Efesios 6:8 - Mixteco del suroeste de Tlaxiaco Oaxaca

⁸ Chi ya̱ jíníꞌ rán ya̱ nu̱u̱nꞌ máá I̱toꞌoꞌ‑ó ni̱ꞌi̱nꞌ ta ɨɨn ɨɨn ñɨvɨ ta̱ꞌvi̱ꞌ jie̱ꞌe̱ꞌ néni ɨɨn tiñu váꞌa sáꞌá‑a, va̱ni musúꞌ, va̱ni ñɨvɨ xí tiñu.

Efesios 6:8 Iomraidhean Croise

Mateo 16:27

Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kiji tuku ni̱ꞌ iniꞌ ñɨ̱vɨ́ yaꞌá, jee viiꞌ víꞌí kuñáꞌnú ni̱ꞌ jín tiñu níso ni̱ꞌ kuéntáꞌ kua̱ꞌ kúñáꞌnú maá Tátáꞌ ni̱ꞌ Ndiosíꞌ, jee kiji ni̱ꞌ jín rá najiáꞌáꞌ ííꞌ ni̱ꞌ. Saájee nachunáán ni̱ꞌ nu̱u̱nꞌ ta ɨɨn rá ñɨvɨ sánikua̱ꞌ na̱ja íyó tiñu nsa̱ꞌá ráa.

Mateo 20:7

Jee nkachiꞌ ráa nu̱u̱nꞌ re̱ꞌ: “Saáchi ni ɨɨn ntu̱náꞌ kána ránuꞌuꞌ satíñú ránꞌ jín‑i”, nkachiꞌ ráa, saájee nkachiꞌ re̱ꞌ nu̱u̱nꞌ ráa: “Suni kuáꞌán rán nu̱u̱nꞌ káá tataꞌ uva ni̱ꞌ, [jee chunáán ni̱ꞌ nu̱u̱nꞌ ránoꞌó ne̱ ni ɨɨn jie̱ꞌe̱ꞌ ya̱ váꞌa].”

Mateo 5:12

Na̱ ka̱ꞌ kusɨ̱ɨ̱ꞌ iniꞌ rán jee sɨ̱ɨ̱ꞌ kuvi ka̱ꞌ iniꞌ ánímaꞌ rán, chi mánasɨ́ ñáꞌnú ví ta̱ꞌvi̱ꞌ nataji Ndiosíꞌ nu̱u̱nꞌ rán ya̱ íyó ne̱ antivɨ́ súkún. Chi sánikua̱ꞌ sáꞌá kini ráa jín ránoꞌó suni sukuán nsa̱ꞌá kini rá ñɨvɨ jín rá te̱e nna̱kani tu̱ꞌun nkene yuꞌú máá maá Ndiosíꞌ ne̱ yanaꞌán ne̱ ntiáꞌan nkiji ránoꞌó.

Mateo 6:1

’Kumí rán maárán ya̱ koto saꞌá rán tiñu na̱a̱ꞌ váꞌa ichinúúnꞌ rá ñɨvɨ sáva kune̱ꞌyá ráa maa, chi retú saꞌá rán maa suꞌva jee Tátáꞌ rán ya̱ nééꞌ antivɨ́ súkún nsáꞌ nataji re̱ꞌ ta̱ꞌvi̱ꞌ nu̱u̱nꞌ rán.

Mateo 6:4

Saꞌá nú suꞌva sáva koo yuꞌuꞌ ya̱ ku̱ꞌva nú karidáꞌ nu̱u̱nꞌ ñɨvɨ jíniñúꞌún maa, jee maá Tátáꞌ nú Ndiosíꞌ ya̱ jíníꞌ re̱ꞌ ya̱ íyó yuꞌuꞌ, jee maáréꞌ nataji re̱ꞌ ta̱ꞌvi̱ꞌ nu̱u̱nꞌ nú.

Lucas 14:14

Saájee na̱ ka̱ꞌ netuꞌ ka̱ꞌ kuvi nú, chi ntu̱náꞌ íyó nu̱u̱nꞌ ráa ya̱ nataji ráa nu̱u̱nꞌ nú. Soo nachunáán Ndiosíꞌ nu̱u̱nꞌ noꞌó ya̱ kútaꞌviꞌ nú ki̱vɨ̱ꞌ natekuꞌ i̱i̱ꞌ rá ñɨvɨ na̱a̱ꞌ ya̱ níꞌiꞌ ―nkachiꞌ Jesús.

Lucas 6:35

’Soo kunu̱u̱nꞌ rán rá ñɨvɨ ya̱ túfíꞌ táꞌán ráa jín ránoꞌó jee saꞌá rán ya̱ váꞌa jín ráa. Jee ku̱ꞌvanúún rán nu̱u̱nꞌ ñɨvɨ sú ntu jíníꞌ rán ya̱ naniꞌinꞌ tuku rán maa. Jee máá ñáꞌnú ví ta̱ꞌvi̱ꞌ ni̱ꞌi̱nꞌ rán, jee kuvi rán se̱ꞌya Ndiosíꞌ máá ñáꞌnú ka̱ꞌ nu̱u̱nꞌ nɨꞌɨ, chi ñúnkúún iniꞌ re̱ꞌ rá ñɨvɨ ya̱ ntu jiáꞌa ráa ya̱ kútaꞌviꞌ ráa nu̱u̱nꞌ re̱ꞌ jín rá ñɨvɨ niváꞌa.

