Efesios 4:12 - Mixteco del suroeste de Tlaxiaco Oaxaca

¹² Njia̱ꞌa re̱ꞌ rá tiñu vá nu̱u̱nꞌ ráa sáva sikújia ráa iniꞌ rá ñɨvɨ ya̱ nsa̱ꞌá sɨ́ɨ́n Ndiosíꞌ kúvi ñɨvɨ re̱ꞌ. Síkújia ráa iniꞌ maáó ya̱ kúvi‑ó rá ñɨvɨ re̱ꞌ sáva kɨtíñú‑ó saꞌá‑ó tiñu re̱ꞌ nu̱u̱nꞌ ɨɨn inka táꞌán‑ó, sáva sikuéꞌnu‑ó ɨɨn inka táꞌán‑ó, ya̱ ɨɨn ni ñɨvɨ kuvi‑ó nu̱u̱nꞌ Cristo, kuéntáꞌ ɨɨn yɨkɨkúñu.

Efesios 4:12 Iomraidhean Croise

Lucas 22:32

Soo nuꞌuꞌ jíkánꞌ táꞌvíꞌ ni̱ꞌ jie̱ꞌe̱ꞌ nú nu̱u̱nꞌ Ndiosíꞌ sáva níta ya̱ kúneí iniꞌ nú nuꞌuꞌ. Jee sáá nakani iniꞌ nú ya̱ nsa̱ꞌá nú jee nikó nú nu̱u̱nꞌ nuꞌuꞌ saájee nasáneí nú iniꞌ ánímaꞌ rá ñanitáꞌán nú kuiñɨ ni̱ꞌin ráa ―nkachiꞌ Jesús.

Hechos 1:17

Jee ɨɨn rá táꞌán ránꞌ nkuvi re̱ꞌ, jee nni̱ꞌi̱nꞌ re̱ꞌ tiñu yaꞌá saꞌá re̱ꞌ jín ránꞌ jie̱ꞌe̱ꞌ Tu̱ꞌun Ndiosíꞌ ―nkachiꞌ Pedro.

Hechos 1:25

sáva nakeꞌen re̱ꞌ tiñu yaꞌá jee kuvi re̱ꞌ apóstol ya̱ chuichí nú. Tiñu vá nxi̱nóo Judas, jee kua̱ꞌa̱nꞌ re̱ꞌ nu̱u̱nꞌ kúníꞌ re̱ꞌ nu̱u̱nꞌ níꞌinꞌ re̱ꞌ maa ―ni̱ka̱nꞌ táꞌvíꞌ ráa.

Hechos 11:23

Sáá nkenta re̱ꞌ yukuán, niniꞌ re̱ꞌ ya̱ va̱ꞌa nsa̱ꞌá Ndiosíꞌ nu̱u̱nꞌ ráa chi ma̱ni̱ꞌ re̱ꞌ néꞌyá re̱ꞌ ráa. Jee nnusɨ̱ɨ̱ꞌ iniꞌ Bernabé. Jee nna̱chuꞌun neí re̱ꞌ iniꞌ ráa kukáñá víꞌí iniꞌ ánímaꞌ ráa ya̱ kuiñɨ na̱a̱ꞌ ráa jín I̱toꞌoꞌ‑ó.

Hechos 20:24

Ntu sáꞌá ni̱ꞌ kuéntáꞌ maáníꞌ sú kaꞌniꞌ ráa nuꞌuꞌ. Kua̱chi kuíni ni̱ꞌ sijínu ni̱ꞌ ichi ni̱ꞌ, jee sikúnkuvi ni̱ꞌ tiñu ntaji I̱toꞌoꞌ‑ó, Jesús, nu̱u̱nꞌ ni̱ꞌ. Tiñu vá ví ya̱ istúvi ni̱ꞌ tu̱ꞌun váꞌa jie̱ꞌe̱ꞌ íyó mániꞌ iniꞌ Ndiosíꞌ, sú ntu̱náꞌ íyó ni̱ꞌin‑ó maa.

