Apoclipsis 7:9 - Mixteco del suroeste de Tlaxiaco Oaxaca

⁹ Jee sáá nkuvi yaꞌá, jee nna̱kune̱ꞌyá ni̱ꞌ, jee niniꞌ ni̱ꞌ kue̱ꞌe̱ꞌ víꞌí rá ñɨvɨ, ya̱ ni ɨɨn ñɨvɨ nsúkua kuneí‑i kaꞌvi‑i ráa. Va̱ji ráa nu̱u̱nꞌ ntáká nu̱u̱nꞌ rá ñɨvɨ, jín nu̱u̱nꞌ ntáká tataꞌ, jín nu̱u̱nꞌ ntáká ñuunꞌ, jín nu̱u̱nꞌ ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa. Jee íñɨ́ ráa yuꞌú teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ, jín nu̱u̱nꞌ maáréꞌ ya̱ kúvi re̱ꞌ Lanchi Lúlí vá. Jee ñúꞌún ráa saꞌma kuíjín, jee ínaꞌá ráa naꞌá yu̱ku̱ñu̱u̱nꞌ.

Apoclipsis 7:9 Iomraidhean Croise

Génesis 13:16

Jee saꞌá ni̱ꞌ ya̱ nukueꞌeꞌ víꞌí rá se̱ꞌya ichiyúkúnꞌ nú kuéntáꞌ ti̱ka̱cha̱a̱ꞌ íyó nu̱u̱nꞌ ñu̱ꞌún, ya̱ retú kúneí kaꞌvi ɨɨn ñɨvɨ ti̱ka̱cha̱a̱ꞌ íyó nu̱u̱nꞌ ñu̱ꞌún, jee sunisaá kúvi kaꞌvi‑i rá se̱ꞌya ichiyúkúnꞌ nú.

Génesis 49:10

Jee nkuíyo bastón nu̱u̱nꞌ Judá, jee kino̱o bastón te̱e néetiñu jín rá ichiyúkúnꞌ kiji nu̱u̱nꞌ re̱ꞌ ya̱ tatúníꞌ ráa ne̱kua̱ꞌ kiji te̱e xí karútíꞌ vá, jee rá ñɨvɨ ntáká rá ñuunꞌ kaníjiá ráa re̱ꞌ.

Lucas 12:1

Jee ni ya̱ kúvi sukuán, jee nku̱tútú ntántúníꞌ mil rá ñɨvɨ kue̱ꞌe̱ꞌ, jee ne̱ nákuniꞌi táꞌán ráa ya̱ta̱ꞌ ɨɨn inka rá táꞌán ráa. Jee nka̱jiéꞌé Jesús káchíꞌ re̱ꞌ xíꞌna ka̱ꞌ nu̱u̱nꞌ rá te̱e kútáꞌán jín re̱ꞌ súkuáꞌa re̱ꞌ, jee nkachiꞌ re̱ꞌ nu̱u̱nꞌ ráa: ―Kumí rán maárán koto tɨ́ɨn rán rá tu̱ꞌun káꞌánꞌ rá te̱e fariseo, chi te̱e sansuꞌva kúvi ráa jee kuéntáꞌ kua̱ꞌ levadura, chi jiéténuun tu̱ꞌun ráa nu̱u̱nꞌ rá ñɨvɨ jee kenta nuún kuvi ráa ñɨvɨ sansuꞌva, kuéntáꞌ kua̱ꞌ sáꞌá levadura sáá xínáa‑a chi̱ji ñujien.

Lucas 21:36

Saáva nito koo rán, ka̱ka̱nꞌ táꞌvíꞌ rán nu̱u̱nꞌ Ndiosíꞌ ntáká tiempúꞌ, sáva kuneí rán ka̱ku rán nu̱u̱nꞌ nta̱ká rá tu̱nóꞌó yaꞌá kiji, jee sáva kuneí rán kenta rán kuiñɨ rán ichinúúnꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.

Juan 12:13

jee ña̱ꞌnu̱ꞌ ráa rá naꞌá yutun yu̱ku̱ñu̱u̱nꞌ jee nkene ráa kua̱taꞌanꞌ ráa Jesús, jee nka̱jiéꞌé ráa kánajíín ráa, jee káchíꞌ ráa: ―¡Sikáku Ndiosíꞌ yó! ¡Na̱ ka̱ꞌ netuꞌ ka̱ꞌ kúvi maáréꞌ ya̱ va̱ji jín tiñu ñáꞌnú nu̱u̱nꞌ súví I̱toꞌoꞌ‑ó Ndiosíꞌ! ¡Maáréꞌ kúvi re̱ꞌ te̱e ya̱ nísotíñú re̱ꞌ tátúníꞌ re̱ꞌ nu̱u̱nꞌ rá ñɨvɨ ñuunꞌ Israel! ―nkachiꞌ ráa.

