Soo jie̱ꞌe̱ꞌ ni ka̱ꞌ ya̱ níyo ma̱ni̱ꞌ iniꞌ Ndiosíꞌ nku̱náꞌví iniꞌ re̱ꞌ nuꞌuꞌ, saáva nsi̱kútaꞌviꞌ re̱ꞌ nu̱u̱nꞌ ni̱ꞌ ya̱ kúvi ni̱ꞌ apóstol nchu̱ichí re̱ꞌ jín tiñu níso ni̱ꞌ vitan. Jee nsáꞌ ka̱ꞌá níyo ma̱ni̱ꞌ iniꞌ Ndiosíꞌ néꞌyá re̱ꞌ nuꞌuꞌ ya̱ nka̱ji re̱ꞌ nuꞌuꞌ saꞌá ni̱ꞌ tiñu re̱ꞌ, chi saꞌ víꞌí ka̱ꞌ nsa̱tíñú yɨ́ɨ́ ni̱ꞌ nu̱u̱nꞌ re̱ꞌ nsú káꞌ ntáká rá inka ka̱ꞌ te̱e kúvi apóstol. Soo nsú nuꞌuꞌ ví ya̱ sáꞌá tiñu vá, chisaꞌ Ndiosíꞌ ví ya̱ chíneí chítuvi re̱ꞌ nuꞌuꞌ jín tiñu sáꞌá ni̱ꞌ.

2 Corintios 6:1

Jee saáva ránuꞌuꞌ, táꞌán sátíñú kúvi ránꞌ jín Ndiosíꞌ, jee jíkánꞌ táꞌvíꞌ ránꞌ nu̱u̱nꞌ ránoꞌó ya̱ koto níꞌínꞌ ka̱ꞌá rán ya̱ ma̱ni̱ꞌ iniꞌ Ndiosíꞌ néꞌyá re̱ꞌ ránoꞌó.

Filipenses 2:21

Chi nɨꞌɨ ráa nánukú tiñu ya̱ kino̱o va̱ꞌa nu̱u̱nꞌ maáráa, jee nsú tiñu Jesucristo nánukú ráa.

Filipenses 2:25

Jiáni iniꞌ ni̱ꞌ ya̱ jíniñúꞌún ni̱ꞌ chuichí ni̱ꞌ Epafrodito kua̱jiaaꞌ‑a nu̱u̱nꞌ rán. Jee kúvi re̱ꞌ ñaniꞌ ni̱ꞌ, jee táꞌán sátíñú jín ni̱ꞌ ví re̱ꞌ, jee táꞌán náma jín ni̱ꞌ tu̱ꞌun Jesús ví re̱ꞌ, kuéntáꞌ táꞌán ɨɨn soldado kántáꞌán. Nchu̱ichí rán re̱ꞌ chineí re̱ꞌ nuꞌuꞌ jín ya̱ jíniñúꞌún ni̱ꞌ.

Filipenses 2:30

Chi jie̱ꞌe̱ꞌ tiñu Cristo, nkenta re̱ꞌ ya̱ yatin kuviꞌ re̱ꞌ. Chi ñeꞌneꞌ iniꞌ re̱ꞌ kuviꞌ re̱ꞌ, sáva ñasɨꞌ re̱ꞌ nu̱u̱nꞌ rán jín tiñu chi nchi̱neí re̱ꞌ nuꞌuꞌ ya̱ ntu kúvi saꞌá rán jín nuꞌuꞌ.

Colosenses 1:29

Jee saáva núnasɨ́ ni̱ꞌ saꞌá ni̱ꞌ fesáꞌ saꞌá ni̱ꞌin ni̱ꞌ tiñu yaꞌá, jie̱ꞌe̱ꞌ ya̱ sátíñú ni̱ꞌin Cristo iniꞌ nuꞌuꞌ, jín fuersáꞌ níso re̱ꞌ.

Colosenses 4:12

Tájí Epafras tu̱ꞌun jíkátu̱ꞌún re̱ꞌ jie̱ꞌe̱ꞌ ránoꞌó, ya̱ suni kúvi re̱ꞌ táꞌán ñuunꞌ rán, jee kúvi re̱ꞌ musúꞌ ya̱ jiátíñú Cristo Jesús. Jee sáá káꞌánꞌ re̱ꞌ jín Ndiosíꞌ, jee sukuáni núnasɨ́ re̱ꞌ jíkánꞌ táꞌvíꞌ víꞌí re̱ꞌ jie̱ꞌe̱ꞌ rán, ya̱ kuiñɨ ni̱ꞌin rán, ya̱ kujia iniꞌ rán nu̱u̱nꞌ tu̱ꞌun kúneí iniꞌ rán, jee ya̱ koo kutú rán nu̱u̱nꞌ nɨꞌɨ ya̱ kuíni maá Ndiosíꞌ.

1 Tesalonicenses 2:9

Chi, ránoꞌó ñanitáꞌán, náꞌán rán ya̱ nsa̱tíñú ni̱ꞌin ráníꞌ jee nnu̱nasɨ́ yɨ́ɨ́ ránꞌ. Nuví niñuꞌ nsa̱tíñú ránꞌ sáva ni̱ꞌi̱nꞌ ránꞌ ya̱ jíniñúꞌún ránꞌ, sáva ntu nkúvi ránꞌ ɨɨn tiñu véi nu̱u̱nꞌ ni ɨɨn ránoꞌó, sáá káchítu̱ꞌún ránꞌ tu̱ꞌun váꞌa Ndiosíꞌ nu̱u̱nꞌ ránoꞌó.