Hechos 20:28

’Kumí rán maárán jee kumí rán ñanitáꞌán ya̱ kúneí iniꞌ ráa Jesús. Chi ñani Ta̱chi̱ꞌ Ííꞌ ránoꞌó, sáva kuvi rán rá te̱e kúñáꞌnú nu̱u̱nꞌ ráa, sáva kunaka rán rá ñɨvɨ kúneí iniꞌ ráa Ndiosíꞌ. Ñatɨ ni̱ñɨ̱ꞌ maá Se̱ꞌya re̱ꞌ, sáá ni̱ꞌi̱ꞌ‑i nu̱u̱nꞌ kurúsiꞌ, sáva nakeꞌen re̱ꞌ rá ñɨvɨ vá.

Hechos 9:31

Saájee rá ñɨvɨ kúneí iniꞌ ráa Jesús, ya̱ nééꞌ nɨꞌɨ ichi sánitɨ́ɨn Judea, Galilea, jín Samaria, jee nneeꞌ ñunkúún ráa. Jee jíjia iniꞌ ráa ka̱ꞌ kúneí iniꞌ ráa Jesús. Jee jiáꞌnu ráa jín ya̱ ñúyúꞌví iniꞌ ráa I̱toꞌoꞌ‑ó. Jee náchuꞌun neí Ta̱chi̱ꞌ Ííꞌ Ndiosíꞌ iniꞌ ráa. Jee va̱ji kúkueꞌeꞌ ráa.

Romanos 12:5

Jee suni sukuán súnika̱ꞌ kue̱ꞌe̱ꞌ‑ó íyó, soo kuéntáꞌ ɨɨn yɨkɨkúñu kúvi‑ó ya̱ yɨ́ꞌɨ́‑ó nu̱u̱nꞌ Cristo, jee ta ɨɨn‑ó yɨ́ꞌɨ́‑ó nu̱u̱nꞌ ɨɨn inka‑ó.

Romanos 12:7

Áxí retú nni̱ꞌi̱nꞌ nú ta̱ꞌvi̱ꞌ ya̱ chíneí táꞌán nú inka ñɨvɨ, jee chineí nú maa. Áxí retú nni̱ꞌi̱nꞌ nú ta̱ꞌvi̱ꞌ ya̱ xínéꞌénꞌ nú Tu̱ꞌun Ndiosíꞌ, jee xinéꞌénꞌ nú maa.

Romanos 14:19

Jee saáva kuniꞌvɨꞌ iniꞌ‑ó saꞌá‑o tiñu ya̱ kuneeꞌ ñunkúún‑ó jín rá ñanitáꞌán‑ó, jín ya̱ chineí táꞌán ɨɨn inka‑ó jín táꞌán‑ó sáva kujia iniꞌ ɨɨn inka‑ó kuiñɨ ni̱ꞌin‑ó jín Tu̱ꞌun Ndiosíꞌ.

Romanos 15:14

Soo ránoꞌó ñanitáꞌán maáníꞌ, nuꞌuꞌ chi jínúꞌ iniꞌ ni̱ꞌ ya̱ íyó mániꞌ nasɨ́kuitɨꞌ iniꞌ rán néꞌyá rán táꞌán rán, jee jíníꞌ va̱ꞌa rán nɨꞌɨ tu̱ꞌun na̱a̱ꞌ Ndiosíꞌ ya̱ nníꞌinꞌ rán, jee kúvi náxiníꞌvɨ́ꞌ iniꞌ rán ɨɨn inka táꞌán rán saꞌá rán sáni káchíꞌ Tu̱ꞌun Ndiosíꞌ.

Romanos 15:2

Ta ɨɨn ɨɨn‑ó íyó nukú‑ó ya̱ saꞌá‑ó ya̱ kuva̱ꞌa iniꞌ ñanitáꞌán‑ó ya̱ kuvi ya̱ váꞌa nu̱u̱nꞌ‑u, sáva kujia iniꞌ‑i kuiñɨ ni̱ꞌin‑i nu̱u̱nꞌ Ndiosíꞌ.

Romanos 15:29

Jee jíníꞌ ni̱ꞌ ya̱ netuꞌ noo kuvi nta̱ká‑ó sáá kenta ni̱ꞌ yukuán kuneeꞌ ni̱ꞌ jín rán nakani ni̱ꞌ tu̱ꞌun váꞌa Cristo.

1 Corintios 12:27

Jee ránoꞌó ranika̱ꞌ chi kúvi rán yɨkɨkúñu Cristo, chi yɨ́ꞌɨ́ rán nu̱u̱nꞌ re̱ꞌ, jee ta ɨɨn ta ɨɨn‑ó kúvi‑ó pedasúꞌ yɨkɨkúñu re̱ꞌ.

