Mateo 20:28 - La'qaatqa ñi qota'olec Qota'olec & Qota'olec Novita Na Qomyipi

²⁸ Ma' chaqaida dá'maq 'neeta najo ỹale llaalec se novi' quiyim ỹahotaque qaiquelola. Ta'ta'a quiyim ná'ogue quelola, chaqai quiyim da nachaalataxac ỹaanec, ca' 'ec lishiuetenaxanaxat, qaiyi 'xoic ca nca'leuec.

Mateo 20:28 Iomraidhean Croise

Isaías 53:5

Qam qaica'laxatauec sauaxat quiyim se ña'xaỹaxanaxa, ca qaiqa'viỹa'gue sauaxat da se no'uen hueetaguilo qomi'; da le'xoric na' qaỹouaxantac, ca chicqochigui da no'daxa coqomi', chaqai quesaua lcoñiraxa', ca qomá'ogue qaremeuec.

Isaías 53:8

Qaica cá'maq ỹasauaxat, qam qai'xat, chaqai qaica cá'maq qoshiilec so'maxare; qaica cá'maq itena'a dá'maq nachaalataxac. Qanapocshiguim so'maxare quena 'laua, ca' qaỹalauat soualec na lasauaxaset na ỹalamaxareteripi.

Mateo 20:27

Chaqai canchaqaica caqamiri ỹahotaque quiyim 'auaxaic, ca ca'maxare, ca' na'ac quená'maq liỹaripi.

Mateo 26:28

Ma' najo ná'maq iuoripi i'taxajñi dá'maq dalaxaic 'maqataxac. Ca' qaỹocoraqta'pe, qaiyi 'xoic cá'maq qaỹapalaxat ma'le ca lasauaxaset.

Mateo 8:20

Ca' so Jesús 'naaco' na'le queso'maxare: —Ana nouaxaỹaxallipi 'ue na lauac, chaqai na qo'oollipi 'ue na lpa'gue'. Qam najo ỹale llaalec qaica ca lo'xaỹoqsoqo'.

Marcos 10:45

Ma' vire'ta najo ỹale llaalec mesqa nac ỹahotaque quiyim qaiquelola, ta'ta'a quiyim ná'ogue quelola, chaqai quiyim ỹaanec da nachaalataxac 'ec laseue' nqai'en quiyim 'xoic ca qanca'laxatec qomyipi.

Marcos 14:24

Ca 'naaco' quesaua'maxare: —Nauajo chaqainaua nauá'maq iuo', naua'maxare i'taxachiñi dá'maq dalaxaic 'maqataxac, chaqai qaỹocoraqta'pe ma'le, qaiyi 'xoic ma'le ca nca'leuec.

Lucas 22:27

Ca ¿negue' ca ỹapacauec, cá'maq nqa'xanñi reloqojlec ca nqui'ỹaxala' que'e, loqo'm cá'maq qailaretac? ¿Mesqai llico' chaqaiso só'maq reloqotalec so lqui'ỹaxala'? Qam aỹim salequetauguilo qamiri, shintari' quiyim chaqaỹim nelaatec.

Romanos 4:25

só'maq qoỹaañiguit da lelauaxa sauaxat na qarasauaxaseteripi, chaqai liỹa qanca'laxatec, qaiyi icoñi'chiguita qomi' ñi qota'olec.

2 Corintios 8:9

Ma' shi'gue 'yiiñii da lqouagaxa so qara'gaxala' Jesucristo. Ma' so'maxare ỹaatqajam nesallaxanec, qam ne'xoresentam, ma' paguec da le'xorenataxanaxa caqamiri, qaiyi qamiri nesallaxanqa, chicqochigui dá'maq le'xoric so'maxare.

Gálatas 3:13

Qam so Cristo quepaqataxanlgoto qomi' quedá'maq chalego lecaic qanouaxanaxaset quet chicqochigui so naqataxaquipi, ma' so'maxare npa'xanguit dá'maq chalego lecaic nouaxanaxaset talgoto quet qomi'. Ma' naua naneresañi na'qaatqa 'neracsa': “Chalego lecaic ca nouaxanaxaset quiñi qota'a ná'ogue ná'maq qaicoñirashiguim queca qo'paq.”