1 Corintios 12:13

Chi suni nsi̱kuánuté Cristo yó jín métúꞌún ni Ta̱chi̱ꞌ Ííꞌ vá sáva kɨꞌɨ‑ɨ iniꞌ ánímaꞌ‑ó jee nsa̱ꞌá Ta̱chi̱ꞌ Ííꞌ vá ya̱ kɨꞌɨ ntáká‑ó nu̱u̱nꞌ Cristo kuéntáꞌ nki̱vɨ‑ó nu̱u̱nꞌ ɨɨn ni yɨkɨkúñu re̱ꞌ. Ya̱ súka̱ꞌ ñɨvɨ Israel kúvi‑ó, áxí ñɨvɨ ntu kúvi‑ó Israel, áxí súka̱ꞌ ñɨvɨ ya̱ kúvi musúꞌ ya̱ nkeꞌen ñɨvɨ maa, áxí va̱ni ñɨvɨ ya̱ íyó núne ya̱ sátíñú‑u tiñu maá‑a, chi ntáká‑ó chi yɨ́ꞌɨ́‑ó nu̱u̱nꞌ rá ñɨvɨ Ndiosíꞌ, chi ɨɨn ni Ta̱chi̱ꞌ Ííꞌ níꞌínꞌ nɨꞌɨ‑ó.

2 Corintios 5:10

Chi nta̱ká‑ó saá íyó kɨ̱ꞌɨ̱nꞌ‑ó kuiñɨ‑ó nu̱u̱nꞌ keꞌneꞌ Cristo rá tiñu nsa̱ꞌá‑ó, sáva ta ɨɨn ɨɨn‑ó ni̱ꞌi̱nꞌ‑ó sánikua̱ꞌ na̱ja nsa̱ꞌá‑ó, va̱ni tiñu váꞌa áxí va̱ni tiñu níváꞌa, sáá ni̱yo‑ó jín yɨkɨkúñu‑ó iniꞌ ñɨ̱vɨ́ yaꞌá.

Gálatas 3:28

Maáóránꞌ ya̱ yɨ́ꞌɨ́‑ó nu̱u̱nꞌ Cristo Jesús, ntu sɨ́ɨ́n íyó‑ó nu̱u̱nꞌ Ndiosíꞌ, sú kúvi rán ñɨvɨ Israel áxí ñɨvɨ ntu kúvi Israel, ni te̱e kúvi musúꞌ ya̱ nkeꞌen ñɨvɨ, ni te̱e xí tiñu ya̱ íñɨ́ núne, ni te̱e jín ni ñaꞌan, chi ɨɨn ni kúvi nɨꞌɨ‑ó nu̱u̱nꞌ Ndiosíꞌ, ya̱ yɨ́ꞌɨ́‑ó nu̱u̱nꞌ Cristo Jesús.

Colosenses 3:11

Jee saáva ntu̱náꞌ ítú iniꞌ retú ntu kúvi‑ó ñɨvɨ Israel, áxí kúvi‑ó ñɨvɨ Israel, retú níso yɨkɨkúñu‑ó seña ñɨvɨ Israel naní circuncisión, áxí ntu níso‑ó maa, retú kúvi‑ó rá to̱ꞌo̱ꞌ, áxí ñɨvɨ ñuunꞌ láꞌví, retú kúvi‑ó musúꞌ ya̱ kéꞌen ñɨvɨ maa, áxí ñɨvɨ ya̱ yɨ́tíñú nu̱u̱nꞌ tiñu maáa. Chi I̱toꞌoꞌ kua̱íyó kuitɨꞌ‑ó ví Cristo, jee yɨ́ꞌɨ́ re̱ꞌ iniꞌ kua̱íyó kuitɨꞌ‑ó.

Colosenses 3:24

Chi ya̱ jíníꞌ rán ya̱ ni̱ꞌi̱nꞌ rán nu̱u̱nꞌ máá I̱toꞌoꞌ‑ó ta̱ꞌvi̱ꞌ, ya̱ jiáꞌa re̱ꞌ nu̱u̱nꞌ rá ñɨvɨ yɨ́ꞌɨ́ nu̱u̱nꞌ re̱ꞌ, chi nu̱u̱nꞌ maá I̱toꞌoꞌ‑ó Cristo sátíñú rán.

Colosenses 3:25

Chi ñɨvɨ ya̱ sáꞌá tiñu niva̱ꞌa, suni sukuán ni̱ꞌi̱nꞌ‑i sánikua̱ꞌ tiñu niva̱ꞌa ya̱ nsa̱ꞌá‑a. Chi Ndiosíꞌ jee ntu tɨ́ɨn kuéntáꞌ re̱ꞌ na̱ ñɨvɨ kúvi ráa.

Hebreos 10:35

Jee saáva koto xínóo rán ya̱ ne̱ yuchí kúkáꞌnú iniꞌ rán Jesús, chi jie̱ꞌe̱ꞌ kúneí iniꞌ rán Jesús jee ni̱ꞌi̱nꞌ rán ta̱ꞌvi̱ꞌ máá ñáꞌnú nasɨ́kuitɨꞌ ka̱ꞌ.

Hebreos 11:26

Chi nñu̱ꞌun iniꞌ re̱ꞌ ya̱ yɨ́yáꞌvi víꞌí ka̱ꞌ ví ya̱ ku̱ꞌva rá ñɨvɨ tu̱nkánuun re̱ꞌ kuéntáꞌ kua̱ꞌ nito u̱ꞌvi̱ꞌ ráa Cristo, nsú káꞌ kukúká re̱ꞌ jín rá nantíñú yɨ́yáꞌvi íyó ñuunꞌ Egipto. Chi nneenu̱u̱nꞌ re̱ꞌ ya̱ ni̱ꞌi̱nꞌ re̱ꞌ ta̱ꞌvi̱ꞌ ya̱ ku̱ꞌva Ndiosíꞌ nu̱u̱nꞌ re̱ꞌ.