1 Corintios 12:7

Saájee nu̱u̱nꞌ ta ɨɨn ɨɨn‑ó táji Ta̱chi̱ꞌ Ííꞌ ta̱ꞌvi̱ꞌ ya̱ túvi ya̱ sátíñú re̱ꞌ iniꞌ‑ó sáva sáꞌá‑ó tiñu Ndiosíꞌ ya̱ síkújia‑ó iniꞌ rá ñanitáꞌán‑ó jín Tu̱ꞌun Ndiosíꞌ ya̱ kúvi ya̱ váꞌa maáó.

1 Corintios 14:12

Jee saáva ránoꞌó jee jie̱ꞌe̱ꞌ ya̱ ñúnúunꞌ rán rá ta̱ꞌvi̱ꞌ ya̱ jiáꞌa Ta̱chi̱ꞌ Ííꞌ Ndiosíꞌ, jee kunu̱u̱nꞌ rán ya̱ saꞌ víꞌí káꞌ kua̱tíñú rán rá ta̱ꞌvi̱ꞌ vá sáva sikújia rán iniꞌ rá ñanitáꞌán rán ya̱ yɨ́ꞌɨ́ naꞌá Ndiosíꞌ sáva kukutú ka̱ꞌ iniꞌ ráa nu̱u̱nꞌ Tu̱ꞌun Ndiosíꞌ.

1 Corintios 14:14

Chi retú káꞌánꞌ ni̱ꞌ jín Ndiosíꞌ jín inka nu̱u̱nꞌ tu̱ꞌun ya̱ ntu jiáku̱ꞌun iniꞌ ni̱ꞌ, jee káꞌánꞌ ta̱chi̱ꞌ káꞌánꞌ ni̱ꞌ jín Ndiosíꞌ, soo antúníꞌ ni̱ꞌ chi ni ntu̱ví jíníꞌ‑i tu̱ꞌun káꞌánꞌ ni̱ꞌ, jee ya̱ sukuán jee ntu̱ví íyótíñú‑u nu̱u̱nꞌ nuꞌuꞌ.

1 Corintios 14:26

Saájee ránoꞌó ñaniꞌ jín ku̱ꞌva, ¿ná kúvi ya̱ saꞌá‑ó? Sáá nútútú rán, jee ta ɨɨn rán kuvi saꞌá ɨɨn tiñu, ɨɨn kata yaaꞌ ííꞌ ya̱ káꞌánꞌ Tu̱ꞌun Ndiosíꞌ, áxí ɨɨn xinéꞌénꞌ‑e Tu̱ꞌun Ndiosíꞌ, áxí ɨɨn nakani‑i tu̱ꞌun ni̱stúvi Ndiosíꞌ nu̱u̱nꞌ‑u, áxí ɨɨn kaꞌanꞌ inka rá tu̱ꞌun ya̱ ntu jiáku̱ꞌun iniꞌ‑i, áxí ɨɨn nakachiꞌ‑i ná kuíni káchíꞌ rá tu̱ꞌun ya̱ káꞌánꞌ ñanitáꞌán vá. Soo íyó saꞌá rán ntáká rá tiñu yaꞌá sáva sikújia rán iniꞌ rá ñɨvɨ ya̱ yɨ́ꞌɨ́ nu̱u̱nꞌ Ndiosíꞌ sáá kueꞌnu ráa jín tu̱ꞌun re̱ꞌ.

2 Corintios 12:19

¿Á sa̱naanꞌ jiáni iniꞌ rán ya̱ náma ráníꞌ maáráníꞌ nu̱u̱nꞌ ránú rúja? Soo ntu̱ví. Chisaꞌ nu̱u̱nꞌ súví Cristo káꞌánꞌ ráníꞌ jee ne̱ maá Ndiosíꞌ jíníꞌ, ya̱ káchíꞌ ránꞌ nta̱ká tu̱ꞌun nu̱u̱nꞌ ránú, sáva sikújia ráníꞌ iniꞌ ránoꞌó nu̱u̱nꞌ Cristo, ya̱ ñúnúunꞌ ráníꞌ ránoꞌó.

