Jeremías 7:9 - La'qaatqa ñi qota'olec Qota'olec & Qota'olec Novita Na Qomyipi

⁹ Ocachii, lauataxañii, niyiquiñii, se ipaguigui quena' 'ue da 'xachii, 'ỹaañiỹot na richiinaxanaxachii ñi nashiilec Baal, chaqai 'yiỹoto naua re'cootallii na 'naac qota'olqaipi sqa 'iỹapegueu'a.

Jeremías 7:9 Iomraidhean Croise

1 Reyes 18:21

Ca co'na'le, ca' so Elías nqo'neu'a sá'ogue so qomyipi, ca 'naaco': —¿Chi' laquio' 'xañiñi quiyim quiitalgoto naua dos ra'deenataxanaxagohi? No'm ñi qara'gaxala' chaqaiñi ñí'maq ỹaatqajam qota'olec, ca' quiitalec ñi'maxare; chaqai no'm ñi Baal, ca' chaqaiñi oquiitalec. Qam so qomyipi qaica ca ỹa'xat.

Éxodo 20:3

Sqaico' ca liỹa rashiilliguii, chaqaỹimeta.

Isaías 1:13

Totaxan nodohiuo ca rachitaxanataxanaxachii qaica ca 'negue; yamaqa'gue na lesalaxaripi na'maxare. Qamiri ỹaxañiu'oga quen na qomyipi quiyim ỹa'ue ca lemaqachic quiyi dalaxaic shiraigo chaqai yi na'xa'a co'mataxaqui, qam ỹim ỹaatqajam se yqo'ta na lemaqachic na qom ỹo'ueetetac na se no'uen.

Isaías 58:2

Naua'que na'xata' idaantaque aỹim, ca ỹa'maqachigui lauel ma' ỹa'den da ñayicyaxac, 'ec ca qom ỹo'ueetetac ca ỹa'maqachiguiñi chaqai 'ec quiyim se napacalgoto naua ilaataxanaxaco; ỹahotaque quiyim saanem ca 'maxaraic ỹaqataxac chaqai 'ue da netoonaxac ma' sqoỹoqaque caỹim.

Jeremías 1:16

Dajo dá'maq nouaxanaxaset so'uet ma'le sauaxat da lasauaxaset, ma' yalat ca'e aỹim na' copata'a na lichiinaxanaxat chaqai ỹa'dooto naua le'cootal na 'naac qota'olqaipi, chi lo'ueenatec yi'maxare.

Jeremías 19:4

Ma' na llaalqaipi so Israel ca'e aỹim, ca' ñigui quiyim 'ec ỹoqa'a najo 'laua; quenajo, ca ỹo'uet ca lichiinaxanaxat quena ỹoqa'a 'naac qota'olqaipi, qam se iuanapega, vire'ta so 'auaxaic leta'allipi chaqai na nashillipi quena Judá, ca no'xataxajlec quena leuoripi na qomyipi qaica ca lasauaxaset.

Jeremías 44:3

sauaxat dá'maq se no'uen ỹo'ueetetac. Ma' yo'ooqochit na' ỹa'deetacoto naua le'cootal na 'naac qota'olqaipi chaqai ỹaantacot na lichiinaxanaxat. Na'maxare nashiilqaipi, qam sqa taỹapegueu'a so qomyipi chaqai qamiri chaqai so 'auaxaic qataa'illipi.

Jeremías 44:8

¿Chi'negue ma' yo'ooqochichii quedá'maq ro'ueenataxanaxaguii chaqai 'viichii na richiinaxanaxachii quena ỹoqa'a qota'olqaipi quena Egipto ná'maq naguipegue' quiyim ñiỹa'ñi? Ca' quedajo, ca' viitaque cá'maq chi relauaxahi, ca' ñigui quiyim qamiri naloqojnaxanaxaqui' quiyim 'ue ca qaỹa'xat se no'uen queca qom chaqai qamiri ne'naqa quená'ogue na ỹoreta'oguit qomyipi quena 'laua.

