Génesis 22:17 - La'qaatqa ñi qota'olec Qota'olec & Qota'olec Novita Na Qomyipi

¹⁷ ỹaatqajam 'xoic ca iqouagaxa caqami' ma'le. Chaqai 'xoic nqaishin ma'le ca qachaalaxai'pi, 'nejem ana huaqajñi hueeto'ot na piguim; chaqai 'nejem na lo'uaxanaxa hueeto'oto naua lahil ana lachiugue. Chaqai ca'maxare sqaica lovi' nqai'en na npa'guenaxauaripi.

Génesis 22:17 Iomraidhean Croise

Génesis 12:2

Ca' queca qachaalaxai'pi, ca' sachigoxochichigui ca ni'ic lodegaxat; chaqai saanem qami' da iqouagaxa, chaqai so'uet quiyim qami' choxoraic ma'le, chaqai chicqochigui qami' ma'le ca la'maxa na liỹaripi.

Génesis 13:16

Ỹim ỹaatqajam 'xoic nqaishin ca'maxare, 'nejem na lamoxoỹaxa na 'laua. Ca 'nejem quiyim se qaishit qanaloqochin na namoxoỹaxa, ca' qai'neeta se qaishit qanaloqochin ma'le ca qachaalaxai'pi.

Génesis 15:5

Co'na'le, ca' ñi qara'gaxala' ỹauegueco' so Abram. Ca 'naaco': —Ỹaatqajam 'ajñite' na piguim, ca naloqochiñi' ana huaqajñi, no'm shichi' naloqojñi'. Ca chaqaica ỹorete' caua qachaalaxahi' ma'le.

Génesis 17:6

Ỹim so'uet ma'le quiyim 'xoic ca qachaalaxai'pi; chicqaugui ma'le qami' ca nashillipi chaqai na ỹoreta'oguit qomyipi.

Génesis 24:60

Ca' qoỹaanec da no'uen na'qaatec caso Rebeca, qohinaco': Qami' qarqaỹoole, ¡qami' late'e ma'le ca 'xoic qomyipi sqaica ishit naloqochin! ¡Chaqai ca qachaalaxai'pi loxonec ma'le na na'aateripi npa'guenaxauaipi!

Génesis 25:11

Ca co'na' mashic tot qaica so Abraham, ca' ñi qota'olec nqouaguegue so Isaac na' neeta'ñi yi seeque'ta yi na'ñi aso ni'ỹa leenaxat Ñí'maq nca'leetauec chaqai iuañiua'.

Génesis 26:24

Ca' queso pe, ca qanachaxana so'maxare quiñi qara'gaxala'. Ca 'naaco': Ỹim ná'maq ỹim qota'olec queso qataa'i' Abraham. Qaica ro'chiraque; ma' qami' iỹaatac. Ma' chicqochigui nqaishin so ilaatec Abraham, ca 'xoic da iqouagaxa ma'le caqami', chaqai 'xoic nqaishin ca qachaalaxai'pi.

Génesis 26:4

Ca' ỹaatqajam 'xoic nqaishin ma'le ca qachaalaxai'pi 'ec ana huaqajñi quena piguim, ca' saanem ma'le ná'ogue najo 'laua. Chaqai ná'ogue na ỹoreta'oguit qomyipi quena 'laua 'ue ma'le ca la'maxa chicqochigui ma'le ca qachaalaxai'pi.

Génesis 28:3

Ca' ñi qota'olec ñí'maq sqaica lqalanec nqouaguegue qami', chaqai ỹo'uet quiyim 'xoic ca qachaalaxai'pi, qaiyi chicqochigui qami' ca 'xoic ỹoreta'oguit qomyipi.

Génesis 28:4

Chaqai quiyim ỹaanem qami' chaqai ca qachaalaxai'pi qai'neeta ca lqouagaxa ỹachaxanem na'le so Abraham, qaiyi ralamaxarichii na 'laua senqatalec nagui, shinqatari' ca ỹoqa'a ca chicqa'gue, ma' ñi'maxare ỹachaxanapeguem quiyim ỹaanem so Abraham.

Génesis 32:12

Ma' qami' ỹaatqajam re'qoote'uegue na'le dá'maq 'ñirac quiyim no'ueenaxachi' ca ỹicyaxac, chaqai quiyim tot qaica ca naloqochin ca ỹaalqaipi, 'ec na lo'uaxanaxa quenaua lahil ana huaaxai.

