Juan 7:37 - La'qaatqa ñi qota'olec Qota'olec & Qota'olec Novita Na Qomyipi

³⁷ Ca quesó'maq co'uaataxanaxaic na'xa'a queso nemaqachic, ca ỹaatqajam pagueco' quen da nemaqajnataxanaxa. Ca' quesojo na'xa'a nachajñi so Jesús ỹaatqajam nelamaxaren na' retaqa, 'naaco': —No'm 'ue ca iuet laquip, ca nacpegue' aỹim, ca' ne'et.

Juan 7:37 Iomraidhean Croise

Nehemías 8:18

Ca' qaỹo'uet so nemaqachic quiyim qoyiuelec ñi qara'gaxala' quesaua siete na'xata'. Ca' so Esdras saua'que sauajo na'xata' retaqateguelec aso laqataxaco lomalate ñi qota'olec. Ca' queso liỹa na'xa'a, ca' qaỹo'uet so nemaqachic lodegaxat, ca qaipacqajanchigui dá'maq na'qaatec qoỹeretañi. (9.1—12.26 So qomyipi ỹa'xat na lasauaxaset. Ime, ca ỹaanec da la'qaatec quiyim ipaquichiguilo nqai'ne' naua lelaataxanaxaco ñi qota'olec. Qoỹaanshiguim so lquepaqataxanaxat yi Jerusalén.)

Salmos 42:2

'Eco' ỹaatqajam 'xoic da ỹaquip quiñi qota'olec, ñí'maq chicqo'ot da nca'laxa. ¿Chi' laquio' liỹa ñovira'a ñi qota'olec?

Salmos 63:1

¡Qami' qota'olec, qami' qota'olec caỹim! 'Ue da ipagaxallic quiyim sedaantaque qami'; ma' vi'saxauot cá'maq souentaque; ỹimá'ogue souentaque qami', shintari' ca 'laua rashivijlec, qaica ca huaxaỹaq chaqai qaica ca nca'laxa.

Proverbios 1:20

Quenaua nayico chaqai quenaua lapooqote' na qom qara'xaỹaque da lelamaxa da na'deenaxanaxa;

Proverbios 9:3

Ca' ila' ana lelaatallipi quiyim ỹaualaq, nelamaxaren, queugui yi na'a' lodegaxat, ca 'naac:

Cantares 5:1

Mashic shi'gue seuetaugui na ỹanaxanqa', qami' ñapiitaxauo'lli'. Mashic secona ana ñimirra chaqai na ño'daxaraic lahita, shi'gue se'guentac na rapic li'i hueetagui ana lapa, shi'gue ñi'teetapigui na lataxa chaqai naua lo'i'. Qamiri qarqo'itqate' qanauochaxaua', qui'ii chaqai ni'chii, ¡canchi lecaata cá'maq ni'chiigui!

Isaías 40:2

nichiriita taxahi quiyi Jerusalén, ca 'ñiỹapega: Ime da ncoñiitaxaguii, shi'gue machiigui da ro'maxashichii, shi'gue coñiguit caỹim dá'maq paguec lecaic nouaxanaxashichii quesá'ogue so rasauaxashichii.

Isaías 40:6

Ca' 'ue so sa'xaỹaque 'naac: Raualqai', ca' ỹim senataxan: ¿Negue' quet cá'maq shinta'gue ca ỹaualaxac? Ca 'naac: Quiyim ná'ogue na qomyipi 'ec ana peue, ¡se ra'ñiiñi 'ec aca lenoỹaxai quena no'ueenaxa!

Isaías 55:1

Ná'ogue ná'maq iuet ca laquip, naiquena, ca' ne'et quena huaxaỹaq; naiquena ná'maq qaca aca lam, naguiu'a na trigo chi qoỹaantauec, ca qui'ii; naguiu'alo na lataxa chaqai naua lo'i', qam sqai shivichiñii.

Isaías 55:3

Naguipegue' aỹim, ca' na'xaỹaxañii, ỹaatqajam na'xaỹaxañii'ta aỹim, ca' rca'lliiuec. Ca sa'ue ma'le da ña'deenaxac caqamiri sqaica lqodoc, ca ipaquichiguilo ma'le naua sachaxanta'pe na'le queda i'xorenataxanaxa queso David.

