Mateo 6:2 - La'qaatqa ñi qota'olec Qota'olec & Qota'olec Novita Na Qomyipi

² Ca' vichiguiño' quiyim tauañii cá'maq 'ue ca louenaxanaxa, qam sqai 'deenaxanaxañiigue ná'ogue na qomyipi, 'nejem dá'maq 'ne'tegue quen ná'maq 'neetapigui lauel quiyim huagaxaraiquipi, nachaxanta quiyim hueetaugui ana lapoxoqui na judioipi chaqai quena nayiquipi. Dajo 'ne'tegue, ma' ỹahotaque quiyim qaimaqachin quena qomyipi. Qam ỹim shinac quedajo 'ne'tegue, chaqa'ma' shi'gue 'ue da nishiuetenaxac.

Mateo 6:2 Iomraidhean Croise

Isaías 58:7

quiyim nouañise'e' ca qopaaxaic queca qanoqe' chaqai quiyim na'ñi ca ra'aachi' ca qaica ca lauo'; chaqai quiyim vite ca looỹac cá'maq sham neetauec chaqai quiyim rqouaquitegue cá'maq riỹa'e'.

Mateo 15:7

Ca' ¡qamiri 'ñiitapega quiyim ỹaatqajam qamiri llaalqa ñi qota'olec! Ca dá'maq 'ñiitari' ỹaatqajam taachigui dá'maq ỹiriño' na'le so letaxaỹaxanqajnec ñi qota'a leenaxat Isaías, co'na' 'naac:

Mateo 16:3

Chaqai quiyi nete'etam, ca' qamiri 'ñiỹac: “Ỹaatqajam se no'uen na na'xa'a, ma' ỹaatqajam toc na piguim chaqai napalligui.” ¡Qamiri 'ñiitapega qamiri llaalqa ñi qota'olec! Ỹaatqajam 'yiiñii 'xachii dá'maq leloxoỹaxac na piguim. Qam sqa 'yiiñiguita nauá'maq netanqa nagui quenaua na'xata' seuqatauguilo.

Mateo 22:18

Qam so Jesús retan dá'maq se no'uen ỹahotaque so'maxare, ca 'naapegalo' saua'maxare: —Qamiri ma' 'ñiitapega qamiri 'maxaraqa, ¿chi'negue ma' yi'guiñitac?

Mateo 23:5

Ca' quená'ogue ná'maq ỹo'uet, ỹahotaque qaỹa'ajantac quena qomyipi. Ma' ỹaatqajam nqo'ta quiyim 'ue ca hueetalec na latap chaqai quenaua lqai'laqate' quiyaua naneresañi la'qaatqa ñi qota'a, leca'gue nqohin ca nerec, chaqai quiyim ỹañiñi naua noho paguec ladocqa' naua lauollaxa' quena liỹa qom.

Mateo 23:6

Chaqai nqo'ta ná'maq paguec loyac qa'xanqa' quena' 'ue na nqui'ỹaxac, chaqai na paguec lemaqachic qa'xanqa' cana lapoxoqui na judioipi,

Mateo 24:51

Ca qaỹo'uet ma'le ca chalego lecaic nouaxanaxaset, 'nejem nqohin ca nouaxanaxaset ná'maq 'neetapega 'maxaraiquipi. Ca ma'le, ca' noỹen chaqai iquishquinta' naua louee quena nqui'ic.

Mateo 5:18

Ma' ỹaatqajam llic dá'maq shinac caqamiri, quiyim ñaqa 'ue na piguim chaqai na 'laua, ca' sqaica ca qanaqata'a quena nerqaipi, vire'ta ca netancoqui' quena naqataxaquipi quiyim saqa' ỹovita quiyim ipaquichigui ná'ogue ná'maq 'neeta mashic qoỹeretañi.

Mateo 6:16

Ca ma' ỹovita quiyim nqopaaqachichii, qam se re'oq nqai'ñii quiyim ỹaviguiñi na qashiigui, 'nejem dá'maq 'ne'tegue quen ná'maq chi nachaxanta qomyipi. Ma' na'maxare 'ne'tegue dajo, ma' ỹahotaque qaỹa'den quiyim nqopaaqachitetac. Ca' ỹim shinac caqamiri quiyim na'maxare shi'gue 'ue da nishiuetenaxac.