1 Tesalonicenses 5:12

Ránoꞌó ñaniꞌ jín ku̱ꞌva, ntañúꞌún jíkánꞌ táꞌvíꞌ ni̱ꞌ nu̱u̱nꞌ ránoꞌó, ya̱ kɨya̱ꞌvi nu̱u̱nꞌ rán kune̱ꞌyá rán rá te̱e ya̱ sáꞌá ráa tiñu I̱toꞌoꞌ‑ó nteñu ránoꞌó, ya̱ kúvi ráa rá te̱e kúñáꞌnú yósóꞌ nu̱u̱nꞌ ránoꞌó, jín ya̱ náchuꞌun ráa ránoꞌó ichi I̱toꞌoꞌ‑ó.

2 Tesalonicenses 3:1

Jee íyó inka tu̱ꞌun kachiꞌ ráníꞌ nu̱u̱nꞌ ránoꞌó, ñanitáꞌán, ya̱ ka̱ka̱nꞌ táꞌvíꞌ ránú nu̱u̱nꞌ Ndiosíꞌ jie̱ꞌe̱ꞌ ránuꞌuꞌ. Sáva kutenuun ya̱chi̱ꞌ tu̱ꞌun jie̱ꞌe̱ꞌ I̱toꞌoꞌ‑ó, jee sáva koo ñáꞌnú tu̱ꞌun vá nu̱u̱nꞌ rá ñɨvɨ, sáni nkuvi nteñu ránoꞌó.

1 Timoteo 4:10

Chi jie̱ꞌe̱ꞌ yaꞌá sátíñú ni̱ꞌin‑ó jee núnasɨ́‑ó sátíñú‑ó, chi njia̱ꞌa‑ó tu̱neí iniꞌ‑ó Ndiosíꞌ ya̱ tékúꞌ. Jee suvire̱ꞌ ví ya̱ kúvi saꞌá re̱ꞌ ya̱ kúvi natavaꞌ re̱ꞌ nta̱ká ñɨvɨ nu̱u̱nꞌ kua̱chi ráa xinánitáꞌvíꞌ re̱ꞌ ráa. Jee sáni máá rá ñɨvɨ ya̱ ínúꞌ iniꞌ ráa Cristo ví ya̱ sáꞌá re̱ꞌ ya̱ nanitáꞌvíꞌ ráa.

2 Timoteo 4:5

Soo noꞌó, kuꞌun kájí iniꞌ nú nu̱u̱nꞌ nta̱ká tiñu, keꞌneꞌ iniꞌ nú tu̱nóꞌó, saꞌá nú tiñu ya̱ kachitu̱ꞌún nú tu̱ꞌun váꞌa jie̱ꞌe̱ꞌ Cristo, jee sikúnkuvi va̱ꞌa nú tiñu sáꞌá nú nu̱u̱nꞌ Ndiosíꞌ.

Filemón 1:1

Maáníꞌ, Pablo, ya̱ yɨ́ꞌɨ́ ni̱ꞌ veka̱a jie̱ꞌe̱ꞌ yɨ́tíñú ni̱ꞌ nu̱u̱nꞌ Jesús ya̱ nísotíñú re̱ꞌ ya̱ kúvi máá Cristo, ya̱ ñani Ndiosíꞌ sáva tatúníꞌ nu̱u̱nꞌ nɨꞌɨ, jee nuꞌuꞌ jín ñaniꞌ‑ó Timoteo tájí ránꞌ tutuꞌ yaꞌá nu̱u̱nꞌ noꞌó, Filemón, ya̱ ñúnúunꞌ ránꞌ xá, jín ya̱ táꞌán sátíñú nú jín ránuꞌuꞌ nu̱u̱nꞌ tiñu Cristo.

Hebreos 3:6

Soo Cristo, kúvi re̱ꞌ Se̱ꞌya Ndiosíꞌ, jee síkúnkuvi na̱a̱ꞌ re̱ꞌ ntáká tiñu ya̱ yósóꞌ re̱ꞌ nu̱u̱nꞌ rá ñɨvɨ veꞌi Ndiosíꞌ, ya̱ suvi kúvi maáórán, retú íñɨ́ ni̱ꞌin‑ó níkɨ́nꞌ kutú‑ó kúneí iniꞌ‑ó re̱ꞌ ne̱ kenta nu̱u̱nꞌ nɨ́ꞌɨ tékúꞌ‑ó, jín ya̱ kúsɨ́ɨꞌ víꞌí iniꞌ‑ó jie̱ꞌe̱ꞌ ya̱ íyó tu̱neí iniꞌ‑ó ya̱ kuneeꞌ‑ó jín Ndiosíꞌ.

Apoclipsis 2:1

’Jee tee nú tu̱ꞌun yaꞌá kɨ̱ꞌɨ̱nꞌ‑ɨ nu̱u̱nꞌ ya̱ kúñáꞌnú nu̱u̱nꞌ grupo ñɨvɨ ya̱ jínúꞌ iniꞌ ráa nuꞌuꞌ, ya̱ kútútú ráa ñuunꞌ Éfeso, sáva naku̱ꞌva nú maa nu̱u̱nꞌ ráa: “Nuꞌuꞌ kúvi ya̱ ínaꞌá ni̱ꞌ ni uxáꞌ rá tiu̱u̱nꞌ ichi naꞌá kuáꞌá ni̱ꞌ, jee jíkónúun ni̱ꞌ nteñu ni uxáꞌ rá kantilerúꞌ oro. Tu̱ꞌun yaꞌá káchíꞌ nuꞌuꞌ: