Mateo 7:13 - La'qaatqa ñi qota'olec Qota'olec & Qota'olec Novita Na Qomyipi

¹³ Noxoñiỹougui ñi lasom cocho'qui'. Ma' 'xoic lecagui ñi lasom chaqai so nayic tai'a ca nelauqa'. 'Xoic leca'gue chaqai sqaica ca lqalaic, ca' ỹaatqajam 'xoic ná'maq queeta'gue so'maxare.

Mateo 7:13 Iomraidhean Croise

Génesis 6:12

ma' ná'ogue na qomyipi ỹo'maac. Ca co'na' ñi qota'olec iuana quiyim 'xoic na se no'uen quena 'laua.

Génesis 6:5

Ca ñi qara'gaxala' qota'olec co'na' ỹa'ajantac quiyim paguec se no'uen da loic na qomyipi quena 'laua, ma' na'maxare ỹaatqajam queetalec quiyim ỹa'deentaque ỹo'uet ná'maq se no'uen.

Proverbios 9:6

'Xañiñi dá'maq quiyim se na'xaỹaxañii, qaiyi rca'lliiuec; 'ñiitari' ca qom 'deenaxanqachaqaic.

Isaías 1:9

Quetqai ñi qara'gaxala' qaica lqalanec sqaico' caua no'ueenaxaterañi coqomi', ca' nagui queta' shinqatari' yaua Sodoma chaqai yi Gomorra na' qanopoxoỹaxachiñi.

Isaías 35:8

Chaqai yí hua'ñi ma'le ca ñicta, ca' qoỹanegue nayic 'xoic lichic. Ná'maq saqa' nco'chiñi da nachaalataxac, ca se ishit quegue ma'le; chaqai ná'maq qaica ca ỹa'den, se ishit quegue ma'le ca'maxare.

Mateo 23:13

¡Ỹaatqajam 'xoraiqolqa qamiri napaxaguinataxana' quena naqataxaquipi chaqai qamiri fariseoipi, ma' 'ñiitapega qamiri 'maxaraqa! Ma' pohigui ñi lasom da lo'ueenataxanaxac ñi qota'a queda piguim, qaiyi se inoxono na liỹaripi. Chaqai qamiri qai'neeta sqai noxoñiuo, chaqai sqai 'xañiỹac ná'maq ỹahotaque inoxono.

Mateo 25:41

Ca ma'le ca nashi 'naaco' quecá'maq pa'aata'gue da nemaq: “Noỹoochiuec caỹim, qamiri mashic qaỹa'ue da nouaxanaxashichii. Quiipegue' yi norec sqaica lqodoc, shi'gue qaỹa'maxatetañi qaỹauaaque loma' so na'ỹaapec chaqai na lelaatqaipi.

Mateo 25:46

Ime, ca' nauajo querepegue' ca nouaxanaxac sqaica lqodoc, ca ná'maq no'uen da ỹo'ueetetac, ca' quepegue' ca nca'laxa sqaica lqodoc.

Mateo 3:2

Ca' da la'qaatec 'neetasa': —Netogochiguilo nqai'ñii' naua qavilyii, ma' mashic tot qoỹoqaque da lo'ueenataxanaxac ñi qota'a neeta'gue da piguim quiyim ỹoiquentac ná'ogue najo.

Mateo 3:8

Na'maxachita, re'qoota nqai'ñii da no'ueenataxaguii quiyim mashic 'xañiñi naua ranataxahi se no'viiñi.

Mateo 7:14

Qam ñi lasom chaqai so nayic taira'a yi nca'laxa, sqa loguilo, ca' mesqai 'xoic cá'maq ỹanata.

Lucas 14:33

'Eda da 'neeta quiyim 'ue cá caqamiri quiyim se ỹalat ná'ogue na louenqaipi, se ishit quiyim ỹapaxaguinatec.

Lucas 9:33

Ca' queco'na' saua ỹale' sham ỹore'ogalo nqo'neesauec queso Jesús, ca retaqa so Pedro, 'naaco': —Qami' napaxaguinataxanaq, ¡chalego la'maxa quiyim quenajo seuqate'e! So'ueetaxai' caua tres ni'ỹaxaqui', 'óna caqami', chaqai ca liỹa queda Moisés, chaqai ca liỹa queda Elías. Qam so Pedro se ỹa'den ca 'neeta da la'qaatec.