Mateo 6:3

Qam no'm qami' 'ue ca 'ỹaañitem cá'maq 'ue ca louenaxanaxa, qam sqa 'deenaxanaxañitegue cá'maq ỹaatqajam nauochaxaua'e' riỹa'e'.

Mateo 6:5

Chaqai ma' qamiri nqouagaxaiñii, 'neeto' lotqai 'ñiita ná'maq 'neetapigui lauel huagaxaraic, nachaxanta quena' nqouagaxain cana lapoxoqui na judioipi chaqai quenaua lasoguel na nayiquipi, qaiyi qaỹa'ajantac quena qom. Ca' ỹaatqajam llic da shinac caqamiri, ca' quedá'maq dajo quiyim 'ne'tegue, ca chaqa'ma' 'ue ca nishiue'.

Mateo 7:5

Ca ma' 'ñiitapega quiyim qamiri 'maxaraqa, ca' 'au naqachii añí'maq loỹo neeta'ñigui ana nqochii, qaiyi ỹaatqajam neuañichiguiñi quiyim naqachii ca lichooqui' hueeta'ñigui aca nqote ca rqaỹahi.

Marcos 12:39

Na'maxare imitete'e ná'maq paguec loyac qa'xanqa' quena lapoxoqui na judioipi chaqai ná'maq paguec loyac quenaua nqui'ỹaaqate',

Marcos 7:6

Ca' so Jesús 'naaco': —Ỹaatqajam taachiguilo qamiri naua la'qaatqa so letaxaỹaxanqajnec ñi qota'a, leenaxat Isaías, co'na' ỹa'xatau'alo qamiri, ma' qamiri 'ñiỹac quiyim qamiri llaalqa ñi qota'olec. Co'na' so'maxare ỹiriñi dajo, 'neetasa': Najo qomyipi imaqachin aỹim, qam qainauate' naua laapi', qam añi le'taxanata qoỹoqo'ta nqai'en aỹim.

Lucas 11:41

Ca' vichiguiño' qamiri quiyim chitaxanataxañii, qam 'ỹaañiuec cá'maq pa'aauo, qaiyi ná'ogue co'teeta.

Lucas 11:43

¡Ỹaatqajam 'xoraiqolqa qamiri fariseo! Ma' qamiri rqo'itaxachii quiyim nqa'xañitañigui ná'maq ỹaatqajam 'ue da lichoxoric cañi lapoxoqui na judioipi, chaqai ỹaatqajam qaỹa'maxate'teguelo qamiri quena' 'ue ca qaiquin queca nayic.

Lucas 12:33

Miiñii naua rouenaxahi. Ime, ca' 'ỹaañim na 'ue ca ỹouentaque. Ime, ca' 'viichii aca qachoxoguii se ishit quiyim qo'oq, chaqai da nesallaxa hueeta'gue da piguim ma' se imeho, chaqai se inoxono ca cuataxai, chaqai se rechigaxan ca pit.

Lucas 12:56

Ca' ¡qamiri mashic 'ñiitapega quiyim qamiri 'maxaraqa! Ma' qamiri 'yiiñii 'xachii na netanqaipi na piguim chaqai na 'laua, qam ¿chi'negue ma' sqa 'yiiñii ca 'neete' naua na'xata' seuqatauguilo nagui?

Lucas 13:15

Ca' so qara'gaxala' saat, 'naaco': —Qamiri mashic 'ñiitapega quiyim qamiri 'maxaraqa, ¿peeta'a sqaica canchaqaica caqamiri ỹosouec ca lalo ñii'lola, loqo'm aca lalo 'ashina queca na'xa'a co'mataxaqui quiyim ỹauegaxasom, ne'taxan queca huaxaỹaq?

Lucas 20:46

—Rovichii'o' na rapaxaguinataxanta'pegue na naqataxaquipi, ma' ỹaatqajam nqo'talo ỹansañi naua noho ladocaqa, chaqai nqo'ta quiyim qaỹa'maxate'tegue qaiquin quena co'matqa'. Chaqai na'maxare ỹahotaque nqa'xanñigui aca qa'xanaxaqui paguec loyac cana lapoxoqui', chaqai ná'maq ỹaatqajam lo'yaxanqa nqui'ỹaaqate'.