2 Corintios 13:11

Nu̱u̱nꞌ nɨ́ꞌɨ, tátúníꞌ ni̱ꞌ nu̱u̱nꞌ ránoꞌó ñanitáꞌán ya̱, na̱ ka̱ꞌ kusɨ̱ɨ̱ꞌ iniꞌ ánímaꞌ rán, na̱ ka̱ꞌ kujia noo iniꞌ rán nu̱u̱nꞌ Cristo ne̱ kuna̱a̱ꞌ rán, jee na̱ ka̱ꞌ tɨɨn kuéntáꞌ rán rá tu̱ꞌun ya̱ xínániꞌvɨꞌ ni̱ꞌ iniꞌ rán, jee na̱ ka̱ꞌ nuún kuꞌun iniꞌ rán, jee na̱ ka̱ꞌ ñunkúún kuneeꞌ rán jín ɨɨn inka táꞌán rán. Jee maá Ndiosíꞌ, ya̱ sáꞌá ya̱ kunu̱u̱nꞌ‑ó ɨɨn inka‑ó jín ya̱ kuneeꞌ ñunkúún‑ó jín ɨɨn inka‑ó, jee koo re̱ꞌ jín rán.

2 Corintios 13:9

Chi kúsɨ́ɨꞌ iniꞌ ánímaꞌ ránꞌ sáá táyáꞌ iniꞌ ráníꞌ jee ránoꞌó íyó fuersáꞌ ránú ya̱ kúneí iniꞌ rán Cristo. Jee suni sukuán jíkánꞌ táꞌvíꞌ ránꞌ yaꞌá nu̱u̱nꞌ Ndiosíꞌ sáva kenta kujia ránú kuneí noo iniꞌ rán Cristo.

2 Corintios 3:8

soo saꞌ víꞌí káꞌ viiꞌ kúñáꞌnú nasɨ́kuitɨꞌ tratúꞌ jiáá ya̱ sátíñú Ta̱chi̱ꞌ Ííꞌ re̱ꞌ iniꞌ‑ó.

2 Corintios 4:1

Jee saáva ntu̱ví núun iniꞌ ráníꞌ, chi jie̱ꞌe̱ꞌ nku̱náꞌví iniꞌ Ndiosíꞌ nne̱ꞌyá re̱ꞌ ránuꞌuꞌ, saáva nni̱ꞌi̱nꞌ ránꞌ tiñu yaꞌá ya̱ nte̱tíñú Ndiosíꞌ ránuꞌuꞌ stékútu̱ꞌún ránꞌ jie̱ꞌe̱ꞌ tratúꞌ jiáá.

2 Corintios 5:18

Jee maá Ndiosíꞌ ví ya̱ sáꞌá re̱ꞌ nta̱ká rá tiñu vá, chi jie̱ꞌe̱ꞌ ya̱ nsa̱ꞌá Cristo, jee nsa̱ꞌá re̱ꞌ ya̱ nnuma̱ni̱ꞌ‑ó jín re̱ꞌ. Jee ntaji re̱ꞌ tiñu nu̱u̱nꞌ ránuꞌuꞌ sáva kachitu̱ꞌún ránꞌ tu̱ꞌun re̱ꞌ jie̱ꞌe̱ꞌ ya̱ kúvi ni̱ꞌi̱nꞌ ñɨvɨ ya̱ numa̱ni̱ꞌ re̱ꞌ jín ráa.

2 Corintios 6:3

Jee ni ntu̱náꞌ sáꞌá ráníꞌ sáva ntu xinínkava ránꞌ ñɨvɨ sáva ntu kasɨꞌ ránꞌ tɨɨn ráa Tu̱ꞌun Ndiosíꞌ, sáva nku̱ví chikua̱chi ráa si̱kɨ̱ꞌ tiñu sáꞌá ránꞌ nu̱u̱nꞌ Ndiosíꞌ.

2 Corintios 7:1

Jee ránoꞌó ñanitáꞌán ya̱ ñúnúunꞌ ni̱ꞌ, nni̱ꞌi̱nꞌ‑ó tu̱ꞌun yaꞌá ya̱ nchi̱sóyuꞌú Ndiosíꞌ saꞌá re̱ꞌ jín‑ó. Jee saáva íyó koo noo ninuꞌun‑ó ya̱ nkɨ́ꞌɨ‑ó nu̱u̱nꞌ nta̱ká ya̱ sátéꞌén yɨkɨkúñu‑ó jín ánímaꞌ‑ó nu̱u̱nꞌ Ndiosíꞌ. Jee íyó kujia iniꞌ‑ó sasɨ́ɨ́n‑ó maáó ya̱ nkɨ́ꞌɨ‑ó nu̱u̱nꞌ ya̱ níváꞌa, chi ñúyúꞌví iniꞌ‑ó Ndiosíꞌ.