Efesios 1:7

Quedá'maq chalego lecaic le'xorenataxanaxa, ca' ñi qota'a nca'laxaterec qomi', chicqochigui nqai'en da lelauaxa so llaalec, ca ỹapalaxate' caua qarasauaxasete'.

Efesios 5:2

Quiyim qamiri 'xorenataxanaxaiqa 'nejem so Cristo na' qare'xoren, ca' nañaanalta' quiyim ileualgoto qomi', 'nejem nqohin ca qagreta llaalec quiyim qaỹalauat, chaqai qaỹavigaxat, ca' qoỹaanot ñi qota'a. Ca namaañi'chiguit da lahita ñi'maxare.

1 Timoteo 2:6

Ma' so Jesucristo nañaañiguit da lelauaxa, ca' ishiueten so laseuete da lca'laxa ná'ogue na qomyipi, ca' dajo qaỹa'xat na' chi ỹovita cá'maq laloqo'.

Tito 2:14

So'maxare nañan quiyim ileualgoto qomi', ma' ỹahotaque quiyim qarca'laxatec quená'ogue na se no'uen chaqai ỹaatqajam co'taxat da qanachaalataxac, qaiyi qomi' lalamqate' chaqai quiyim qarqo'ta so'ueetaq cá'maq no'uen.

Hebreos 2:10

Ma' ñi qota'a lalamaxaret ná'ogue nanchaqaina 'ue, chaqai chaqai chicqo'ot ñi'maxare. Ca' ñi qota'a ỹahotaque quiyim ná'ogue na llaalqaipi nouanau'a da lauaq. Ca vichiguiño' ñi'maxare naloqojonchiguiñi nqai'en da no'ueenataxac so Jesucristo, só'maq lca'laxala' na'maxare, chicqochigui nqai'en da le'xoric.

Hebreos 5:8

Ca' so Cristo 'eno'm ỹaatqajam ñaalec, qam ỹovirau'a da le'xoric, ca' ỹa'den quiyim na'xaỹaxanta.

Hebreos 9:28

ca' chaqaida 'neeta nqai'en so Cristo quiyim 'oonoqui' nañaanalta', qaiyi naqat ná'ogue na nasauaxaset. Ime, ca' lotqai liỹa nachaxan, qam tot naqat na nasauaxaset, ta'ta'a quiyim nca'laxatec ná'maq nauaantaque so'maxare.

1 Pedro 2:24

Chaqaiso so Cristo i'xat sá'ogue so qarasauaxaset hueetaugui nqai'en so loshicmaxa, i'xatashiguim na' qaipateno queso npatenaxala', qaiyi le'en saxanaxañi da nasauaxaset, ca qolaxalec da 'maxaraic chaalataxac. So'maxare coñirqata, qaiyi remiiuec qamiri.

1 Pedro 3:18

Ma' so Cristo queda le'xoric, ca' ileualgoto naua qarasauaxasete'; 'oonoqui', ca' chaqa'ma' imaauec nqai'en. So'maxare ỹaatqajam huagaxaraic, qam ileualgoto na'le qomi' quiyim qomi' hualoxona', qaiyi ỹauega'alo qomi' ñi qota'a. Ỹaatqajam qaỹalauat quesó'maq loshicmaxa, qam liỹa nca'leuec nqohin quesó'maq se re'xogui.

1 Juan 2:2

So Jesucristo chaqaiso só'maq chicqochigui quiyim qaỹapalaxate' naua qarasauaxasete', chaqai mesqoqometa, ma' qai'neeta quená'ogue na qomyipi hueetalec na 'laua.

Apocalipsis 1:5

Chaqai qai'neeta chicqo'ot so Jesucristo só'maq netaxaỹaxanqajnec ishit qoyiuelec ca la'qaatec, chaqai chaqaiso só'maq 'au qanca'laxatec queso nelauaxa, chaqai chaqaiso só'maq lashi na nashillipi hueetalec ana 'laua. So Cristo só'maq qare'xoren, ca nquiỹoorec saua qarasauaxasete', quiỹoxonalo sauá'maq chi leuo',