Lucas 6:24

Qam 'xoraiquipiolec qamiri ma' qamiri nesallaxanqaipi, ma' mashic 'uo' da ra'maxahi.

Lucas 6:42

Qam no'm sqa 'yiiñira'a añi loỹo neeta'ñigui ana nqochi'i', ¿chi'neco' shichi' 'ñirapega ca rqaỹa'e': “Ỹaqaỹa, ñaq yayaxañirac ñaq ñaqat yi lichooqui' hueeta'ñigui ana nqochi'i'”? ¡Ma' qami' 'ñiisapega qami' 'maxaraic! 'auaxañi' naqachi' añí'maq loỹo neeta'ñigui ana nqochi'i', qaiyi ỹaatqajam huañiterelec quiyim naqachi' cá'maq lichooqui' hueeta'ñigui aca nqote ca rqaỹa'e'.

Juan 13:29

Ma' so Judas hueeto'ot aso nam lahi', ca 'uo' na 'neetapega quiyim so Jesús ỹahotaque rishiujnaxanaque cá'maq qaỹouen queso nemaqachic, loqo'm 'ue ca ỹaanem na 'xoraiquipi.

Juan 5:41

Aỹim se sacoñiguit ca nemaqajnataxanaxa chicqotougui na qomyipi caỹim.

Juan 5:44

¿Negue' cá'maq 'neeto' quiyim 'ue ca viilec qamiri quiyim coñi'chiguit ca lemaqajnataxanaxa quiñi 'óna 'nejemalam, qam sqai michiỹaque cá'maq nemaqajnataxanaxa chicqo'ot ñí'maq qaiñiita qota'olec?

Juan 7:18

Cá'maq chi lo'ueenatec ca ỹa'xat, ỹo'uet, ma' ỹahotaque quiyim qaimaqachin quena qom. Qam cá'maq ỹahotaque quiyim qaimaqachin cá'maq nelaatqo', ca' chaqaica cá'maq ỹaatqajam llic ca ỹa'xatetac, chaqai qaica ca na'maachic hueetagui.

Hechos 10:2

So ỹale chaqai sá'ogue so lauo' laseripi ỹaatqajam huelec ñi qota'olec, chaqai no'cha'a ñi'maxare. Chaqai 'xoico' quen ana ỹaan lam, lotaanaxanqate quena judioipi, chaqai se neme nqouagaxaintacot ñi qota'olec.

Hechos 10:31

Ca 'naapiguiỹa': “Cornelio, ñi qota'olec 'xaỹa da nqouagaxainaxaqui' chaqai ỹo'leenta'a da rqouagaxa'e' quena' tauañi'sac ná'maq 'ue na louenaxanaxa.

Hechos 10:4

Qam so Cornelio chi ra'iito'oto' so nelaatec chicqashiguim, ma' 'xoic da lqolonaxa, chi nacantauco' quiyim inat: —¿Negue' ca, qami' ỹa'gaxala'? Ca' so nelaatec 'naaco': —Ñi qota'olec ỹacoñiguit da nqouagaxainaxaqui' chaqai da 'ñiisari' quena' tauañi' ná'maq 'ue louenaxanaxa.

Hechos 11:29

Ca' so mashic ỹacoñiguit da na'qaatec na'ñi yi Antioquía ỹa'uo' aso lotaanaxanqate queso nqaỹaripi neeta'ñi yi Judea, qam cá'maq chaqa taachi'ñi ishit ỹaan queca 'óna.

Hechos 24:17

Ca mashic 'vii saua ñaxari souootac, ỹoqa'a na seueta'gue, ca sopil, sopila yí'maq chi iuo', ñachiita aso lqouagaxanqate na ỹaqaỹaripi, chaqai sodou'a ñi qota'olec aso ỹachitaxanataxanqate.