Efesios 1:23

Jee maáórán kúvi‑ó yɨkɨkúñu re̱ꞌ, chi nɨꞌɨ ya̱ íyó Cristo kukánáa ánímaꞌ‑ó ne̱ natɨɨn iniꞌ maáréꞌ. Jee maáréꞌ íyó chitú nɨ́ɨ́nkáꞌnú nu̱u̱nꞌ nɨꞌɨ ya̱ íyó, sáva koo nɨꞌɨ sáni kuíni re̱ꞌ.

Efesios 4:16

Jee kúvi ntáká‑ó kuéntáꞌ yɨkɨkúñu re̱ꞌ, ya̱ náketáꞌán kutú nɨꞌɨ jín rá nu̱u̱nꞌ ñútáꞌán jín rá tu̱chi fuersáꞌ, jee nunuún iniꞌ ntáká‑ó. Jee sáá nuún chíneí táꞌán va̱ꞌa‑ó sánikua̱ꞌ tiñu kúvi sáꞌá ta ɨɨn‑ó, jee sukuán síkújia iniꞌ táꞌán‑ó ka̱ꞌ sáva sikuéꞌnu‑ó táꞌán‑ó jín tu̱ꞌun ñúnúunꞌ táꞌán.

Efesios 4:29

Jee koto jiáꞌa rán ya̱ kene ni ɨɨn tu̱ꞌun niváꞌa kini yuꞌú nú, chisaꞌ kaꞌanꞌ rán tu̱ꞌun váꞌa ya̱ íyótiñu, ya̱ sikújia va̱ꞌa‑a ñɨvɨ sáni jíniñúꞌún ráa, sáva nachineí‑i ráa ya̱ tésóꞌo maa.

Efesios 4:4

Chi ɨɨn ni kuvi‑ó nu̱u̱nꞌ Ndiosíꞌ, kuéntáꞌ ɨɨn yɨkɨkúñu, jee ɨɨn ni Ta̱chi̱ꞌ Ííꞌ re̱ꞌ íyó jín‑ó, sánikua̱ꞌ suni nkana Ndiosíꞌ yó ya̱ ɨɨn nuún ni íyó tu̱neí iniꞌ‑ó ya̱ ni̱ꞌi̱nꞌ‑ó kuneeꞌ‑ó jín Cristo, chi nkana re̱ꞌ yó sáva ni̱ꞌi̱nꞌ‑ó maa.

Colosenses 1:24

Vitan jee nuꞌuꞌ, ne̱ ánímaꞌ ni̱ꞌ kúsɨ́ɨꞌ víꞌí iniꞌ ni̱ꞌ ya̱ nóꞌo ni̱ꞌ jie̱ꞌe̱ꞌ tiñu sáꞌá ni̱ꞌ jie̱ꞌe̱ꞌ ya̱ váꞌa ránoꞌó. Sáni nnoꞌo Cristo jie̱ꞌe̱ꞌ rá ñɨvɨ ya̱ kúneí iniꞌ ráa re̱ꞌ, suni sukuán ne̱ yɨkɨkúñu máá maáníꞌ nóꞌo ni̱ꞌ ni síkúnkuvi ni̱ꞌ tiñu Cristo jie̱ꞌe̱ꞌ ya̱ váꞌa maáráa, ya̱ kúvi ráa kuéntáꞌ yɨkɨkúñu re̱ꞌ, ya̱ kúvi ráa ñɨvɨ re̱ꞌ ya̱ nstútú re̱ꞌ.

Colosenses 1:28

Jee jie̱ꞌe̱ꞌ Cristo stékútu̱ꞌún ránꞌ, jee stúꞌva ránꞌ, jee xínéꞌénꞌ ránꞌ nu̱u̱nꞌ nta̱ká ñɨvɨ nɨꞌɨ tu̱ꞌun níchí nta̱jí Ndiosíꞌ, sáva saꞌá ránꞌ ya̱ kujia iniꞌ nta̱ká ráa nu̱u̱nꞌ Ndiosíꞌ, ya̱ yɨ́ꞌɨ́ ráa nu̱u̱nꞌ Cristo.