Isaías 58:1

Ñi qara'gaxala' qota'olec 'naac caỹim: Se ro'chi'i', taxahi' nelamaxariñi', 'ec npe'te nqai'ñi' ca qavillaxaqui'; relaqaita na ỹalamaxareteripi llaalqaipi so Jacob quedá'maq se no'uen ỹo'ueetetac chaqai queda lasauaxaset.

Jeremías 2:2

Mo'e', ma' vichita yi na'a' lodegaxat Jerusalén, ca taxahi'; nichintegue ca ra'qaachiqui', qaiyi ỹaatqajam qara'xaỹa, 'ñiraco': Da la'qaatec ñi qara'gaxala' 'neetasa': So'leente'te na' ñaqai qami' nogot ỹaatqajam na'maxachite' quen, na' secoñiraxaua' quiyim qami' ỹoua, ỹaatqajam rqo'chiriua' na'le, ca' qui'sa'pegue' na'le aỹim quiyi 'laua qaica qom, yí'maq 'laua qaica ca qoỹanlec.

Ezequiel 47:9

Chaqai canchaqaica ỹovitegue najo huaxaỹaq, ca' ishit nca'leuec ná'ogue nanchaqaina isecỹac chaqai 'xoic na nallin. Ma' na huaxaỹaq canajo lachiugue cá'maq hua'ñi ca huaxaỹaq chim, qam ñigui lo'daxaraic nqai'en, chaqai nca'leuec ma'le ná'ogue nanchaqaina.

Mateo 11:28

Naguipegue' aỹim qamiá'ogue, ma' mashic rco'chiiuec quena ro'ueenataxanaxaguii chaqai quena ri'ỹaaguii, ca' ỹim ñco'mataxandec qamiri.

Mateo 3:3

Ca' sojo Juan chaqaiso' so 'neetapego' na'le so letaxaỹaxanqajnec ñi qota'a leenaxat Isaías co'na' deraxan, 'ne'teguesa': 'Ue so qara'qaataque qom lavillaxac, 'maqateguelec yi 'laua qaica qom, ca' so laualaxac 'neetasa': “'Maxachiñi ca nayicyaxac ñi qara'gaxala'; ỹaatqajam ỹalamqata nqai'ñii ca llic.”

Mateo 5:6

Ỹaatqajam chalego la'maxa ma'le quecá'maq 'ec 'ue na lqopaaxa chaqai na laquip quiyim ỹahotaque ỹo'uet ná'maq ỹahotaque ñi qota'olec, ma' ñi'maxare ỹotauanegue ma'le ca'maxare, qaiyi ishit ỹo'uet.

Juan 1:23

Ca' so Juan 'naaco': —Aỹim ná'maq ỹim lavillaxac ca ỹaualaq, 'maqateguelec yi 'laua qaica qom, qam da laualaxac 'neetasa': “Huachigue lamaxachita ca nayic, llic ma'le ca qara'gaxala'” —ca' chaqaida dá'maq 'naaco' na'le so la'qaataxanqajnec ñi qota'a leenaxat Isaías.

Juan 14:6

Ca' so Jesús 'naaco': —Ỹim ná'maq ỹim nayic, chaqai aỹim lliqueta, chaqai qai'neeta ỹim nca'laxa. Ỹim qaỹimeta ñigo, ca ishit qaỹovira'a ñi qota'a.

Juan 4:10

Ca' so Jesús 'naaco': —Huategue' queta' 'yiiñi' cá'maq ỹaan ñi qota'olec chaqai ná'maq ỹashiilatac qami' queca laquip, ca' qami' quet aná'maq yashiila'e', ca' ỹim saanem qami' ca huaxaỹaq se neme ne'paxantashiguim.

Juan 4:11

Ca' aso 'aalo 'naaco': —Qami' ỹa'gaxala', vire'ta qaica ca re'maxasoxonaqchi' quiyim naviquirishiguim ca huaxaỹaq, chaqai aná'maq ni'ỹa qoỹoqochi'ñigui. Ca ¿nega'ỹo' ca chigoxochira'gue ca huaxaỹaq se neme ne'paxantashiguim quiyim nañaañi'?

Juan 4:14

Qam cá'maq ni'chigui cá'maq huaxaỹaq saanem, ca' qaica ma' liỹa quet iuet laquip. Ma' cá'maq huaxaỹaq saanem, ca'maxare 'ec la'uaxac ne'paxantashiguim quena lauel ca'maxare. Ca' chaqaica cá'maq ỹoviraqta'a ca nca'laxa sqaica lqodoc.