Hechos 9:36

Ca' quesaua na'xata' 'uo' aso mashic shi'gom ỹacoñiguit da na'qaatec na'ñi yi Jope, leenaxat Tabita. Dajo neenaxat quenaua griego la'qaatqa 'naac: Dorcas (dajo 'naac: qagreta neuec). Aso 'aalo co'na' ñaqa 'ue 'xoic da lotaanaxanaxac, ỹotauantac ná'maq 'ue na louenaxanaxa.

Romanos 12:8

Chaqai cá'maq ỹa'den quiyim ỹa'ñaxat ca liỹa, ca' chaqaida queetalec quiyim ỹo'uet. Chaqai quecá'maq ramiaxan, ca ỹo'uet, qam qaica ca naquitetaque. Chaqai cá'maq na'gaxala', ỹaatqajam netela'a da lo'ueenataxanaxac. Chaqai cá'maq ỹotauan ná'maq 'ue na louenaxanaxa, qam qaidaata neconaque da leuagaxaric.

1 Corintios 13:3

Chaqai no'm saan ná'ogue na hueetaỹot, chaqai no'm saanec na ỹoshicmaxa quiyim qaỹavigaxat, qam qaica ca i'xorenataxanaxa, qaiyiita qaica ca 'negue caỹim.

Gálatas 2:10

Ta'ta'a quiyim qatalo qomi' quiyim se scouaqa'e na 'xoraiquipi, qam dajo chaqaida dá'maq 'xoic iuogoxo quiyim so'uet.

Efesios 4:28

Cá'maq rocachitaco' quen, ca' 'maxaraic ỹaxanñi da locataxac; ta'ta'a quiyim ro'ueenataxan, qaiyi ishit ỹotauan cá'maq 'ue ca louenaxanaxa.

1 Tesalonicenses 2:6

Se ỹauanapega sahoqotaque quiyim qaimaqachine' qomi' quena qomyipi, caqamiri loqo'm quecanchaqaica liỹa, ma' qomi' lelaatqa so Cristo. Qam qaiyiita sqai shicqateguelec dajo quiyim sahoqotaque qaidaañiguita qomi'.

1 Timoteo 6:18

'Ñirapega na'maxare quiyim ỹo'uet cá'maq no'uen, qaiyi 'ec lesallaxa da'maxare quiyim ỹo'uet cá'maq ỹa'maqachiguiñi. Chaqai qaica ca huapigui lauel, ta'ta'a quiyim 'ue ca ỹaan lotaanaxanaxat.

Filemón 1:7

Ca' 'xoic da ñitoonaxac, ña'ñaxatete'e' da re'xorenataxanaxa'e', ma' chicqochigui qami' quiyim ỹa'maqachigui na lauel ná'maq mashic icoñiguit da na'qaatec.

Hebreos 13:16

Chaqai se couahi'e quiyim 'viichitac cá'maq ỹa'maqachiguiñi, chaqai quiyim nouañii'te' cá'maq riỹahi quecá'maq 'ue caqamii, ma' dajo nachitaxanataxanaxac chaqaida dá'maq ỹa'maxarenta ñi qota'a.

1 Pedro 4:11

No'm 'ue ca retaqa, ca' caua la'qaatqa 'neete'm caua la'qaatqa ñi qota'a. Chaqai no'm 'ue ca qoỹaanem ca lo'ueenataxanaxac, ca ỹo'uet, qam ỹahote'e dá'maq lquesaxanaxa qoỹaanem quiñi qota'a. Chaqai quená'ogue ná'maq qaỹo'uet tai'a nqohin quiyim qaimaqachin ñi qota'a chicqochigui so Jesucristo. Ma' sqaica lqodoc da lauaq chaqai da lquesaxanaxa ñi qota'a. Ajá'a, chaqaida 'neeta dajo.

1 Samuel 15:30

Ca' so Saúl 'naaco': —Ỹim 'ue da ỹasauaxaset. Qam nagui qouaquiric iuanchigui nqai'ñi' ná'ogue na qo'xoiquipi chaqai quená'ogue na qomyipi quiyim qaiyiita se napaquirailec quiyim ỹim nashi. Ca' vichiguiño' rapilli' quiyim ñauequeta'pegue' qami', qaiyi ñqouagaxainot ñi ra'gaxalachi' qota'olec.