Jeremías 44:9

¿Mashic shi'co' couahi'e dá'ogue dá'maq se no'uen ỹo'ueetetac na'le so 'auaxaic qataa'illipi chaqai ná'maq ỹo'uet na'le so nashillipi quiyi Judá, chaqai so louaaripi, chaqai qamiri, chaqai caná'maq rouahi ỹo'uet quiyi 'laua Judá chaqai quenaua nayico yi Jerusalén?

Jeremías 7:6

no'm sqai hualaxaiñiỹari' chiitegueñi na ỹoqa'a na chicqa'gue, na na'pelyipi chaqai ana pa'ỹellipi, chaqai no'm sqai lauachii na qom qaica ca lasauaxaset quenajo, chaqai no'm sqai 'yiỹoto naua re'cootallii ná'maq ỹoqa'a qota'olqaipi, ma' chaqaina ná'maq 'em nqa'viiñiteguelta',

Ezequiel 18:18

Ca' só'maq leta'a quiyim pataxasoxonaxai chaqai rocachi chaqai ỹo'uet dá'maq se no'uen queca lauo', ca' ileu chi nouaxanaxaset quecá'maq lasauaxaset.

Oseas 2:13

Sa'ue ma'le da nouaxanaxaset quesá'ogue so 'auaxaic na'xataripi na' ỹahotaque na lichiinaxanaxat quena lashiilqaipi, na' ỹa'ue na no'ueetaxat lichicshaqate chaqai ana lqola, ma' ỹahotaque queeta'pegue' ná'maq nqo'ta añi'maxare, ca' coua'e aỹim. Ỹim na'gaxala', se'taxajñi da ỹa'qaatec.

Amós 4:5

Ca vigaxachii na pan qaca aca lpe'taqate quiyim 'ỹaañiuo queda na'aachicyaxaguii, chaqai 'xachitac quená'ogue añi viỹaque rachitaxanataxanqachii, ma' chaqaida dá'maq viitaque qamiri. Ñi qara'gaxala' i'taxajñi da la'qaatec.

Malaquías 3:5

Ñi qara'gaxala' sqaica lqalanec 'neetasa' da la'qaatec: Ỹim semite' qamiri ma'le queda rasauaxashichii. Chaqai ỹim ná'maq seuanchigui ná'maq ỹoiquen ca liỹa, ná'maq lapaatapi'ñi' ana se loua, ná'maq nallitalta' quena' 'ue da ỹa'xat, qam se ipacqajñigui, ná'maq qa'viita'pegue na 'ueenataxanaxairipi chaqai ana pa'ỹe chaqai na na'pelyipi, chaqai ná'maq se ỹa'maxata'gue na ỹoqa'a ca chicqa'gue, chaqai ná'maq napaqueteguelec aỹim.

Romanos 2:2

Ma' qomi' sa'deenqata quiyim ñi qota'olec sqai ỹit quiyim nimit ca nasauaxaset, ca ỹovire'ta quiyim ỹo'uet ca nouaxanaxaset cá'maq ỹo'ueetetac cá'maq se no'uen.

Apocalipsis 21:8

Ca ná'maq qolonqaiquipi, chaqai ná'maq sqai huelgoto naua ỹa'qaatqa, chaqai ná'maq naqaigaxat, lauataxanaxaiquipi, chaqai na nedequenaxairipi, chaqai na 'naxanaxairipi, chaqai na nqouagaxaintacot na nashiilec nqolac, chaqai ná'ogue na 'maatqaiquipi, na'maxare tai'a nqohin quiyim qainaxañigui ca norec lodegaxat lavigaxat na quiquiaxaic. Ca' chaqaica ca co'uaataxanaxaic nelauaxa.

Apocalipsis 22:15

Qam no'ueenauec ma'le ná'maq ỹo'ueeteta'pe naua se no'viiñi, chaqai ná'maq ỹo'ueetetac ana le'naxanaxaqui, chaqai na nedequenaxairipi, chaqai na lauataxanaxairipi, chaqai ná'maq nqouagaxaintacot na nashiilec nqolac, chaqai ná'ogue ná'maq nqo'ta chaqai ỹo'ueetetac da na'maachic.