Génesis 32:13

Ca' queso pe co'na' laq so Jacob quiyi'maxare, ca quená'maq hueeto'ot, ca' nca'a ca lqouagaxanaxat queso lopiichi Esaú:

2 Samuel 17:11

Ca' nagui, ca' saqata qami' quiyim lapooñireta' quet ná'ogue ná'maq ñaqa 'ue llaalqaipi so Israel quiyi Dan queda rapiguim, chi ỹovireta'a ná'maq neetalec yi Beerseba queda 'guiñi, ma' ỹaatqajam 'xoic 'nejem na lo'uaxanaxa hueeto'ot na lahi aso huaaxai, chaqai quiyim chaqaiqami' ná'maq qaỹa'guelec ma'le queca lauataq.

1 Reyes 4:20

Ỹaatqajam 'xoic na qomyipi neeta'ñi yi Judá chaqai yi Israel, tot qaishit qanaloqochin, 'nejem na lo'uaxanaxa hueeto'ot na lahi aso huaaxai. Chaqai ỹaatqajam 'xoic na na'ic chaqai na qani'chigui, chaqai 'xoic da na'maxa.

Miqueas 1:9

Ma' yi lcoñiraxa yi Samaria tot qaica nataren. Da nouaxanaxaset ỹovira'oga yi Judá chaqai qai'neeta sham ỹovira'oga yi Jerusalén, yí'maq na'a' lodegaxat neeta'ñi yí'maq ỹalamaxareteripi. (1.10-16 So npa'guenaxauaripi noquiiga'a yi Israel.)

Romanos 4:13

Ma' ñi qota'a ỹachaxan na'le dajo queso Abraham chaqai quena llaalqaipi quiyim qoỹaanem ma'le na 'laua quiyim lalamaxaret la'a'. Qam na' qaỹachaxanapeguem dajo so Abraham, mesqaida quiyim ỹo'ueetetaiquet dá'maq 'naac na naqataxaquipi, ta'ta'a quiyim 'ue da lpi'ỹaxac quiñi qota'olec. Ca' ñi'maxare icoñi'chiguit, ca ỹamata'gue lo'yaxanec ỹale.

Romanos 9:27

Qam quená'maq Israel llaalqaipi, ca' so Isaías 'naaco' na'le: “'Eno'm ỹaatqajam 'xoic na llaalqaipi so Israel, 'ec lecaata na lo'uaxanaxa cana huaaxai, qam sqo vito'olqai' ma'le caua no'ueendañi quiyim nca'lerec.

1 Corintios 15:57

Qalaxam nagui 'xoic da qana'aachic quiñi qota'a, ma' ỹaanema qomi' quiyim sauegaxanaq, chicqochigui nqai'en so qara'gaxala' Jesucristo.

Efesios 1:3

Semaqachinqatac ñi qota'a ñí'maq leta'a so qara'gaxala' Jesucristo, ma' mashic ña'daqatau'a so Cristo, ca' ñi'maxare ỹaanema qomi' ná'ogue ná'maq lqouagaxanaxat chicqo'ot nqai'en na piguim.

Deuteronomio 21:19

ca' caua leta'al ỹaueguera'a cá'maq letaxaỹaqa' na qo'xoiquipi neeta'ñi ca na'a'.

Hebreos 11:12

Ca so Abraham, 'eno'm mashic ipalata'a ca lqodoc aca lqauaxaqui, qam ỹovirau'a quiyim 'xoic so llaalqaipi, 'nejem ana huaqajñi neeto'ot na piguim, chaqai 'nejem na lo'uaxanaxa hueeto'oto naua lahil aso huaaxai, se qaishit qanaloqochin.

Hebreos 6:14

Ca 'naaco': “Ỹaatqajam llic chalego lecaic ma'le da ỹoqouagaxa caqami', chaqai 'xoic ca qachaalaxai'pi sa'ue ma'le.”

Apocalipsis 11:15

Ca' so pa'aatec quesaua siete nelaatqa piguim lase' pi'chigui aso lpe'te. Ca qara'xaỹaque so chalego lecaic nivillaxac queda piguim, 'naacsa': Da lo'ueenataxanaxac ná'ogue ná'maq ỹoiquentac na 'laua, chi ỹovireta'a quiyim lalamaxaret ñi qara'gaxala', chaqai so nela' nashi nca'laxaqui; ñi'maxare qaica lqodoc quiyim ỹoiquentac na'maxare.