Juan 5:40

Qam qamiri sqa 'maxariñii naguipegue' aỹim, qaiyi coñiguit dajo nca'laxa.

Juan 6:35

Ca' so Jesús 'naaco': —Chaqaỹim ná'maq pan chicqaugui da nca'laxa. Cá'maq nacpegue' aỹim, ca se ỹauanapega quiyim qopat; chaqai cá'maq huelec aỹim, ca se ỹauana ỹalauat laquip.

Juan 6:37

Ná'ogue ná'maq nañaañim ñi ita'a nacpegue' aỹim; chaqai ná'maq nacpegue' aỹim, se so'da'guit.

Juan 6:55

Ma' ỹaatqajam na'ic na ỹoshicmaxa chaqai ỹaatqajam 'taqate' naua iuo'.

Juan 7:28

Ca co'na' 'xaỹa dajo so Jesús ma' rapaxaguinataxantac cañi no'ueenaxanaxaqui, ca retaqa, qam nelamaxaren, 'naaco': —¡Ajá'a, ca' ỹim huañiua', chaqai 'yiiñii ca sachigoxogue! Qam se ñanoiquentac quiyim ñanac, ta'ta'a quiyim yila' ñí'maq ỹaatqajam lliqueta, ca' ñí ñí'maq sqai huañiỹapega.

1 Corintios 10:21

Ca' se ỹa'maxañi quiyim ni'chiigui aca 'taxaqui tai'a quena' qoyiuelec so qara'gaxala', ca ime lotqai ni'chiigui aca 'taxaqui tai'a quena' qoyiuelec na lelaatqaipi so na'ỹaapec. Chaqai se ỹa'maxañi a'guii ca na'ic tai'a quena' qaỹo'leente so qara'gaxala', ime lotqai a'guii ca na'ic mashic qoỹaanot na lelaatqaipi so na'ỹaapec.

1 Corintios 10:4

chaqai sá'ogue ni'chigui so niquip se re'xogui. Ma' ne'teetapigui so huaxaỹaq chicqotapougui aso qa' se re'xogui queeta'pegue' so'maxare quecanchaqa taigue. Ca' sojo qa' chaqaiso so Cristo.

1 Corintios 11:25

Ca' qai'neeta na' ime so nqui'ỹaxac, ca ỹacona aso 'taxaqui, ca 'naaco': “Najo 'taxaqui chaqana ná'maq tai'a dá'maq dalaxaic 'maqataxac qai'taxajñi quenaua iuo'. Ca ma' ỹovita quiyim ni'chiigui, ca lotqai o'lliinchii'te aỹim.”

1 Corintios 12:13

Ma' qomi' 'eno'm qomi' judío lase', loqo'm sqai judío lase', loqo'm qomi' nelaatqa, loqo'm sqo qomi' nelaatqa, qam na' qanachilaxane' qomi', ca 'eco' qarenocau'a so 'oonoqui' noshicmaxa chicqochigui so Espíritu. Chaqai qomá'ogue 'ec qane'taxanguilo só'maq 'oonoqui' Espíritu Santo.

Efesios 5:18

'Neeto' lotqai rquiñiuguichii, ma' dajo tai'a quiyim na'laañi nqai'en ca qom. Ta'ta'a quiyim no'qaachiguilo qamiri queso Espíritu Santo.

Apocalipsis 21:6

Na' ime, ca 'naac caỹim: —Ná'ogue mashic ime. Ỹim ná'maq ỹim 'auaxaic chaqai spa'aatec. Ca cá'maq iuet ca laquip, ca' ñi'taxañigui ca ne'paxantashiguim huaxaỹaq chicqaugui da nca'laxa, qaca aca laseuete.

Apocalipsis 22:1

Ca' na'le, ca so piguim le'ec ỹachaxañim aso lachiugue co'teeta chicqaugui da nca'laxa; so le'ec huaxaỹaq richiichiguiñi, 'ec na chaañi, chicqau'a yi nqa'xanqa' ñi qota'olec chaqai so 'ec qagreta llaalec.

Apocalipsis 22:17

So Espíritu Santo chaqai aso loua so 'ec qagreta llaalec 'nerac: —Anaqui'. Chaqai cá'maq na'xaỹaxantac 'naac: —Anaqui'. Chaqai cá'maq ỹalauat ca laquip, chaqai ỹahotaque ne'et, ca' nanac, ca' ne'et quiyi huaxaỹaq chicqaugui da nca'laxa. Qaca nqohin aca laseuete.