Romanos 11:25

Ránoꞌó ñanitáꞌán, kuíni ni̱ꞌ ya̱ kukáꞌnú iniꞌ rán tu̱ꞌun yaꞌá ya̱ ni̱yo yuꞌuꞌ‑u soo nstúvi Ndiosíꞌ maa nu̱u̱nꞌ‑ó. Kuíni ni̱ꞌ ya̱ kuniꞌ rán tu̱ꞌun yaꞌá, sáva nkútéyɨ́ɨ́ rán kani iniꞌ rán ya̱ níchí xi̱ni̱ꞌ rán. Chi nkuna̱a̱ꞌ iniꞌ Ndiosíꞌ ya̱ sava rá ñɨvɨ ya̱ ntu kúvi ñɨvɨ Israel kuneí iniꞌ ráa Cristo. Jee tu̱ꞌun yuꞌuꞌ vá kúvi ya̱ nkuni̱ꞌin ánímaꞌ sava rá ñɨvɨ ñuunꞌ Israel, ne̱kua̱ꞌ nɨꞌɨ rá ñɨvɨ ntu kúvi ñɨvɨ Israel ki̱vɨ ráa xi̱ntíín Ndiosíꞌ saá váji kuneí iniꞌ ráa Cristo.

Efesios 6:13

Saáva satúꞌva rán maárán jín nɨꞌɨ ya̱ táji Ndiosíꞌ nu̱u̱nꞌ rán sáva nama rán maárán, kuéntáꞌ íyó soldado ya̱ sátúꞌva re̱ꞌ jín rá nantíñú re̱ꞌ, sáva kúvi kuneí rán kuiñɨ ni̱ꞌin rán ki̱vɨ̱ꞌ kákini kenta, jee sáá nkuvi nsa̱ꞌá rán nɨꞌɨ, jee kuiñɨ ni̱ꞌin rán.

Hebreos 11:12

Jee sukuán jee súnika̱ꞌ ya̱ nku̱ñáꞌnú víꞌí Abraham ya̱ íyó kuéntáꞌ ya̱ ni̱ꞌi̱ꞌ yɨkɨkúñu re̱ꞌ, jee nu̱u̱nꞌ métúꞌún re̱ꞌ nkene ña̱ko̱o kue̱ꞌe̱ꞌ víꞌí tataꞌ ichiyúkúnꞌ re̱ꞌ, kuéntáꞌ kua̱ꞌ kue̱ꞌe̱ꞌ víꞌí rá tiu̱u̱nꞌ íyó súkún, jín kuéntáꞌ kua̱ꞌ kue̱ꞌe̱ꞌ víꞌí ñuítɨ́ káá yuꞌú nteñúꞌún ya̱ ni ntu kúvi kaꞌvi maa.

Hebreos 12:22

Chisaꞌ nkikuyatin rán máá maá yuku Sión nu̱u̱nꞌ íyó ñuunꞌ nu̱u̱nꞌ nééꞌ Ndiosíꞌ tékúꞌ, ya̱ kúvi Jerusalén íyó antivɨ́, nu̱u̱nꞌ íyó ntántúníꞌ víꞌí rá najiáꞌáꞌ ííꞌ re̱ꞌ ya̱ íyó tútú ráa kúsɨ́ɨꞌ iniꞌ ráa chíñúꞌún ráa re̱ꞌ.

Apoclipsis 11:15

Saájee najiáꞌáꞌ ííꞌ uxáꞌ nti̱vɨ̱ꞌ‑ɨ trompeta‑a, jee nkaꞌanꞌ ni̱ꞌin rá nusuyuꞌú ne̱ antivɨ́ súkún, jee káchíꞌ ráa: ―Ntáká nación íyó ñɨ̱vɨ́ ya̱ tátúníꞌ rá ñɨvɨ ya nna̱kɨ̱ꞌɨ ráa naꞌá máá I̱toꞌoꞌ‑ó Ndiosíꞌ jín Cristo re̱ꞌ, jee maáréꞌ ví ya̱ tátúníꞌ re̱ꞌ nu̱u̱nꞌ ráa nɨ́ɨ́nkání ―káchíꞌ ráa.

Apoclipsis 22:3

Jee ntu̱náꞌ koo ka̱ꞌ ya̱ kɨꞌɨ chi̱ji tu̱ꞌun chisónínu Ndiosíꞌ. Jee nu̱u̱nꞌ ñuunꞌ vá koo teyuꞌ nu̱u̱nꞌ nééꞌ Ndiosíꞌ tátúníꞌ re̱ꞌ jín maáréꞌ ya̱ kúvi re̱ꞌ Lanchi Lúlí Ndiosíꞌ. Jee rá musúꞌ re̱ꞌ kɨtíñú ráa nu̱u̱nꞌ re̱ꞌ.