Juan 10:9

Ỹim ná'maq ỹim lasom; cá'maq inoxontougui aỹim, ca' ca'laaxaic ma'le. Ca 'nejem ma'le aca qagreta quena' inoxono chaqai quiyim nenoxonec cañi lahi', ca' ỹanata ca 'uaqapi.

Juan 14:6

Ca' so Jesús 'naaco': —Ỹim ná'maq ỹim nayic, chaqai aỹim lliqueta, chaqai qai'neeta ỹim nca'laxa. Ỹim qaỹimeta ñigo, ca ishit qaỹovira'a ñi qota'a.

Hechos 3:19

Vichiguiño' nagui no'uen quiyim 'xañiñi naua no'ueenataxagohi, ca' nañaañiỹot ñi qota'olec, qaiyi ñi'maxare ỹapalaxate' naua rasauaxashichiri. Ca' ñi qara'gaxala' ishit quiyim nelatalo qamiri caua na'xata' quiyim ra'maxaichiguiñi,

Romanos 9:22

Ca ñi qota'olec ỹahotaque ca laloqojnaxanaxat quiyim ichoxot ca nouaxanaxaset chaqai da lquesaxanaxa, qam 'ue da leualaxavic quiyim na'ñaxachiguit ná'maq 'chichiguiñi tai'a quiyim qaỹa'ue ca nouaxanaxaset chaqai quiyim qanopoxoỹaxajñi.

2 Corintios 4:4

Ma' so na'ỹaapec se neuanñi nqai'en da la'deenataxanaxac, ca' sqai huelec, qaiyi se iuana da lauaq dá'maq ỹaatqajam no'uen na'qaatec re'oq nqai'en da lauaq so Cristo, ma' chaqaiso só'maq lqui'i nca'leetauec ñi qota'a.

2 Corintios 6:17

Ca vichiguiño' qai'neeta 'naac ñi qara'gaxala': Oquii'e, noỹoochiuec quena'maxare; sqai coñigui ná'maq napio'xot da chaalataxac. Ca ma'le, ca' ỹim secoñiguita qamiri,

Gálatas 5:24

Chaqai ná'maq mashic lalamaxaret so Cristo, shi'gue 'ec pateno na loshicmaxa queso npatenaxala', liỹaatashiguim ná'ogue ná'maq chi lqo'itaxanqachic chaqai ná'maq loiquipi.

Filipenses 3:19

Ca ma' ỹovita ca lqodoc, ca qaiqa'viỹa'gue na'maxare ma'le. Ma' chaqai queeta'pegue' ná'maq chi lamaanaxanqachic na loshicmaxa, chaqai nemaqajanlec ná'maq ỹo'uet quet ca layiloxo, chaqai qainaata ỹa'deentapega ná'maq hueetalec na 'laua.

1 Juan 5:19

Sa'deenaq quiyim qomi' lalamaxarete' ñi qota'a, chaqai quiyim ná'ogue na qomyipi ná'maq hueetalec ana 'laua qoỹoiquentac queso na'ỹaapec.

Apocalipsis 12:9

Ca' chaqaida dá'maq 'neeto' na'le na' qaỹo'daauec so isecỹac chalego lecaic. Ca so'maxare chaqaiso' só'maq ñaauapec 'ec nanaic leenaxat Satanás chaqai na'ỹaapec, só'maq ỹayintaco' quen ná'ogue na ỹoreta'oguit qomyipi hueetalec ana 'laua. Ca so na'ỹaapec chaqai so lelaatqaipi qaỹo'daauec, taalec nqohin na 'laua.

Apocalipsis 13:8

Ca' sojo isecỹac ỹaatqajam qaimaqachin quená'ogue ná'maq hueetalec ana 'laua, quená'maq se qoỹeretañi ca leenaxat na' ñaqai chita'gue qaỹo'uet na 'laua, cacá'maq lere nca'laxalate hueeto'ot so 'ec qagreta llaalec shi'gue qaỹalauat.

Apocalipsis 20:15

Ca' sojo norec qainaxañigui só'maq se naneretalec ca leenaxat aso lere qoỹeretalec ná'maq mashic qanca'laxatec.

Apocalipsis 20:3

Ca inaxa'ña ca lapooqo' na nqui'illipi. Ca ỹapo'ña, ỹo'uet aso netanaqsete ñi lasom, ca tot ishit ỹayin ná'maq ỹoreta'oguit qomyipi, toco' ma' ỹovirerec saua mil ñaxari. Ca' ma'le, ca' liỹa qaỹosouec lecocho'qui'.