Colosenses 4:17

Jee kachiꞌ rán xá nu̱u̱nꞌ Arquipo: “Ya̱ kuniꞌvɨꞌ iniꞌ nú nu̱u̱nꞌ tiñu nni̱ꞌi̱nꞌ nú saꞌá nú nu̱u̱nꞌ I̱toꞌoꞌ‑ó, sáva sikúnkuvi nú maa.”

1 Timoteo 1:12

Jiáꞌa ni̱ꞌ, ya̱ kútaꞌviꞌ ni̱ꞌ nu̱u̱nꞌ I̱toꞌoꞌ‑ó Cristo Jesús, ya̱ chíneí chítuvi re̱ꞌ nuꞌuꞌ. Jee jiáꞌa ni̱ꞌ, ya̱ kútaꞌviꞌ ni̱ꞌ nu̱u̱nꞌ re̱ꞌ, chi nku̱neí iniꞌ re̱ꞌ ya̱ síkúnkuvi ni̱ꞌ nta̱ká tiñu, ya̱ tátúníꞌ re̱ꞌ nu̱u̱nꞌ nuꞌuꞌ, jee ñani re̱ꞌ nuꞌuꞌ saꞌá ni̱ꞌ tiñu yaꞌá.

2 Timoteo 4:11

Jee kua̱chi métúꞌún ni Lucas íyó jín ni̱ꞌ. Jee nanukú nú Marcos, jee kiji nú jín re̱ꞌ yaꞌá, chi íyótiñu re̱ꞌ chineí re̱ꞌ nuꞌuꞌ saꞌá ni̱ꞌ tiñu yaꞌá nu̱u̱nꞌ Ndiosíꞌ.

2 Timoteo 4:5

Soo noꞌó, kuꞌun kájí iniꞌ nú nu̱u̱nꞌ nta̱ká tiñu, keꞌneꞌ iniꞌ nú tu̱nóꞌó, saꞌá nú tiñu ya̱ kachitu̱ꞌún nú tu̱ꞌun váꞌa jie̱ꞌe̱ꞌ Cristo, jee sikúnkuvi va̱ꞌa nú tiñu sáꞌá nú nu̱u̱nꞌ Ndiosíꞌ.

Hebreos 13:17

Jee kaníjiá rán rá te̱e yósóꞌ ichinúúnꞌ rán jee chiꞌi rán maárán xi̱ntíín ráa, chi maáráa ví ya̱ néen kuéntáꞌ ráa ránoꞌó sáva kúvi‑i ya̱ váꞌa nu̱u̱nꞌ rán. Chi naku̱ꞌva ráa kuéntáꞌ jie̱ꞌe̱ꞌ‑e nu̱u̱nꞌ Ndiosíꞌ. Kaníjiá rán ráa sáva kusɨ̱ɨ̱ꞌ iniꞌ ráa sikúnkuvi ráa tiñu sáꞌá ráa, jee sáva nkéꞌen ráa kue̱ka̱ꞌ saꞌá ráa maa chi retú sukuán jee nsáꞌ váꞌa kúvi nu̱u̱nꞌ rán.

Hebreos 6:1

Jee saáva siáꞌa‑ó ya̱ tukuni naku tuku‑ó ka̱ꞌ jie̱ꞌe̱ꞌ tu̱ꞌun Cristo ya̱ nku̱tu̱ꞌva‑ó ne̱ xíꞌnañúꞌún. Chisaꞌ nakeꞌen‑ó kɨ̱ꞌɨ̱nꞌ‑ó ichinúúnꞌ‑ó, sáva kenta‑ó kuvi‑ó ñɨvɨ jíjia iniꞌ jín tu̱ꞌun re̱ꞌ. Sáva ntu tukuni nánikó yátá‑ó kaꞌanꞌ‑ó jie̱ꞌe̱ꞌ rá tiñu ñáꞌnú ya̱ ya jíníꞌ‑ó ne̱ xíꞌnañúꞌún, sú kuéntáꞌ jie̱ꞌe̱ꞌ ya̱: nakani iniꞌ‑ó xinóo‑ó rá kua̱chi sáꞌá‑ó ya̱ xínáánꞌ‑a yó, jín suni jie̱ꞌe̱ꞌ ya̱ kuneí iniꞌ‑ó Ndiosíꞌ,