Apoclipsis 3:18

Saáva nákutíñú ni̱ꞌ nu̱u̱nꞌ rán ya̱ kunenu̱u̱nꞌ rán ya̱ yɨ́yáꞌvi ka̱ꞌ ya̱ va̱ji nu̱u̱nꞌ ni̱ꞌ kuéntáꞌ keꞌen rán ka̱a oro ya̱ ya nna̱ka̱yu̱ꞌ nu̱u̱nꞌ ñúꞌúnꞌ sáva saꞌá ninuꞌun maa, sáva kukúká nijia rán nu̱u̱nꞌ nuꞌuꞌ. Jee nunasɨ́ rán koo ninuꞌun rán nu̱u̱nꞌ ni̱ꞌ kuéntáꞌ keꞌen rán nu̱u̱nꞌ ni̱ꞌ saꞌma kuíjín sáva ntu koo tu̱nkánuun rán jie̱ꞌe̱ꞌ íyó ñɨɨn rán nu̱u̱nꞌ nuꞌuꞌ. Jee tɨɨn rán tu̱ꞌun ni̱ꞌ kuéntáꞌ keꞌen rán nu̱u̱nꞌ ni̱ꞌ ta̱ta̱nꞌ chuꞌun rán nchinúún rán sáva nu̱nijínꞌ nu̱u̱nꞌ rán.

Apoclipsis 4:4

Jee nu̱u̱nꞌ teyuꞌ re̱ꞌ tátúníꞌ re̱ꞌ, yukuán ni̱kótíyu o̱ko̱ꞌ ku̱mi̱ꞌ (24) ka̱ꞌ teyuꞌ nu̱u̱nꞌ tátúníꞌ. Jee yukuán nééꞌ o̱ko̱ꞌ ku̱mi̱ꞌ (24) rá maá te̱e kúñáꞌnú. Jee ñúꞌún ráa máá saꞌma kuíjín, jee ñúxíniꞌ ráa corona oro.

Apoclipsis 5:11

Jee nne̱ꞌyá ni̱ꞌ jee nteso̱ꞌo ni̱ꞌ nusuyuꞌú kue̱ꞌe̱ꞌ víꞌí rá najiáꞌáꞌ ííꞌ Ndiosíꞌ, ni̱kótíyu ráa xiín teyuꞌ nu̱u̱nꞌ tátúníꞌ vá, jín rá tékúꞌ vá, jín rá te̱e kúñáꞌnú vá. Jee ntántúníꞌ kue̱ꞌe̱ꞌ nasɨ́kuitɨꞌ rá millón rá najiáꞌáꞌ ííꞌ íyó yukuán.

Apoclipsis 5:9

Jee jíta ráa ɨɨn yaaꞌ jiáá ya̱ káchíꞌ suꞌva: Noꞌó ví ya̱ íyó ni̱ꞌi̱nꞌ nú tɨɨn nú tutuꞌ i̱ña̱ꞌ jee kuvi kune nú rá seyúꞌ násɨ́ꞌ maa. Chi nso̱ko̱ꞌ nú maánú ñaꞌniꞌ rá ñɨvɨ noꞌó, jee jín ni̱ñɨ̱ꞌ nú nna̱chuya̱ꞌvi nú nkeꞌen nú rá ñɨvɨ sáva nuvi ráa ñɨvɨ Ndiosíꞌ. Rá ñɨvɨ vá va̱ji nu̱u̱nꞌ ntáká tataꞌ, ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, ntáká ñuunꞌ, ntáká nu̱u̱nꞌ rá ñɨvɨ.

Apoclipsis 6:11

Saájee njia̱ꞌa re̱ꞌ saꞌma kuíjín kuꞌun ráa, jee nkachiꞌ re̱ꞌ nu̱u̱nꞌ ráa ya̱ najia̱ví ráa yakuꞌ ni ka̱ꞌ tiempúꞌ ne̱kua̱ꞌ chitú numero kaꞌniꞌ rá ñɨvɨ rá ñanitáꞌán ráa ya̱ kúvi táꞌán sáꞌá tiñu nu̱u̱nꞌ Cristo jín ráa jee kuviꞌ rává kuéntáꞌ maáráa.

Apoclipsis 7:8

jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ Zabulón, jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ José, jín u̱xu̱ꞌ u̱vi̱ꞌ mil rá ñɨvɨ ya̱ kúvi tataꞌ nkene ráa nu̱u̱nꞌ Benjamín ví ya̱ ña̱kuneeꞌ seyúꞌ te̱e̱nꞌ ráa.